Cuuamate Qixxaawa Dandaattohu Hiittoonniiti?

1-2. Xaara cuuamate qixxaawoottokkiha ikkiro, hexxo mudha hasiissannohekkihu mayiraati? (Aaniidi qoolira noo misile lai.)

CUUAMATE hasatto nooheha ikkiro, kaajja mixo fushshiꞌrootto. Xa cuuamate qixxaawootto? Tennera ati qixxaawoommo yite hedoottohanna songote cimeeyyeno fajjitinoheha ikkiro, aante noo yannara cuuamate hobbi ruxxi yitooti. Hatto assittoro Yihowara soqqamme afiꞌnanni baꞌraaꞌra afiꞌratto.

² Kayinni cuuamattora albaanni mitore biddi assiꞌra hasiissannoheta kulloonnihe? Woy ati umikki tenne huwatootto? Hatto ikkiro, hexxo mudhitooti. Aja woy akkalano ikkittoro, tenne hasiissanno mixo wonshiꞌra dandaatto.

“HOOLANNOERI NOONI?”

3. Mittu Itiyophiyu manchi Filiphoosi mayyee xaꞌmino? Hiittenne xaꞌmora dawaro afiꞌra hasiissannonke? (Soqqamaasinete Looso 8:36, 38)

³ Soqqamaasinete Looso 8:36, 38 nabbawi. Mittu Itiyophiyu manchi Filiphoosi, “Cuuama hoolannoeri nooni?” yee xaꞌmino. Itiyophiyu manchi cuuama lowo geeshsha hasiꞌrino; kayinni isi cuuamate addinta qixxaawino?

4. Itiyophiyu manchi lede rosate murciꞌrinota leellishinohu hiittoonniiti?

⁴ Itiyophiyu manchi “Magano magansiꞌrara Yerusaalame haꞌrino.” (Soq. 8:27) Hakko daafira isi Yihudu ammaꞌno wido ikkikki digatino. Isi Ibiraawootu Afiite Qullaawa Borronni Yihowa daafira rosinoti dihuluullissannote. Ikkirono isi ledo rosate quqquxamino. Filiphoosi konni manchi ledo doogote xaadi woyite, kuni manchi ma assanni no? Masaalaanchu Isayaasi xaaxo nabbawanni no. (Soq. 8:28) Tini xaaxo kaajja ayyaanaamittete sagaleeti. Kuni manchi rosinohu mitu Qullaawu Maxaafi rosinni calla kassi yee heeꞌra dihasiꞌrino; isi lede rosa hasiꞌrino.

5. Itiyophiyu manchi rosinore loosu aana hosiisate maa assino?

⁵ Kuni manchi “Itiyophiyu mootitte Hindeke yinannitera muli amaalaanchootinna [woxise] baalaho hajajaanchoho.” (Soq. 8:27) Hakko daafira isira loosu batiꞌrannositi dihuluullissannote. Ikkirono isi Yihowa magansiꞌrate yanna gaaꞌmino. Kuni manchi halaale rose calla kassi diyiino; rosinore loosu aana hosiisino. Hakko daafira Yerusaalamete qullaawu mini noowa Yihowa magansiꞌrara Itiyophiyunni kae seeda doogo haꞌrino. Isi Yerusaalame haꞌrate lowo yannanna woxe gudinoha ikkara dandaanno; ikkirono Yihowa magansiꞌrate assa hasiissannosire baala assino.

6-7. Itiyophiyu manchi Yihowara noosi baxilli lexxanno gede assiꞌrinohu hiittoonniiti?

