Maganu Qixxeessinota Adhanna Adhama Ayirrisse

1, 2. Ibiraawoota 13:4 maa assineemmo gede jawaachishshannonke?

YIHOWA ayirrisatto? Hatto assattoti egennantinote! Yihowara ayirrinyu hasiissannosi; qoleno ayirrinsummosiro isino ayirrisannonke. (1 Sam. 2:30; Law. 3:9; Aju. 4:11) Isi wole manna, lawishshaho silxaane noonsare ayirrinseemmo gede kulinonke. (Rom. 12:10; 13:7) Ikkollana roorenkanni ayirrinye leellisha hasiissannonkehu mittu baxxino coyi no. Hakkuno adhanna adhamate qixxaawooti.

² Soqqamaasinchu Phaawuloosi togo yee borreessino: “Adhanna adhama baalunku ayirrisannota ikkito; ayiddaanninna ayiddaama mimmitoho ammananto.” (Ibi. 13:4) Phaawuloosi tenne coyiꞌrinohu mulla yaate geeshshira calla diꞌꞌikkino. Hatteentenni isi, mittu mittunku Kiristaanchi adhanna adhama ayirrisanno gede hajajanni no. Atino adhanna adhama konni garinni laꞌꞌatto?

3. Yesuusi adhanna adhamate daafira hiittenne kaajja amaale amaalino? (Hanafote noo misile lai.)

³ Adhanna adhama ayirrisa lainohunni Yesuusi dancha lawishsha ikkinonke. Farisootu Yesuusa galte diigate daafira xaꞌmitusi yannara isi, Maganu umi adhanna adhama daafira coyiꞌrinore qummi assino; togo yiino: “Manchu annasinna amasi agure galtesi ledo heeꞌranno. . . . Kunnira Maganu mitto assinore mannu badoonke.”—Maarqoosi 10:2-12 nabbawi; Kal. 2:24.

4. Yihowa adhanna adhamate daafira mayi biddishsha fushshino?

⁴ Yesuusi adhanna adhama xintinohu Magano ikkinotanna galte geedonnita ikka hasiissannoseta coyiꞌrino. Maganu Addaaminna Heewanira galtensa diiga dandaannota dikulinonsa. Hatteentenni Maganu hedo “lamunku” adhamino gedeenni hegerera heeꞌranno gedeeti.

ADHANNA ADHAMA GAWAJJINOHA YANNATE GEESHSHI QARRA

5. Reyo adhanna adhama maa assitanno?

⁵ Addaami cubbo loosasi lowore daaffino. Kuri giddo mittu reyote; reyo adhanna adhama gawajjitanno. Soqqamaasinchu Phaawuloosi reyo adhanna adhama diiggannotanna galte shiiꞌrinohu hakkuyi gedensaanni adhama dandaannota coyiꞌrino.—Rom. 7:1-3.

6. Muse Seeri Yihowara adhanna adhamate noosi lao afate kaaꞌlannonkehu hiittoonniiti?

⁶ Maganu Israeelete dagara uyino Seeri adhanna adhamate daafira tittire kulanno. Kuni Seeri mitte galte sayinse adha dihoolanno; kuni rosichi hanafinohu Maganu Israeelete dagara Seera aansara albaanniiti. Ikkollana Muse Seeri meentonna ooso miincannikki gede kulanno. Lawishshaho, mittu Israeelaawichi borojjicho adhironna yannate gedensaanni wole galte layinki assiꞌriro, umi galtesira uddano, sagalenna wole hasiisannosere shiqisha hasiissannosi. Maganu hasiꞌrannohu, isi ise agarannosenna towaatannose gedeeti. (Ful. 21:9, 10) Ninke Muse Seeri hunda heeꞌnoommoha ikka hoogirono, Yihowa adhanna adhama ayirrisannota konni seerinni rosa dandiineemmo. Tini ninkeno adhanna adhama ayirrinseemmo gede diassitannonke?

7, 8. (a) Muse Seeri galte diigate daafira mayyaanno? (b) Yihowa galte diiga ma garinni laꞌꞌanno?

⁷ Muse Seeri galte diigate daafira mayyaanno? Yihowara adhanna adhamate daafira noosi lao disoorrantino; ikkirono Muse seeri adhanna adhama diiga dandiinanni woyiti noota kulanno. (Marro 24:1 nabbawi.) Mittu Israeelaawichi galtesira “giwisannosi coye aanase afiꞌro” haꞌrisa dandaanno. Muse Seeri “giwisanno” coye yiniri maatiro dikulanno. Ikkollana kuni shiima soꞌro ikkikkinni saalsiisannoha woy shota ikkinokki coye ikkikki digatino. (Mar. 23:14) Yesuusi warono batinyu Yihudu manni ‘kairira baalaho galtensa fushshe’ haꞌrisanno; tini dadillissannote. (Mat. 19:3) Ninke kayinni insa lawishsha harunsa dihasiꞌneemmo.

