FOOLIISHSHO 11
‘Adhanna Adhama Ayirrado Ikkito’
“Wedellimmate galtekkinni hagiidhi.” —LAWISHSHA 5:18.
1, 2. Aanchine hiitte xaꞌmore laꞌneemmo? Mayira?
ATI seenne adhootto?a Adhoottoha ikkiro, adhakkinni hagiirre afiꞌroottonso, buutote qarri giddo nootto? Galtekki ledo noohe jaaloomi fongoganni haꞌrinoni? Adhamatenni afiꞌnanni hagiirre afiꞌrittokki cincite calla nootto? Hatto ikkiro, noohe hagiirri xa ajanni haꞌreenna dadillittokki digatootto. Kiristaana ikkootto daafira, adhamakki baxatto Maganira Yihowara ayirrinynye abbitara hasiꞌrattoti dihuluullissannote. Konnira xa nooheti maatete mitiimma lowo geeshsha mitiinsitinohehanna xissiissinoheha ikkara dandaanno. Ikkeennano xa nootto gara horonta soorramannokkihu gede assite heddooti.
2 Konni albaanni maatensa heeshshonni hagiirre afiꞌrikki cince calla heeꞌrinohu, xa kayinni hagiirre afiꞌra dandiinohu haammatu minaanninna minaama no. Xa kuni manni jaaloomansa jawaachchishiꞌra dandaanno doogo rosino. Atino maatekki heeshshonni roore hagiirre afiꞌra dandaatto. Hiittoonni?
MAGANUNNIWANNA GALTEKKIWA ROORE SHIQI
3, 4. Adhamino manni Maganunniwa roore shiqate sharro assansa galtensa ledo roore gamba yaate kaaꞌlitannonsahu hiittoonniiti? Lawishshunni kuli.
3 Atinna galtekki Maganunniwa albinni roore shiqqiniro, mimmitiꞌnewano roore shiqqinanni. Mayira? Hanni woriido halaꞌle guunxo shaalinoha mitto ilaala lawishsha assine adhino. Mittu manchi konni ilaalira hundaho mitto ragaanni, mitte mancho qolte wole ragaanni uurritino. Lamunku hakko ilaala gidda jammari. Ilaalaho hundaanni noo wote lamunku mereero lowo badooshshi no. Ikkeennano lamunku konne aliido shaalino ilaala giddanni haꞌri kiiro, mereeronsa noo xeertinynyi ajanni haꞌranno. Konni lawishshinni afiꞌnanniha dancha roso huwatitto?
4 Yihowara woꞌmunni woꞌma soqqamate assatto sharro ilaala giddate assatto sharro labbanno yaa dandiinanni. Yihowa baxatto daafira, togoo sharro assa wonanni jammarte nootto. Ikkollana galtekkinna ate mereero noo baxilli qiidinoha ikkiro, lamunku ilaala kawanna kaꞌaanni gidditinanni heedhinoonni yaate. Ikkeennano lamunku alillichcho giddaꞌne agura hoogginiro mayi maikkanno? Umi qara mereeroꞌne lowo xeertinynyi heeꞌrara dandaanno. Ikkollana Maganunniwa shiqqinanni hadhini kiiro, yaano alillichcho gidda agura hoogginiro, mimmitiꞌnewa roore shiqqinanni. Addaho, Maganunniwa shinqanni haꞌra, galtete ledo albinni roore shiqate qara coyeeti. Ikkina tenne assa dandiitinannihu hiittoonniiti?
Qullaawu Maxaafinni afiꞌnanni egenno loosu aana hosiissiniro, adhamaꞌne jawaata assate wolqa afidhino
5. (a) Maganunniwanna galtenniwa roore gamba yaa dandiinanniti mitte doogo hiitteeti? (b) Yihowa adhanna adhama hiittoonni laꞌꞌanno?
5 Lawishshu yaattonni ilaala gidda dandiitinanniti mitte doogo, atino galtekkino adhanna adhama lainohunni Maganu Qaali giddo noo amaale seekke harunsate. (Faarso 25:4; Isayyaasi 48:17, 18) Konni daafira, hawaariya Phaawuloosi tennera xawise uyino amaale wodanchi. Togo yiino: ‘Adhanna adhama ayirrado ikkito.’ (Ibiraawuyaani 13:4) Hatto yaasi mayyaate? ‘Ayirrado’ yaanno qaali mitto kaffi assine laꞌnanni coye, hattono muxxe ikkinore xawisanno. Yihowa adhanna adhama laꞌꞌannohu konni garinniiti; yaano muxxe ikkinorichchi gede asse laꞌꞌanno.
