“Mangistekki Daggo” Mamaro?

1, 2. (a) Mito wote ballinoommohu gede ikkineemmohu mayiraati? (b) Maganu Mangistere maa anfoommo?

MANNU mito wote mittu coyi ikkanna laihu gedensaanni mayi ikkinoro qaage xawise kula hoogannota huwatoottoha ikkara dandaanno. Mittu manchira akimichu xibbasi marammare kae mayi amadinosiro kulisihu gedensaanni mayinosiro baꞌꞌasira dandaanno. Woy mittu manchira makifachu woy maxanxare albasiinni heedhenni leella hooggasira dandiitanno. Togoori ikkannohu mayiraati? Xiinxallaano, mitte hinge duucha coye assate woꞌnaalleemmo wote ballinoommohu gede ikkineemmota xawissino. Surrenke mitte higge mitto coye calla seekkite hixamanyitannoha lawanno.

² Yannankera lowo manni alamete aana ikkanni noori mayira ikkannoro huwata hooge ballinohu gede ikkino. Kuni manni alame 1914 kawa lowo geeshsha soorrantinota ammanannoha ikkirono, kuri coyibba ikkitannohu mayiraatiro kayinni dileellannonsa. Ninke Qullaawu Maxaafi rosaano ikkinoommo daafira, Yesuusi 1914⁠nni iima Nugusa ikki wote Maganu Mangiste dagginota anfoommo. Ikkollana, “Mangistekki daggo. Fajjokki iima ikkitanni noo gede, uullano ikkito” yine huucciꞌneemmo huuccattora woꞌma dawaro diafiꞌnoommo. (Mat. 6:10.) Tini huuccatto woꞌma dawaro afidhannohu, tini busha alame baꞌanno woteeti. Maganu fajjo iima ikkitanni noonte gede uullano ikkitannohu hakka woteeti.

3. Maganu Qaale xiinxallanke maaho kaaꞌlitinonke?

³ Maganu Qaale ganyine xiinxallineemmo daafira, yannankera addi addi masaalo woꞌmitanni noota anfoommo. Tini rooriidi manniwiinni baxxinoommore assitannonke! Rooru manni uminsa heeshshoranna dilgonsara lowo geeshsha jaatanaawanno daafira, Kiristoosi 1914⁠nni jammare moohinotanna muli yanna giddo firde haare daannota dihuwatino. Ateneeto togo yite xaꞌmi: ‘Alamete goofimarchi lowo geeshsha gambise dayinotanna uullate aana noo ikkito tenne leellishshannota alba ammaneemmo geeshsha ammaneemmo?’ Yihowa Farciꞌraasincho ikkoottohu muli yanna giddo ikkiro nafa, heeshshokki mayi aana illachishshinote? Dawarokki ikkitutano ikkituro, hanni muli yanna giddo Maganu fajjo gudisidhe uullate aana ikkitanno yineemmo gede assannonkeha sase coye laꞌno.

FARADAASINE FULTE LEELTINO

4, 5. (a) Yesuusi 1914⁠nni jammare ma assanni no? (Umi misile lai.) (b) Farado guluffinori sase faradaasine maa riqibbanno? Tini masaalo woꞌmitanni noohu hiittoonniiti?

⁴ Waajjo farashsho gulufino gede assine kulloonnihu Yesuusi Kiristoosi, 1914⁠nni iimi zawude adhino yaano moohino. Isi Nugusa ikkanni heeꞌrenni, Sheexaanunnita busha alame qeelate hadaraasa jammarino. (Ajuuja 6:1, 2 nabbawi.) Ajuuja fooliishsho 6⁠te noo masaalo, Maganu Mangiste gashsha jammartanno wote, hakkawontenni alame lowonta bushshannota kultino. Tenne masaalo garinni, olu, hude, dhibbunna reyo abbitannoti wole coyibba wole yannanni roore batidhanno. Masaalote aana farado guluffe Yesuusi Kiristoosi hoode hadaraassanni noo faradaasine, konne baala qarranna adaga riqibbannoreeti.—Aju. 6:3-8.

⁵ Addi addi gobbuwa alamete aana salaame heedhanno gede buusante loosate sheemaate eꞌannoha ikkirono, alba masaalloonni garinni olu ‘salaame uullate aaninni haare hoolino.’ Umihu Alamete Oli, uullate aaninni salaame haare hoolinohura batinyu olira hanafote. Alamete aana 1914 kawa miinjunna sayinsete lopho nooha ikkirono, sagalete anje xaano alame yaachisha diagurtino. Qoleno, diru baala dhibbu, kalaqamu danonna wolu adagi lowo miliyoone ikkanno manna xoqolanni noota kaadannohu ayi no? Tini ikkituwa konni albaanni ikke egenninokki deerrinni manna gawajjitanni no, ganyite ikkitanni no, hattono lowo manna guddanni no. Tini coyibba mayi tiro afidhinoro huwatootto?