⁸ Masaalaanchu Milkiyaasi Yihowa adhanna adhama ma garinni laꞌꞌannoro xawisino. Hatte yannara mannu ‘qeedhimmatenni heeꞌre adhino galte’ xagare haꞌrisa rosaminoreeti; insa hatto assitannohu Yihowa magansiꞌrannokkiha aja meento adhate yite ikkara dandaanno. Milkiyaasi Maganoho adhanna adhamate daafira noosi lao xawisanni, “Ani ayiddaanninna ayiddaama babbaxxannota giweemmo” yee borreessino. (Mil. 2:14-16) Tini Maganoho adhanna adhamate daafira hanafote noosi lao soorrantinokkita leellishshanno; Yihowa adhanna adhama xinti woyite “Mannu annasinna amasi agure, galtesi ledo mitto ikkanno” yiino. (Kal. 2:24) Yesuusi adhanna adhama Annisi laꞌꞌanno garinni laꞌꞌannota leellishino; isi “Maganu mitto assinore mannu badoonke” yiino.—Mat. 19:6.

GALTE DIIGA DANDIINANNIHA MITTICHO KORKAATA

9. Yesuusi Maarqoosi 10:11, 12te coyiꞌrinore ma garinni huwata hasiissannonke?

⁹ Mitu manni, ‘Mittu manchi galte diige wolu ledo adhamanno gede assanno korkaati no?’ yee hedannoha ikkara dandaanno. Yesuusi adhanna adhama diigate daafira noosi lao togo yee xawisino: “Galtesi haꞌrise wole adhannohu, galtesi agure foorinoho yaate. Galtese agurte woleho assidhanno meyatino foortinote yaate.” (Maq. 10:11, 12; Luq. 16:18) Ee, Yesuusi adhanna adhama ayirrisanno; wolootuno hatto assitara hasiꞌranno. Mittu manchi ammanantino galtesi haꞌrise wole adhannoha ikkiro fooranni no. Minaamano ammanamino minaannase agurte woleho assidhannoha ikkiro, foortanni no. Korkaatuno minaanninna minaama galtensa diigino daafira calla adhamansa gumulantanno yaa diꞌꞌikkino. Adhamansa diigi gedensaannino Maganu albaanni lamunku “mitto” maalaati. Qoleno Yesuusi mittu manchi beebbaataame galtesi fushshe haꞌrisannoseha ikkiro ise foorrete giddo ubbara dandiitannota coyiꞌrino. Hiittoonni? Hakka waro mitte mancho minaannise fushshe haꞌrisisero woxu kaaꞌlo afiꞌrate yite wirro mine assidhara dandiitanno. Konni garinni adhama qolte foorrete.

10. Mittu Kiristaanchi adhamasi diige wolu ledo adhama dandaannohu hiittoo woyiteeti?

¹⁰ Yesuusi minaanninna minaama adhamansa diiga dandaannoha mitticho korkaata qummi assino; togo yiino: “Mittu manchi galtesi foorretenni kainohunni ikka hoogiro [Giriikete Afiinni, Poorniya], hakkuyi kaꞌa galtese haꞌrise wole adhiro foorinoho.” (Mat. 19:9) Isi Ilaalu Sibikatesi yannarano tenne coyiꞌrino. (Mat. 5:31, 32) Lamente yannara Yesuusi “foorrete” daafira coyiꞌrino. Foorre adhanna adhamate gobbaanni siimu xaadooshshi ledo xaado afiꞌrino cubbo loosate. Togoo cubbi giddo mitu, soorrote, footate, adhammoonnikkihu ledo siimu xaadooshshe assate, labbaahu labbaahu woy meyati meyate ledo adhamatenna saadate ledo siimu xaadooshshe assate. Lawishshaho, mittu mine kalaqiꞌrino manchi fooriro, minaamasi galtese diiga woy diiga hooga doodha dandiitanno. Ise galtensa diigguro, Maganu albaannino adhamansa diigantanno.

11. Mitte Kiristaancho woy Kiristaanchi galtensa foorturo nafa, adhamansa diiga hoogate doodha dandaannohu mayiraati?

¹¹ Yesuusi mittu adhamino manchi fooriro, (poorniya) baddalaminohu galtesi diiga hasiissannosi diyiino. Lawishshaho minaama minaannise foorinoha ikkirono galtensa diiga hooga doodhitara dandiitanno. Mayira? Korkaatuno ise hakkuyi gedensaannino minaannase baxxannoha ikkara dandaanno; qoleno ise minaannisera gatona yiteenna lamunku adhamansa kaajjishiꞌrate sharrama dandaanno. Ise adhamase diiggu gedensaanni wirro adhama hoogguro fonqolo ikkannori iillasera dandaanno. Maalaamittete hasattose ayi wonshannose? Ise callattanno? Galtese diigase oosose gawajjitanno? Adhamase diigguro oosose halaalu mine lossiꞌra qarra ikkitannose? (1 Qor. 7:14) Galtensa diigantinohu baddalamino minaanni woy minaamara lowohu fonqolo ikkanno coyi iillannonsa.

