Mitto Coye Doodhattohu Hiittoonniiti?

1. Qullaawu Maxaafi giddo kulloonni higguwa giddo mite hiikkuriiti? Tenne higguwara hajajamanke kaaꞌlitannonkehu hiittoonniiti?

YIHOWA Qaalisi Qullaawu Maxaafi widoonni batinye xabbe leeltanno hajajo uyinonke. Lawishshaho, isi saalimala, kaphu maganna magansiꞌra, mooranna dimba hoolino. (1 Qor. 6:9, 10) Qoleno Maganu Beetti Yesuusi Kiristoosi harunsaanosira aante noota kaajja hajajo uyino: “Hadhine gosa baala Annu, Beettunna Qullaawu Ayyaani suꞌminni cuuꞌinanni rosaanoꞌya assensa; hajajoommoꞌnere baala assitanno gede rosiissensa! Kuneeti, gobbate goofimarchi geeshsha ani kiꞌne ledo noommo.” (Mat. 28:19, 20) Ee, Maganu higgenna hajajo agarooshshe ikkitannonke! Maganu higgenna hajajora hajajama uminkera noonke ayirrinyi lexxanno gede assitanno; hattono fayyimmanke agadhatenna maatenke hagiirri lexxanno gede kaaꞌlitinonke. Baalunkunni roore, sabbakate looso loonseemmo gede kultannota woy wole Yihowa hajajo seekkine cuꞌmiranke iso hagiirsiinseemmonna atootesi afiꞌneemmo gede assitinonke.

2, 3. (a) Qullaawu Maxaafi heeshshonke giddo tuncu yaannonkehu mittu mittunku coyira higge aannonkekkihu mayiraati? (b) Konni birxichira hiikkuri xaꞌmuwa laꞌneemmo? (Hanafote noo misile lai.)

² Ikkollana, Qullaawu Maxaafi giddo assi woy assitooti yine hajanjoonnikkihu bacu coyi tuncu yaannonke. Lawishshaho, Qullaawa Borro giddo Kiristaanu ma gari uddano uddiꞌra hasiissannoro kultannoti xawinse kulloonni higge dino. Tini Yihowa hayyo leellishshannohu hiittoonniiti? Uddiꞌnanni gari mittu bayichinni wolu bayichiwiinni calla ikkikkinni yannate kiiro babbaxxanno. Qullaawu Maxaafi giddo uddiꞌratenna seesate daafira kultanno higge tittirre kulloommero tini higge yanna saꞌinota ikkitanno. Qoleno, qullaawu ayyaaninni borreessaminohu Maganu Qaali giddo Kiristaanu loosa hasiissannonsa looso, fayyimma agadhanno garanna hiikkonne boohaarsha boohaara hasiissannonsaro kultannoti batinye higge dino. Mittu mittunku manchi woy maatete umo ikkitinori tenne hajo lainohunni uminsa doorsha doodha dandiitanno.

³ Assi woy assitooti yitanno higge nookkihu heeshshonke ledo xaado afiꞌrino coyi tuncu yaankera dandaanno; ikkina tenne yannara doodhineemmo doorshi Yihowara didhiwannosi yaateni? Qullaawu Maxaafi higge diiga hoongoommohura calla doodhineemmo doorshi baalu iimi Annanke hagiirsiisanno yaateni? Assi woy assitooti yitanno higge uyinoonnikki coyi tuncu yaannonke yannara, Yihowa hagiirsiisanno doorshi hiikkonneetiro afa dandiineemmohu hiittoonniiti?

DOODHINEEMMORE QOROPHINE DOODHA HASIISSANNONKEHU MAYIRAATI?

4, 5. Doodhineemmo doorshi ninkeno wolootano gawajjara woy kaaꞌlara dandaannohu hiittoonniiti?

⁴ Mitu manni banxummoreno doodhinummoro qarru dino yee hedanno. Ikkollana, Yihowa hagiirsiisannoha dancha doorsha doodhate Qaalisi Qullaawu Maxaafi giddo noo higguwanna xintu seerubba seekke huwatanna harunsa hasiissannonke. Lawishshaho, Magano hagiirsiisate isi mundeete daafira uyino higge ledo sumuu yaannore assa hasiissannonke. (Kal. 9:4; Soq. 15:28, 29) Huuccatto Qullaawa Borro giddo noote xintu seerubbanna higguwa ledo sumuu yaanno doorsha doodhineemmo gede kaaꞌlitannonke.

