Yihowawa Gamba Yite Heeꞌri

1, 2. Agarooshshe afiꞌra dandiineemmohu mamiinniiti?

HANNI doogote hadhanni heedheenna lowo xeena abbinohu gede assite hedi. Gordu roore tunsanni haꞌri; hakkiinni belequ faashshi yaanna banqo xadha hanaffu. Hakkiinni biite xeena gana hanafi. Hakko balla xeeꞌnattowa hasiꞌra hanafitto. Hasidhanni marte kaajjadonna xissannokki mine afiꞌrittota wodanu hirikki yiihe!

² Tini heeꞌnoommo yanna hattoote. Alame horo bushshanni hadhanni no. Konnira ‘Agarooshshe afiꞌnannihu mamiinniiti?’ yite hedattoha ikkara dandaanno. Mittu Qullaawu Maxaafi giddo kulloonni faarsaanchi togo yiino: “Kaaliiqano [“Yihowa,” NW], ‘Ati qiishoꞌyaatinna goloꞌyaati; hexxeemmohe Maganooti’ [yeemmo].” (Faarso 91:2) Ee, Yihowa xa qarru iillannonke wote golo ikkankera dandaanno; qoleno konni kaꞌira kaajja hexxo uyinonke.

3. Yihowa golonke assiꞌra dandiineemmohu hiittoonniiti?

³ Yihowa agarannonkehu hiittoonniiti? Isi iillannonke qarra baalanka fulleemmo gede kaaꞌlankera dandaanno; qoleno gawajjitankera hasidhannore baalanka roortanno wolqa noosiho. Xa bushu coyi iillinkero nafa, Yihowa albillitte hattenne gawajjo taashshannota dihuluullammeemmo. Qullaawu Maxaafi togo yee amaalannonke: “Maganu baxilli giddo heedhe.” (Yihuda 21) Qarru yannara Yihowa kaaꞌlo afiꞌrate, isiwa gamba yine heeꞌra hasiissannonke. Ikkina konne assa dandiineemmohu hiittoonniiti?

BAXANNOHE MAGANO BAXATTOTA LEELLISHI

4, 5. Yihowa baxannonketa leellishinohu hiittoonniiti?

⁴ Yihowawa gamba yine heeꞌrate, isi mageeshshi geeshsha baxannonkero huwata hasiissannonke. Hanni Yihowa assinonke coye baala hedi. Biifado uulla kalaqe uyinonke; qoleno ise aana dhagge ikkitanno haqqenna saada woꞌmitanno gede assino. Hakkiinni saeno inteemmota coommitanno sagalenna angeemmoha xalala waa uyinonke. Yihowa Qullaawu Maxaafi widoonni suꞌmasinna kaajja akattasi kulinonke. Wolu baalunkurinni roore, Yihowa, ninke daafira yee heeshshosi sayise aanno gede muxxe Beettosi Yesuusa uullara soye baxillesi leellishinonke. (Yohaannisi 3:16) Tini kakkalo, albillittete kaajja hexxo heedhannonke gede assitino.

⁵ Yihowa Mesihichu Mangiste qixxeessino; kuni iimi gashshooti muli yanna giddo qarra baalanka hunanno. Tini Mangiste uulla gannate assitanno; hatte gannatera mannu baalunku keerunninna hagiirrunni hegerera heeꞌranno. (Faarso 37:29) Yihowa baxannonketa leellishinoti wole doogo, xaa yannara woyyitino heeshsho heeꞌneemmo gara rosiisasiiti. Isi huucciꞌneemmo gedeno koyisinonke; qoleno woꞌmanka wote huuccattonke macciishshate qixxaawinoho. Addanko Yihowa ninke mitto mittonka baxannonketa leellishannore assino.

