Heeshsho Maganu Laꞌꞌanno Garinni Lai

1. Heeshsho noore baala kalaqinohu ayeeti?

MASAALAANCHU Ermiyaasi, “Yihowa halaalaancho Maganooti” yiino. “Isi heeshshote Maganooti.” (Ermiyaasi 10:10) Hakkiinni saeno, Maganu Yihowa heeshsho noorira baalaho Kalaqaanchoho. Gordono heedhanno kalaqo iso togo yitino: “Duuchchanka kalaqoottona, kalaqamarano fajjoottohu ateetina.” (Ajuu[j]a 4:11) Nugusu Daawiti Maganoho galatu faarso faarsi wote, “Heeshshote buichcho atewiinniitina” yiino. (Faarso 36:9) Konni daafira, heeshsho Maganu uyino eltooti.

2. Maganu heeshshote heeꞌneemmo gede assate maa assino?

² Qoleno heeshshote heeꞌneemmo gede assannonkehu Yihowaati. (Soqqamaanote Looso 17:28) Inteemmo sagale, angeemmo waa, foolleemmo ayyarenna heeꞌneemmo uulla uyinonkehu isooti. (Soqqamaanote Looso 14:15-17) Yihowa konne baala qixxeessinohu heeshsho hagiirsiissannota ikkitanno garinniiti. Heeshshonkenni lowo geeshsha hagiidhate kayinni, Maganu higge rosanna loosu aana hosiisa hasiissannonke.—Isayyaasi 48:17, 18.

HEESHSHO QULLAAWA ASSE LAꞌꞌA

3. Qayeeli Abeeli shiita Maganoho mayi macciishshamisi?

³ Maganu, uminketa ikko wolu heeshsho qullaawa assine laꞌnammora hasiꞌranno. Lawishshaho biꞌre Addaaminna Heewani waro, beettinsa Qayeeli maaꞌnu rodiisira Abeelira lowo geeshsha hanqi. Yihowa Qayeeli, hanqisi lowo cubbiwa massannosita kule qorowisiisisi. Qayeeli kayinni kulloonnisita dihaarino. Isi ‘rodoosi Abeeli gane shiino.’ (Kalaqo 4:3-8) Qayeeli rodoosi shiino daafira Yihowa qorichchishinosi.—Kalaqo 4:9-11.

4. Lubbo qullaawa asse laꞌꞌa hasiissannota Maganu Muse Higge giddo kaajjishe kulinohu hiittoonniiti?

⁴ Kumunni kiirranni diri gedensaanni, Yihowa Isiraeelete gosa isi hasiꞌranno garinni soqqantannosi gede addi addi higge uyinonsa. Isi tenne higge masaalaanchu Muse widoonni qole uyinonsa daafira, mito wote Muse Higgeeti yinanni. Muse Higge giddo mitte, “Shitooti” yitannote. (Marro 5:17) Tini higge, Maganu mannu heeshsho qullaawa asse laꞌꞌannotanna mannu qole wolu heeshsho hattonni qullaawa asse laꞌꞌa hasiissannosita Isiraeele buuxxanno gede assitinonsa.

5. Godowu gato huna lainohunni hiittoo lao heedhankera hasiisanno?

⁵ Godowa noo qaaqqi lubbo Maganu hiisse laꞌꞌannoyya? Muse Higge garinni, godowa noo qaaqqo shaa Maganu effire giwannoreeti. Godowa noo qaaqqi lubbo nafa Yihowa albaanni lowo waaga afidhino. (Wolaphpho 21:22, 23; Faarso 127:3) Konni daafira godowu gato huna soꞌrote.

6. Manna giwa hasiissannonkekkihu mayiraati?

⁶ Wole manna dancha illenni laꞌꞌano, heeshsho qullaawa asse laꞌꞌate widira gaamantanno. Qullaawu Maxaafi togo yaanno: “Rodoosi giwannohu duuchchu lubbo [shiinoho]; lubbo shiinohura hegere heeshsho noosikkita egentinoonni.” (1 Yohaannisi 3:15) Hegere heeshsho afiꞌra hasiꞌneemmoha ikkiro, wodaninke giddonni manna giwate hedo woꞌmunni woꞌma fushshe huna hasiissannonke; korkaatuno duuchcha jaddora kaimu manna giwate. (1 Yohaannisi 3:11, 12) Mimmitinke ledo baxama rosa hasiissannonke.