⁵ Ayyaanaammittenke ledo xaado afiꞌrinoha shota ikkinokki doorsha doodhineemmo yanna heedhanno. Doodhineemmo doorshi baalu Yihowa ledo noonke fiixooma seekkara woy hunara dandaanno. Danchu doorshi Yihowa ledo noonke fiixooma kaajjishanno; bushu doorshi kayinni Yihowa ledo noonke fiixooma hunanno. Qoleno, gara ikkinokki doorshi wolu roduuwi gufiꞌrannonna koffi yaanno gede assara woy songote mittimma hunara dandaanno. Ee, doodhineemmo doorshi gawajjannoha woy kaaꞌlannoha ikkara dandaanno.—Roomu Sokka 14:19; Galatiyu Sokka 6:7 nabbawi.

6. Mitto doorsha doodhineemmo yannara maa heda hasiissannonke?

⁶ Qullaawu Maxaafi giddo assi woy assitooti yitanno hajajo nookki coyi tuncu yaannonke yannara maa assa hasiissannonke? Tenne yannara, doodhineemmore ninke baxisinonke daafira calla doodha agurre Yihowa hagiirsiisannonna isi atoote afiꞌneemmo gede assanno doorsha doodhate sharrama ninke faantaati.—Faarso 37:5 nabbawi.

YIHOWA MAA ASSINARA HASIꞌRANNORO AFA

7. Assi woy assitooti yitannoti Qullaawu Maxaafi higge nookki coyi tuncu yaannonke yannara Yihowa maa assinammora hasiꞌrannoro afa dandiineemmohu hiittoonniiti?

⁷ ‘Yihowa Qaalisi giddo asse woy assitinoonte yitanno hajajo uyinokki coyi tuncu yaannonke yannara iso hagiirsiisannori maatiro afa dandiineemmohu hiittoonniiti?’ yite hedattoha ikkara dandaanno. Efesooni Sokka 5:17, “Mootichu hedo maatiro wodanche” yitanno. Assi woy assitooti yitannoti Qullaawu Maxaafi higge nookki coyi tuncu yaannonke yannara Maganu hedo maatiro wodancha dandiineemmohu hiittoonniiti? Iso huucciꞌranna qullaawu ayyaanisi widoonni aannonke biddishsha harunsa tennera kaaꞌlitannonke.

8. Yesuusi Yihowa isi maa assara hasiꞌrannoro wodanchinohu hiittoonniiti? Lawishsha kuli.

⁸ Hanni Yesuusi Annisi isi maa assara hasiꞌrannoro wodanchinohu hiittoonniitiro hedi. Lawishshaho, Yesuusi lame babbaxxitino yannara huuccatto assire maalaletenni lowo manna itisino. (Mat. 14:17-20; 15:34-37) Ikkollana, Yesuusi halalla hudiꞌre heeꞌreenna Daawuloosi kinna daabbote qole soorranno gede kule fonqolisi yannara isi tenne assa giwino. (Maatewoosi 4:2-4 nabbawi.) Isi Annisi hedo seekke afino daafira kinna daabbote qole soorra hasiissannosikkita wodanchino. Ee, Yesuusi hatte yannara wolqasi umisi horora horoonsiꞌra Maganu fajjo ikkitinokkita huwatino. Yesuusi kinna daabbote qole soorra giwe Yihowa biddishshanna hasiisannosire aannosita addaxxannota leellishino.

9, 10. Dancha doorsha doodhate mayi kaaꞌlannonke? Lawishsha kuli.

