“Lubbo” nna “Foole” Yitanno Qaalla Mayi Tiro Afidhino?

“LUBBO” nna “foole” yinanni qaalla macciishshatto wote mayi qulli yaannohe? Batinynyu manni lubbonna foolu yaa, giddonke nooreetinna illete leellannokkireeti, hattono reyannokkireeti yee ammananno. Qoleno kuni manni, mittu manchi reyanno wote lubbonna foolu maalunni baxxe reyikki heeꞌranno yee hedanno. Togoo ammana lowo geeshsha halaꞌlitinohura, batinynyu manni Qullaawu Maxaafi hatto yee rosiisannokkita afanno wote xagge assiꞌranno. Ikkina, Maganu Qaali lubbonna foole maati yaanno?

QULLAAWU MAXAAFI “LUBBO” YAANNO QAALE HOROONSIꞌRINO GARA

Hanni balaxxe, lubbote yaa mayyaatero assaawi. Umo Qullaawa Maxaafa Ibirayisxetenna Girikete afiinni borreessinoonnita qaagittokki digatootto. Qullaawu Maxaafi borreessaano, lubbo yaanno qaalira Ibirayisxete afiinni nefeshi woyi Girikete afiinni pisihi yaanno qaale horoonsidhino. Kuni lamunku qaali Qullaawa Borro giddo 800 aleenni hige no; Haaro Alame Tirora lamenka qaale duuchchankawa “lubbo” yine tirroonni. Qullaawu Maxaafi, “lubbo” woyi “lubbuwa” yaano qaale horoonsiꞌrino gara buuxittoro, kuni qaali (1) manna, (2) saada, woyi (3) mannu woyi saadate heeshsho yaa ikkinota huwatatto. Tenne sase babbaxxitino tiro leellishshannota hanni mite mite xiqise laꞌno.

Manna. “Nohi yannara, . . . [baote] wayinni gatinohu shiima mannaati, insano sette [lubbuwaati].” (1 Pheexiroosi 3:20) Kowiichcho ‘lubbuwate’ yaanno qaali mannaho; insano Nohi, galtesi, sase oososinna minaamuwansaati. Wolaphpho 16:16 Isiraaeelete gosa menna gamba assidhano gara kultanno. Tini xiqise togo yitanno: “Mittu mittunku dunkaaniꞌne giddo noo lubbo kiironni . . . gamba assidhe.” Konni daafira, Isiraeele menna gamba assiꞌra dandiitannohu minensa noo manni kiironniiti. “Lubbo” mancho umosi ikkitinota xawisannohu wolu Qullaawu Maxaafi lawishshi Kalaqo 46:18; Iyyaasu 11:11; Soqqamaanote Looso 27:37 (NW) nna Roomu Sokka 13:1 (NW) aana no.

Saada. Qullaawu Maxaafi kalaqonnire coyiꞌranni togo yaanno: ‘Hakkiinnino Maganu togo yii: “Wayi heeshsho noonsa lubbuwa batise fushsho; buubbanno kalaqono baattote iimaanni buubbo.” Qoleno Maganu togo yii: “Uulla heeshsho noonsa lubbuwa sirchinsa garinni fushshito; hattono mini saada, baattote aana millissanno kalaqonna gaxigala sirchinsa garinni fushshito.” Hakkiinnino yiinonte gede ikki.’ (Kalaqo 1:20, 24) Tenne xiqise aana qulxuꞌme, mini saadanna gaxigalu mitteenni “lubbote” yaamamino. Qoleno Kalaqo 9:10; Zelewaawuyaani 11:46 nna Zehulqu 31:28 aana ceanna saada lubbote yaamantino.

Mannu heeshsho. Mito wote “lubbo” yaanno qaale mannu heeshsho kulate horoonsiꞌnanni. Yihowa Muse togo yiino: “Lubbokki hasidhanni noo mannooti baalunku reyitino.” (Wolaphpho 4:19) Muse diinna hasidhanni noohu maati? Insa hasidhanni noohu Muse heeshsho hunateeti. Hakkuyira albaanni Raaheeli Biiniyaami iltu wote, “lubbose fultino (togo yinoonnihu reyitino daafiraati).” (Kalaqo 35:16-19) Hakkawote Raaheeli heeshshose hooggino yaate. Qoleno Yesuusi yiinore lai: ‘Danchu allaalaanchi aneeti; danchu allaalaanchi geꞌreewisira yee lubbosi sayise aanno.’ (Yohaannisi 10:11) Yesuusi mannu oosora yee lubbosi woyi heeshshosi sayise uyino. Tenne xiqissa aana “lubbo” yaanno qaali mannu heeshsho xawisannoho. Mannu heeshshono “lubbote” yinannita ledde buuxate, 1 Negesti 17:17-23; Maatewoosi 10:39 (NW); Yohaannisi 15:13 (NW) nna Soqqamaanote Looso 20:10 laꞌꞌa dandaatto.

