Kiristaanu Heeshshonna Soqqanshote Xiinxallote Maxaafichora Qummi Assinoonni Borro
© 2023 Watch Tower Bible and Tract Society of Pennsylvania
WOCAWAARO 4-10
MAGANU QAALI GIDDO NOOTA MUXXE JIRO | ASTEERI 1-2
“Asteeri Gede Kawajjaamma Ikkate Sharramme”
Fonqolo Ikkannori Iillannohe Yannara Dhukakki Affe Heeꞌra Dandaatto
11 Janjanninke woy deerra saꞌne naandanninke wote, dhukanke hambammora dandiineemmo. Asteeri heeshshose maalaꞌlinanni garinni soorrantu yannara assitinori lawishsha ikkannoho. Ise xumate xumaati; qoleno mitto diro woꞌma biinfilleho kaaꞌlannore buudhitanni qawaaxxidhe heedhino. Ise, Moote Arxekisisi baxannonsa gede assiꞌrate mimmitonsa roora hasiꞌrannohu Faarisi Gashshooti hunda noo gobba baalantenni abbinoonnihu aju seenni ledo barru baala xaaddanno. Ikkirono, ise dinaaxxitino. Ise, Moote Arxekisisi mootitte assisehu gedensaanni nafa dixelleqqissino woy dhukase dihabbino.—Ast. 2:9, 12, 15, 17.
Maganu Mannira Halantino
15 Asteeri mootenniwa martanno yanna iillituta, iseneeto roore biifisate hasiisannoseha baxxu uduunne doodhite adha dandiitannota kulloonnise. Ikkollana, ise quwa saꞌannokkita ikkitino daafira, Hegayi kulinosere agurranna wolere adhite dihadhino. (Ast. 2:15) Ise, moote danu xumme calla lae baxannokkita huwattukki digattino; hakko mootete mine, meessi dhuka afanna umo heeshshi assa hakkeeshsha rosaminore diꞌꞌikkino. Ikkina Asteeri togoo akatta leellishase garaho?
Fonqolo Ikkannori Iillannohe Yannara Dhukakki Affe Heeꞌra Dandaatto
12 Dhukanke afanke, duuchanka wote deerrunninna umonkeno wole mannano ayirrinseemmota leellishanno garinni uddiꞌneemmo, seenseemmonna heeꞌneemmo gede kaaꞌlitannonke. Mannu baxannonke gede assitannoti naaxxa woy leellama ikkitukkinni “gaꞌlabbichunna wodanaamu” akati noonketa leellishate. (1 Pheexiroosi 3:3, 4 nabbawi; Erm. 9:23, 24) Hedonkenni ninkeneeto gotti gotti assineemmoha ikkiro, tini assineemmorinni xawo fulase digattanno. Lawishshaho, ninke baxxitino qoosso afiꞌnoommota, giddore anfoommota woy albisa ikkitinori ledo loosate qoosso noonketa eerreemmoha ikkara dandaanno. Woy wolu manni ledo assinoommore ninke callu assinoommori gede assine coyiꞌneemmoha ikkara dandaanno. Togoo woteno Yesuusi dancha lawishsha ikkannonke. Isi roore wote Ibiraawootu Afiita Qullaawa Borro giddo noo hedo, noo gedeenni woy xinta assiꞌre coyiꞌranno. Yesuusi dhukasi afinoha ikkino daafira, rosiisanni noori Annisiwiinni dayinoha ikkinotanna umisi egenno woy hayyo aana xintaminoha ikkinokkita macciishshanno manni afanno garinni coyiꞌrino.—Yoh. 8:28.
Maganu Qaalinni Ronseemmore
Ati Tenne Afootto?
Xiinxallaano Marduka (Sidaamu afiinni Merdookiyoosi yinanni) yinanni suꞌmi borreessaminota, Faarisi kiyuniforme yinanni borro affino. Kuni Marduka yinanni manchi Suusa loosannoho silxaane noosi manchooti; hattono shallagote looso loosannoha ikkikki digatino. Soojjaati xagge fullahaanchi Arteri Unginaadi “Merdookiyoosi daafira Qullaawu Maxaafi giddo kulloonni tajeno agurranna wole taje noohu tenne kiyuniforme giddo callaati” yiino.