⁹ Ninkeno Yesuusi gede dancha doorsha doodhate kaaꞌlanno biddishsha afiꞌrate Yihowa addaxxa hasiissannonke. Aane noohu Maganu Qaali ledo sumuu yine heeꞌra hasiꞌneemmo: “Woꞌmu wodanikkinni Kaaliiqa addaxxi ikkinnina, umikki egennora irkidhooti. Assattorira baalaho Magano albaanni qoꞌli; isino halaalaancho doogo kulannohe. ‘Ani egennaamoho’ yitooti. Kaaliiqa waajji; bunshetewiinni xooqi.” (Law. 3:5-7) Qullaawu Maxaafi xiinxallonni Yihowa hedo afa, mittu coyi tuncu yaannonke yannara Maganu maa assinammora hasiꞌrannoro wodanchate kaaꞌlitannonke. Yihowa hedo seekkine anfummoro wodaninke isi biddishsha harunsate albinni roore owaata ikkanno.—Hiz. 11:19.

¹⁰ Hanni tenne lawishshunni laꞌno; mitte mine assidhino mancho dikkidhanni noohu gede assite hedi. Ise mitto caamma lae hidha hasidhu; ikkollana hakku caammi waaga lowoho. Konnira, ise ‘kageeshshi woxe fushshummaro minaanniꞌya mayyaannoe?’ yite heddu. Ise minaannise ledose nookkiha ikkirono, konne caamma hidhituro mayi macciishshamannosiro affino. Ise tenne afa dandiitinohu hiittoonniiti? Ise minaannise ledo heedhanno daafira gari jajji noonsakkihura isi konne woxe anfi gede fushshinara hasiꞌrannokkita affino. Konnira hakkonne caamma hidhituro minaannisera mayi macciishshamannosiro wodanchitino. Hatteente gede, Yihowa hedonna doogo seekkine anfanni haꞌnummo kiiro, babbaxxino coyi tuncu yaannonke yannara iimi Anninke maa assinammora hasiꞌrannoro wodanchate dandoonke lexxitanno.

YIHOWA HEDO AFA DANDAATTOHU HIITTOONNIITI?

11. Qullaawa Maxaafa nabbambeemmo woy xiinxallineemmo yannara ninkeneeto hiikkuri xaꞌmuwa xaꞌma dandiineemmo? (“Qullaawa Maxaafa Xiinxallatto Yannara Ateneeto Togo Yite Xaꞌmi” yitanno saaxine lai.)

¹¹ Yihowa hedo afate hojju xiinxallo seekkine xiinxalla hasiissannonke. Maganu Qaale nabbambeemmo woy xiinxallineemmo yannara ninkeneeto togo yine xaꞌma dandiineemmo: ‘Kuni nabbawummo coyi Yihowa daafira, keeraancho doogosinna hedosi daafira maa buuxisannoe?’ Ninkerano faarsaanchu Daawitite gedee hedo hasiissannonke; isi togo yee faarsino: “Kaliiqaꞌya ballo, harumakki leellishie; doogokki rosiisie; ati gatisattoe Maganooti. Anino barra woꞌma ate hexxeemmo.” (Far. 25:4, 5) Mitte Qullaawu Maxaafi dhagge hiincatto yannara ateneeto togo yite xaꞌmi: ‘Konne coye maateꞌya giddo loosunni leellisha dandeemmohu hiittoonniiti? Konne nabbawoommore hiikko horoonsiꞌra dandeemmo? Mini giddo? Loosu bayicho? Rosu minenso, soqqameemmo yannara?’ Nabbamboommore hiikko loosunni leellisha dandiineemmoro anfummoro loosunni leellisha dandiineemmohu hiittoonniitiro afa shota ikkitannonke.

12. Qullaawu Maxaafi aana xintantino borruwankenna songote gambooshshinke babbaxxitino hajo daafira Yihowa hedo afate kaaꞌlannonkehu hiittoonniiti?