MIMMITOꞌNE BAXATE KAKKAYISANNOꞌNEHU YIHOWARA NOOꞌNEHO GIDDO BAXILLEETI
6. Phaawuloosi adhanna adhama lainohunni uyino amaale maa kultanno? Tenne bade afa maaho kaaꞌlitanno?
6 Maganu soqqamaano ikkitinoonni daafira, atino ikko galtekki adhanna adhama kaffi assine laꞌnannita, hakkii saeno qullaawa ikkitinota affinoonni. Adhanna adhamate qixxaawo assinohu Yihowa umosiiti. (Maatewoosi 19:4-6) Ikkollana atenna galtekki mereero qarru kalaqaminoha ikkiro, adhanna adhama ayirrado ikkitinota afaꞌne calla mimmitoꞌne baxillunninna ayirrinynyunni amadate kakkayisa hooggaꞌnera dandiitanno. Ikkina tenne assate kakkayisannoꞌneri maati? Phaawuloosi adhanna adhama kaffi asse laꞌꞌannire coyiꞌrino gara seekkite huwati. Isi coyiꞌri wote, “Adhanna adhama ayirradote” diyiino; hatteentenni, ‘Adhanna adhama ayirrado ikkito’ yiino. Phaawuloosi macciishshaminosire coyiꞌranni nooha ikkikkinni assa hasiissannonkere kaajjishe kulanni no.b Tenne badde afakki, galtekkira baxille leellishate haaro ikkite kaꞌꞌatto gede kakkayissahera dandiitanno. Hiitto?
7. (a) Wonsha hasiissannonke hajajubba hiikkuriiti? Wonshineemmohuna mayiraati? (b) Togoo hajajo wonshanke mayi xiqime afidhino?
7 Manna rosaano assineemmo gede uyinoonninke halaafinate woyi gambooshshe haꞌneemmo gede uyinoonninke hajajonna wole Qullaawa Borro giddo noo hajajo hiittoonni laꞌꞌattoro hanni hedi. (Maatewoosi 28:19; Ibiraawuyaani 10:24, 25) Tenne hajajubba wonsha mito wote kabbaaddannoti dikaandannite. Sabbakatto manni yaattore adha giwara dandaanno; woyi loosatto loosi lowo geeshsha daafursannohe daafira songote gambooshshe haꞌra kabbaaddahera dandiitanno. Ikkeennano Maganu Mangiste sokka duduwano ikko Kiristaanu songo ledo gamba yaa diaguratto. Tenne assattota wole agurina Sheexaanu nafa hoolahera didandaanno! Mayira? Yihowa lubbora baxakki hajajosi wonshatto gede kakkayissannohe daafiraati. (1 Yohaannisi 5:3) Tenne assakki mayi xiqime afidhino? Sabbakano ikko songote gambooshshe haꞌrakki, giddoyiidi keerenna hagiirre uyitannohe; korkaatuno tenne assakki Maganu fajjo assa ikkitinota afootto. Togoo hagiirrenna keere afiꞌrakki qolte roore jawaatatto gede kaaꞌlitannohe. (Nehimiya 8:10) Tennenni mayi roso afiꞌneemmo?
8, 9. (a) Adhamanke ayirrado assiꞌrate uyinoonninke hajajo wonshate kakkayisannonkeri maati? Mayira? (b) Aanchine hiittee lame assaawe laꞌneemmo?
8 Magano lubbora baxakki sabbakatenna gambooshshe haꞌrate uyinoonni hajajo gufichcho ikkannori heeꞌreennanni wonshattora kakkayissuhente gede, Maganoho noohe baxilli ‘Adhanna adhama ayirrado ikkito’ yitanno hajajo mito wote kabbaadduhero nafa wonshatto gede kakkayisannohe. (Ibiraawuyaani 13:4; Faarso 18:29; Mekibibi 5:4) Hakkii saeno, sabbakatenna gambooshshe haꞌrate sharro assakki Maganuwiinni lowo atoote abbitannohente gede, adhamakki kaffi assite laꞌꞌate assatto sharrono Yihowa laꞌꞌanno, hattono maassiꞌrannohe.—1 Teselonqe 1:3; Ibiraawuyaani 6:10.