6. Qullaawu Maxaafi masaalo woꞌmitanni noota huwattinori ayeooti? Insa tenne affuti ma assitu?

⁶ Umihu Alamete Oli kaitanna furu dhibbi jammarita lowo mannira hedonsa bebbeehantino. Ikkollana buuramino Kiristaani, Dagate Diri woy “wossanaminohu dagate diri” 1914⁠nni goofannota quqquxame agadhe no. (Luq. 21:24) Kuni Kiristaani mayi ikkannoro gudise diafino. Ikkirono, 1914⁠nni Maganu Mangiste ledo xaado afiꞌrinohu baxxino coyi ikkannota huwatino. Insa Qullaawu Maxaafi masaalo woꞌmitinota huwattuti, Maganu gashshooti jammarinota hakkawontenni mittoreno waajjitukki mannaho duduwa jammartu. Tenne sokka duduwa jammartuta mannu lowo geeshsha taqaawwaminonsa. Mannu insa taqaawwamansa umise masaalo woꞌmitanno gede assitino. Hakkuyi kawa lowo diro Maganu Mangiste diinna ‘higge irkidhe’ sabbakate looso uurrisate woꞌnaaltino; qoleno, finqille kayissino, woy roduuwanke usuratenna shaate geeshsha iillitino.—Far. 94:20; Aju. 12:15.

7. Rooru manni alamete aana ikkanni noori mayira ikkannoro huwatinokkihu mayiraati?

⁷ Maganu Mangiste iima gashshitanni noota leellishshannoti lowo taje heedheenna, rooru manni huwatannokkihu mayiraati? Maganu daga lowo diro dudubbanni keeshshitinoti Qullaawu Maxaafi masaalo woꞌmitanni noota alamete ikkito seekkite leellishshanni nooti mannaho leella gibbinohu mayiraati? Kuni manni illensara leellannore calla laꞌꞌannokka? (2 Qor. 5:7) Maganu loosanni noore laꞌꞌa hooginohu uminsa dilgo saarte amaddinonsa daafiraatikka? (Mat. 24:37-39) Mitu manni hedo bebbeehantinohu Sheexaanu alame totainniitikka? (2 Qor. 4:4) Maganu Mangiste assitanni noore huwatate ammananna ayyaanaamitte wodancha hasiissanno. Ayyaanu illenke ballitinokki daafira lowonta tashshi yiinonke!

BUNSHE LEXXITANNI HADHINO

8-10. (a) Layinki Ximootewosi 3:1-5 noo masaalo woꞌmitanni noohu hiittoonniiti? (b) Bunshe lowo geeshsha lexxitanni hadhino yineemmohu mayiraati?

⁸ Maganu Mangiste muli yanna giddo uulla gashshitanno yineemmo gede assannonkehu layinki coyi no, hakkuno: alamete aana bunshe albinni roore batidhanni haꞌraseeti. Layinki Ximootewosi 3:1-5 noo masaalo woꞌma jammartunku mitu xibbuu diri saino. Tenne xiqisera kulloonnihu mannu akati alame woꞌmate aana halaꞌlanni no. Ati togoori ikkanna dilaootto? Hanni tennera boode lawishsha laꞌno.—2 Ximootewosi 3:1, 13 nabbawi.

⁹ Hanni 1940 woy 1950 balla mannaho biso shorodhi assanno coyenna xa loosu bayicho, boohaarshu giddo, hattono ispoortenniwa ikkannore, woy faashinete yinannire heewisiisse lai. Base baalate finqillenna amanyootu maaeelle woꞌmitino. Mannootu xa wolu manninni roore kaajjado, finqilanna amanyoote baꞌinore ikkite leella hasidhanno. Biꞌre 1950 balla bushate yinannita televizhiinete pirogiraame, xa maatete dancha boohaarsha ikkitino gede assine laꞌnanni. Labbaahu labbaahu ledo, woy meyaati meyaate ledo foortannori boohaarshanna faashine maaeelsitino gari lowo mannira goꞌlinore diꞌꞌikkino; qoleno togoo fooraasine busha akatansa faajjete halashshitanni no. Maganu galatamona, ninke togoo coyibba isi ma garinni laꞌꞌannoro anfoommo!—Yihuda 14, 15 nabbawi.

