Maatekki Hagiirraame Assiꞌra Dandaattohu Hiittoonniiti?

1. Higgete garinni adhama maatete hagiirrira qara coye ikkitinohu mayiraati?

Maate hagiirraame ikkitara hasiꞌrannohu hagiirraamu Magani Yihowa ayewoteno danchare kulannonke. (1 Ximootewosi 1:11) Adhanna adhama hanaffanno gede assinohu isooti. Higgete garinni adhama maatete giddo teense heeꞌnanni gedenna ooso ille yaaddo nookkiha lossiꞌnanni gede kaaꞌlitanno daafira, maatete hagiirrira qara coyeeti. Kiristaanu qooxeessinsara noo higge garinni, adhamansa higge affinota assiꞌra hasiissannonsa.​—Luqaasi 2:1, 4, 5 nabbawi.

Maganu adhanna adhama ma garinni laꞌꞌanno? Isi adhamino manni mitteenni geedara hasiꞌranno. Yihowa minaanninna minaama mimmitoho ammanaminore ikkara hasiꞌranno. (Ibiraawuyaani 13:4) Isi adhama diingannita giwanno. (Milkiyaasi 2:16) Ikkollana, Yihowa minaanninna minaama giddo mittu soorriro kuꞌu adhama diige wole adhanno gede fajjino.​—Maatewoosi 19:3-6, 9 nabbawi.

2. Minaanninna minaama mimmitoho hiittoore ikka hasiissannonsa?

Yihowa labbaahanna meyata kalaqinohu adhamanno woyite mimmitoho irko ikkaraati. (Kalaqo 2:18) Minaanni maatete umo ikkino daafira, maatete hasiisannoha maalaamittete coye wonshanna insara Maganunnire rosiisa hasiissannosi. Qoleno umisi hasattonni roorse galtesira baxille leellisha hasiissannosi. Minaanninna minaama mimmito baxanna ayirrisa hasiissannonsa. Guuta ikkino minaanninna minaama nookki daafira, gatona yaa rosa lowonta hasiissannote; korkaatuno tini maatete hagiirrira qara coyeeti.​—Efesooni 4:31, 32; 5:22-25, 33; 1 Pheexiroosi 3:7 nabbawi.

3. Maatekki giddo hagiirru hoogiro, galtekki fushshite huna hasiissannohe?

Maateꞌne giddo afoo arrawo hunannori tuncu yiiꞌnero, lamunku mimmito baxillu illenni laꞌꞌate woꞌnaala hasiissannoꞌne. (1 Qorontoosi 13:4, 5) Maganu Qaali maatete giddo kalaqantannota shiimmaadda mitiimma tirate babbaxxa woyyitanno diyaanno.​—1 Qorontoosi 7:10-13 nabbawi.

4. Ooso, Maganu kiꞌne ma ikkitinara hasiꞌranno?

Yihowa kiꞌne hagiirraamma ikkitinara hasiꞌranno. Isi wedellimmaꞌnenni hagiidha dandiitinanni gara kultannota duuchantenni woyyitino amaale aannoꞌne. Qoleno anniꞌnenna amaꞌne hayyonni, hattono insa woꞌnaalshinni dancha roso afidhinara hasiꞌranno. (Qolasiyaasi 3:20) Hakkiinni saeno, Kalaqaanchiꞌne Yihowa isiranna Beettisira soqqantine hagiirre afidhinara hasiꞌranno.​—Mekibibi 11:9–12:1; Maatewoosi 19:13-15; 21:15, 16 nabbawi.

5. Annuwanna amuuwa, oosoꞌne hagiirraamma ikkitanno gede maa assa dandiitinanni?

Oosoꞌnera sagale, galtannowa, hattono uddidhannore shiqishate diinaggaabbine loosa hasiissannoꞌne. (1 Ximootewosi 5:8) Ikkollana oosoꞌne hagiirraamma ikkitanno gede, Magano baxxanno gedenna isire rosa halchitanno gede rosiisano hasiissannoꞌne. (Efesooni 6:4) Kiꞌne Magano baxxinannita heeshshoꞌnenni leellishshine lawishsha ikkaꞌne, oosoꞌne kiꞌne faale hadhanno gede lowo kaaꞌlo afidhino. Amaaltinanninsa amaale Maganu Qaali aana xintantinota ikkituro, oosoꞌne garunni heddanni lophitanno gede assitanno.​—Marro 6:4-7; Lawishsha 22:6 nabbawi.

Oosoꞌne jawaachishanna galata rosse; korkaatuno tini lowonta kaaꞌlitannonsa. Qoleno soꞌro loossuro raga qolanna seejja hasiissanno. Togoo qajeelshi, hagiirrensa hunanno coyiwiinni agarannonsa. (Lawishsha 22:15) Ikkollana, seejjitinanni woyite hanqunninna kaajjillunni seejja dihasiissanno.​—Qolasiyaasi 3:21 nabbawi.

Yihowa Farciꞌraasine annuwanna amuuwa, hattono ooso kaaꞌlate lowo maxaaffa qixxeessitino. Tini maxaaffa Qullaawu Maxaafi aana xintantinote. ​—Faarso 19:7, 11 nabbawi.