12, 13. (a) Hooseira mayi iillinosi? (b) Hoosei Gomeeri wirro adhinohu mayiraati? Tenne xaggenni maa ronseemmo?

¹² Masaalaanchu Hoosei lawishshi, Maganu adhanna adhama ma garinni laꞌꞌannoro huwatate kaaꞌlannonke. Maganu, Hoosei, Gomeeri yinannita foora mancho adhannonna ise ‘foorretenni ooso’ iltannota kulinosi. Gomeeri “godobbe [Hooseira] labbaa beetto iltusi.” (Hos. 1:2, 3) Gedensoonni ise meyatanna labbaa qaaqqo iltino; ise lamenka iltinohu wolu ledo foorte ikkara dandaanno. Gomeeri duucha higge foortinoha ikkirono, Hoosei ise dihaꞌrisino. Yannate gedensaanni ise Hoosei agurte borojjicho ikkitino. Ikkirono Hoosei ise woxxino. (Hos. 3:1, 2) Yihowa Hoosei lawishsha horoonsiꞌre, Israeele Isira ammanama gibbe wole maganna magansidhe foortinoha ikkirono, Isi duucha hige gatona yiinonsata leellishino. Ninke tennenni maa ronseemmo?

¹³ Mittu Kiristaanchi galtesi foorturo, umisi doorsha doodha dandaanno. Yesuusi baddalamino minaanni woy minaama galtesi diiganna wirro adhama dandaannota coyiꞌrino. Wole widoonni qole, baddalamino minaanni woy minaama gatona yaa dandaanno. Hatto assansa soꞌro diꞌꞌikkitino. Hoosei Gomeeri wirro adhino. Hoosei galtesi isiwa higguta xaate wolu ledo siimu xaadooshshe assa dandiitannokkita kulinose. Hoosei yannate geeshsha Gomeeri ledo ‘dixaadino’ woy siimu xaadooshshe diassino. (Hos. 3:3) Gedensaanni kayinni Hoosei galtesi ledo wirro xaadinoha ikkara dandaanno. Tini Maganu mannisi ledo wirro jaalooma kalaqiꞌrate maahoyye yiinota leellishshannote. (Hos. 1:11; 3:3-5) Ikkina tini adhanna adhamate daafira maa rosiissannonke? Baddalamino minaanni woy minaama galtese ledo wirro siimu xaadooshshe assitannoha ikkiro, baddalinose galtese gatona yitinota leellishshanno. (1 Qor. 7:3, 5) Hakkuyi gedensaanni adhamansa diiganno gede assannori diheeꞌranno. Hakkiinni kuri minaanninna minaama adhanna adhama Maganu laꞌꞌanno garinni laꞌꞌate sharrama hasiissannonsa.

GALTEꞌNE GIDDO QARRU KALAQAMIRO NAFA ADHANNA ADHAMAꞌNE AYIRRISSE

14. Umi Qorontoosi 7:10, 11 kultanno garinni adhamanke mereero mayi kalaqamara dandaanno?

¹⁴ Baalunku Kiristaani Yesuusinna Yihowa gede adhanna adhama ayirrisa hasiissannonsa. Ikkollana mannu ooso guuntete xeꞌne noonsare ikkitino daafira, mitootu hatto assa hooggara dandiitanno. (Rom. 7:18-23) Konnira umi xibbi diro mitu Kiristaanira adhamansa giddo buutote qarri iillinonsata nabbambeemmo woyite tini dhagge diꞌꞌikkitannonke. Phaawuloosi, “Minaama minaanniwiinni baxxitoonke” yee amaalinoha ikkirono, togoori kalaqamino woyiti no.—1 Qorontoosi 7:10, 11 nabbawi.

15, 16. (a) Minaanninna minaama mereero qarru kalaqamiro nafa, insa maa assate sharrama hasiissannonsa? Mayira? (b) Minaanni woy minaama Yihowa magansidhannokkiha ikkiro, konne biddishsha harunsa dandiinannihu hiittoonniiti?

