Maganu Qarru Heeꞌrara Faqqadinohu Mayiraati?

1, 2. Xaa yannara mannu oosora hiikku dadillisanno coyi iillanno? Konnira duuchchu manni hiittee xaꞌmo xaꞌmanno?

MITTE olunni hembeelantanni keeshshitino gobbara waajjishanno oli kaeenna, olu giddora einokkihu kumunni kiirranni meentinna qaaqquulli goofino; konne meentonna qaaqquulle albaanni batinynye manna madaarroonnitera shiimmaadda masqalla doyissine qansoonni waammara mitteenni madaarri. Mittu mittunku masqali aana “Mayira?” yitanno borro no. Mannaho dadillisannori iillannonsa wote hakku qarri iillinonsahu mayiraatiro leella hooginsaro lowo geeshsha xissiisiꞌre aleenni noo xaꞌmo xaꞌmanno. Mannu xissiisiꞌre tenne xaꞌmo xaꞌmannohu olunni, kalaqote danonni, xibbunni woyi jaddotenni baxanno manni reyanno wote, mininsa diigame baꞌꞌanno wote woyi qarru buuto xissiisannonsa woteeti. Kuni manni togoo dano iillitannonsahu mayiraatiro afa hasiꞌranno.

² Maganu qarru iillara faqqadannohu mayiraati? Maganu Yihowa duuchchanka dandaannoha, baxillaancho, hayyichchanna taashsho baxannoha ikkina, alame bunshetenninna taashshote xeꞌnenni woꞌmitinohu mayiraati? Ati togoori mayira ikkannoro xaꞌmite egennootto?

3, 4. (a) Maganu qarru heeꞌrara faqqadinohu mayiraatiro xaꞌma soꞌro ikkitinokkita leellishannohu maati? (b) Bunshenna qarra lainohunni Yihowara mayi macciishshamannosi?

³ Maganu qarru heeꞌrara faqqadinohu mayiraati yee xaꞌma soꞌroteni? Mitu mannira togoo xaꞌmo xaꞌma ammana xeꞌinonsata woyi Magano ayirrissannokkita leellishshannoha lawannonsa. Ikkollana Qullaawa Maxaafa nabbawatto wote, ammanantinori hattono Magano waajjitanno mannooti togoo xaꞌmo xaꞌmitinota huwatatto. Lawishshaho masaalaanchu Imbaaqoomi Yihowa togo yee xaꞌmino: “Dadillisanno coye laeemmo gede mayira assittoe? Qarru iillanna sammi yite laꞌꞌattohuna mayiraati? Baonna finqille albaꞌyaanni noohu mayiraati? Gibbonna gaaru kaꞌꞌannohu mayiraati?”—Imbaaqoomi 1:3.

⁴ Ammanamino masaalaanchi Imbaaqoomi tenne xaꞌmo xaꞌminohura Yihowa hanqinosini? Dihanqinosi. Isinni Yihowa, Imbaaqoomi danchummatenni coyiꞌrinoha konne qaale Qullaawu Maxaafi giddo borreessamanno gede assino. Qoleno Maganu, tenne hajo lainohunni Imbaaqoomira coyi roore xawe leellannosi gedenna ammanasi roore jawaattanno gede kaaꞌlinosi. Yihowa ateno konni garinni kaaꞌlahera hasiꞌranno. Qullaawu Maxaafi, ‘Isi kiꞌnera [assaawanno]’ yaannota qaagi. (1 Pheexiroosi 5:7) Maganu bunsheno ikko bunshe abbitino qarra ayee manchinni roore giwanno. (Isayyaasi 55:8, 9) Ikkina, alamete aana qarru togo batiꞌrinohu mayiraati?

QARRU TOGO BATIꞌRINOHU MAYIRAATI?

