Sabbakate Loosonke Loonseemmohu Ma Garinniiti?

Yesuusi reyara shiimu barri albaanni togo yiino: “Kuni [Maganu] Mangistehu danchu duduwi uulla woꞌmate sabbakamanno; hakkiinnino goofimarchu daanno.” (Maatewoosi 24:14) Ikkina konne alame woꞌmate loosamannoha sabbakate looso loosa dandiinannihu ma garinniiti? Yesuusi uullate aana noo waro konne looso loosino garinni loonsummorooti.—Luqaasi 8:1.

Mannaho qaensara marre sabbankeemmo. Yesuusi rosaanosi dancha duduwo minunni mine hadhe dudubbanno gede rosiisino. (Maatewoosi 10:11-13; Soqqamaanote Looso 5:42; 20:20) Kuri umi xibbi diri sawaakootira hiikko sabbaka hasiissannonsaro bande kulloonninsa. (Maatewoosi 10:5, 6; 2 Qorontoosi 10:13) Yannankerano sabbakate loosi danchu garinni qinaawinoho; qoleno mitte mittenti songo sabbakkannoha umise qoqqowo afidhino. Tini qolte, Yesuusi “mannaho dancha duduwo dudumbeemmo gedenna seekkine farciꞌneemmo” gede uyinonke hajajo wonshate kaaꞌlitannonke.—Soqqamaanote Looso 10:42.

Mannu noowa baalankawa haꞌneemmo. Yesuusi duuchu manni daannowano lawishshaho, baaru gamanna wayi balewa sabbake lawishsha ikkino. (Marqoosi 4:1; Yohaannisi 4:5-15) Ninkeno mannu noowa baalankawa, yaano doogote aana, daddalu basera, paarkete giddo, woy silketenni Qullaawu Maxaafire kulleemmo. Qoleno injiitino yanna afiˈnummoro olliinkera, ledonke loossannoriranna rossannorira, hattono fiixinkera farciꞌneemmo. Konne baala assanke, uulla woꞌmate aana noohu lowo miliyoone ikkanno manni ‘gatonniha dancha duduwo’ macciishshanno gede faro fantino.—Faarso 96:2.

Ati Maganu Mangisteha dancha duduwonna albillittete mannu oosora noo hexxo kulate hedootto manni no? Tenne hexxo umikki calla affe sammi yitooti. Dandaamihero xaanni hanaffe mannaho kuli!

• Duduwa hasiissannonkehu “danchu duduwi” hiikkonneeti?

• Yihowa Farciꞌraasine Yesuusi sabbakino garinni sabbakkanni noohu hiittoonniiti?