Kuni fullahaanchi xiinxallinore borreessihu gedensaanni, wolootu fullahaano lowo kume ikkitannota Faarsi kiyuniforme wolu afiira qolte tirtino. Kuri giddo gama Persepoolisite kinchu aana borreessinoonni borrooti; tenne kinchu aana borreessinoonni borro anfoonnihu Persepoolisi huxxi mule noohu Miinju Mini diigamino kinna giddooti. Tenne kinchu aani borro borreessinoonnihu Arxekisisi umihu gashshooti yannara ikkinota buunxoonni. Tenne borro borreessinoonnihu Eelaami qaalinniiti; hattono Asteeri maxaafi giddo kulloonni gedeeti batinye suꞌmuwa no.
Persepoolisite batinye kinchu aana borreessinoonni borrora, Arxekisisi umihu gashshooti yannara Suusa noohu mootete mini giddo borreessaancho ikke loosinohu Marduka yinanni manchi suꞌma qummi assinoonni. Mitte kinchu aana borreessinoonni borro Marduka borro wolu afiira qole tirannoha ikkinota kultanno. Tini taje Qullaawu Maxaafi Merdookiyoosi daafira kulannori ledo sumuu yitannote. Merdookiyoosi Arxekisisi umihu gashshooti yannara mootete mine loosannohonna ajayi ajeenna lame qaale coyiꞌra dandaanno gashshaanchooti. Merdookiyoosi duucha woyite Suusa noohu mootete mini waalchira ofollanno. (Ast. 2:19, 21; 3:3) Mootete waalcho yinoonnihu gashshaano loosonsa loossannoho jawa mineeti.
Kinchu aana borreessinoonni borrora kulloonnihu Marduka yinanni manchonna Qullaawu Maxaafi giddo kulloonniha Merdookiyoosi yinanni mancho mitto assannonsahu dhagge ikkanno coyi no. Heedhino dirinna bayichi hattono gashshaano ikkite loossino loosi mittoho. Kuni coyi baalu mitto ikkasi Mardukanna Merdookiyoosi yinoonni manchi mittoho yine hendeemmo gede assankera dandaanno.
Lallawo
Yihowa Kaaꞌlaanchokkiitina Waajjitooti
YESUUSINNA SOKKAASINE KAAꞌLITINOSI GAR
3 Phaawuloosira kaaꞌlo hasiissinosi. Mannu Phaawuloosi 56 M.D. balla Yerusaalamete noohu qullaawu mini giddonni goshooshe fushshe shaasira woꞌnaalino. Layinki barra Phaawuloosi Sanihediriini shongo albira shiqinshi woyite, gibbannosiri shitasira agarte no. (Soq. 21:30-32; 22:30; 23:6-10) Hakkawoyite Phaawuloosi, ‘Togo beebba assiꞌnannae cince heeꞌra dandeemmohu mageeshshi geeshshaati?’ yee hedinoha ikkara dandaanno.
4 Yesuusi Phaawuloosi kaaꞌlinosihu hiittoonniiti? Phaawuloosi amandihunni layinki hashsha “Mootichu” Yesuusi mulesi uurre, “Jawaati! Anere Yerusaalamete farciꞌrittonte gede Roomahono farciꞌratto” yiinosi. (Soq. 23:11) Tini Phaawuloosi lowo geeshsha jawaachishshinosi. Yesuusi Phaawuloosi Yerusaalamete farciꞌrino daafira galatinosi. Qoleno, Yesuusi Rooma keerunni iillatto yee qaale einosi; isi hakkiichono sabbakanno. Yesuusi coyiꞌrinori, Phaawuloosi annisi hanqafe noo qaaqqi gede bashshi yaannokki gede assinosi.