7. Mittu manchi lubbo qullaawa asse laꞌꞌannokkita leellishannohu mitu mitu assooti hiikkonneeti?

⁷ Uminke heeshshono qullaawa asse laꞌꞌa hasiissannonke? Roore yanna mannu reya dibaxanno; ikkollana mitu manni hagiirreho yee reyo abbanno coye assanno. Lawishshaho, batinynyu manni sijaara aganno, caate qamaꞌꞌanno, woyi boohaarshaho yee jallaagishshanno xagga adhanno. Togoori mannimma gawajjanno; qoleno reyo abbanno. Togoore assanno manchi, heeshsho qullaawu coyi gede asse dilaꞌꞌanno. Togoo assooti Maganu albaanni battete. (Roomu Sokka 6:19; 12:1; 2 Qorontoosi 7:1) Maganu hasiꞌranno garinni isira soqqamate, togoo assootiwiinni xeertiꞌra hasiissannonke. Togoo assootiwiinni xeertiꞌra kabbaaddannoha ikkirono, Yihowa hasiissanno kaaꞌlo aannonke. Qoleno heeshshonke isi uyinonketa muxxe elto assine laꞌꞌate assineemmo sharro kaffi asse laꞌꞌanno.

8. Dano abbannori kalaqamannokki gede ayeewoteno qorophpha hasiissannonkehu mayiraati?

⁸ Heeshsho qullaawa assine laꞌneemmoha ikkiro, dano abbannori kalaqamannokki gede ayeewoteno qorophpha hasiissannonke. Gidde noonkekkire ikkanna hagiirreho woyi boohaarate yine calla gawajjo abbannore assa dihasiissannonke. Motorisayikile, biskilliite woyi makeena naddaꞌneemmo wote qorophpha hasiissannonke. Qoleno busha godoꞌlewiinni woyi finqillete ledo xaado afidhino ispoortewiinni xeertiꞌra hasiissannonke. (Faarso 11:5) Biꞌre Isiraeelete uyinoonniti Maganu higge togo yitanno: “[Fooqenniha woyi gimbenniha] haaro mine miꞌnatto wote, mannu uwe reyenna minikkira mundeete eda abbiꞌrattokki gede roqqo wori.” (Marro 22:8) Tenne higgera noohu xintu seeri garinni, minikki qooxeessira bale heedhuro mannu uwe gawajjamannokki gede beeshshi woyi qooxote huxxa huxxi; qoleno wolu gawajjo abbannori heeꞌrannokki gede qorophphi. Motorisayikile, biskilliite, woyi makeenu heeꞌrihero, gulufate seyinoro balaxxe buuxi. Minekki noori, motorisayikilekki, biskilliitekki woyi makeenikki ate aana woyi woleho dano abbannokki gede qorophphi.

9. Heeshsho qullaawa assine laꞌneemmoha ikkiro, saadate hiittoo lao heedhankera hasiisanno?

⁹ Saadate lubbona hiitto asse laꞌꞌa hasiissannonke? Saadate lubbono Kalaqaanchu albaanni qullaawate. Sagaletenna uddanote woyi manna gawajjotenni gatisate yine saada shinara Maganu faqqadino. (Kalaqo 3:21; 9:3; Wolaphpho 21:28) Ikkollana, saada beebba assanna insa aana xelleqqisa, woyi godoꞌlete yine calla shaa, heeshsho qullaawa ikkitinota mishate.—Lawishsha 12:10.

MUNDEE QULLAAWA ASSE LAꞌꞌA

10. Maganu, lubbonna mundee xaado afidhinota xawisinohu hiittoonniiti?

¹⁰ Qayeeli rodoosi Abeeli shii gedensaanni, Yihowa togo yiisi: “Rodiikki mundee uullatenni anewa higge raartanni no.” (Kalaqo 4:10) Maganu Abeeli mundeere coyiꞌri wote coyiꞌranni noohu Abeeli lubboreeti. Qayeeli shiinoti Abeeli lubbooti; konnira qorichcha adha hasiissannosi. Abeeli mundee woyi lubbosi taaltino firde afiꞌrate Yihowawa higge raartino gede kulloonni. Lubbonna mundee xaado afidhinota Nohi yannahu Baote Wayi gedensaannino kulloonni. Baote Wayira albaanni mannu, haqqete laalo, akaakilte, gidenna lewuze woyi ochcholoone itanno. Baote Wayi gedensaanni kayinni Yihowa Nohinna oososi togo yii: “Lubbote noori millissanno saada baala sagale ikkitoꞌne. Albaanni akaakilte uummoꞌnente gede, xa kore baala kiꞌnera oommoꞌne.” Ikkollana Maganu hoolino coyi no; isi togo yiino: “Lubbo [woyi heeshsho] yaano mundee giddo noo maala kayinni ittinoonte.” (Kalaqo 1:29; 9:3, 4) Kuni, Yihowa mittu manchi mundee woyi saadate mundee hattono ceannita lubbote gede asse laꞌꞌannota leellishanno.