¹⁵ Phaawuloosi, minaanninna minaama babbaxxe heeꞌranno gede assannori maatiro dixawisino. Babbaxxine heeꞌnanni gede assanno qarri foorre ikkitinokkita anfoommo. Hatto ikkoommero minaanni woy minaama galtensa diigate korkaatu heeꞌrannonsa. Phaawuloosi minaannisewiinni baxxitino minaama “mine assidhukkinni ofolto” yiino. Babbaxxe heeꞌrirono lamunku Maganu albaanni mittoho. Phaawuloosi minaanninna minaama mereero aye geeshshi qarri kalaqamirono, foorinohu hoogi geeshsha qarransa tirte mitteenni heeꞌrate sharrantanno gede amaalino. Lamunku, songote cimeeyye Qullaawu Maxaafi aana xintantino amaale uyitannonsa gede xaꞌmira dandiitanno. Cimeeyye mittohono mallaaddukki Qullaawu Maxaafi aana xintantino amaale uyitansara dandiitanno.

¹⁶ Ikkollana mittu Kiristaanchi Yihowa Farciꞌraasincho ikkinokkihu ledo adhaminohalla ikki? Galtensa mereero qarru kalaqamanno woyite insa babbaxxe heeꞌra dandaanno? Aleenni ronsummonte gede, minaanninna minaama galtensa diiga dandaannohu lamunku giddo mittu fooriro callaati; ikkollana Qullaawu Maxaafi babbaxxinanni gede assannore tittire dikulanno. Phaawuloosi togo yiino: “Ammanaanchote ammaninokki minaanni heeꞌrisero, isi ledose heeꞌra baxiro, iseno iso agurtoonke.” (1 Qor. 7:12, 13) Kuni biddishshi yannankerano loosanno.

17, 18. Mitu Kiristaani galtensa giddo qarru heeꞌrirono babbaxxa hoogate doodhinohu mayiraati?

¹⁷ Ikkollana mito woyite “ammaninokki minaanni” “ledose heeꞌra” hasiꞌra hoogara dandaanno. Ise lubbosera waajjitanno deerra gane gawajjannoseha ikkara dandaanno. Woy qole minaannise maatete hasiisannore shiqisha giwannoha woy ayyaanaamittese gawajjannore assannoha ikkara dandaanno. Hattoo yannara, mitte Kiristaancho ikkitino minaama minaannise baxire yiirono ‘ledose heeꞌra baxinokki’ daafira babbaxxe heeꞌra doodhitara dandiitanno. Mitu Kiristaani kayinni togoori iillinonsaha ikkirono galtensawiinni baxxa hoogate doodhino; insa kaajje heeꞌratenna galtensa kaajjishiꞌrate sharramanno. Insa tenne doodhinohu mayiraati?

¹⁸ Minaanninna minaama togoo qarrinni kainohunni babbaxxe heeꞌririno, adhamansa didiigantanno. Aleenni laꞌnummonte gede, insa babbaxxiro lowo fonqoli iillannonsa. Phaawuloosi minaanninna minaama babbaxxannokki gede assannonsaha wole korkaata kulino. Togo yiino: “Ammaninokki minaanni ammantino minaamanni keeraaꞌmanno. Ammantinokki minaamano ammanino minaanninni keeraaꞌmitanno. Hakkunni kaꞌa oosoꞌne battaabbinoreeti; xa kayinni keeraaꞌmitanno.” (1 Qor. 7:14) Mitu Kiristaani qarru heeꞌrirono Yihowa magansidhannokki galtensa ledo heeꞌra doodhino. Insa galtensa Yihowa magansidhannota ikkituta, babbaxxa hoogate doodhansa dancha ikkitinota wodanchino.—1 Qorontoosi 7:16 nabbawi; 1 Phe. 3:1, 2.

19. Kiristaanu songo giddo hagiirru noo galte woꞌmitinohu mayiraati?

¹⁹ Yesuusi adhanna adhama diigate daafira amaalino; soqqamaasinchu Phaawuloosi qole babbaxxe heeꞌrate daafira coyiꞌrino. Yesuusino ikko Phaawuloosi, Maganu soqqamaano adhanna adhama ayirrissara hasidhanno. Yannankera alamete doyichora Kiristaanu songo giddo galtensa hagiirru noota assiꞌrino roduuwi no. Kiꞌne songorano batinyu hagiirraamu minaannuwinna minaamuwi nooha ikkara dandaanno. Kuri ammanantino minaannuwi minaamuwansa baxanno; ammanamino minaamuwi qole minaannuwansa ayirrisanno. Insa adhanna adhama ayirrisa dandiinannita leellishino. Yannankera lowo miliyoone ikkanno minaanninna minaama Maganu Qaali giddo noota aante noo amaale harunsanni noo daafira tashshi yaannonke: “Mannu annasinna amasi agure, galtesi ledo mitto ikkanno; lamunku mitto biso ikkitanno.”—Efe. 5:31, 33.