6. Yihowa baxillesi leellishinohetera maa assa hasiissannohe?

⁶ Yihowa baxillesi leellishinohetera ati maa assa hasiissannohe? Assinohe coyi baalunkura galatattota leellishi. Yannankera batinyu manni galatannoha diꞌꞌikkino; tini dadillissannote. Yesuusi uullate aana noo warono duuchu manni hattooho. Mitte hige Yesuusi dhiigu amadinoha tonne manna hursihu gedensaanni, iso galatinohu mitto callaho. (Luqaasi 17:12-17) Yesuusa galati manchi gede ikka hasiissannonke. Woꞌmanka wote Yihowa galanteemmore ikka hasiꞌneemmo.

7. Yihowa mageeshshi geeshsha baxa hasiissannonke?

⁷ Hakkiinni saeno Yihowa banxeemmota leellisha hasiissannonke. Yesuusi rosaanosi Yihowa woꞌmu wodaninsanni, woꞌma lubbonsanninna woꞌma hedonsanni baxa hasiissannonsata kulino. (Maatewoosi 22:37 nabbawi.) Hatto yaa mayyaate?

8, 9. Yihowa banxeemmota leellisha dandiineemmohu hiittoonniiti?

⁸ Yihowa baxeemmo yaa calla ikkitannoni? Diꞌꞌikkitanno. Yihowa woꞌmu wodaninkenni, woꞌma lubbonkenninna woꞌma hedonkenni banxeemmoha ikkiro, tenne assootinkenni leellinsheemmo. (Maatewoosi 7:16-20) Qullaawu Maxaafi Magano baxanno manchi, isira hajajamannota xawise kulanno. Tenne assa qarrissannote? Diqarrissanno; mayira yiniro, Yihowa ‘hajajo kaajjado woy duha diꞌꞌikkitino.’—1 Yohaannisi 5:3 nabbawi.

⁹ Yihowara hajajammeemmoha ikkiro, hagiirru nootanna dancha heeshsho heeꞌneemmo. (Isayaasi 48:17, 18) Ikkina Yihowawa gamba yine heeꞌrate kaaꞌlannonkeri maati? Hanni laꞌno.

YIHOWAWA SHIQA AGURTOOTI

10. Yihoware rosa agura hasiissannohekkihu mayiraati?

¹⁰ Yihowa jaala ikka dandoottohu hiittoonniiti? Qullaawa Maxaafa xiinxallakki Yihowa afatto gedenna isi ledo jaalooma kalaqiꞌratto gede kaaꞌlitinohe. Kuni jaaloomi giirate gedeeti. Bubbanno giira xoꞌannota hoolate haqqe wora hasiissannonte gede, Yihowa ledo noohe jaaloomi kaajje heeꞌranno gede isire agurittokki rosa hasiissannohe.—Lawishsha 2:1-5.

11. Qullaawu Maxaafi rosi kaaꞌlannohehu hiittoonniiti?

¹¹ Qullaawa Maxaafa xiinxallitanni haꞌratto wote, wodanakki kakkayisanno roso rosatto. Hanni lame Yesuusi rosaano isi Qullaawu Maxaafi masaalo xawise kulinsata yitinore hedi. Insa togo yitino: “Doogote heeꞌneenna hasaawisanninkenna Qullaawa Borro qaagiissanni kulinke yannara wodaninke giirate gede ikke dibuwinke!”—Luqaasi 24:32.

12, 13. (a) Maganoho noonke baxilli ma ikkara dandaanno? (b) Yihowara noonke baxilli qiidannota hooꞌla dandiineemmohu hiittoonniiti?

¹² Lamenti rosaano Qullaawa Borro yitannore huwatansa wodanansa kakkayissinonte gede, atino Qullaawa Maxaafa huwata hanafitto wote hattonni tashshi yiinoheha ikkara dandaanno. Tini Yihowa afatto gedenna baxattosi gede assitinohe. Kuni baxilli qiidara hasiꞌrattokkiti egennantinote.—Maatewoosi 24:12.

¹³ Maganu jaala ikkitto gedensaanni, jaaloomikki kaajje heeꞌranno gede assiꞌrate diinaggaabbe sharrama hasiissannohe. Yihowarenna Yesuusire agurittokki rosa, hattono rossanni nootto rosonna konne roso harunsa dandaatto gara seekkite heda hasiissannohe. (Yohaannisi 17:3) Qullaawa Maxaafa nabbawatto woy xiinxallatto wote, ateneeto togo yite xaꞌmi: ‘Kuni Yihowa daafira maa rosiisannoe? Yihowa woꞌmu wodaniꞌyanninna woꞌma lubboꞌyanni baxa hasiissannoehu mayiraati?’—1 Ximootewoosi 4:15.