11. Maganu Nohi yannanni kayise mundee ma assinannita hoolino?

¹¹ Mundee qullaawa assine laꞌneemmohura ise ita dihasiissannonke. Yihowa Isiraeelete uyino Higge giddo togo yee hajajino: “. . . Ugaaxannohu ayee manchino gaxigala woyi intanni cea ugaaxe amadiro, mundee dune bushsha diwa hasiissannosi. . . . Isiraeelete ooso togo yoommo: ‘Ayee gari maali mundee ittinoonte.’” (Zelewaawuyaani 17:13, 14) Nohi saadate mundee itannokki gede 800 diri albaanni Maganu uyino hajajo xaano loossanno. Yihowa lao dahaabbinota diꞌꞌikkitino: Soqqamaanosi saadate maala ita dandiitanno, mundee kayinni diꞌꞌittanno. Insa mundee uulla duntanno; hatto assansa kalaqote heeshsho Maganunniwa qolate gedeeti.

12. Mundeetewiinni xeertiꞌra lainohunni umi sanira qullaawu ayyaani uyinoti, xaa geeshsha loossanno hajajo hiitteeti?

¹² Togoo hajajo Kiristaanahono uyinoonni. Umi sanira Yesuusi harunsanno manni giddo noo cimeeyyenna hawaariyaate, Kiristaanu songo giddo noo roduuwi baalu hiittee hajajo agadha hasiissannonsaro wossanate gamba yitino. Togo yite wossantino: ‘Ninkenna qullaawu ayyaani [konni hasiisanno coyi gobbaanni] wole qarrisanno coye bayisiinsammoꞌnera dihasiꞌneemmo. [Kaphphu magannara] kakkalloonni sagale ittinoonte, [qalxante reyitino saada maala] ittinoonte, [mundeetewiinni hattono soorrotewiinni xeertidhe].’ (Soqqamaanote Looso 15:28, 29; 21:25) Konni daafira ‘mundeetewiinni xeertiꞌra’ hasiissannonke. Maganu lao garinni, mundeetewiinni xeertiꞌra, kaphphu magannawiinninna foorretenni xeertiꞌrate gede hasiissannote.

13. Mundeetewiinni xeertidhe yitanno hajajo, mundee nigu widoonni adhano hooltanno yineemmohu mayiraatiro lawishshunni kuli.

¹³ Mundeetewiinni xeertidhe yine uyinoonni hajajo mundee nigu widoonni adhano hooltannoni? Ee hooltanno. Lawishshaho, mittu hakimichchi alkoolete agiwiinni xeertiꞌri yee hajajihero, agalla aggootina nigu widoonni marfetenni adhi yaasiitini? Hatto yaasi diꞌꞌikkino! Hatteente gede, mundeetewiinni xeertiꞌrate yaa, mundee bisinke giddora ayee garinnino eꞌannota hooꞌlate yaate. Konni daafira, mundeetewiinni xeertidhe yitanno hajajo, ayiino mundee nigu widoonni aannonketa hooꞌlineemmo gedeno assitannonke.

14, 15. Hakimootu mitto Kiristaancho mundee adha hasiissannohe yituro, isi ma assanno? Mayira?

¹⁴ Mittu Kiristaanchira dano iillitusiro, woyi oppirshiine assiꞌra hasiissannosiha ikkirona? Miteekkite hakimootu kuni Kiristaanchi mundee adha hasiissannosi, hakkuyi kaꞌa reyanno yitara dandiitanno. Kuni Kiristaanchi reya hasiꞌrannokkiti dihuluullissannote. Maganu uyinositi muxxete elto yaano lubbosi reyitannota gatisate, mundee nookkiha wole hikkiminna adhanno. Konni daafira, mundeete bayichcho uyinanniti wole xagga heedhuro, hattee adhanno.

¹⁵ Mittu Kiristaanchi tenne alame aana heeshshosira shiima barra lexxate yee Maganu higge diigannoni? Yesuusi togo yiino: ‘Lubbosi [woyi heeshshosi] gatisiꞌrara hasiꞌrannohu duuchchu huꞌnanno; lubbosi anera yee huꞌnannohu duuchchu kayinni gatisiꞌranno.’ (Maatewoosi 16:25) Reya dibanxeemmo. Ikkollana Maganu higge diinge xaa heeshshonke keeshshiishiꞌrate woꞌnaallummoro, hegere heeshsho hoongammora dandiineemmo. Konni daafira, Maganu higge gara ikkitinota addaxxa hasiissannonke; ayee garinni reyinummorono, heeshsho aannonke Magani qaage kayisannonketanna muxxe ikkitino elto yaano heeshsho galagale aannonketa woꞌmunni woꞌma addaxxineemmo.—Yohaannisi 5:28, 29; Ibiraawuyaani 11:6.

