Ani Yihowa Albaanni Hiittooho?
1. Qullaawa Maxaafa hincilaallote ledo lawinsoonnihu mayiraati?
1 Hincilaallotenni alba meikki meikkita layiꞌratto? Rooru manni gobbayidi mannimmansa layiꞌre bushinore hooꞌlate barru baala layiꞌranno. Qullaawa Maxaafa hincilaallote ledo lawinsoonni. Maganu Qaale nabbawanke Yihowa laꞌꞌannota giddoyidi ayimmanke layiꞌrate kaaꞌlitannonke. (1 Sam. 16:7; Yaq. 1:22-24) Maganu Qaali “wodanu hedonna alaami maatiro bade afa dandaanno.” (Ibi. 4:12) Qullaawa Maxaafa barru baala nabbawanna hiinca, woyyeessiꞌra hasiissannonkere biddi assiꞌne wongeelu loosira dancha guma afiꞌrate kaaꞌlitannonkehu hiittoonniiti?—Far. 1:1-3.
2. Qullaawu Maxaafi ninkeneeto fonqolle layiꞌrate kaaꞌlannonkehu hiittoonniiti?
2 Qullaawa Maxaafa Hincilaallote Gede Assitine Horoonsidhe: Yihowara ammaname soqqamino mannire kultannoti Qullaawu Maxaafi xagge isi hiittoo akatta baxannoro afate kaaꞌlitannonke. Lawishshaho, Daawiti Maganu suꞌmira diinaggaawannote leellishino. (1 Sam. 17:45, 46) Isayyaasi waajjikkinni qarrisanno qooxeessira sabbakate isonooto shiqishino. (Isa. 6:8, 9) Yesuusi iimi annasi lubbora baxanno daafira soqqansho hagiirre hunanno duhi gede ikkikkinni, fooliishshotenna hagiirru buicho gede asse laino. (Yoh. 4:34) Umi xibbi diri Kiristaanino diinaggaawe sabbakino, Yihowa addaxxino, hattono hexxo mudhikki kaajje uurrino. (Looso 5:41, 42; 2 Qor. 4:1; 2 Xim. 4:17) Togoo xagge hiincanke qullaawa soqqanshonke albinni roore isilancho assiꞌrate maa woyyeessiꞌra hasiissannonkero afate ninkeneeto layiꞌneemmo gede kaaꞌlitannonke.
3. Hasiisannore biddi assiꞌrate lashshi yaa hasiissannonkekkihu mayiraati?
3 Biddi Assiꞌra Hasiissannore Biddi Assidhe: Mittu manchi hincilaallotenni layiꞌre kae bushinore biddi assiꞌrikki aguriro layiꞌrasi kaaꞌlitannosiri dino. Ninkeneeto layiꞌne biddi assiꞌra hasiissannonkere biddi assiꞌrate Yihowa kaaꞌlannonke gede iso huucciꞌra dandiineemmo. (Far. 139:23, 24; Luq. 11:13) Yanna gooffe dagginohuranna mannootaho bao dagganni noo daafira, hasiisannore biddi assiꞌrate lashshi yaa dihasiissannonke.—1 Qor. 7:29; 1 Xim. 4:16.
4. Maganu Qaale hixamanye lae hasiisannore biddi assiꞌranno manchi mayi atoote afiꞌranno?
4 Yihowa laꞌꞌannoti mittu manchiti giddoyidi ayimma aaniidi ayimmasinni roore waaga afidhinote. (1 Phe. 3:3, 4) Maganu Qaale hixamanye lae hasiisannore biddi assiꞌranno manchi mayi atoote afiꞌranno? Kuni manchi “macciishshe kae hawannoha ikkikkinni loosu aana hosiisannoho; tenne assasinni qole hagiidhanno.” (Yaq. 1:25) Ee, ‘Yihowa ayirrinye hincilaallote gede xawinseemmo’ daafira hagiirraamma ikkineemmo; hattono soqqanshote dancha guma afiꞌneemmo.—2 Qor. 3:18.