14. Huuccatto Yihowara noonke baxilli kaajje heeꞌranno gede kaaꞌlitannonkehu hiittoonniiti?

¹⁴ Baxatto jaalikki ledo ganyite hasaawakki, jaaloomiꞌne kaajje heeꞌranno gede assitannoti egennantinote. Hatteente gede, huuccattotenni Yihowa ganyine hasaawinseemmoha ikkiro, isira noonke baxilli kaajje heeꞌranno. (1 Teselonqe 5:17 nabbawi.) Huuccatto iimi Anninke uyinonkete kaajja eltooti. Woꞌmanka wote isira giddonketa fushshine hasaapha hasiissannonke. (Faarso 62:8) Yinoommota yinanni rosantino huuccatto assiꞌrantenni, godowinta huucciꞌra hasiissannonke. Ee, agurrummokki Qullaawa Maxaafa xiinxallineemmohanna giddonketa fushshine huucciꞌneemmoha ikkiro, Yihowara noonke baxilli kaajje heeꞌranno.

MANNAHO YIHOWARE KULA

15, 16. Sabbakate looso ma garinni laꞌꞌatto?

¹⁵ Yihowawa gamba yine heeꞌrate, ammananke wolu mannira kulano hasiissannonke. Yihoware mannaho rosiisa ninkera lowo ayirrinyeeti. (Luqaasi 1:74) Qoleno kuni Yesuusi addu Kiristaani baalunkura uyino loosooti. Ninke baalunku Maganu Mangisteha dancha duduwo sabbaka hasiissannonke. Ati konne assa hanafootto?—Maatewoosi 24:14; 28:19, 20.

¹⁶ Soqqamaasinchu Phaawuloosi sabbakate loosi lowo geeshsha muxxe ikkinota huwatino; isi konne looso ‘miinjaho’ woy jirote yiino. (2 Qorontoosi 4:7) Mannaho Yihowarenna isi hedinore rosiisate geeshsha ikkannohu wolu loosi horonta dino. Konni garinni Yihowara soqqama dandaatto; isi qole isira yite assattore horonta dihawanno. (Ibiraawoota 6:10) Sabbakate loosi, atino rosiisatto mannino Yihowawa shiqqinanni gedenna hegere heeshsho afidhinanni gede kaaꞌlanno daafira ateno insano kaaꞌlanno. (1 Qorontoosi 15:58 nabbawi.) Konni loosinni roore hagiirsiisanno loosi mama no?

17. Sabbakate looso wiinamme loosa hasiissannohu mayiraati?

¹⁷ Sabbakate loosi wiinamme loonsanniho. ‘Qaale kulanna’ ‘woꞌmanka woyite jawaante’ sabbaka hasiissannonke. (2 Ximootewoosi 4:2) Mannaho Maganu Mangistere kula hasiissanno. Qullaawu Maxaafi togo yaanno: “Jawu Mootichu barri gambisino; daasino addintanni rakkino.” Goofimarchu ‘dikeeshshanno.’ (Soffooniyaasi 1:14; Imbaaqoomi 2:3) Ee, Yihowa muli yanna giddo Sheexaanunnita busha alame hunanno. Kuni ikkara albaanni, mannu Yihowara soqqama doodhanno gede kulle qorophisiisa hasiissannonke.

18. Yihowa addu Kiristaani ledo mitteenni magansiꞌra hasiissannonkehu mayiraati?

¹⁸ Yihowa addu Kiristaani ledo mitteenni magansiꞌnammosira hasiꞌranno. Qullaawu Maxaafi togo yaanno: “Baxille afiꞌratenna dancha looso loosate mimmitonke kakkayinso. Mitu mitu agurtunte gede, ronsoommoha xaadonke agurroonke. Roorenka Mootichu daanno barri gamba yiinota qaagginanna, mimmitonke albinni roorsine jawaachinsho.” (Ibiraawoota 10:24, 25) Baalanka gambooshshe haꞌrate dandaaminkere baala assa hasiissannonke. Gambooshshu mimmito jawaachinsheemmo faro fanannonke.