⁶ Itiyophiyu manchira Filiphoosi mito hasiisanno halaale rosiisinosi; konni halaali giddo mittu Yesuusi Buuraminoha ikkinota kulannoho. (Soq. 8:34, 35) Kuni manchi Yesuusi assinosire rositi lowo geeshsha hagiidhinoti dihuluullissannote. Hakkiinni maa assiyya? Hasiꞌroommero isi bashsho noowa Yihudu ammaꞌno giddo heeꞌra dandaanno. Ikkirono isi Yihowaranna Beettisira noosi baxilli lexxanno gede assiꞌrino. Kuni manchi cuuame Yesuusi Kiristoosi harunsaancho ikkate mitto lowo geeshsha hasiisanno doorsha doodha hasiꞌrino. Filiphoosi kuni manchi cuuamate qixxaawinota afiti cuuinosi.

⁷ Atino Itiyophiyu manchi lawishsha harunsittoro cuuamate qixxaawa dandaatto. Huluullamittokkinni isi gede, “Cuuama hoolannoeri nooni?” yaa dandaatto. Hanni atino Itiyophiyu manchi assinore assa dandaattohu hiittoonniitiro laꞌno; Isi agurikki rosino, rosinore loosu aana hosiisino, hattono Maganoho noosi baxilli lexxanno gede assiꞌrino.

ROSA AGURTINOONTE

8. Yohaannisi 17:3 ma assineemmo gede kulloonninke?

⁸ Yohaannisi 17:3 nabbawi. Qullaawa Maxaafa xiinxalla hasiꞌratto gede assitinoheti Yesuusi coyiꞌrinote tenne hedooti? Ninke giddo batinye kaaꞌlitinonketi tenne hedooti. Ikkirono tini hedo rosa agurreemmokki gedeno assitannonke? Ee assitannonke. Isi ‘callu halaalaancho Magano ikkinohu’ daafira rosa horo diagurreemmo. (Ros. 3:11) Hegere geeshsha ronsanni heeꞌneemmo. Ronsummo kiiro, Yihowawa albinni roore shinqeemmo.—Far. 73:28.

9. Qullaawu Maxaafiha xinta ikkino roso ronsummohu gedensaanni ma assa hasiissannonke?

⁹ Yihowa daafira rosa hananfeemmo woyite Qullaawu Maxaafiha xinta ikkino roso calla ronseemmoti egennantinote. Soqqamaasinchu Phaawuloosi Ibiraawootu Kiristaanira borreessino sokkara konne roso, “umi roso” yiino. Isi “umi roso” yiinohu ajishate diꞌꞌikkino; konne roso isi qaaqquulle kiꞌanno ado ledo heewisiisino. (Ibi. 5:12; 6:1) Ikkirono isi baalunku Kiristaani konni xinta ikkino rosinni sainore rosanno gedenna Maganu Qaali giddo noo halaale seekke xiinxallanno gede jawaachishino. Qullaawu Maxaafi giddo noo halaale seekkite xiinxalla hasiꞌratto? Ayyaanaamittetenni lopha hattono Yihowanna isi hedinori daafira agurittokkinni rosa hasiꞌratto?

10. Mitu mannira xiinxalla qarra ikkitannonsahu mayiraati?

¹⁰ Ninke giddo batinyeho xiinxalla qarra ikkitannonke. Atina xiinxalla baxatto? Rosu mine dancha gede nabbambanninna xiinxallinanni gara rosootto? Xiinxalla baxisannohe? Qoleno xiinxalla lowore kaaꞌlitannoha lawannohenso maxaaffa nabbawe rosate ani worba diꞌꞌikkoommo yite hedatto? Hatto ikkiro, togoori macciishshamannohehu ate calla diꞌꞌikkootto. Ikkirono Yihowa kaaꞌlannohe. Isi guutaho, isi gedee Rosiisaanchi dino.