5. Mito wote ammaꞌnote marooti qarru iillannohu mayiraati yite kultanno? Qullaawu Maxaafi kayinni mayyaanno?

⁵ Babbaxxitino ammaꞌno giddo noo manni qarru togo mayira batiꞌrinoro xaꞌmara ammaꞌnonsa marootiwanna rosiisaanowa maranno. Ammaꞌnote marootino duuchcha wote, qarru iillannohu Maganu fajjo ikkino daafiraati yite qoltannonsa; qoleno isi dadillisanno coye ikko mitte mittenta ikkito lowo diri albaanni balaxe wossanino yitanno. Batinynyu mannira, Maganu loosi xilqete yine woyi Maganu mannaho qaaqquullu nafa gatikki reyo abbannohu iima ledosi heedharaati yine kullanninsa. Ikkollana albaanni rosittonte gede, Maganu Yihowa horontanni bunshe diassanno. Qullaawu Maxaafi togo yaanno: “Bunshe assa Maganuwiinni faffo; taashsho xeꞌinore assano Duuchchanka Dandaannohuwiinni xeertidho!”—Iyyoobi 34:10.

6. Mannu alamete aana noo qarrira Magano beebba bushiishannohu mayiraati?

⁶ Mannu alamete aana noo qarrira Magano beebba bushiishannohu mayiraatiro afootto? Roorenkanni mannu Duuchchanka Dandaanno Magano bushiishannohu, tenne alame gashshanni noohu iso laweennansaati. Kuni manni Qullaawu Maxaafi rosiisannoha kabbaadannokkihanna hasiisannoha mitto halaale diafino. Ati konne halaale konni maxaafira sayikki fooliishshora rosootto. Tenne alame gashshanni noohu Sheexaane Daawuloosiiti.

7, 8. (a) Alame gashshaanchise akata leellishshannohu hiittoonniiti? (b) Mannu cubbaataamo ikkasi hattono “yannanna agarroonnikki hedeweelcho” qarru heeꞌranno gede assitinohu hiittoonniiti?

⁷ Qullaawu Maxaafi xawise togo yaanno: “Alame [woꞌma] Sheexaanu gashshooti woroonni ikkitino.” (1 Yohaannisi 5:19) Konne coye hedatto wote, tini yaatto gara dilabbannohe? Tini alame illete leellannokkihu mittu ayyaanaamu kalaqami akata leellishshanno; isi ‘manna duuchcha soꞌrisiisanni no.’ (Ajuu[j]a 12:9) Sheexaanu bunshetenni woꞌminoho; dogannohonna kaajjadoho. Konni daafira isi gashshino alameno bunshetenni, dogatenninna kaajjillunni woꞌmitinote. Qarru woꞌminohu umi korkaati konneeti.

⁸ Layinki korkaati kayinni sayikki fooliishshora ronsummonte gede, Edenete kaashshu basera finqille jammartunkunni kayise mannu ooso guunte xeꞌinorenna cubbaataamma ikkansaati. Cubbaataammu manni duuchcha wote kuꞌu koꞌonne roorate sharramanno; hatti sharronsa qolte olu kaꞌꞌanno gede, mimmito coqqontanno gedenna qarru heeꞌranno gede assitanno. (Mekibibi 4:1; 8:9) Qarru heeꞌranno gede assinohu sayikki korkaati kayinni, ‘yannanna agarroonnikki hedeweelchooti.’ (Mekibibi 9:11) Yihowa agarooshshi nookki alamera mannu busha saatera busha bayichcho maransanni qarru iillansara dandaanno.

9. Yihowa qarru heeꞌrara faqqadinohu ikkadu korkaati heeꞌreennasiiti yineemmohu mayiraati?

⁹ Qarra abbannohu Magano ikkinokkita afanke shesho uyitannonke. Mannu aana qarra abbanno olira, jaddote hattono kuꞌu koꞌonne coqqonannotera, wole agurranna kalaqote danora nafa xaꞌmamannohu diꞌꞌisooti. Hatto ikkiro, Yihowa kuni baalu qarri heeꞌrara faqqadinohu mayiraati? yitanno xaꞌmora dawaro afa hasiissannonke. Isi Duuchchanka Dandaannoha ikkiro, qarru iillannota hoolannoti wolqa noosi yaate. Hatto ikkina sammi yiinohu mayiraatiyya? Baxillaanchu Magani sammi yiinohu ikkadu korkaati heeꞌreennasiiti.—1 Yohaannisi 4:8.