9 Ikkina adhamakki ayirrado assiꞌra dandaattohu hiittoonniiti? Adhamate qixxaawo shotisanno akata hooꞌla hasiissannohe. Qolteno, jaaloomaꞌne jawaachchishannore assa hasiissannohe.
ADHAMAKKI SHOTISANNO COYENNA AKATA HOOꞌLI
10, 11. (a) Adhanna adhama shotisannohu hiittoo akataati? (b) Galtenke mayine xaꞌma hasiissannonke?
10 Mitte Kiristaancho minaama shiimu diri albaanni, “Cince heeꞌreemma gede kaaꞌlaera Yihowa huucciꞌroomma” yitino. Cincitannori maati? Togo yite kultino: “Minaanniꞌya bushu qaalinni madiissannoe. Illete leellanno bassi dinoe; ikkeennano, ‘Duha ikkoottae! Dixaqqamattate!’ yaanni duuchchaage coyiꞌrannoti xissiissanno qaalla wodanaꞌya madiissitinoe.” Tini mancho maatete giddo seekke hixamanynya hasiissanno hajo, yaano goddaasanno coye coyiꞌrannire xawissino.
11 Kiristaanu maate giddo minaannino ikko minaama mimmito goddaassanno qaalla coyiꞌre rakke hurtannokki mada kalaqansa lowonta dadillissannote! Anfoommonte gede, duuchcha wote goddaassanno qaalla coyiꞌra adhama ayirrado diassitanno. Tenne widoonni kiꞌne adhama hiittoote? Hiittootero afate rambaꞌnetenni, “Coyiꞌreemmo qaali goddaasannohenso hiittooti?” yite galtekki xaꞌmi. Galtekki, coyiꞌrootto qaali duuchchaage xissiisinoseta kultuhero, konne coye woyyeessate maahoyye yaa hasiissannohe.—Galatiya 5:15; Efesooni 4:31.
12. Mittu manchi magansiꞌra Maganu albaanni mulla daafuro ikkitara dandiitannohu hiittoonniiti?
12 Galtekki coyishiishatto gari Yihowa ledo noohe fiixoomi ledo xaado afiꞌrinota wodanchi. Qullaawu Maxaafi togo yaanno: “Ayee manchino Magano magansiꞌranni nooha lawisirono arrawosi kayinni qeeꞌlannokkiha ikkiro, isonooto doganni no; konni manchi magansiꞌra beebbate.” (Yaaqoobi 1:26, NW) Coyiꞌratto coyinna magansiꞌrakki babbande laꞌnannire diꞌꞌikkino. Mittu manchi Maganoho soqqamanni noommo yii geeshsha mine baxire assiꞌrono qarru dino yitanno hedo Qullaawu Maxaafi didaggafanno. Kuni haariimote coye diꞌꞌikkinona, ballo ateneeto doggooti. (1 Pheexiroosi 3:7) Duuchchare diinaggaabbe assate dandoo heedhahera dandiitanno; ikkeennano affanni heedhenni galtekki arrawunni madiissattoha ikkiro, adhamaꞌne shotissanni nootto, konnira magansiꞌrakki Maganu albaanni mulla daafuro ikkitanno.
13. Mittu manchi galtesi xissiisara dandaannohu ma garinniiti?
13 Qoleno minaannino ikko minaama hedinokki garinni mimmito xissiisannokki gede qorophpha hasiissannonsa. Hanni lame lawishsha laꞌno: Minaanni noosekkiha oosose lossidhannoti mitte mancho amaale aannose gede galte noosi rodiiwa duuchcha wote silke dowwoltanno; hakkiinnino silketenni lowo yanna hasaawanno; seenne adhinokkihu mittu Kiristaanchi qole saammintete kiiro mitte mine assidhino rodoo ledo soqqansho fule lowo yanna mitteenni sayisanno. Lamunku lawishshira kulliri galte noonsa roduuwi tenne assannohu dancha hedonni ikkara dandaanno; ikkina ikkitonsa galtensa baxissannote? Togoori tuncu yiinoseti mitte minaama togo yitino: “Minaanniꞌya songote giddo nootera wole rodoora lowo yanna oye illachcha tugannota laꞌꞌaꞌya xissiissannoe. Tini wolootuwiinni ajoommahu gede ikke macciishshamannoe gede assitannoe.”