11. Yihowa ‘Bayira Rosiisaancho’ ikkasi leellishinohu hiittoonniiti?

¹¹ Yihowa, isi ‘Bayira Rosiisaancho’ ikkinota kulinonke. (Isa. 30:20, 21, NW) Isi cincaho, shaqqadohonna rosaanosi noo gari leellannosiho. Yihowa rosaanosi danchumma illachishanno. (Far. 130:3) Qoleno isi assa dandiineemmokkire asse horo diyaannonke. Yihowa surrekki dhagge ikkanno garinni kalaqino gara qaagi. (Far. 139:14) Isi kalaqinonkehu rosa hasiꞌneemmo gede asseeti. Kalaqaanchinke hegerera ronsanni hagiidhinanni heeꞌnammora hasiꞌranno. Hakko daafira Qullaawu Maxaafi halaale rosate ‘halcha’ hayyote. (1 Phe. 2:2) Wonshiꞌra dandaatto mixo fushshiꞌri; hattono ganyite Qullaawa Maxaafa nabbawatenna xiinxallate yanna gaaꞌmi. (Iya. 1:8) Yihowa kaaꞌlonni nabbawa baxanna albinni roore isi daafira rosa hagiirsiissannohe gede assiꞌra dandaatto.

12. Xiinxallineemmo woyite Yesuusi lawishsha illachisha hasiissannonkehu mayiraati?

¹² Yesuusi heeshshonna soqqansho daafira ganyite hiincate yanna gaaꞌmi. Roorenkanni tenne qarru yannara Yihowara soqqamate kaaꞌlannonkehu qaru coyi Yesuusi lawishsha seekkine harunsate. (1 Phe. 2:21) Yesuusi harunsaanosira iillannonsa qarra xawise kulino. (Luq. 14:27, 28) Ikkirono isi addu harunsaanosi isinte gede iillannonsa qarra dandiite saꞌannota addaxxino. (Yoh. 16:33) Yesuusi heeshsho daafira mitto mittonka coye xiinxalli; hattono barru barru heeshshokkinni isi lawishsha harunsatto gara afate mixo fushshiꞌri.

13. Yihowa ma assannonke gede ganyine huucciꞌra hasiissannonke? Mayira?

¹³ Egenno afiꞌra calla diguddanno. Ikkirono egenno albinni roore Yihowa daafira ronseemmo gede hattono dancha akatta heedhannonke gede lawishshaho, Yihowa banxeemmo gedenna iso ammanneemmo gede kaaꞌlitannonke. (1 Qor. 8:1-3) Yihowa daafira rosatto woyite isi ammana ledannohe gede woꞌmanka woyite huucciꞌri. (Luq. 17:5) Isi togoo huuccatto macciishsha baxanno. Konni garinni Maganonke seekkine afanke loosoho kakkayissannonke.—Yai. 2:26.

ROSOOTTORE WOꞌMANKA WOYITE LOOSU AANA HOSIISI

14. Soqqamaasinchu Pheexiroosi ronsommore loosu aana hosiisa hasiissannota ikkitinota xawisinohu hiittoonniiti? (Misileno lai.)

¹⁴ Soqqamaasinchu Pheexiroosi Kiristoosi harunsaano rossinore woꞌmanka woyite loosu aana hosiisa hasiissannota ikkitinota xawise kulino. Isi Qullaawu Maxaafi giddonni Nohi xagge qummi assino. Yihowa Nohira hatte yannara nooha busha manna hunate baote waa abbannota kulinosi. Baote wayi daanni nootta afansa calla Nohinna maatesi digatissanno. Pheexiroosi Baote Wayira albaanni noo yanna, “Nohi markaawe boci waro” yee qummi assinota wodanchi. (1 Phe. 3:20) Addanko, Nohinna maatesi jawa markaawe loosse Maganuwiinni rossinore loosu aana hosiissino. (Ibi. 11:7) Pheexiroosi hakkiinni Nohi assinore cuuamate ledo heewisiise togo yee borreessino: “Kuni wayino xa kiꞌne gatisate cuuamate lawishshaati.” (1 Phe. 3:21) Hakko daafira xa kiꞌne cuuamate qixxaawate assitinanni heedhinoonnire Nohinna maatesi lowo diro markaawe loosate assitinori ledo heewisiisa dandiineemmo. Cuuamate qixxaawate maa assa hasiissannohe?