MITTE KABBAADE KISSE KALAQANTINO

10. Sheexaanu xaꞌmo kayisinohu maa lainohunniiti? Isi kisse kalaqinohu hiittoonniiti?

¹⁰ Maganu qarru heeꞌrara faqqadino korkaata afate, qarru jammarino yannare badheenge assaawa hasiissannonke. Sheexaanu Addaaminna Heewani Yihowara finqiltanno gede assi wote, mitte kabbaade kisse kalaqino. Sheexaanu tenne kisse kalaqinohu Yihowa wolqa lainohunni diꞌꞌikkino. Isinni Sheexaanu Yihowa wolqara gawalo nookkita afino. Hatteentenni Sheexaanu, Yihowata gashshate mabte lainohunni xaꞌmo kayisino. Sheexaanu, Yihowa gashshannorira dancha coye hoꞌlannohonna kaphphaanchoho yee, Iso bushu gashshaanchi gede asse kassasino. (Kalaqo 3:2-5) Sheexaanu wole yaattonni mannu ooso Maganu gashshooti gobbaanni heedhuro woyyannonsa yiino. Tini Yihowa aliidimma yaano gashshate mabtesi seyaatate.

11. Yihowa Edenete finqilture hakkawotenni shiinokkihu mayiraati?

¹¹ Addaaminna Heewanino Yihowara finqiltu. Wole yaattonni insa togo yitino: ‘Yihowa Gashshaanchonke ikkara dihasiꞌneenno. Bushunna danchu maatiro ninke uminke wossaꞌna dandiineemmo.’ Yihowa kissete dawaro qolinohu hiittoonniiti? Isi assaawate dandoo noonsa kalaqamira baalaho, finqilturi sodhinotanna isi gashshooti ayeewoteno woyyinoha ikkinota rosiisa dandaannohu hiittoonniiti? Mitu manni Maganu finqilaasine shee gude insa bayichcho wole kalaqiro woyyannonka yaara dandaanno. Yihowa kayinni Addaaminna Heewani sirchi uulla woꞌmanno gede alaamu noosita albaanni xawisino; qoleno insa gannate ikkitino uullara heedhara hasiꞌrino. (Kalaqo 1:28) Yihowa ayeewoteno alaamasi wonshanno. (Isayyaasi 55:10, 11) Hakkiinni saeno, Edenete finqilture shaa, Yihowata gashshate mabte lainohunni kaꞌino xaꞌmora dawaro diqoltanno.

12, 13. Yihowa, Sheexaanu tenne alame gashshaancho ikkanno gedenna mannu ooso insaneeto gashshitanno gede faqqadinohu mayiraatiro lawishshunni kuli.

¹² Hanni mitto lawishsha laꞌno. Mittu rosiisaanchi kifilete rosaanora mitte kabbaade shallago loonsanni gara kulanni noo gede assite hedi. Mittu worba ikke heeꞌrenni finqilu rosaanchi, rosiisaanchu shallago loosanno gari digaraho yee coyiꞌri. Kuni rosaanchi rosiisaanchu loose afannokkihu gede asse, tenne shallago woyyitino doogonni looseemmo yee heewisami. Mite rosaano rosaanchu yiinori garaho yite insano finqiltu. Xa rosiisaanchu ma assiro woyyanno? Finqiltino rosaano kifiletenni fushshe huniro, gattino rosaano mayitakka? Finqilino rosaanchinna isira kaaꞌlite finqilturi halaale yitino yite diheddanno? Kifilete gattino rosaano gudisidhe rosiisaanchu koꞌore fushshe huninohu soꞌrosi anfannita waajjeeti yite mishshasira dandiitanno. Kayinni hanni rosiisaanchu finqilu rosaanchi tenne shallago loosate hedino gara leellishara faqqadisi yine hendo.

¹³ Yihowano lawishshu aana laꞌnummo rosiisaanchi gede assino. Tini hajo laꞌannori Edenete noo finqilaasine calla ikkitinokkita qaagi. Miliyoonetenni kiirranni sokkaano konne coye laꞌanni no. (Iyyoobi 38:7; Daanieeli 7:10) Yihowa finqilaasinete qolanno dawaro, tenne baala sokkaanonna gedensaannino assaawate dandoo noonsa kalaqama baala laꞌanno. Ikkina Yihowa ma assiyya? Sheexaanu mannu ooso gashshanno gara leellishara faqqadisi. Qoleno Yihowa mannu ooso Sheexaanu marraꞌꞌannansa umonsa gashshitara faqqadinsa.

