ROSO 01
Qullaawu Maxaafi Kaaꞌlannohehu Hiittoonniiti?
Ninke baalunku, qarrammeemmohunna reyineemmohu mayiraatironna albillitte heeshsho hiittoota ikkitannoro afa hasiꞌneemmo. Qoleno yaachishannonkeha addi addi qarra tidha dandiineemmo gara lawishshaho, heeshshote hasiisannonkere afiꞌranna maatenke hagiirru noota assiꞌra dandiineemmo gara afa hasiꞌneemmo. Batinyu manni, Qullaawu Maxaafi huluullitannonke xaꞌmuwara dawaro qolannotanna heeshsho woyyeessitannota dancha amaale aannota huwatino. Qullaawu Maxaafi duuchunku mannira kaaꞌlannoha lawannohe?
1. Qullaawu Maxaafi dawaro qolannoti mite xaꞌmuwa hiikkuriiti?
Qullaawu Maxaafi duuchu mannira huluullitannote aante noo xaꞌmuwara dawaro qolanno: Heeshshote kaimi maati? Heeꞌneemmohu mayiraati? Danchu manni qarramannohu mayiraati? Mannu reyiro hiikkanno? Mannu baalunku keere heeꞌra hasiꞌrannoha ikkina, olu togo batiꞌrinohu mayiraati? Albillitte baatto hiikkitanno? Qullaawu Maxaafi togoo xaꞌmuwara dawaro afiꞌrate sharrammeemmo gede jawaachishannonke; qoleno lowo miliyoone ikkanno manni Qullaawu Maxaafi giddonni duushshitanno dawaro afiꞌrino.
2. Qullaawu Maxaafi hagiirru noo heeshsho heeꞌneemmo gede kaaꞌlannonkehu hiittoonniiti?
Qullaawu Maxaafi danchare amaalannonke. Lawishshaho, maate addu hagiirre afiꞌra dandiitanno gara kulanno. Qoleno yaaddo gargadhanna loonseemmo loosinni hagiidha dandiineemmo gara amaalannonke. Tenne borro mitteenni xiinxallineemmo woyite, Qullaawu Maxaafi tennenna woleno hattoo hajo daafira mayyaannoro rosatto. Hakkiinni, “Qullaawa Borro baala [Qullaawu Maxaafi giddo noo hedo baalanti] kaaꞌlitanno” yaa halaale ikkitinota huwatakki digattanno.—2 Ximootewoosi 3:16.
Tini borro Qullaawa Maxaafa riqibbannota diꞌꞌikkitino. Hatteentenni, Qullaawa Maxaafa xiinxallate kaaꞌlitannohe. Konni daafira, borrote giddo noota Qullaawu Maxaafi qummeeshshuwa faꞌnite nabbawatto gedenna rosu ledo heewisiisatto gede jawaachinsheemmohe.
LEDDE XIINXALLI
Qullaawu Maxaafi manna kaaꞌlino gara, Qullaawa Maxaafa nabbawa baxisannohe gede assiꞌra dandaatto garanna Qullaawu Maxaafi yaannore huwatate kaaꞌlo xaꞌmiꞌra dancha ikkitinohu mayiraatiro huwati.
3. Qullaawu Maxaafi doogo kulannonke
Qullaawu Maxaafi waraꞌa yiino caabbichi gedeeti. Heeshshonke giddo danchare doodhineemmo gedenna albillitte ikkannore anfeemmo gede kaaꞌlannonke.
Faarso 119:105 nabbabbe; hakkiinni, aante noo xaꞌmuwa hasaabbe:
Tenne faarso borreessino manchi Qullaawu Maxaafi daafira mayyee hedanno?
Ati Qullaawu Maxaafi daafira mayite hedatto?
4. Qullaawu Maxaafi huluullitannonke xaꞌmuwara dawaro qolanno
Mitte mancho lowo diro huluullitannase heedhino xaꞌmuwara Qullaawu Maxaafi giddonni dawaro afidhino. VIIDIYO laꞌe; hakkiinni, aante noo xaꞌmuwa hasaabbe.
