AANIIDI QOOLIHA COYI UMO | REYOTE GEDENSAANNI HEESHSHO NOONI?
Reyino Mannira Hexxo Noonsa?
Reyino manni galagale heeshshote heeꞌra dandaanno?
QULLAAWU MAXAAFI DAWARO: “Qaagooshshu waamma giddo noori baalunku huurosi [Yesuusita] macciishshitanno yanna dagganni no.”—Yohaannisi 5:28, 29.
Yesuusi albillitte Mangistesi hunda Waamma mullicho ikkitannota coyiꞌrino. Sai birxichira kullihu Fernaando togo yiino: “Mite yee Yohaannisi 5:28, 29 nabbawummo wote lowo geeshsha dhagge assiꞌroommo. Kuni qummeeshshi halaalaancho hexxo uyinoe; qoleno, albillittete yanna dancha ikkitannota heda hanafummo.”
Hundi yannara, ammanamino manchi Iyyoobi Maganu reyotenni kayisannosita dihuluullamino. Isi togo yee xaꞌmino: “Mittu manchi reyiro, galagale lubbote heeꞌranno?” Hakkiinni togo yee huluullamikki coyiꞌrino: “Fooliishsho afiꞌreemmo yanna dagga geeshsha, giddeetu soqqanshoꞌya diro baalanka [Waammate giddo keeshsheemmo yanna] cinceemmo. Ati woshshattoe, ani qoleemmohe.”—Iyyoobi 14:14, 15.
Alaazaari kao albillitte reyitinori kaꞌanno yine hexxineemmo gede assitannonke
Alaazaari rodoo Maarta mannu reyotenni kaꞌꞌannota albanni affino. Alaazaari reyihu gedensaanni Yesuusi Maarta, “Rodiikki kaꞌꞌanno” yiise. Ise qolte, “Goofimarchu barra kaꞌꞌannota afoomma” yitusi. Hakkiinni Yesuusi togo yiise: “Ani kaotenna heeshshote. Ane ammanannota loosunni leellishannohu, reyiro nafa kaꞌꞌanno.” (Yohaannisi 11:23-25) Yesuusi hakkawontenni Alaazaari reyotenni kayisi! Tini maalaꞌlissanno xagge albillitte hakkiinni roorinori ikkannota leellishshannote. Hanni alame woꞌmate aana reyino manni kaꞌꞌanno wote heeꞌranno hagiirre hedi!
Mitu manni reyotenni kae iimira haꞌrannoni?
QULLAAWU MAXAAFI DAWARO: Maganu Qaali Yesuusi kao Qullaawu Maxaafi giddo kulloonnite wole sette kaonni baxxitannota kulanno. Kuni settu manni reyotenni kae heeꞌrinohu koye uullate aanaati. Ikkollana, Qullaawu Maxaafi Yesuusi kaore kulanni, “Yesuusi Kiristoosi . . . iimira haꞌre Maganu qiniiteenni no” yaanno. (1 Pheexiroosi 3:21, 22) Reyotenni kae iimira haꞌrinohu Yesuusa callaatini? Yesuusi alba hawaariyaatesira togo yiinonsa: “Haꞌre bayicho qixxeessummoꞌnehu gedensaanni, kiꞌneno ani noommowa heedhinanni gede, galagale daye ani noommowa haareemmoꞌne.”—Yohaannisi 14:3.
Kiristoosi iimira haꞌre mite rosaanosira bayicho qixxeessino. Reyotenni kae iimira haꞌranno manni kiiro xaphoomunni 144,000 ikkitanno. (Ajuuja 14:1, 3) Ikkina, kuri Yesuusi harunsaano iimira hadhannohu ma assitaraati?
Hakko loossannohu lowo loosi no! Qullaawa Borro insa daafira togo yitanno: “Umi kao beeqqaasine ikkitinori baalunku hagiirraammahonna qullaawootaho; layinkimeeshshu reyo insa aana silxaane diafidhino; insa Maganohonna Kiristoosira kakkalaano ikkitanno; qolteno isi ledo 1,000 diro nugussa ikkite gashshitanno.” (Ajuuja 20:6) Reyotenni kaꞌe iimira hadhannori nugussanna kakkalaano ikkite Kiristoosi ledo uulla gashshitanno.
Hakkunni gedensaanni kaꞌannori ayeooti?
QULLAAWU MAXAAFI DAWARO: Qullaawa Borro Hawaariya Phaawuloosi togo yiinota kultanno: “Kuni manni hexxannonte gede, keeraanono finqilaasineno reyotenni kaꞌannota Magano hexxeemmo.”—Hawaariyaatete Looso 24:15.
Maganu Qaali reyinohu lowo biliyoone ikkanno manni kaꞌꞌannota buuxisanno
Phaawuloosi “keeraano” yiiri wido ikkitannori ayeooti? Hanni mitto lawishsha lai. Ammanamino manchi Daanieelira geedhimmasi yannara togo yine kulloonnisi: “Fooliishshiꞌratto, goofimarchu barra kayinni kaꞌe iillannohe qeecha adhatto.” (Daanieeli 12:13) Daanieeli reyote goxichinni kaꞌꞌannohu hiikko heeꞌraraati? “Keeraano uulla ragidhanno; ise aanano hegerera heedhanno.” (Faarso 37:29) Yesuusino togo yiino: “Jooguullu hagiirraammaho, korkaatuno insa uulla ragidhanno.” (Maatewoosi 5:5) Daanieelinna wolu ammanamino manni reyotenni kae uullate aana hegerera heeꞌranno.
Phaawuloosi “finqilaasine” yiiri wido ikkitannori ayeooti? Kuni manni Qullaawu Maxaafi halaale rosatenna huwatate faro afiꞌrikki reyino mannaati; kuni manni lowo biliyoone ikkanno. Insa reyotenni kaꞌuhu gedensaanni, Yihowannaa Yesuusire rosanna assitinonsarira galaxxa dandiitanno. (Yohaannisi 17:3) Magano magansiꞌra doodhitannori baalunku Yihowante gede hegerera heeꞌrate faro afidhanno.
Magano magansiꞌra doodhitannori baalunku guuta ordu keere afidhe hagiidhitanni hegerera heedhanno
Albillitte uullate aana heeshsho hiittoota ikkitanno?
QULLAAWU MAXAAFI DAWARO: Maganu “hindiiddo duuchanta illensanni feyanno; reyo higgeno diheedhanno; qoleno dadillu, raare woy xisso higgeno diheedhanno.” (Ajuuja 21:4) “Mannu minna miꞌnanno, hatte minnarano heeꞌranno; qoleno woyinete haqqe kaasiꞌre gumase itanno.”—Isayyaasi 65:21.
Hanni reyotenni kainohu baxatto manni ledo togoo bayicho heeꞌratto heeshsho hedi! Ikkina, reyino manni kaꞌꞌannota huluullammeemmokkihu mayiraati?
a Qullaawu Maxaafi Maganu suꞌmi Yihowa ikkinota kulanno.