¹² Yihowa hedo roore afa dandiineemmoti wole doogo isi dirijjitesi widoonni aannonkeha Qullaawu Maxaafi aana xintamino biddishsha harunsate. Lawishshaho, Yihowa Farciꞌraasine Borro Xiinxallate Kaaꞌlitanno Birosherenna INTERNEETETE LAYIBIRERE uminke doorsha doodhineemmohu babbaxxino coyi tuncu yaannonke yannara tenne haja lainohunni Yihowa hedo wodancha dandiineemmo gara afate hende qixxeessinoonni. Kiristaanu gambooshshiwa seekke macciishshankenna dawaro qolankeno lowo geeshsha kaaꞌlitannonke. Hakkiicho rosiinsannire hiincanke Yihowa hedo albinni roore anfeemmonna harunsineemmo gede assitannonke. Yihowa qixxeessino qixxaawo seekkine horoonsiꞌne ayyaanaamittete sagale sagaꞌlanke doogosi albinni roore anfanni haꞌneemmo gede kaaꞌlitannonke. Hatto assinummoro baxillaanchu Maganinkewiinni atoote afiꞌneemmo gede assanno doorsha doodhineemmo.

DOODHITINANNI DOORSHI YIHOWA HEDO LEDO SUMUU YAANNO GEDE ASSIDHE

13. Yihowa hedo anfummoro dancha doorsha doodhineemmota leellishanno lawishsha kuli.

¹³ Hanni Yihowa hedo afa dancha doorsha doodhineemmo gede kaaꞌlitannonkehu hiittoonniitiro leellishanno lawishsha laꞌno. Maganu Mangiste halashshaano ikkinoommohura woꞌma yanna suwisaano ikka hasiꞌneemmoha ikkara dandaanno. Tennera, heeshshonke bikkunnita assiꞌra hananfeemmo. Ikkirono, maalaamittete coyi albi geeshsha ikka hooganno wote hagiidha hoongeemmo yine yaandeemmoha ikkara dandaanno. Qullaawu Maxaafi giddo suwisaano ikke yitanno higge dino; hakko daafira halashshaano ikkine Yihowara ammanamme soqqammanni heeꞌra dandiineemmo. Ikkirono, Yesuusi Maganu Gashshootira yite uminsa horo agurtannori lowo atoote afidhannota buuxisino. (Luqaasi 18:29, 30 nabbawi.) Qoleno Qullaawa Borro ‘banxe uyiꞌneemmoti galatu kakkalonna’ addu magansiꞌra halashshate assineemmori baalu Yihowa hagiirsiisannota kultannonke. (Far. 119:108; 2 Qor. 9:7) Tenne Qullaawa Borro giddo noo hedo nabbambenna biddishsha afiꞌrate huuccatto assiꞌne Yihowa hedo wodancha didandiineemmo? Tenne hedo hiincanke ninkerano kaaꞌlannohanna iimi Anninkewiinni atoote afiꞌneemmo gede assanno doorsha doodhate kaaꞌlitannonke.

14. Uddiꞌratto uddano doodhatto gari Yihowa hagiirsiisannoronna teꞌee afa dandaattohu hiittoonniiti?

¹⁴ Hanni wole lawishsha laꞌno: Songote giddo mito roduuwa hagiirsiisa hooggara dandiitanno uddano baxisinohehu gede assite hedi. Qullaawu Maxaafi giddo konni garinni uddidhinoonte yitanno higge dino. Tenne hajo daafira Yihowara mayi macciishshamannosi? Hawaariya Phaawuloosi tenne lainohunni ayyaanunni togo yee amaalino: “Meentuno umo biifisire, culka woy irra woy lowo woxinni hirranni imaana uddiratenni seesa agure, arshimmatenninna kawajjotenni seesona. Magano magansiꞌneemmo yaanno meenti dancha looso loosatenni seesona.” (1 Xim. 2:9, 10) Tini amaale Kiristaanu labballino harunsa hasiissannote. Yihowara ammanamme soqqammeemmore ikkinoommohura, ninke injo daafira calla heda agurre uddiꞌneemmonna seenseemmo gari wole manna kaaꞌlanno woy gawajjanno gara heda hasiissannonke. Bikkunnire ikkankenna baxillu, ammanate roduuwinkera mayi macciishshamannonsa yine hendeemmo gede kakkayisannonke; tini hagiirrinsa baꞌꞌannokkinna koffi yitannokki gede assitanno. (1 Qor. 10:23, 24; Fil. 3:17) Tenne hajo daafira Qullaawa Borro mayitanno yine hedanke, Yihowa hedo wodanchatenna iso hagiirsiisanno doorsha doodhate kaaꞌlitannonke.