15. Addu maaro eate ma assa hasiissanno?

¹⁵ Umo assa hasiissannonke coyi giddo mittu cubbinkera addinta maaro eate. (Soq. 2:37, 38) Addinta maaro ea soorramme biddi yineemmo gede assitannonke. Yihowa dadillisannore lawishshaho maaeela heeshsho heeꞌra, sijaara aga woy bushare coyiꞌra agurootto? (1 Qor. 6:9, 10; 2 Qor. 7:1; Efe. 4:29) Aguroottokkiha ikkiro, soorrante biddi yaate sharrama agurtooti. Kaaꞌlonna biddishsha afiꞌrate Qullaawa Maxaafa xiinxallisannohe mancho woy songote cimeeyye amaaꞌli. Wedellichanna mine baxxite fuloottokkiha ikkiro, cuuamattokki gede assannoheha busha rosicho qeeꞌlatto gede kaaꞌlitahera annakkinna amakki amaaꞌli.

16. Ganyine ayyaanaamittete coye assate maa maa assa hasiissannonke?

¹⁶ Ayyaanaamittete coye ganyine assano hasiissannote. Lawishshaho gambooshshe haꞌranna dawaro qola hasiissannonke. (Ibi. 10:24, 25) Soqqansho fulate ikkado ikkittoro, ganyite fulate pirogiraame fushshiꞌri. Konne heeshsho gatisate looso loositto kiiro albinni roore baxatto. (2 Xim. 4:5) Wedellichanna mine baxxite fuloottokkiha ikkiro, ateneeto togo yite xaꞌmi: ‘Gambooshshe haꞌreemmohunna soqqansho fuleemmohu anniꞌyanna amaꞌya qaagiissiteennaeetinso ani umiꞌyanni kaeeti?’ Kuri coyibba umikkinni kaꞌe assattoha ikkiro ammana nooheta leellishatto; hattono Magano Yihowa baxattotanna galatattota leellishatto. Tini ‘Magano lawatenni heeꞌratto’ heeshsho isira aatto eltooti. (2 Phe. 3:11; Ibi. 13:15) Mannu xixxiiwinkekkinni uminkenni kaꞌne uyineemmori baalu Maganonke hagiirsiisanno. (2 Qorontoosi 9:7 ledo heewisiisi.) Togoore assineemmohu Yihowara aate dandiinummore baala assa hagiirsiissannonke daafiraati.

YIHOWARA NOOHE BAXILLI LEXXANNO GEDE ASSIꞌRI

17-18. Cuuamate assa hasiissannohere assatto gede kaaꞌlannohehu qaru akati hiikkonneeti? Kuni akati kaaꞌlannohehu hiittoonniiti? (Lawishsha 3:3-6)

¹⁷ Cuuamate assa hasiissannohere assitto kiiro qarra ikkannoheri tuncu yaannohe. Mitu manni ammanakkinni kainohunni qacifatahera dandaanno; kuni manni giwahera woy daramatto gede nafa assahera dandaanno. (2 Xim. 3:12) Busha rosicho qeeꞌlate sharramattoha ikkirono mito woyite bushu rosichi waadahera dandaanno. Woy mixoꞌya wonshiꞌra didandeemmo yite hedde cinca hoogattoranna hexxo mudhattora dandaatto. Hexxo mudhattokki gede mayi kaaꞌlannohe? Tennera kaaꞌlannohehu qaru akati Yihowara noohe baxilleeti.