19. Ammanate roduuwanke baxate kaaꞌlannonkeri maati?

¹⁹ Gambooshshe haꞌrittoro, Yihowa magansiꞌratto gede kaaꞌlitannoheta dancha jaalla afiꞌratto. Hakkiicho atente gede Magano magansiꞌrate diinaggaabbannorinni addi addi gari roduuwinni xaadatto. Qoleno atente gede insano guuntete xeꞌne noonsareetinna sodhannoreeti. Hattoo yannara, gatona yite saꞌꞌate qixxaawi. (Qolasiyaasi Sokka 3:13 nabbawi.) Woꞌmanka wote ammanate roduuwikkiha dancha akata laꞌꞌate woꞌnaali; hatto assakki insa baxatto gedenna Yihowawa albinni roore shiqatto gede kaaꞌlitannohe.

HALAALAANCHO HEESHSHO

20, 21. “Halaalaancho heeshsho” yiniti hiitteeti?

²⁰ Yihowa jaallasi ikkitinori woꞌmunku baalunkunni woyyitino heeshsho heedhara hasiꞌranno. Qullaawu Maxaafi albillitte heeꞌneemmo heeshsho xa heeꞌneemmotenni lowo geeshsha baxxitannota kulanno.

²¹ Albillitte 70 woy 80 diro calla ikkikkinni hegerera heeꞌneemmo. Biifado gannatera “hegere heeshsho” ragiꞌne guuta ordu fayyimma afiꞌne, keerunninna hagiirrunni heeꞌneemmo. Qullaawu Maxaafi “halaalaancho heeshsho” yaannoti hatteeti. Yihowa tenne heeshsho aankera qaale eino; ikkirono hattee heeshsho seekkine cuꞌmiꞌrate sharrama hasiissannonke.—1 Ximootewoosi 6:12, 19.

22. (a) “Halaalaancho heeshsho” seekkine ‘cuꞌmiꞌra’ dandiineemmohu hiittoonniiti? (b) Hegere heeshsho loosinkenni afiꞌneemmota diꞌꞌikkitino yineemmohu mayiraati?

²² “Halaalaancho heeshsho” seekkine ‘cuꞌmiꞌra’ dandiineemmohu hiittoonniiti? ‘Dancha looso loosanna’ togoo loosinni ‘dureeyye ikka’ hasiissannonke. (1 Ximootewoosi 6:18) Hatto yaa Qullaawu Maxaafinni ronseemmore assa hasiissannonke yaate. Ikkollana halaalaancho heeshsho afiꞌneemmohu uminke sharronniiti yaa diꞌꞌikkino. Hegere heeshsho loosunni afiꞌnannita diꞌꞌikkitino. Togoo heeshsho Yihowa ammanantino soqqamaasinesira mulla uyino ‘eltooti.’ (Roomu Sokka 5:15) Iimi Anninke ammanantino soqqamaasinesira addinta tenne elto aa hasiꞌranno.

23. Xa gara ikkinore doodha hasiissannohehu mayiraati?

²³ Ateneeto togo yite xaꞌmi: ‘Magano isi hasiꞌranno garinni magansiꞌranni noommo?’ Biddi assiꞌra hasiissannohe coyi noota huwatittoro, xaanni biddi assiꞌri. Yihowa addaxxineemmohanna isira hajajamate dandaaminkere baala assineemmoha ikkiro, isi golonke ikkanno. Isi Sheexaanu alamera gattinote goofimarchu barruwara ammanamino mannasi agaranno. Hakkiinni Yihowa hunda hedino garinni Gannatete hegerera heeꞌneemmo gede assannonke. Ee, xa gara ikkinore doodhattoha ikkiro halaalaancho heeshsho afiꞌra dandaatto!