5 Phaawuloosira wolu mayi qarri iillinosi? Isira Yerusaalamete kuni coyi iillisihunni mitu lamu diri gedensaanni, Ixaaliya haꞌranni heeꞌrenna baaru aana waajjishanno dambali kaino; markaawete giddo loossannorinna wolu manni diganteemmo yee hexxo mudhino. Phaawuloosi kayinni diwaajjino. Mayira? Isi markaawete giddo noo mannira togo yiino: “Sai hashsha isiha ikkoommohu magansiꞌreemmo Magani soyino sokkaasinchi daye muleꞌya uurre, ‘Phaawuloosi, waajjitooti! Jawu moote albaanni uurra hasiissannohena. Ledokki hadhanni nooreno Maganu . . . [‘atera yee gatisanno,’ NW]’ yee kulinoena waajjitinoonte.” Yihowa umo Phaawuloosi Yesuusi widoonni jawaachishinte gede xaano sokkaasinchu widoonni jawaachishinosi. Yihowa yiino garinni Phaawuloosi Rooma keerunni iillino.—Soq. 27:20-25; 28:16.
6 Yesuusi ninke kaaꞌlannonkehu hiittoonniiti? Isi Phaawuloosi kaaꞌlinte gede ninkeno kaaꞌlannonke. Lawishshaho, Yesuusi iso harunsitannore baalaho “gobbate goofimarchi geeshsha [“woꞌmanka woyite,” NW] ani kiꞌne ledo noommo” yee qaale eino. (Mat. 28:20) Yesuusi coyiꞌrinori jawaachishannonke. Mayira? Korkaatuno mito woyite iillannonke qarra cince saꞌꞌa shota diꞌꞌikkitannonke. Lawishshaho, shiiꞌneemmo woyite, shiima yanna calla ikkikkinni lowo diro xissiisiꞌneemmoha ikkara dandaanno. Woloota qolte geedhimma waaddannonsa. Mitoota kayinni quwa saꞌino yaaddo qarrissannonsa. Ikkirono, Yesuusi “woꞌmanka woyite,” yaano ragu tunsannonke woyiteno ledonke noota anfoommo daafira, iillannonke qarra baala cincine saꞌꞌa dandiineemmo.—Mat. 11:28-30.
7 Maganu Qaali Yihowa sokkaanosi widoonni kaaꞌlannonketa kulannonke. (Ibi. 1:7, 14) Lawishshaho, ‘Maganu Mangisteha dancha duduwo’ ‘gosate, gaꞌretenna addi addi afoo coyiꞌranno mannira’ sabbankeemmo woyite, sokkaano kaaꞌlitannonke hattono massaggannonke.—Mat. 24:13, 14; Yohaannisi Ajuuja 14:6 nabbawi.
WOCAWAARO 11-17
MAGANU QAALI GIDDO NOOTA MUXXE JIRO | ASTEERI 3-5
“Wolootu Dandiiture Baala Assitanno Gede Kaaꞌlensa”
it-2 431 guf. 7
Merdookiyoosi
Haamara Kumbuula Giwino. Hakkunni gedensaanni Arxekisiisi, Agaagicha Haama xaphoomu ministericha asse shoomino; Haama haarote shoommoonnisi daafira mootete waalchira heedhannori kumbuultannosi gede hajajino. Merdookiyoosi tenne assa effire giwino; isi hatto assa giwinohu Yihudicha ikkino daafira ikkinota coyiꞌrino. (As 3:1-4) Merdookiyoosi kumbuulannokkihu mayiraatiro xawise kulino; isi Maganisi Yihowara baxxino Yihudicha ikkino daafira togo assiro Yihowa ledo noosi aante baꞌara dandiitanno. Isi Haamara kumbuula alba Israeelootu assitannonte gede mittu roorre noosi manchira umo heeshshi yee ayirrinye aatenni sainore ikkinota huwatino. (2Sa 14:4; 18:28; 1Mo 1:16) Merdookiyoosi Haamara kumbuula giwinohu afaare afeeti. Haama Amaaleqicha ikkikkinni digatino; Yihowa qole ‘Amaaleqoota hegere geeshsha qasannota’ coyiꞌrino. (Fu 17:16; HAAMA yaannoha lai.) Merdookiyoosi Haamara kumbuulinokkihu Yihowara ammanamara yeeti ikkinnina poletiku hajora yee diꞌꞌikkino.