¹⁰ Qoleno bashsho ooso finqiltu yinannihu ma assiturootironna xaa ooso assitanni noore heewisiisi. Lawishshaho, 1950 balla ooso sijaara woy ago agguro, woy gariweelo sirbituro anninsanna amansa cannaqantanno. Xa kayinni aante noote gedeeta macca gibbanno odoo macciishsha rosante agurtino: 15 diri rosaanchi kifilete ledosi rossanno oosora aanaho massaara tokkose 2 ooso shii, 13 kayinni madiissi. Dimbitinoti ajuulle ooso gamba yite honsu diri qaaqqo hili mararro nookkiha shite, annasenna fiixise beetto kayinni gante goddaassu. Mitte rippoorte kultanno garinni, mitte Iisiyu gobbara saihu tonnu diri giddo loosantino jaddo giddo darate ikkitannota loossinori wedellaho. Xa yanna lowo geeshsha bushshino yiniro kaadannohu heeꞌranno?

11. Lowo manni alame bushshanni hadhinota huwatannokkihu mayiraati?

¹¹ Hawaariya Pheexiroosi togo yaasi garankolla: “Goofimarchu diro uminsa yorto harunsitanni haariintanno haariimaasine dagganno; insa, ‘Dayeemmo yiihu hanni hiikko nooyya? Biꞌre annuwanke reyituhunni jammare, baalunkuri kalaqote hanafonni kayise noo gedeennilla heeꞌranno’ yitanno.” (2 Phe. 3:3, 4) Mitu manni togo yaannohu mayiraati? Roore wote mitto coye duuchaange laꞌnummo kiiro, hakko coye ronseemmo daafira maano dilawannonke. Mittu muli jaalinke akati anga iima soorramanno wote lowonta masisankera dandaanno. Dagoomu akati sunu sununni maaeelanni haꞌrannoha ikkiro kayinni, hakkeyi geeshsha wodancha hoongammora dandiineemmo. Ikkirono, togoo maaeelle busha ikkase gattinokki daafira ajishe laꞌꞌa dihasiissannonke.

12, 13. (a) Alamete ikkitonni hexxo mudha hasiissannonkekkihu mayiraati? (b) “Dandee heeꞌrate qarrissannote” tenne goofimarchu barruwa giddo kaajje heeꞌrate mayi kaaꞌlannonke?

¹² Hawaariya Phaawuloosi “goofimarchu barri dandee heeꞌrate qarrisannoha” ikkannota coyiꞌrino. (2 Xim. 3:1) Ikkirono dandiine heeꞌne dianfanni yaa diꞌꞌikkino; hakko daafira alametewiinni maaxamme heeꞌra dihasiissannonke. Yihowa, ayyaanisi hattono Kiristaanu songo kaaꞌlitannonke daafira, dadillisannonke woy waajjishannonke coye baala qeela dandiineemmo. Ammanammoommore ikkine heeꞌra dandiineemmo. Maganu “rosantinotenni aleenni ikkitino wolqa” aannonke.—2 Qor. 4:7-10.

¹³ Phaawuloosi goofimarchu barrire xawissanno masaalo kula jammari wote, “tenne afi” yiinota wodanchi. Hatto yaasi, aanche coyiꞌrino masaalo woꞌmase gattannokkita leellishshanno. Yihowa goofimarcho abba geeshsha tini alame horo bushshanni hadhannoti dihuluullissannote. Xaggete xiinxallaano, amanyootu lowo geeshsha maaeelinohu mitu dagoomi woy daga baꞌinota borreessitino. Amanyootu alame woꞌmate aana xa ikkino gede ikke bae kayinni diegennino. Lowo mannira tini maano lawa hooggansara dandiitanno; ikkirono, 1914 kawa ikkitanni noo coyibba Maganu Mangiste muli yanna giddo bunshe gudisse huntannota ammanneemmo gede assitannonke.

TINI ILAMA DISAꞌANNO

14-16. Maganu Mangiste muli yanna giddo ‘dagganno’ yineemmo gede assannonkehu sayikki korkaati hiikkoyeti?

¹⁴ Goofimarchu gambise dayino yineemmo gede assannonkehu sayikki coyino no. Maganu daga xagge tenne leellishshanno. Lawishshaho Maganu Mangiste iima kalaqantara albaanni, mitte ammanaminoha buuramino Kiristaana amaddino gaamo Maganoho soqqantanni no. Insa 1914⁠nni ikkanno yite agadhitino coyibba giddo gamu ikkikki gati yannara ma assitino? Insa giddo rooriidi Yihowara ammanante soqqantanni heedhino; hattono fatananna mannu taqaawwamannonsata dandiite heedhino. Konni buuramino Kiristaani giddo rooriidi, reyote geeshsha ammanante heedhino.

