AANIIDI QOOLIHA COYI UMO | QULLAAWU MAXAAFINNI KAAꞌLO AFIꞌRA DANDIINANNI GARA
Qullaawa Maxaafa Nabbawa Hasiissannohu Mayiraati?
“Qullaawu Maxaafi yaannore huwata horo dandiinannikkiha lawannoe.”—Juuvi
“Qullaawa Maxaafa nabbawa ceeꞌmishshannoha lawannoe.”—Kiweni
“Qullaawu Maxaafi geeshsha lowoha ikkino gara laummota nabbawa giwisie.”—Ezikeeli
Qullaawa Maxaafa nabbawattora hedde kaꞌe, aterano togoo hedo macciishshanteennahe agurte egennootto? Batinyu mannira Qullaawa Maxaafa nabbawa gooddo labbannonsa. Kayinni Qullaawu Maxaafi hagiirru noo heeshsho heeꞌratto gede kaaꞌlannoheta afittoro maa assatto? Qullaawu Maxaafi niwaawe baxissannota assiꞌra dandiinanni doogga nootalla afitto? Qullaawu Maxaafi kulannore afate kakkaꞌꞌatto?
Hanni Qullaawa Maxaafa nabbawa hanafansa kaaꞌlitinonsahu boodu manni coyiꞌrinore laꞌno.
Ezikeeli yinannihu 20 diri balla ikkannosi beetti togo yiino: “Alba ani, haꞌrannowa afikkinni makeena kadanno manchi gedeeti. Qullaawa Maxaafa nabbawaꞌya kayinni hagiirru noo heeshsho heeꞌreemmo gede kaaꞌlitinoe. Qullaawu Maxaafi barru baala kaaꞌlitannoeta kaajja amaale amadino.”
Firieda yinanniti 20 diri balla ikkannosetino togo yitino: “Alba ani shiimu coyira hanqeemmate. Qullaawa Maxaafa nabbawummati kayinni, aneneeto qeeꞌla rosoomma. Tini mannu ledo sumuu yee heeꞌreemma gede assitinoe; konnira xa lowo jaalla nooe.”
Yunisi yinanniti 50 diri balla ikkannoseti Qullaawu Maxaafire coyidhanni togo yitino: “Qullaawu Maxaafi dancha mancho ikkeemma gedenna busha rosicho agureemma gede kaaꞌlanni nooe.”
Kurinna wolu lowo miliyoone ikkanno manni huwatinonte gede, Qullaawa Maxaafa nabbawakki albinni roore hagiirru noo heeshsho heeꞌratto gede kaaꞌlitannohe. (Isayaasi 48:17, 18) Lawishshaho Qullaawu Maxaafi, danchare woy woyyinore doodhatto gede, dancha jaalla heedhannohe gede, yaachishannore dandiite heeꞌratto gedenna duuchunkunni roore, Maganu daafira halaale ikkinore afatto gede kaaꞌlannohe. Qullaawu Maxaafi giddo noo amaale Buicho Maganoho; konnira tenne amaale harunsakki horonta digawajjitannohe. Maganu busha amaale horo diamaalanno.
Qaru coyi Qullaawa Maxaafa nabbawa hanafate. Qullaawa Maxaafa baxisanno garinni nabbawa hanafate kaaꞌlannori maati?