14. Yihowa mannu ooso insaneeto gashshitanno gede wossanasi mayi horo uyitanno?

¹⁴ Lawishshu aana laꞌnummo rosiisaanchi, finqili rosaanchinna isi garo sodhinota afino. Qoleno rosiisaanchu finqiltu rosaano shallago loossanno gara leellishshara faqqada kifilete noo rosaano baalate horo uyitannota afino. Finqilaasine hattee shallago loosa hoogguro, finqiltinokkiri wole rosaano kifilete giddo aliidiha ikke marraꞌꞌate dandoo noosihu rosiisaancho calla ikkinota affanno. Hakkunni gedensaanni rosiisaanchu finqiltu rosaano kifiletenni fushshe hunanno korkaati xawe leellannonsa. Hatteente gede, suwashsho wodana afidhinori mannu oosonna sokkaano baalanti Sheexaanehonna iso harunsite finqilturira injiinonsakkitanna mannu ooso insaneeto gashsha dandiitannokkita laꞌuro horo afidhannota Yihowa afino. Tenne laꞌꞌansanni insano hundi masaalaanchi Ermiyaasi gede, aane nooha xinta ikkino halaale buuxxanno: “Yihowaꞌya, manchu beetti doogo umisita ikkitinokkita seekke afoommo. Qaafosi biddi assiꞌra nafa qaafanno manchita diꞌꞌikkitino.”—Ermiyaasi 10:23.

KAGEESHSHITA SEEDA YANNA MAYIRA FAQQADIYYA?

15, 16. (a) Yihowa qarru kageeshshita seeda yanna heeꞌrara faqqadinohu mayiraati? (b) Yihowa, macca gibbanno jaddonna bunshe hoolannokkihu mayiraati?

¹⁵ Ikkina, Yihowa qarru kageeshshita seeda yanna heeꞌrara faqqadinohu mayiraati? Bushu coyi ikkannota hoolannokkihuna mayiraati? Tenne buuxate, lawishshu aana laꞌnummo rosiisaanchi assannokkiha lame coye laꞌno. Umihunni, kuni rosiisaanchi finqilu rosaanchi shallago loosanno gara leellishanno wote mereeroho diuurrisannosi. Layinkihunni, rosiisaanchu finqilu rosaanchira hatte shallago loosa dikaaꞌlannosi. Hatteente gede, Yihowa assa giwate wossaꞌninoha lame coye lai. Umihunni, Yihowa Sheexaanunna isira garo ikkituri gara ikkansa leellishate woꞌnaaltu wote diuurrisinonsa. Konni daafira yanna oye laꞌꞌa hasiissino. Kumunni kiirranni dirira, mannu ooso duuchchu daniha mannu gashshoote woꞌnaaltino. Mannu ooso sayinsetenna wole doogonni mito geeshsha lophphitinoha ikkirono, taashshote xeꞌne, buxima, jaddonna olu bashshonni roore lexxanni haꞌrino. Mannu manna gashshe afannokkiti xabbe leeltino.

¹⁶ Layinkihunni, Sheexaanu tenne alame gashshanna Yihowa dikaaꞌlinosi. Lawishshaho Maganu macca gibbanno jaddo heedhannokki gede assoommero, wole ragaanni finqilture kaaꞌla diꞌꞌikkitanno? Mannu ooso qarru nookkiha insaneeto gashsha dandiitanno yee mannu hedanno gede diassitanno? Yihowa hatto assoommero, kaphphaanote miila ikkanno. Ikkollana “Maganu kaphpha didandaanno.”—Ibiraawuyaani 6:18 NW.

17, 18. Mannu gashshooti hattono Sheexaanu alamete gashshaancho ikkasi abbitino gawajjo baala Yihowa hiissanno?