14. (a) Kalaqo 2:24 aana minaanniranna minaamara mayi halaafinate uyinoonni? (b) Ninkeneeto mayine xaꞌma hasiissannonke?
14 Tini minaamanna togoori tuncu yiinonsari wolootu mayira xissiisidhinoro huwata diqarrissanno. Minaanninsa woyi minaamansa adhanna adhama lainohunni Maganu uyinoha qara biddishsha diharunsitino: “Manchu annasinna amasi aguranno, galtesi ledono quraanynyamanno.” (Kalaqo 2:24) Adhantinori annansanna amansa ayirrisa hasiissannonsati dikaandannite; ikkollana galtensara roore illachcha tugganno gede halaafinate uyinonsahu Maganoho. Qoleno Kiristaanu ammanate roduuwansa lubbora baxanno; ikkeennano rooru halaafinati noonsahu galtensaraati. Konni daafira, adhamino Kiristaani ammanate roduuwinsa ledo hakko iso minaanni meyaate ledo, minaama labbaahu ledo gabbaꞌꞌannohunni aleenni yanna sayisannoha ikkiro, woyi danna sae gamba yaannoha ikkiro maatete giddo buutote qarri kalaqamanno. Atenna galtekki mereero qarra kalaqinohu togoo coyetini? Ateneeto togo yite xaꞌmi: ‘Isi ani addinta galteꞌya ledo baqete yanna sayiseemmo? Illachcha tuge towaateemmose? Gabbaꞌꞌannose baxille leellisheemmose?’
15. Maatewoosi 5:28 garinni, adhamino Kiristaani galtensa ikkinokki mannira gabbaꞌꞌannokki garinni illachcha tuga qorophpha hasiissannonsahu mayiraati?
15 Hakkiinni saeno, adhamino Kiristaani galtensa ikkitinokki meyaatera woyi labbaahura gabbaꞌꞌannokki garinni illachcha tugannoha ikkiro, buutote qarri aana uwara dandaanno. Mitu adhamino Kiristaani quwa sae gamba yiino roduuwi ledo baxillunni amadamate geeshsha iillino; tini dadillissannote. (Maatewoosi 5:28) Togoo baxillinni quraanynyamansa, adhanna adhama roore shotisannore assate widira massitinonsa. Hanni hawaariya Phaawuloosi tennera mayinoro wodanchi.
“ADHAMATE MAꞌNANO BATTETENNI KEERAAꞌMITINOTA IKKITO”
16. Phaawuloosi adhanna adhama lainohunni mayitanno hajajo uyino?
16 Phaawuloosi ‘Adhanna adhama ayirrado ikkito’ yitanno hajajo uyihu gedensaanni hakkawontenni, “Adhamate maꞌnano battetenni keeraaꞌmitinota ikkito; korkaatuno, foortannorenna soorritannore Maganu faradanno” yaanno qorowishsha uyino. (Ibiraawuyaani 13:4, NW) Phaawuloosi horoonsiꞌrinohu “adhamate maꞌna” yaanno qaali siimu xaado kulannoho. Siimu xaadi adhamino labbaahunna meyaati calla assannoha ikkiro ‘battetenni keeraaꞌminoha’ yaano xuru nookkiha ikkanno. Konni daafira Kiristaanu, “Wedellimmate galtekkinni hagiidhi” yaannoha ayyaanunni borreessamino qaale harunsanno.—Lawishsha 5:18.
17. (a) Alame soorro laꞌanno gari hoshooshannonsakki gede Kiristaanu qorophpha hasiissannonsahu mayiraati? (b) Iyyoobi faale harunsa dandiineemmohu hiittoonniiti?