16. Maganu soqqamaano mundee lainohunni ma assate sharro assitanno?

¹⁶ Xaa yannara, ammanantinori Maganu soqqamaano mundee lainohunni isi uyino biddishsha harunsate lowo sharro assitanno. Insa, mundee ayee garinnino diꞌꞌittanno. Qolteno mundee xaginaateho dihoroonsidhanno.a Mundee kalaqino Magani insara woyyanno coye afinota dihuluullantanno. Atina, woyyannohe coye afinohu Magano ikkinota ammanatto?

MUNDEE GARUNNI HOROONSIꞌNANNITI MITTICHCHO DOOGO

17. Biꞌre Isiraeelete yannara, Maganu Yihowa hasiꞌrannoti mundee garunni horoonsiꞌnanniti mittichcho doogo hiitteeti?

¹⁷ Muse Higge mundee garunni horoonsiꞌnannita mittichcho doogo xawisse kultanno. Yihowa biꞌree Isiraeele iso magansiꞌra hasiissannonsa gara kulanni togo yee hajajino: “Kalaqote lubbo [woyi heeshsho] mundeete giddo no; lubboꞌnera maaro afidhinanni gede, ani umiꞌya kakkalote bayichcho mundee [winxanni gede hajajoommo]; korkaatuno maaro abbitannoti mundeete.” (Zelewaawuyaani 17:11) Isiraeele cubbo loossuro, saada kakkalo assite shiqishshe, hatte saada mundee giddo gama, hunda xaadooshshu dunkaani giddo, yannate gedensaanni kayinni Maganu beetemeqidese giddo kakkalote bayichcho wixxe maaro afidhanno. Mundee garunni horoonsiꞌnannihu togoo kakkalo shiqishatenni callaati.

18. Duꞌnantinotenni Yesuusi mundeenni mayi horonna atoote afiꞌneemmo?

¹⁸ Addu Kiristaani Muse Higge hunda heeꞌrannoha diꞌꞌikkino; konni daafira saadate kakkalo shiqishe mundee kakkalote bayichcho diwixanno. (Ibiraawuyaani 10:1) Ikkeennano, Isiraeelete yannara mundee kakkalote bayichcho winxe shiqinshanni kakkalo, muxxe ikkitinotera Maganu Beetti Yesuusi Kiristoosi kakkalora lawishshaho. Konni maxaafira ontikki fooliishshora ronsummonte gede, Yesuusi mundeesi kakkalo ikkite duꞌnantanno gede asse heeshshosi ninkera sayise uyino. Hakkiinnino iimira haꞌre, duꞌnantino mundeesi waaga mitte hige duuchchu wotira Maganoho shiqishino. (Ibiraawuyaani 9:11, 12) Tenne assasi cubbinkera maaro afiꞌneemmo gede xinta ikkitino; qoleno hegere heeshsho afiꞌneemmo faro fantinonke. (Maatewoosi 20:28; Yohaannisi 3:16) Mundee konni baxxino garinni loosu aana hosase lowo horo afidhino! (1 Pheexiroosi 1:18, 19) Gato afiꞌra dandiineemmohu, duꞌnantinoti Yesuusi mundee afidhino horo ammannummoro callaati.

19. ‘Mannu baalunku mundeenni keeraano’ ikkate maa assa hasiissannonke?

¹⁹ Maganu Yihowa muxxe elto ikkitino heeshsho uyinonke daafira lowo geeshsha galantammosira hasiisanno! Isira noonke galati, Yesuusi kakkalo ammanatenni hegere heeshsho afiꞌra dandiinanni kaayyo noota wolu mannira kulleemmo gede dikakkayisannonke? Wolu manni heeshsho Maganu laꞌꞌanno garinni laꞌꞌa hasiꞌneemmo daafira, tenne kaayyo wolootaho quqquxamatenninna diinaggetenni kulleemmo. (Hiziqeeli 3:17-21) Konne woꞌmunni woꞌma assineemmoha ikkiro, ninkeno hawaariya Phaawuloosi yii gede yaa dandiineemmo. Isi togo yiino: “Ani mannu baalunku mundeenni keeraanchoho; korkaatuno Maganu fajjo baala kiꞌnera kulatenni badhera dihigoommo.” (Soqqamaanote Looso 20:26, 27, NW) Heeshshonna mundee qullaawa assine laꞌneemmota leellinsheemmoti qara doogo, Maganunnirenna alaamasi mannaho kulate.