¹⁷ Finqilaasine Maganoho finqiltuhunni jammarte iillitino gawajjo baala hiikkitannoyya? Yihowa duuchchanka dandaannoha ikkinota qaaga hasiissannonke. Konni daafira isi mannu oosora qarru abbino gawajjo baala dhaawate dandoo noosi; qoleno dhaawanno. Albaanni ronsummonte gede, uullanke gannate ikkitanno wote xa iillitinose gawajjo dhaawantanno. Cubbu abbino gawajjo Yesuusita wodote kakkalo ammanatenni hoꞌlitanno; reyo abbitino gawajjo qolte reyino manni kaꞌꞌanno wote dhaawantanno. Maganu Yesuusa, ‘Daawuloosi looso diigate’ horoonsiꞌranno. (1 Yohaannisi 3:8, NW) Yihowa konne baala hasiissanno yannara wonshanno. Isi rahe qaafo adhinokki daafira galata hasiissannonke; korkaatuno cince yanna uyino daafira halaale afatenna isira soqqamate kaayyo afiꞌnoommo. (2 Pheexiroosi 3:9, 10) Maganu hundinni jammare, halaalunni magansiꞌrannosi manna seekke hasanninna tenne qarru woꞌmino alame giddo iillannonsa qarra dandiite heedhanno gede kaaꞌlanni keeshshino.—Yohaannisi 4:23; 1 Qorontoosi 10:13.

¹⁸ Mitu manni, Maganu Addaaminna Heewani finqiltannokki gede asse kalaqoommero kuni baalu qarri heeꞌrannoni? yaara dandaanno. Tenne xaꞌmora dawaro afiꞌrate, Yihowa uyinoheta mitte muxxete elto qaaga hasiissannohe.

MAGANU UYINOHE ELTO HOROONSIꞌRATTOHU HIITTOONNIITI?

19. Yihowa uyinonketi muxxete elto maati? Tenne elto kaffi asse laꞌꞌa hasiissannonkehu mayiraati?

¹⁹ Fooliishsho ontete ronsummonte gede, mannu ooso baxisinonsare doodhate mabte uyineenna kalaqantino. Tini elto mageeshshi geeshsha muxxe ikkitinoro wodanchootto? Maganu batinynye saada kalaqino; tini saada baala heedhannohu garri-garimmo laꞌe diꞌꞌikkino. (Lawishsha 30:24) Mannu ooso, uyinoonnise hajajo harunsite loossanno rooboote woyi maashine loossino. Maganu ninkeno hatto asse kalaqoommenkero baxisannonke? Dibaxisannonke. Hiittoo manna ikkineemmoro, hiittoo heeshsho heeꞌneemmoro, hiittoo manni ledo jaalooꞌma hasiꞌneemmoronna w.k.l doodhate mabte noonke daafira tashshi yaannonke. Ninke mannu ooso quwa saꞌinokkiti doodhate mabte heedhankera hasiꞌneemmo; Maganuno togoo mabte heedhankera hasiꞌranno.

20, 21. Doodhate mabtenke duuchchunkunni woyyino garinni horoonsiꞌra dandiineemmohu hiittoonniiti? Hatto assa hasiissannonkehuna mayiraati?

²⁰ Yihowa giddeessineennanke soqqammammosira dihasiꞌranno. (2 Qorontoosi 9:7) Lawishshaho, mittu qaaqqi yii yineenna baxeemmohe yiironna, umisinni kae baxeemmohe yiiro annasi woyi amasi roore hagiirsiisannohu hiikkonneeti? Konni daafira, Yihowa uyinoheta doodhate mabte horoonsiꞌrattohu hiittoonniiti? yitanno xaꞌmo xaꞌma hasiissannote. Sheexaanu, hattono Addaaminna Heewani doodhate mabtensa horo bushu garinni horoonsidhino. Insa Yihowa effidhe gibbino. Atina?

²¹ Xaggete elto ikkitinota doodhate mabtekki duuchchunkunni woyyino garinni horoonsiꞌratto kaayyo noohe. Yihowara kaaꞌlite uurritinorira miliyoonetenni kiirranni mannira miila ikka dandaatto. Kuri mannooti Sheexaanu kaphphaanchonna danchu garinni gashsha dandaannokkiha ikkinota heeshshonsanni leellishshino daafira Maganu wodana tashshi assitino. (Lawishsha 27:11) Atino gara ikkitino heeshsho heeꞌratenni insa gede assa dandaatto. Tenne lainohunni aantanno fooliishshora ronseemmo.