Viidiyote giddo laꞌnummo manchora, alba hiittoo xaꞌmo noose?
Qullaawa Maxaafa xiinxallase kaaꞌlitinosehu hiittoonniiti?
Qullaawu Maxaafi xaꞌmo xaꞌmineemmo gede jawaachishannonke. Maatewoosi 7:7 nabbabbe; hakkiinni, aante noo xaꞌmo hasaabbe:
Qullaawu Maxaafinni dawaro afiꞌra hasiꞌrattoti hiitti xaꞌmo noohe?
5. Qullaawa Maxaafa nabbawa baxa dandaatto
Batinyu manni Qullaawa Maxaafa nabbawa baxanno; qoleno Qullaawa Maxaafa nabbawansa lowore kaaꞌlitanni noonsa. VIIDIYO laꞌe; hakkiinni, aante noo xaꞌmuwa hasaabbe.
Viidiyote giddo laꞌnummo wedellooti nabbawa baxxanno?
Kayinni Qullaawa Maxaafa nabbawa baxxannohu mayiraati?
Qullaawu Maxaafi sheshifachishannore rosiisannonke; hattono hexxo aannonke. Roomu Sokka 15:4 nabbabbe; hakkiinni, aante noo xaꞌmo hasaabbe:
Qullaawu Maxaafi aanno sheshonna hexxo daafira ledde afa hasiꞌratto?
6. Qullaawu Maxaafi yaannore huwanteemmo gede wolootu kaaꞌlitankera dandiitanno
Batinyu manni Qullaawa Maxaafa hojjinsa nabbawannotano agurranna, wolootu ledo hasaawano kaaꞌlitinonsata huwatino. Soqqamaasinete Looso 8:26-31 nabbabbe; hakkiinni, aante noo xaꞌmo hasaabbe:
Qullaawu Maxaafi yaannore huwata dandiineemmohu hiittoonniiti?—Kiiro 30 nna 31 lai.
Itiyophiyu manchira Qullaawa Borro yitannore huwatate kaaꞌlannohu hasiisinosi. Yannankera batinyu manni, Qullaawu Maxaafi roso huwatate wolootu ledo hasaawa kaaꞌlitannota wodanchino
MITU MANNI TOGO YAANNO: “Qullaawa Maxaafa xiinxalla beebba yanna guxxate.”
Ati tennera mayyaatto? Mayira?
XAPHISHSHA
Qullaawu Maxaafi heeshsho seekkitanno amaale aanno, huluullitannonke xaꞌmuwara dawaro qolanno, hattono sheshonna hexxo aannonke.
Kageeshsha Rosoottore
Qullaawu Maxaafi hiittoo amaale aannonke?
Qullaawu Maxaafi dawaro qolannoti mite xaꞌmuwa hiikkuriiti?
Qullaawu Maxaafi giddonni mayi daafira afa hasiꞌratto?
EGENNO LEXXI
Qullaawu Maxaafi amaale yannankera kaaꞌlitannonke gara wodanchi.
“Woꞌmante Yannara Kaaꞌlitannota Qullaawu Maxaafi Amaale” (Agarooshshu Shae Kiiro 1 2018)
Anjesinni kayise ditidhoommoho yee hedanno mancho Qullaawu Maxaafi kaaꞌlinosi gara huwati.
Qullaawu Maxaafi aannota maatete kaaꞌlitanno amaale xiinxalli.
“Maate Seekkannoha 12 Qara Coye” (Baqqi Yiiyye! Kiiro 2 2018)
Batinyu manni alamete gashshaanchi ayetiro diafino. Qullaawu Maxaafi kayinni alame gashshinohu ayeti yaannoro wodanchi.
Qullaawa Maxaafa Xiinxalla Hasiissannohu Mayiraati?—Woꞌma Viidiyo (3:14)