it-2 431 guf. 9
Merdookiyoosi
Maganu Israeele Gatisate Horoonsiꞌrinosi. Merdookiyoosi Faarsi gashshooti giddo noo Yihudoota coꞌo assine gundanni gede lallawa fushshini woyite, Asteeri tenne yannara moote ikkitinohu Yihudoota gatisate ikkinota ammanannota coyiꞌrino. Isi Asteerira lowo loosi noosetanna moote ayirrinye leellishannosenna kaaꞌlannose gede xaꞌmidhanno gede kulinose. Ise hatto assase heeshshose qarru giddo tuggannoha ikkirono tenne assate sumuu yitino.—As 4:7–5:2.
Maganu Mannira Halantino
22 Asteeri Merdookiyoosi soqqino sokka macciishshituta, afale talka yitinoseti egennantinote. Ammanase lowo geeshsha jifantanno yanna xaati. Ise Merdookiyoosira qoltino dawaro waajjitinota leellishshanno. Ise Merdookiyoosira mootete seera qaagiissitino. Mittu manchi moote woshshisikkinni isiwa mariro, shinanni. Marino manchi reyotenni gatannohu, moote culku siqqosi isiwa qole diriirsiro callaati. Hakko iso Asxiini moote woshsheenna mara gibbuta assinoonnisere hendiro, Asteeri moote maarannoe yite hexxa dandiitanno? Asteeri mootenniwa martunkunni 30 barri sainoseta Merdookiyoosira kultino. Ise moote kageeshshi yanna woshshisekki keeshshino daafira, kuni garasi anfoonnikki manchi xaate baginoseha lawisekki digatino.—Ast. 4:9-11.
23 Merdookiyoosi Asteeri ammana jawaachishate kaajjishe qolino. Ise sammi yite gibburo, Ayihudete manni gato wolewiinni afiꞌrannota kulinose. Qoleno dartu lexxanni haꞌriro, ise umise hiitto ikkite gattanno? Merdookiyoosi, mannasi coꞌo assine gundara wore laꞌꞌannokkihanna coyiꞌrino qaale wonshikki agurannokki Magano Yihowa woꞌmu wodanisinni addaxxannota leellishino. (Iya. 23:14) Hakkiinni Merdookiyoosi Asteeri togo yiino: “Mayi afino, ati mootete galte ikkoottahu tenne qarru yannara gatisattankera ikkinoha ikkara dandaanno.” (Ast. 4:12-14) Merdookiyoosi ammanatenni dancha lawishsha ikkannoha dilawannohe? Isi woꞌma giddosinni Maganosi Yihowa addaxxino. Ninkena?—Law. 3:5, 6.
Maganu Qaalinni Ronseemmore
kr 160 guf. 14
Magansiꞌrate Wolaphora Gaarama
14 Hunda heedhinori Asteerinna Merdookiyoosinte gede, xaa yannarano Yihowa manni magansiꞌrate wolaphonsara gaaramanno. (Ast. 4:13-16) Kiꞌneno kaaꞌlama dandiitinanni? Ee. Xaa yannara miincanni heeꞌnoonni roduuwinke daafira ganyitine huuccatto assa dandiitinanni. Kiꞌne huuccitinanni huuccatto dartu iillanni noonsa roduuwanke lowo geya kaaꞌlitansara dandiitanno. (Yaiqoobi 5:16 Nabbawi.) Yihowa togoo huuccatto macciishshanno? Yoote mine afiꞌnoommo qeelle isi huuccattonke macciishshannota leellishshanno.—Ibi. 13:18, 19.
