XIINXALLO 2

Hasaawu Garinni Shiqisha

Luqaasi 6:45

ASSA HASIISSANNOHERE: Barru baala hasaawatto garinni, shaqqillunninna rosiisatto roso ammanattota leellishanno garinni coyiꞌri.

Huuccatto assidhe seekkite qixxaawi. Waajjakki qeeꞌlite sokkate aana illachisha dandaatto gede kaaꞌlahera Yihowa huucciꞌri. Qara sokka xabbe leeltannohe gede assiꞌri. Borrote aana noo qaalla noo gedeenni nabbawa agurte, hedo umikki yaattonni coyiꞌri.

Qullaawu Maxaafi giddonni woy wole borro aaninni nabbawate hedoottoha ikkiro, mommoddittokki nabbawa dandaatto gede nabbawatto gafa seekkite xiinxalli. Wolu manni coyiꞌrinore nabbawatto woyite, iibbadu hasaawi gede assite, kayi quwa sayisittokkinni nabbawi.
Ammanattota leellishanno garinni coyiꞌri. Macciishshaano hattee sokka macciishsha hasiissannonsahu mayiraatiro hedi. Insa aana illachishi. Hatto ikkiro, uurrootto gari, bisu millimillokkinna albikki shaqqillenna baxille leellishannoha ikkanno.

Hasaawu garinni coyiꞌratto yaa kaitto gede coyiꞌratto yaa diꞌꞌikkitino. Mannu coyiꞌratto sokka ayirrisanno gede, xawe leellanno garinninna mannu coyiꞌre galino garinni coyiꞌri.
Macciishshaano laꞌanni coyiꞌri. Qooxeessiꞌnera manna laꞌnanni coyiꞌra koffi assitannokkiha ikkiro, macciishshaano lai. Lallawo shiqishatto woyite, macciishshaano baala mitteenni laꞌꞌattonte, mitto mitto laꞌanni coyiꞌri.