17 Galtensa agurte wolu ledo siimu xaado assitannori Maganu fushshinota amanynyootu higge lowonta mishshino yaate. Xaa yannara batinynyu manni soorro mitto qarra afidhinokkihu gede asse laꞌꞌanno. Ikkirono Kiristaanu, wolu manni soorro laꞌꞌanno gari laonsa hoshooshannokki gede qorophpha hasiissannonsa. Kiristaanu goofimarchu yannara ‘fooraasinenna soorraasine faradannohu’ mancho ikkikkinni ‘Magano’ ikkinota afino. (Ibiraawuyaani 10:31; 12:29) Konni daafira, Maganoho tenne hajora noosi lao addu Kiristaani seekke harunsanno. (Roomu Sokka 12:9) Ammanamino manchi Iyyoobi yiinore hanni wodanchi: “Illeꞌya ledo gondooro eoommo.” (Iyyoobi 31:1) Addu Kiristaani soorrote widira massannore hilire nafa assannokki gede, hattono galtensa ikkinokki labbaaha woyi meyaata yortote illenni laꞌꞌannokki gede qorophphanno.—Qoola 251-253 noo Guwuursha lai.
18. (a) Soorro Yihowa albaanni mageeshshi cubbooti? (b) Soorronna kaphphu maganna magansiꞌra mitto assannori maati?
18 Soorro Yihowa albaanni mageeshshi cubbooti? Muse Higge, Yihowara soorrote mayi lao noosiro huwanteemmo gede kaaꞌlitannonke. Isiraeelete waro, soorronna kaphphu maganna magansiꞌra reyote qorichcha abbanno cubbooti. (Zelewaawuyaani 20:2, 10) Lamenka mitto assannori noota huwatootto? Mittu Isiraeelaawichchi kaphphu magano magansiꞌriro, Yihowa ledo eino qaale diiganno. Hatteente gede, mittu Isiraeelaawichchi soorriro galtesi ledo eino qaale diiganno. Lamunku manchi ammanama xeꞌinore assitino. (Wolaphpho 19:5, 6; Marro 5:9; Milkiyaasi 2:14) Konni daafira, lamunku ammanaminonna addaxxinanni Magani Yihowa albaanni xaꞌmantanno.—Faarso 33:4.
19. Mittu Kiristaanchi soorrotewiinni xooqanno gede wolqa ikkannosiri maati? Mayira?
19 Kiristaanu Muse Higge woroonni nookkiti egennantinote. Ikkollana Kiristaanu, Isiraeelete waro soorro kabbaade cubbo ikkitino gede assine laꞌnannita huwatansa, togoo cubbo loosannokki gede wolqa ikkitannonsa. Mayira? Hanni konne coye hedi: Beetekiristaane marte, misilete albaanni guluphphite huuccatto assiꞌratto? ‘Horontanni!’ yite qolattoti egennantinote. Lowo woxe uyiniherona, tenne assate dogamatto? Hatto yiniherono, ‘Ciranka!’ yite qolatto. Addaho, kaphphu magano magansiꞌre Yihowa kaada agurina, tenne assaawa nafa addu Kiristaani makkirannoreeti. Hatteente gede, Kiristaanu ayee coyinnino dogame soorro assatenni Maganonsa Yihowanna galtensa kaadate assaawe nafa makkira hasiissannonsa. (Faarso 51:1, 4; Qolasiyaasi 3:5) Yihowanna qullaawa adhama lowonta shotise, Sheexaane tashshi assannoha togoo cubbo loosa horonta dihasiꞌneemmo.
MITTIMMAꞌNE JAWAACHCHISHIꞌRA DANDAATTOHU HIITTOONNIITI?
