ROSO 3
Qullaawu Maxaafi Halaali Galagale Xawo Fulinohu Hiittoonniiti?
Qullaawu Maxaafi Rosaano, 1870 kawa
Umo fultinota Agarooshshu Shae, 1879nni
Agarooshshu Shae, xaa yannara
Qullaawu Maxaafi, Kiristoosi reyihu gedensaanni addu Kiristaani mereero kaphaano rosiisaano fultannotanna Qullaawu Maxaafi halaale booreessitannota masaalino. (Soqqamaanote Looso 20:29, 30) Yannate gedensaanni tini masaalo woꞌmitino. Tini rosiisaano Yesuusi rosiisino roso Magano affinokki daga rosi ledo karsiissino; konni garinni suꞌmu Kiristinni xintamino. (2 Ximootewosi 4:3, 4) Ikkina xaa yannara Qullaawu Maxaafi yaannore garunni huwantoommota mayinni buuxa dandiineemmo?
Yihowa halaale xawisanno yanna iillitu. Isi ‘goofimarchu yannara halaalaancho egenno batidhannota’ balaxe coyiꞌrino. (Daanieeli 12:4) Halaale hasiꞌranno manna amaddinoti mitte shiima gaamo 1870nni, batinye beetekiristaanna rosiissanno rosi Qullaawa Borro giddo nookkita huwattu. Konni daafira, Qullaawu Maxaafi addinta mayyaannoro buuxate xiinxalla hanaffu; Yihowa qole insara Qullaawa Borro yitannore huwattanno gede wodancha uyinsa.
Suwashshu wodani noonsari Qullaawa Maxaafa seekkite xiinxallitu. Maganu Qaale diinaggaabbe xiinxallitinori hakkawaro Qullaawu Maxaafi Rosaano yinanniri Yihowa Farciꞌraasine, xaa geeshsha ninke xiinxallote horoonsiꞌneemmo hayyo horoonsidhino. Insa Qullaawu Maxaafiha mitto mittonka birxicho hasaabbino. Huwatate qarrissannoti Qullaawu Maxaafi hedo tuncu yitannonsa woyite hattee hedo xawisannoha wole qummeeshsha hasidhanno. Insa mitte hedo wole Qullaawa Borro hedo ledo sumuu yaanno garinni huwattu gedensaanni, wodanchitino coye borreessite wodhitanno. Konni garinni Qullaawu Maxaafi isi isonooto xawisanno gede assansa, Maganu suꞌmirenna Mangistesire, mannu oosoranna uullate noosi hedore, reyino manni noo gara, hattono kaote hexxore halaale haaro ikkite wodanchitanno gede assitinonsa. Halaale hasiꞌransa, batinyu kaphu rosinninna assootinni keere fushshitinonsa.—Yohaannisi 8:31, 32.
Tini Qullaawu Maxaafi Rosaano 1879nni halaale gobba baala iillishate yanna iillitinota wodanchitu. Konni daafira hakko dironni, xaa geeshsha qixxaabbanni noota, Yihowa Mangiste Egensiissannota Agarooshshu Shae yinanni borro attama hanaffu. Xaa yannara Qullaawu Maxaafi halaale 240 gobbara 750 saꞌꞌanno afiinni sabbankanni heeꞌnoommo. Halaalaancho egenno yannankera batidhino gede ikkite batidhe diegentino!
Kiristoosi reyihu gedensaanni, Qullaawu Maxaafi halaali ma ikkino?
Maganu Qaali giddo noo halaali galagale xawo fulanno gede assinohu maati?