WOCAWAARO 18-24
MAGANU QAALI GIDDO NOOTA MUXXE JIRO | ASTEERI 6-8
“Danchu Garinni Hasaawate Kaaꞌlannonke Lawishsha”
Hayyittenna Worba Ikkitinota Leellishshino
15 Asteeri qarrase mootete kuꞌlitukkinni cincite mitto barra hossino daafira, Haama shollanno doogo umisi qixxeessiꞌrino. Qoleno mootete goxichu giwanno gede assinohu Yihowa ikkara dandaannoha dilawannohe? (Law. 21:1) Maganu Qaali cincine ‘agadhineemmo’ gede jawaachishannonkehu dimullaati! (Mikiyaasi 7:7 nabbawi.) Cincine Magano agadhineemmoha ikkiro, isi qarranke ninke hendoommo doogo baalantenni rooranno garinni tiranna laꞌneemmo.
Ise Waajjitukkinni Coyidhino
16 Asteeri kawii saꞌe keeshshite moote hanqisa dihasidhino; hakko daafira, layinki jiliwa baalankare kultasiraati. Kayi hiitto assite kultanno ikka? Maganu assa gede, moote umisi xaano Asteeri maa assinasera hasidhannoro xaꞌmise. (Ast. 7:2) Asteeri xa “hasaawate yanna” iillitinota huwattino.
Hayyittenna Worba Ikkitinota Leellishshino
17 Asteeri hatte mereero wodanisenni Magano huuccidhinota heda dandiineemmo; hakkiinni ise togo yitu: “Mooteꞌya, baxattoehanna hasiꞌroommare assattoeha ikkiro [“mootete danchare lawe leelliro,” NW], anenna gosaꞌya lubbo gatisie.” (Ast. 7:3) Moote danchare lawe leellinosire assiro, Asteeri maahoyye yite adhate qixxaabbinota wodanchootto? Asteeri, minaannase affanni heedhenni shollishshute Asxiini gedeeta horo diꞌꞌikkitino! (Ast. 1:10-12) Qoleno, Asteeri moote dogame Haama ammaꞌninotera iso dibushiishshino. Hatteentenni, ise moote lubbose gatisanno gede eeggifattino.
Hayyittenna Worba Ikkitinota Leellishshino
18 Asteeri hatto yite huuccidhuta, moote lowo geeshsha dhagge assiꞌrikki digatino. Minaamasi gawajjara hedinohu isi ayeti? Hakkiinni Asteeri togo yitu: “Borojjimmate hirammoommoro nafa ate diqarriseemmahe; xa kayinni kuneeti anenna gosaꞌya coꞌo assine gorrine gundaraati! [“Kuni coyi mooteno gawajjannoho,” NW].” (Ast. 7:4) Asteeri dhiwinose coye xawisse kuꞌlitinota wodanchi; ikkirono ise ledde, insa borojjimmate hiraminoha ikkoommero moote qarrissannokkita coyidhino. Tenne gosa coꞌo asse guda kayinni moote umosi gawajjitannota ikkitino daafira, ise sammi yite agura hasidhinokkita xawissino.
19 Manna ammansiisate daafira Asteeri lawishshinni lowore ronseemmo. Baxatto mannira woy silxaane noosi manchira mitto qarra hasaabbe ammansiisa hasiꞌrittoro, cinca, ayirrinyunni hasaawisanna noore xawisse kula lowore kaaꞌlitannohe.—Law. 16:21, 23.
Maganu Qaalinni Ronseemmore
w06 3/1 11 guf. 3
Asteeri Maxaafita Luphi Yitino Hedo
8:17—‘Lowohu wole gobba manni Ayihudete widira higinohu’ hiittoonniiti? Lowo Faarisooti Yihudoota hunate fushshinoonni lallawi soorraminota laꞌe, Maganu insa ledo no yite heddino daafira Yihudimmate widira soorrantukkinni digattino. Koye noohu xintu seeri Zekkaariyaasi maxaafira noo masaalo woꞌmitanno woyiteno loosanno. Hakko togo yine masaalloonni: “Tonnu wole gobba manni mittu Yihudichiwa mare, uddanosi handaara amade, ‘Maganu kiꞌne ledo noota macciishshinoommona, ninkeno ledoꞌne haꞌnoni?’ yite xaꞌmidhanno.”—Zakkaariyaasi 8:23.