20. Mitu mitu minaanniranna minaamara mereeronsa mayi kalaqamino? Lawishshunni kuli.
20 Adhamaꞌne shotisannoriwiinni xeertiꞌratenni saꞌe, galtekkira albinni rooru ayirrinynyi heeꞌrannohe gede maa assa dandaatto? Tennera dawaro qolate, hanni adhamaꞌne minu gede assite hedi. Hakkiinnino minaanninna minaama mimmitoho baxille leellishate assannore, danchu qaalinni coyiꞌra, hede danchare assanna adhama ayirrado assannore wolere kayinni mineho biinfille ledate mine wodhinanni uduunni gede assite hedi. Mimmitiꞌnewa gamba yitinoonnihu gede ikke macciishshamiꞌnero adhamaꞌne, biifisannorinna waraꞌa assannori woꞌmino mine labbanno. Baxilliꞌne qiidiro kayinni togoori biifisannori mittu mittu fulanni baꞌꞌanno; konni garinni adhamaꞌne biifisannori nookki mini gede mullichcho ikkitanno. ‘Adhanna adhama ayirrado ikkito’ yitannota Maganu hajajo wonsha hasiꞌratto daafira, togoori heeꞌriro biddi assate maahoyye yaatto. Qoleno mitto muxxe ikkinore, hattono kaffi assine laꞌnannire gatamaranna haaroonsa nooreeti. Tenne assa dandaattohu hiittoonniiti? Maganu Qaali togo yaanno: “Mine hayyotenni miꞌninanni; wodanchatennino kaajje uurranno gede assiꞌnanni. Qoleno waaga afiꞌrinohu, muxxe ikkinohunna hagiirsiisanno uduunni mineho giddiidi kifillara woꞌmanno gede egennotenni assiꞌnanni.” (Lawishsha 24:3, 4) Tenne xiqise minaanninna minaama loosu aana hosiisa dandaanno gara wodanchi.
21. Adhamanke sunu sununni jawaata assiꞌra dandiineemmohu hiittoonniiti? (Qoola 149 noo saaxineno lai.)
21 Mine woꞌmannohu ‘muxxe ikkino uduunni’ giddo gamu addu baxilleeti, Magano waajjatenna jawaata ammanaati. (Lawishsha 15:16, 17; 1 Pheexiroosi 1:7) Togoo akatta adhama jawaata assitanno. Ikkina Lawishshu xiqisera kulli minira muxxe ikkino uduunni woꞌmanno gede assinoonnihu mayinniitiro huwatootto? “Egennotenni” assinoonni. Addaho Qullaawu Maxaafinni afiꞌnanni egenno loosu aana hosiinsiro, mannu assaawanno gara soorritaranna mimmitoho noonsa baxille lossiꞌranno gede assitara dandiitanno. (Roomu Sokka 12:2; Filiphphisiyusi 1:9) Konnira, atinna galtekki gamba yitine barru qummeeshsha, woyi adhanna adhamannire coyidhannota Agarooshshu Shae woyi Baqqi Yiiyye! yinanni metsiheete aana fultinota Qullaawa Borro aana xintantino birxe muddantinikki xiinxallitinanniha ikkiro, mineꞌne biifisannoha mitto baxisanno uduunnichcho xunsitine laꞌinanni heedhinoonnihu gedeeti. Yihowara nooꞌne baxilli xiinxallitine afidhinoonni amaale loosu aana hosiissinanni gede assiꞌnero, lawishshu yaattonni miniꞌnetera “giddiidi kifillara” biifisanno uduunne eessidhinanni heedhinoonni yaate. Hatto assitiniro, bashsho nooꞌne baxillinna biinfilli sunu sununni galagale higanno.
22. Adhamanke ayirrado assiꞌrate uminke halaafinate wonshinummoro hiittoo hagiirre afiꞌneemmo?
22 Kore mine biifisanno uduunne bayichcho bayichchonsa qolate lowo yannanna sharro xaꞌmannoti egennantinote. Ikkirono, ate widoonni assa hasiissannohere assate sharramattoha ikkiro, “Kiꞌne kiꞌneneeto ayirrisate balaxxinoonnire ikke” yitannota Qullaawu Maxaafi hajajo wonshitanni noottota afootto daafira lowonta tashshi yaannohe. (Roomu Sokka 12:10, NW; Faarso 147:11) Duuchchunkunni roore, adhamaꞌne ayirrado assiꞌrate lowo sharro assattoha ikkiro, Maganu baxillinni fulittokki heeꞌratto.
a Tenne fooliishsho labbaahura coyiꞌnanni heeꞌnoonnihu gede assine shiqinshoonniha ikkirono meyaaterano taalo loossanno.
b Phaawuloosi adhanna adhama lainohunni uyino hajajo, kaajjishe hajajinote wole hajajo ledo mitteenni noota ikkitinota xiqisete qooxeessira noo assaawenni buuxa dandiinanni.—Ibiraawuyaani 13:1-5.