Xaaddote Koyishsha
1. Manna gambooshsheho koyisate zamacha jammarreemmohu mamooteeti?
1 Maateꞌnera woy jaallaꞌnera lowo woxe fushshitinenna daafurtine dancha sagale koyissinansara kultinanninsa wote, hagiidhitine kultinanniti egennantinote. Hatteente gede albillitte daannohu qoqqowu gambooshshira shiqannoha ayyaanaamittete jila qixxeessate lowore assinoonni. Konne gambooshshi jammarate sase lamala gatte heedheenna manna koyinseemmo gede Yihowa qoosso uyinonke. Ikkina konni gambooshshira manna hagiidhine koyisate kaaꞌlannonkeri maati?
2. Zamachu yannara diinaggaambe soqqammeemmo gede assannonkeri maati?
2 Yihowa qixxeessannonkehu togoo gambooshshinni afiꞌnoommo horo kaffi assine laꞌneemmoha ikkiro, tini manna koyisate zamacha jammarranni wote dancha gede soqqammeemmo gede assitankera dandiitanno. (Isa. 65:13, 14) Qoleno dirunni mitte hinge assineemmohu kuni zamachi guma abbannotano qaaga hasiissannonke. (“Guma Abbanno Zamacha” yitanno saaxine lai.) Koyinseemmohu baalu manni daa hoogirono gamu kayinni daanno. Daanno manni ajo batiro zamachu yannara diinaggaambe loosanke kayinni Yihowa ayirranno gede assitanno, qolteno isi shaqqado ikkinota leellishshanno.—Far. 145:3, 7; Aju. 22:17.
3. Koyishshu woraqata tuqinsannihu hiittoonniiti?
3 Koyishshu woraqata halashshine tuqinsanni gara lainohunni, lawishshaho mannu qaete hooganno wote waalchoho wore haꞌranna gudumaaleho farciꞌnanni wote aa hasiissannoronna teꞌee lainohunni cimeeyyete bisi wossana hasiissanno. Injaannoha ikkiro Qidaamenna Sambata koyishshu woraqati ledo metseetta ela hasiissanno. Zamachu goofihu gedensaanni, Yihowa qixxeessinohura ayyaanaamittete jilira lowo manni ledonke gamba yaannota hendeemmo wote, zamachu yannara diinaggaambe soqqamanke hagiirsiissannonke!