15, 16. (a) Maaeelare ganyine hendeemmoha ikkiro Yihowara mayi macciishshamannosi? (b) Boohaarsha doodhineemmo yannara Yihowa hagiirsiisannore afa dandiineemmohu hiittoonniiti? (c) Shota ikkinokki doorsha ma garinni doodha hasiissannonke?

¹⁵ Qullaawu Maxaafi Yihowa mannu bunshete doogo haꞌra hanafinna “wodaninsa hedonna yortonsa duuchanka wote horonta busha” ikkitu yannara dadillinota kulannonke. (Kalaqama 6:5, 6 nabbawi.) Konnira, siimu xaadire jawaawurra Qullaawa Borro giddo assitinoonte yine kulloonnihu kabbaade cubbi widira qolte massitannonkehuranna Yihowa hedo ledo sumuu yitannokkihura tini gara ikkitinokkita wodanchineemmo. Rosaanchu Yaiqoobi togo yee borreessino: “Gordu egenno . . . umonni xalalate. Qolteno keere baxxannote, gaꞌlabbittete, owaatate, sao agurtannote, danchu gumi giddo woꞌminote, godowa hosanna awaawurshu nookkite.” (Yai. 3:17) Tenne Qullaawa Borro hedo harunsine giddonke gara ikkitinokki hedonna yorto kalaqantanno gede assanno boohaarsha giwa hasiissannonke. Yihowa hedo wodanchino Kiristaani Maganu giwannore amadino maxaafa nabbawanni, filme laꞌꞌanninna godoꞌle godoꞌlanni boohaara hasiissannosironna teꞌee afate wole manna dixaꞌmanno. Togoo hajo lainohunni Yihowa hedosi Qaalisi giddo xawise kulino.

¹⁶ Mitto doorsha Yihowa hagiirsiisanno garinni babbaxxitino doogga horoonsiꞌne doodha dandiineemmo. Shota ikkinokki doorsha doodhineemmo yannara kayinni songote cimeeyye woy wole gikki yiino Kiristaana amaaꞌla hasiissanno woti no. (Tit. 2:3-5; Yai. 5:13-15) Ikkollana, mitto doorsha wolu manni doorankera wodha digaraho. Kiristaanu tiiansa qajeelsiꞌranna danchanna busha bade afate dandoonsa horoonsiꞌra hasiissannonsa. (Ibi. 5:14) Ninke baalinke Phaawuloosi ayyaanunni amaalino amaale ledo sumuu yine heeꞌra hasiissannonke; isi togo yiino: “Mittu mittunku umisi duha duqqa hasiissannosi.”—Gal. 6:5.

17. Yihowa hagiirsiisanno doorsha doodha kaaꞌlitannonkehu hiittoonniiti?

¹⁷ Doorsha doodhineemmohu Yihowa hedo garinni ikkiro isiwa albinni roore shinqeemmo. (Yai. 4:8) Qoleno iso hagiirsiinseemmo, hattono atootesi afiꞌneemmo. Tini qolte iimi Anninkera noonke ammana jawaattanno gede assitanno. Konnira, mitte hajo daafira Yihowa hedo afate kaaꞌlitannonkehura isi higguwanna seerubba seekkine hendo. Yihowa daafira ronse gundeemmokkiti egennantinote. (Iyo. 26:14) Ikkollana, isi hedo afate sharrammummoro xa nafa dancha doorsha doodhate hasiissanno hayyo, egennonna wodancha afiꞌneemmo. (Law. 2:1-5) Guuntete xeꞌne noonsate mannu ooso hedonna fushshidhanno somi soorramanno; Maganu kayinni horonta disoorramanno; isinni faarsaanchu togo yiino: “Isi [Maganu] mali kayinni hegerera heeꞌranno. Wodanisi hedono beettu beettira saꞌanno.” (Far. 33:11) Ee, hendeemmorinna assineemmori hayyichu Magani Yihowa hedo ledo sumuu yaannoha ikkiro dancha doorsha doodha dandiineemmo.