ROSO 1
Yihowa Farciꞌraasine Hiittoo Mannaati?
Denimaarke
Tayiwaane
Venizuweela
Hinde
Ati Yihowa Farciꞌraasine giddo meꞌꞌe egennootto? Ninke giddo mitu ollaakki ikkitara dandiitanno, woy ate ledo mitteenni loossannore woy rossannore ikkitara dandiitanno. Woy ate ledo Qullaawu Maxaafire hasaamboommoha ikkara dandaanno. Isi ninke ayeooti? Ammananke faajjete fulle sabbankeemmohu mayiraati?
Ninkeno wolu manni gedeereentilla. Addi addi gosa giddonni, hattono addi addi gari heeshshonni gamba yinoommoreeti. Ninke giddo mitu konni albaanni wole ammaꞌno harunsitannoreeti, wolootu kayinni Maganu noota ammantannokkireeti. Ikkollana, Yihowa Farciꞌraasine ikkinammora albaanni, ninke baalunku Qullaawu Maxaafi yaannore seekkine xiinxallinummo. (Soqqamaanote Looso 17:11) Ronsoommo coyi ammansiisinke, hakkiinnino Magano Yihowa magansiꞌrate uminkenni doodhinoommo.
Qullaawa Maxaafa xiinxallanke kaaꞌlitinonke. Wolu manninte gede, ninkerano mitiinsannori iillannonke, hattono uminke laanfe noonkereeti. Ikkollana, Qullaawu Maxaafi amaale harunsanke, heeshshonke lowonta woyyeessitinonke. (Faarso 128:1, 2) Qullaawu Maxaafinni ronsoommoha dancha coye mannaho kulleemmohu mittu korkaati, wolootuno heeshshonsa woyyeessidharaati.
Heeꞌneemmohu Maganu seerinniiti. Qullaawu Maxaafi rosiisannonte gede, kuni seeri fayyuulle ikkine heeꞌnanni gede, manna ayirrinsanni gede, hattono ammanamanna danchumma lawinohu baxisanno akati heeꞌrannonke gede kaaꞌlanno. Hattono dagoomu giddo fayyunna kaaꞌlanno manni heeꞌranno gede, qoleno maatete giddo mittimmanna amanyootu heeꞌranno gede kaaꞌlanno. ‘Maganu godowa hosannokkiha’ ikkinota ammanneemmo daafira, sirchunna poletiku babbadooshshi nookkita, hattono ammanatenni mitte ikkitinota alamete doyicho maate ikkinoommo. Mitto mitto laꞌniro wolu manni gedeereentilla, mitteenni gamba yine kayinni baxxino manna ikkinoommo.—Soqqamaanote Looso 4:13; 10:34, 35.
Yihowa Farciꞌraasine wolu manni ledo mitto assannonsahu maati?
Yihowa Farciꞌraasine Qullaawa Maxaafa xiinxallansanni hiittoo seera rossino?