Lallawo
Yesuusihu Maaꞌnu Rodiiwiinni Rosse
YAIQOOBI GEDE WORBA ROSIISAANO IKKE
8 Yaiqoobi lowo roso rosinoha diꞌꞌikkino. Isi yannara heedhinori ammaꞌnote murrooti Pheexiroosinna Yohaannisi ‘roso afidhinokkirinna mullu manni’ gede assite laꞌinonte gede, Yaiqoobino hakko garinni laꞌinoti dihuluullissannote. (Soq. 4:13) Ikkollana suꞌmisinni woshshinanni maxaafa nabbambeemmo woyite, Yaiqoobi worba rosiisaancho ikkinota huwanteemmo. Ninkeno Yaiqoobi gede lowo roso ronsoommokkiha ikkara dandaanno. Ikkirono, Yihowa ayyaani kaaꞌlonninna dirijjitesi uyitannonke qajeelshinni worba rosiisaano ikka dandiineemmo. Hanni Yaiqoobi worba rosiisaancho ikke dancha lawishsha ikkinonke garanna isiwiinni maa rosa dandiineemmoro laꞌno.
9 Yaiqoobi huwatate qarrissanno qaalla woy yaatto dihoroonsiꞌrino. Hakko daafira isi borreessino sokka nabbawanno manni maa assa hasiissannonsaronna ma garinni assa hasiissannonsaro afino. Hanni lawishshaho, Yaiqoobi Kiristaanu miincanninsa woyite koma amadikkinni cince heeꞌra hasiissannonsata rosiisinonsa gara laꞌno. Isi togo yee borreessino: “Cincite uurritinore, “Baꞌraadhinoreeti” yineemmonsa. Iyyoobi cincino gara macciishshitinoonni. Mootichuno goofimarchoho assinosiha dancha coye affinoonni. Kunninni Mootichu sao agurannohanna mararannoha ikkinota buuxxinoonni.” (Yai. 5:11) Yaiqoobi rosiisate Qullaawa Borro horoonsiꞌrinota wodanche. Isi borreessino sokka nabbawanno manni, Yihowa Iyyoobi gede ammanantinosire baꞌraasannota huwatanno gede kaaꞌlate Maganu Qaale horoonsiꞌrino. Konni garinni Yaiqoobi huwatate qarrissannokki qaallanna yaatto horoonsiꞌre rosiisino. Yaiqoobi togo asse mannu iso ikkikkinni Yihowa illachishanno gede assino.
10 Maa ronseemmo? Huwatate qarrisannokki garinni rosiisse hattono Maganu Qaale horoonsidhe. Rosiinseemmo woyite wolootu ninke egenno dhagge assidhanno gede assa dihasiissannonke; hatteentenni Yihowa egenno dhagge assidhanno gedenna isi insa daafira mageeshshi geeshsha hedannoro huwattanno gede kaaꞌla hasiissannonke. (Rom. 11:33) Rosiinseemmo woyite woꞌmanka woyite Qullaawa Borro horoonsiꞌne tenne mixonke wonshiꞌra dandiineemmo. Lawishshaho Qullaawu Maxaafi rosaanonkera ninke insa ikkinoommoro maa assineemmoro kulantenni, insa Qullaawu Maxaafi giddo noo lawishshuwa heeshshi gotti assite heddanno gedenna Yihowara mayi macciishshamannosiro huwattanno gede kaaꞌla hasiissannonke. Hatto assinummoro insa ninke ikkikkinni Yihowa hagiirsiisate kaꞌanno.