¹⁵ Yesuusi Sheexaanu alame goofimarchire kultanno masaalo coyiꞌri wote togo yiino: “Kuni baalunku coyi ikka geeshsha tini ilama horo disaꞌanno.” (Maatewoosi 24:33-35 nabbawi.) Yesuusi koye “tini ilama” yiiti lame buuramino Kiristaani gaamo amaddinote. Umi gaamo 1914⁠nni noote; tini gaamo Kiristoosi hakko diro Nugusa ikke gashsha jammarinota huwattino. Tenne gaamo wido ikkitinori 1914⁠nni lubbote noore calla ikkitukki, Maganu ooso ikkitara hakko diro woy hakkuyira albaanni ayyaanunni buurantinoreeti.—Rom. 8:14-17.

¹⁶ “Tini ilama” amaddinoti layinki gaamo qolte, umi gaamo ledo mitte woggara heedhino buuramaasineeti. Tenne gaamo wido ikkitinori umi gaamo miilla uullate aana noo wote lubbote noore calla ikkitukki, hatte yannara qullaawu ayyaaninni buurantinoreeti. Hakko daafira, xa noohu buuramino Kiristaani baalunku Yesuusi yiite ‘tenne ilama’ widira gaamamanno yaa diꞌꞌikkino. Xa tenne layinki gaamo wido ikkitino buuramaasine uminsa geedhitanni no. Yesuusi Maatewoosi 24:34 aana coyiꞌrino qaali kayinni, ajayi ajeenna ‘tenne ilama’ wido ikkitinori shiima buuramaasine bayiru qarri jammaranna laꞌukki ‘horo saꞌannokkita’ ammanneemmo gede assannonke. Kunino, Maganu Mangiste dagge bushuulle hunatenna keeraancho alame abbate gattino yanna hilite yine ammanneemmo gede assannonke.—2 Phe. 3:13.

KIRISTOOSI MULI YANNA GIDDO QEELLE GUDISE ADHANNO

17. Kageeshsha laꞌnummo taje maa huwanteemmo gede kaaꞌlitannonke?

¹⁷ Kageeshsha laꞌnoommo taje maa huwanteemmo gede assitannonke? Yesuusi qorowisiisinonte gede, goofimarchu barra woy saate bande dianfoommo. (Mat. 24:36; 25:13) Ikkollana Phaawuloosi yiinonte gede, hattee “wogga” anfoommo. (Roomu Sokka 13:11 nabbawi.) Tini heeꞌnoommoti hattee woggaati. Qullaawu Maxaafi masaalonna Maganu Yihowanna Yesuusi Kiristoosi assitanni noore hixamanyine harunsineemmoha ikkiro, tenne busha alame goofimarchi gambise dayinota leellishshanno taje waraꞌa yite leeltannonke.

18. Maganu Mangiste maahoyye yite adhitannokkiri ma ikkitanno?

¹⁸ Qeelle adhinohuranna waajjo farashsho gulufinohura Yesuusi Kiristoosira uyinoonnita lowo silxaane ammante adha gibbannori, muli yanna giddo sodhinota ammante adhansa digattanno. Hakkawote fultanno faro diheedhannonsa. Hatte yannara lowo manni shabbarame togo yaanno: “Ayi uurre afanno?” (Aju. 6:15-17) Aante nooti Ajuujate maxaafi fooliishsho tennera dawaro qoltanno. Buuramaasinenna uulla ragiꞌrate hexxo noonsari Magano hagiirsiissino daafira ‘uurritanno.’ Hakkiinnino wolu geꞌreewi wido ikkinohu “batinyu manni” bayira qarra lulluqqe saꞌꞌanno.—Aju. 7:9, 13-15.

19. Goofimarchu gambise dayinota huluullamattokki daafira, mayi ikkanna laꞌꞌate quqquxamatto?

¹⁹ Yannankera woꞌmitanni noota Qullaawu Maxaafi masaalo hixamanyine harunsa agurreemmokkiha ikkiro, Sheexaanu alame kashaarsitannori hedonke dibebbeehanno, hattono alamete ikkito afidhino tiro laꞌanno illenke diballitanno. Kiristoosi muli yanna giddo qeelle gudise adhanno, hattono xalalu Armagedooni olinni tenne busha alame hunanno. (Aju. 19:11, 19-21) Hakkuyi gedensaanni hiitto hagiidhineemmoro hanni hedi!—Aju. 20:1-3, 6; 21:3, 4.