Yannankera Noo Manni Ikkitonna Akati Daafira Qullaawu Maxaafi Giddo Masaalloonnini?

Qullaawu Maxaafi mayyaanno?

Ee, yannankera rooru manni albinni roore bushannota Qullaawu Maxaafi giddo balanxe masaalloonni. Qoleno rooriidi manni amanyootu seera ayirrisannokkitanna dagoomu sumuu yee galanno gede kaaꞌlitanno wodho adhannokkita masaalloonni.a (2 Ximootewoosi 3:1-5) Ikkollana Qullaawu Maxaafi giddo, togoo maaeelle giddora eannokki manni heeꞌrannotano himannoonni. Maganu kaaꞌlonni, kuni manni bushu manni faale haꞌrantenni Maganu hedo gede ikke heeꞌrate sharramanno.—Isayaasi 2:2, 3.

Konni birxichira

• Qullaawu Maxaafi giddo, yannankera mannu ikkitonna akati hiittooha ikkanno yine masaalloonni?

• Umonsa baxanno manni assannori wole manna gawajjannohu hiittoonniiti?

• Mannu bunshete togo umu maala ikkinohu mayiraati?

• Mannunniha busha akata laꞌneemmo woyite hiitto ikka hasiissannonke?

• Mannu baalunku anganni fulakka?

• Dagoomu gudisiꞌre maaeeleenna alame gudisante kande amandayiwa baꞌakka?

Qullaawu Maxaafi giddo, yannankera mannu ikkitonna akati hiittooha ikkanno yine masaalloonni?

Qullaawu Maxaafi giddo, rooru manni leellishannoha addi addiha busha akatanna assoote xawinsoonni; konni baalu akatiranna assootira koru umo baxate. Mannu “umosi qeeꞌlinokkiha,” “umosi baxannoha,” hattono “Maganunni roorse qiniitesi baxannoha ikkanno.”—2 Ximootewoosi 3:2-4.

Balanxe masaalloonninte gede, xaa yannara batinyu manni uminsa daafira calla hedanno, uminsa qiniite calla laꞌꞌanno, insa hagiirsiisannore calla hasiꞌranno, uminsa heeshsho seekkannore calla hedanno. Qoleno togoo akati roore lexxannilla haꞌranni no. Batinyu manni uminsa daafira quwa sae hedanno daafira, “danchumma giwannoha” ikkino; yaano dancha akatta baxa dandaannokkiha ikkino. “Galata afiꞌrinokkiha” ikkino daafira, noonsa coyira woy wolu manni assinonsarira galata hasiissannoe yee dihedanno.

Umo baxa yannankera batinyu manni leellishannoti wole akattano heedhanno gede assitino:

• Hafuurre. Batinyu manni ‘woxe baxannoho.’ Togoo manni heeshshonsa injo bikkannohu afiꞌranno woxi woy noonsa jajji deerrinniiti.—2 Ximootewoosi 3:2.

• Naaxxa. Duuchu manni ‘naaxxaleessaho,’ ‘booꞌnaleessaho,’ hattono ‘booꞌnatenni ufuufaminoho.’ (2 Ximootewoosi 3:2, 4) Togoo manni insaneeto ale kayisanno; hattono dandoonsa, akatansa woy jironsa kule naaxxanno.

• Suꞌma huna. Xaa yannara ‘xonamaano’ hattono ‘hemaano’ batidhino. (2 Ximootewoosi 3:2, 3) Tini qaalla manna woy Magano xonanno manna woy insa daafira nookkire coyiꞌranno manna kultannote.

• Mokkookka. Xaa yannara batinyu manni ‘qullaawa heeshsho afiꞌrinokkiho,’ ‘araara giwannoho,’ ‘yiinowa hosannokkihonna’ ‘muddamaasinchoho.’ (2 Ximootewoosi 3:2-4) Duuchu manni togoo akatta noonsa daafira, hasaawe afoo xaadate woy amaalame mala abbate sumuu diyaanno; qoleno, eino sheemaate diayirrisanno.

• Urungicha. Yannankera batinyu manni “mararro afiꞌrinokkiha” ikkino daafira, mulenni hanqanno. Konni garinni hanqe kaꞌꞌanno woyite, biso shorodhi assannore woy mararro nookki coye assanno.—2 Ximootewoosi 3:3.

