Daddalu Basera Waajjitinikki Farcidhe
1. Daddalu basera farciꞌra waajjishshannonkeha ikkiro hexxo mudha hasiissannonkekkihu mayiraati?
1 Daddalu basera farciꞌra waajjishshannohe? Hatto ikkiro hexxo mudhitooti; wole agurina worbunna waajjannokkihu Phaawuloosi nafa ‘waajjikki farciꞌrate lowo geeshsha sharramino.’ (1 Tes. 2:2) Roore wote waajjineemmo gede assannonke coyenna waajjinummokki farciꞌrate kaaꞌlannonkeri maatiro hanni laꞌno.
2. Daddalaano caaccaabbanno yine cannaqama hasiissannonkekkihu mayiraati?
2 Daddaꞌlitanni Noore Coyishiisheenna Caaccaabbakka? Duucha basera daddalaano mannu insawa marannota affinohura hakkeeshsha dicaaccaabbanno. Albillitte ate dambanyanke ikkanno yite heddara dandiitanno daafira roore yanna dicaaccaabbanno. Uddiꞌra seekke marattoha ikkiro, hattono hisattenna faasiiqqe coyishiishattonsaha ikkiro ayirrisse macciishshitannohe gede assa dandaatto.
3. Dikkiꞌranno manni caaccaawannokki gede ma assa dandiineemmo?
3 Dikkaanchu Batiꞌre Heeꞌreenna Daddalaano Coyishiisha Hasiissannoe? Dandaamannoha ikkiro dikkiꞌranno manni batiꞌrannokki yannara, lawishshaho suuqe fannanni heeꞌneenna marittoro danchaho. Mannu haꞌre goofikkinni halaafichunniwa martooti. Qolteno hasaawakki haransi.
4. Daddalu basera manna hasaawisate mayyaa dandiinanni?
4 Hasaawa Jammarate Mayyeemmo? Suuqe lowo manni hirannota ikkituro halaaficha woyi suuqete anna coyishiishi. Togo yaa dandaatto: “Kowiira dawoommohu daddaꞌlanno manna roore wote qaete anfannikkihuraati. Loosu aana noottota afoommohura dawoommo haja haranse kuleemmohe.” Borro hirranni haꞌnanni heeꞌnoommoha lawannonsakki gede isi loosinkera woxe hiikkiinni afiꞌneemmoro xaꞌma hooginkero fushshaato xaꞌma hooga lowo geeshsha danchate. Mite mite daddalu basera loosaasine hasaawisate halaaficha fajjo xaꞌma hasiissannohe. Insarano umo halaafichaho yiittota yite jammari. Loosaasinete loosu batiꞌre noonsaha ikkiro haranchunni hasaawisse tiraakte uyite haꞌri. Loosaasine coyishiisha dandiinannikkiha ikkiro fooliishshote basera woyi wolewa injaannonsawa borro worte haꞌrate faqqandannihe gede xaꞌmiꞌri.
5. Daddalu basera waajjinummokki farciꞌneemmo gede assannonkeri maati?
5 Yesuusinna Phaawuloosi mannu daddaꞌlannowanna loosiꞌrannowa waajjitukki sabbakkino; atino hatto assa dandaatto. (Maat. 4:18-21; 9:9; Soq. Los. 17:17) Waajjittokkinna beꞌe yiittokki sabbakatto gede kaaꞌlahera Yihowa huucciꞌri. (Soq. Los. 4:29) Daddalu basera mini gede manna marre hoongannikki daafira, atino togoo basera mayira sabbakate woꞌnaalte dilaꞌꞌatto?