Maganu Qaale roore xiinxallitanni haꞌrattoha ikkiro, “lubbo” “reyitannokkita” woyi “hegereta” ikkitinota kulanno bayichchi Qullaawu Maxaafi giddo mittowano nookkita buuxatto. Hatteentenni Qullaawa Borro, lubbo reyitannota xawissanno. (Hiziqeeli 18:4, 20) Konni daafira, Qullaawu Maxaafi reyino mancho “reyitino lubbo” yaanno.—Zelewaawuyaani 21:11.

“FOOLU” MAATIRO BADE AFA

Hanni aanchine Qullaawu Maxaafi “foole” yaanno qaale horoonsiꞌrino gara laꞌno. Mitu mannira “foolu” nna “lubbo” mitto labbannonsa. Tini kayinni digaraho. Qullaawu Maxaafi “foolu” nna “lubbo” babbaxxino coye ikkinota xawise kulanno. Babbaxxinore ikkinohu hiittoonniiti?

Qullaawu Maxaafi borreessaano “foole” yaanno qaale xawisate Ibirayisxete qaale ruwah woyi Girikete qaale pinemma yinanniha horoonsidhino. Qullaawa Borro tenne qaalla tiro buunxeemmo gede kaaꞌlitannonke. Lawishshaho, Faarso 104:29 togo yitanno: “Ati [Yihowa] foolensa [ruwah] haadhe hoolittoro, insa reyitanno; bushshinsa giddorano higganno.” Qoleno Yaaqoobi 2:26 (NW), “foolu [pinemma] nookki mannimma reyitinota” ikkitinota xawissanno. Konni daafira, tenne xiqissa garinni “foolu,” mannimma reyitannokki gede assannoreeti yaate. Foolu nookki mannimma reyitinote yaate. Konni daafira, Qullaawu Maxaafi giddo ruwah yaanno qaale, “foole” yine calla ikkikkinni “wolqa,” woyi heeshshote wolqa yineno tirroonni. Lawishshaho, Nohi yannaha Baote Waa lainohunni Maganu togo yiino: “Maalinsa giddo heeshshote wolqa [ruwah] noonsare, iimira woroonni noo kalaqama baala gudate uullate aana lolaho abbammoraati.” (Kalaqo 6:17; 7:15, 22) Konni daafira, “foolu” illete leeltannokki wolqaati (woyi heeshshote tuuqooti); tini wolqa lubbote noo kalaqo reyitannokki gede assitanno.

Lubbonna foolu babbaxxinoreeti. Raadoone coyishiishate korreentete wolqa hasiissannonte gede, bisinke loosanno gedeno foolu hasiisanno. Konne lede buuxate, hanni mitte shiima raadoone lawishsha assine adhino. Hatte raadoonera kincho worte kaꞌe fanittoro, kinchu giddo noo wolqa raadoonete wolqa uyite coyidhanno gede assitanno. Kinchu nookkiha kayinni, hatte raadoone diloossanno. Raadoonete sokkeette korreentetewiinni bandanni woteno raadoone diloossanno. Hatteente gede, bisinke reyannokki gede woyi loosanno gede assitanno wolqa fooleho. Qoleno, korreentete wolqante gede, foolu dadillara ikko hagiidhara didandaanno, hattono mittoreno diassaawanno. Foolu biso diafiꞌrino. Faarsaanchu yiinte gede, foolu woyi heeshshote wolqa hoogguro, bisinke ‘reyanno hattono bushshu giddora higanno.’

Mekibibi 12:7 mannu reyore coyidhanni togo yitanno: “Bushshu dayinowa baattote giddora higanno; foolu kayinni uyinohuwa halaalaanchu Maganiwa higanno.” Foolu woyi heeshshote wolqa bisu giddonni fultanno wote, bisu reyanno; hakkiinnino dayinowa yaano baattote giddora higanno. Heeshshote wolqa kayinni dagginowa yaano Maganunniwa higganno. (Iyyoobi 34:14, 15; Faarso 36:9) Togo yaa kayinni heeshshote wolqa woyi foolu iimira haꞌranno yaa diꞌꞌikkino. Foolu Maganunniwa higanno yaa, mittu manchi reyi gedensaanni hakko manchita albillittete hexxo wossanannohu Magano Yihowaati yaate. Hakko manchi heeshsho Maganu anga keeshshitanno yaate gedeeti. Hakko manchi galagale lubbote heeꞌranno gede foole woyi heeshshote wolqa qole aa dandaannohu Magano callaho.

Maganu “qaagooshshu waamma” giddo fooliishshidhe noorira baalaho foole qole aannonsata afa lowo geeshsha sheshifachchishshanno! (Yohaannisi 5:28, 29, NW) Kaote yannara, Yihowa reye noo mannira haaro biso kalaqihu gedensaanni foole woyi heeshshote wolqa oye reyotenni kayisanno. Kaote yanna manna lowo geeshsha hagiirsiissannota ikkitanno!

Qullaawu Maxaafi “lubbo” nna “foole” yitanno qaalla horoonsiꞌrino gara ledde buuxate, Reyineemmo Wote Hiikkineemmo? (Amaaru afoo) yitanno biroshere giddonna Qullaawa Borronni Korkaata Xawisa (Amaaru afoo) yinanni maxaafira qoola 375-384 aana xawishsha afiꞌratto. Lamenta borro Yihowa Farciꞌraasine qixxeessitino.