• Seerimale ikka. Yesuusi yannankera ‘bunshe batidhannota’ masaalino. (Maatewoosi 24:12) Isi duucha bayicho ‘luulu’ heeꞌrannotano himanino.—Luqaasi 21:9.

• Mini manna baxa hooga. Lowo manni “iltinonsarira hajajamannokkiha” hattono “baxillu nookkiha” ikkino daafira, mininsa manna ditowaatanno, beebba assiꞌranno, hattono wolqatenni gawajjanno.—2 Ximootewoosi 3:2, 3.

• Lawisiisa. Albita hendiro xaa yannara lowo manni “Magano magansiꞌrannoha lawanno.” (2 Ximootewoosi 3:5) Kuni manni Maganu fajjo wonshantenni maccansara coommannore kultannore ammaꞌnote murroota harunsanno.—2 Ximootewoosi 4:3, 4.

Umonsa baxanno manni assannori wole manna gawajjannohu hiittoonniiti?

Batinyu manni umonsa baxannoha ikkansa, albinni roore lowo manni baasa xissamannonna rakkaawanno gede assitino. (Rosiisaancho 7:7) Lawishshaho, woxe baxxannori woxeho yite wole manna miiccanno. Baxillu nookki manni mininsa manna gawajjara dandaanno; hatti qolte gawajjamino manchi yaadaameessa ikkanno gede woy isonooto shaate kaꞌꞌanno gede assitara dandiitanno. Qoleno ammaꞌnitino manni kaadinonsari seeda yanna baasa xissiisidhara dandiitanno.

Mannu bunshete togo umu maala ikkinohu mayiraati?

Qullaawu Maxaafi, mannu bunshete widira hige tuqqinohu mayiraatiro xawise kulanno:

• Mannaho Maganohonna olliichoho noonsa baxilli qiidino. (Maatewoosi 24:12) Konni daafira, umo baxa roore lexxitanni no.

• Sheexaanu Daawuloosi gordunni uullara tungeenna koye baattote qooxeessira no. (Yohaannisi Ajuuja 12:9, 12) Isi uullara tugaminku, alamete aana mannu roore bushanno gede assino.—1 Yohaannisi 5:19.

Mannunniha busha akata laꞌneemmo woyite hiitto ikka hasiissannonke?

Maganu Qaali, “Hattoo manniwiinni xooqi” yaanno. (2 Ximootewoosi 3:5) Hatto yaa hige dagoomu giddonni fulle baxxine heeꞌneemmo yaa diꞌꞌikkitino. Hatteentenni, umonsa calla baxxannorenna seerimale heeshsho heedhannore muli jaallanke ikkitara diwodhineemmo yaate.—Yaiqoobi 4:4.

Mannu baalunku anganni fulakka?

Deeꞌni. Qullaawu Maxaafi giddo himannoonni garinni, “assinoonnihu tiyyiꞌnanni coyinni kainohunni, lowo geeshsha yaade [dadillanno]” manni no. (Hiziqeeli 9:4) Insa meessi qiniitira hagaangannita dibaxxannoreeti; hattono Maganu seerinni galtannoreeti. Insa coyidhanno coyinninna assootinsanni wolu manniwiinni baxxitinore ikkitinoti xabbe leeltanno. (Milkiyaasi 3:16, 18) Lawishshaho, insa mannu baalu ledo keere heeꞌrate sharrantanno ikkiina olu woy gaancu giddora dieꞌanno.—Mikiyaasi 4:3.

Dagoomu gudisiꞌre maaeeleenna alame gudisante kande amandayiwa baꞌakka?

Deeꞌni. Mannu ooso gudisante horo anganni fultanno deerra dimartanno. Hatteentenni, Maganu isi seera giwate murcidhinore muli yannara baattote aaninni feye hoolanno. (Faarso 37:38) Isi “haaro baatto” yaano koye uullate aana haaro dagooma xintanno; hakkunni dagoomi giddo jooguullu hegerera keerunni heedhanno. (2 Pheexiroosi 3:13; Faarso 37:11, 29) Tini hexxo haaqeete halcho diꞌꞌikkitino. Xa nafa Qullaawu Maxaafi lowo manni heeshshonsa biddi assiꞌre keeraancho Maganu doogo ledo sumuu yee heeꞌranno gede kaaꞌlanni no.—Efesooni Sokka 4:23, 24.