Daanieeli Doobbiyu Balera Tungi

BAITTO ANE! Daanieeli buutote qarri giddo no. Doobbiyu kayinni iso dikisino! Kisinokkihu mayiraatiro afootto? Daanieeli tenne doobbiyu balera tuginohu ayeeti? Hanni laꞌno.

Hakkawaro Baabiloonete nugusa ikke noohu Daariyoosi yinanni manchooti. Daanieeli danchanna hayyichcha ikkino daafira Daariyoosi iso lowo geeshsha baxanno. Daariyoosi gashshootisira roorrichcha ikkanno gede Daanieeli doori. Konni daafira gashshootu aana noori wolootu mannooti Daanieeli hinaassu; hinaasse ma assitiniro afootto?

Daariyoosiwa marte togo yitu: ‘Nugusa, 30 barri geeshsha mittuno ate agurranna wole mitto magano woyi mancho huucciꞌra dihasiissannosi yitanno higge fushshatto gede banxoommo. Mittu manchi tenne higge ayirrisa hoogiro, hakko mancho doobbiyyu balera tungona.’ Daariyoosi kuri mannooti tenne higge fushshara hasidhinohu mayiraatiro diafino. Ikkollana insa yitinori dancha laweennasi, higge borreessi. Xa tenne higge soorra didandiinanni.

Daanieeli tini higge fultinota macciishshiti, bashsho assannonte gede minisira mare huuccatto assiꞌri. Hakkuri bushuullu mannooti Daanieeli Yihowa huucciꞌra agurannokkita affino. Daanieeli shaate mixidhino mixonsa injiitinoha laweennansa hagiidhitu.

Nugusu Daariyoosi kuri mannooti tini higge fultara hasidhinohu mayiraatiro afiti, lowo geeshsha dadilli. Ikkollana tenne higge soorra didandaanno; konni daafira Daanieeli doobbiyu balera tunganni gede hajaji. Ikkirono Nugusu Daanieeli, ‘Soqqamatto Maganikki gatisohe’ yiisi.

Daariyoosi lowo geeshsha dadillino daafira, hakko hashsha digoxino. Soodita gute kae doobbiyu bale noowa rahe mari. Kuueeti iso misilete aana uurre noota lai. Isi qoonqosi gotti asse, ‘Heeshshote Magani soqqamaancho Daanieeli! Soqqamatto Magani doobbiyu afiinni gatisinohe?’ yii.

Daanieeli togo yee qoli: ‘Maganu sokkaanchosi soye, doobbiyu afoo cufino daafira doobbiyu digawajjinoe.’

Nugusuno lowo geeshsha hagiidhe, Daanieeli baletenni fushshinanni gede hajaji. Hakkiinnino Daanieeli shitara hasidhure bushuulle manna doobbiyu balera tunganni gede assi. Hakko mannooti balete hunda nafa iillitukki, doobbiyu diddishinsa; miqqansano cancani.

Hakkiinnino Nugusu Daariyoosi gashshootisi giddo heedhanno daga baalantera togo yee sokka soyi: ‘Mannu baalunku Daanieeli Magano ayirriso yee hajajoommo. Maganisi bayira xagge assino. Daanieeli doobbiyu afiinni gatisino.’