¹⁸ Yihowara noohe baxilli wole baalanta akatta rooranno. (Lawishsha 3:3-6 nabbawi.) Maganoho noohe baxilli kaajjado ikkiro iillannohe qarra dandiite saꞌꞌatto. Qullaawu Maxaafi Yihowa soqqamaanosira bagamannokki baxille leellishannonsata duucha hige kulanno. Yihowa bagamannokki baxille leellishanno yaa isi soqqamaanosi horo tuge diaguranno woy insa baxa diaguranno yaate. (Far. 100:5) Kalaqamoottohu Maganu daninniiti. (Kal. 1:26) Atino togoo baxille leellisha dandaattohu hiittoonniiti?

19. Yihowa assinoherira galatu nooheta albinni roore leellisha dandaattohu hiittoonniiti? (Galatiyu Sokka 2:20)

¹⁹ Galatattoha ikki. (1 Tes. 5:18) Barru baala ateneeto, ‘Yihowa baxannoeta leellishinohu hiittoonniiti?’ yite xaꞌmi. Hakkiinni huuccatto assiꞌratto woyite, Yihowa assinohe coye badde kulte iso galati. Yihowa baxannohe daafira assinoheha dancha coye hedi; Soqqamaasinchu Phaawuloosino Yihowa assinosiha dancha coye wodanchino. (Galatiyu Sokka 2:20 nabbawi.) Ateneeto, ‘Anino iso baxeemmota leellisha hasiꞌreemmo?’ yite xaꞌmi. Yihowara noohe baxilli iillannohe fonqolonna qarra ikkannore dandiite saꞌꞌatto gede kaaꞌlannohe. Qoleno ayyaanaamittete coye ganyite assite iimi Annikkira noohe baxille barru baala leellishatto gede kakkayisannohe.

20. Heeshshokki Yihowara sayisse aate ma assa hasiissannohe? Kuni doorshi hasiisannoha ikkinohu mayiraati?

²⁰ Gale hose Yihowara noohe baxilli mitte baxxitino huuccatto huucciꞌratto gede assannohe. Tenne huuccatto huucciꞌratto woyite heeshshokki Maganoho sayisse aatto. Heeshshokki Yihowara sayisse uyittoro hegerera isi jajja ikkatto; tini dhagge ikkitanno hexxooti. Heeshshokki Yihowara sayisse aatto woyite qarruno faffote yannarano isira soqqamate qaale eatto. Konne qaale yannate kiiro ea dihasiissannohe. Addanko, heeshshonke Yihowara sayinse uyineemmo woyite shaaꞌꞌa ikkinokki doorsha doodhinanni heeꞌneemmo. Ikkirono hanni tenne hedi: Heeshshokki giddo lowo doorsha doodhatto; konni doorshi giddo mitu lowo geeshsha dancha ikkara dandaanno; kayinni heeshshokki Yihowara sayise aate geeshsha ikkanno doorshi dino. (Far. 50:14) Sheexaanu iimi Annikkira noohe baxilli qiidanno gede asse isira ammanamattokki gede assate woꞌnaalanno. Sheexaanu qeelahera horo wodhitooti! (Iyo. 27:5) Yihowara noohe baxilli cuuamitto woyite eootto qaale agadhite heeꞌratto gedenna iimi Annikkiwa albinni roore shiqatto gede kaaꞌlannohe.

21. Cuuama hanafotella yineemmohu mayiraati?

²¹ Heeshshokki Yihowara sayisse uyittohu gedensaanni cuuamate qixxaawoottota songote cimeeyyera kuli. Ikkirono cuuama hanafo ikkinnina gawalo ikkitinokkita woꞌmanka woyite qaagi. Yihowara hegerera soqqamattohu cuuamittorooti. Hakko daafira xaanni iimi Annikkira noohe baxille lossiꞌri. Baxillikki barru barrunku lexxanno gede assiꞌrate mixo fushshiꞌri. Togoo mixo cuuamatto gede kakkayissannohe. Cuuamatto barri lowo geeshsha hagiirsiisannoha ikkanno. Ikkirono tini hanafotella. Yihowaranna Beettisira noohe baxilli hegerera lexxanni haꞌrara halchineemmo!