WOCAWAARO 25–BIRRA 1
MAGANU QAALI GIDDO NOOTA MUXXE JIRO | ASTEERI 9-10
“Silxaanesi Manna Kaaꞌlate Horoonsiꞌrino”
it-2 432 guf. 2
Merdookiyoosi
Xa Merdookiyoosi Haama bayicho xaphoomu ministericha ikkino daafira, Mootete maatami aanaho noota cuuicho uyinoonnisi. Asteeri Merdookiyoosira moote uyinoseta Haama jiro annimmatenni amadanno gede uyitinosi. Hakkiinni Merdookiyoosi, moote fajjeennasi Yihudootaho iillitannonsa gawajjo hooꞌlate insaneeto gargadhitanno gede kulanno seera fushshino. Kuni seeri Yihudootu gato afidhannonna hagiidhitanno gede assinonsa. Faarisi qoqqowira noohu batinyu manni Yihudootaho halamino; qoleno fushshinoonni seera loosu aana hosiinsannihu Adaari aganihu 13ki barrira Yihudootu qixxaabbe no. Merdookiyoosira lowo roorre noosi daafira hakko qoqqowi gashshaano insara halantino. Suusaho kaino oli layinki barri geya digoofino. Faarisi gashshooti giddo 75,000 saꞌannota Yihudootu diinnanna tonne Haama ooso shinoonni. (As 8:1–9:18) Merdookiyoosi Asteeri ledo kaaꞌlame Adaari aganira 14ki nna 15ki barra, yaano ‘Furiimi barruwara’ diru ayyaana ayirrinsanni gede hajajino; qoleno hakko barra hagiidhitanni ittanninna agganni mimmitoho afansha uyitanno gedenna buxane kaaꞌlitanno gede hajajino. Yihudootu fushshinoonni seerira maahoyye yite hajajante konne ayyaana ilamansanna insara halanturi ayirrissanno gede assitino. Gobbate layinki gashshaancho ikkinoha Merdookiyoosi Maganoho baxxinohu Yihudu manni ayirrisinosi; qoleno isi insa kaaꞌla diagurino.—As 9:19-22, 27-32; 10:2, 3.
it-2 716 guf. 5
Furiimi
Ayirrinsannihu Mayiraati? Mite mite fullahaano xaa yannara Yihudootu ayirrissannohu Furiimi Ayyaani ammaꞌnote ayyaana ikkikkinni gobbate ayyaana ikkinotanna konne ayyaana ayirrinsanni woyite mannu mito woyite akkimalannota coyidhanno; ikkirono konne ayyaana xintini woyite alba Yihudootu ayirrissinohu hakko garinni diꞌꞌikkino. Merdookiyoosinna Asteeri halaalaanchu Magani Yihowa soqqamaanooti; qoleno konne ayyaana xintinoonnihu Yihowa ayirrisateeti. Hakka waro Yihudoota baotenni gatisinohu Yihowati yaa dandiinanni; mayira yiniro hakka woyite Yihudoota hunnara kaꞌnoonnihu Merdookiyoosi Yihowara ammanamino daafiraati. Haama Amaaleqicha ikkikki digatino; Yihowa Amaaleqoota rumino hattono baꞌanno gede yoo yiino. Merdookiyoosi Maganu fushshino seera ayirrisanno daafira Haamara kumbuula effire giwino. (As 3:2, 5; Fu 17:14-16) Qoleno Merdookiyoosi Asteerira coyiꞌrinori (As 4:14) Yihudoota gatisannohu lowo wolqa noosiha ikkinota ammanannota leellishanno; hattono Asteeri mootete albaanni shiqqe iso sagalete koyissara albaanni xoomase Maganu kaaꞌlannose gede huuccidhinota leellishshanno.—As 4:16.
cl 101-102 guf. 12-13
Wolqaꞌne Horoonsidhinanni Woyite ‘Magano Labbe’
12 Yihowa Kiristaanu Songora albisa ikkite soqqantannore aliidi laꞌꞌaasine shoomino. (Ibiraawoota 13:17) Kuri ikkadda ikkitino labballi, Maganu uyinonsa silxaane woy qoosso roduuwansa kaaꞌlatenna Maganu hoshsha towaatate horoonsidhanno. Insa, cimeeyyete yaa ammanate roduuwinsara annattanno yaateni? Deeꞌni, hatto yaa diꞌꞌikkino! Cimeeyye songote giddo loosonsa loossanno woyite quwa saꞌannokkirenna umonsa heeshshi assitannore ikka hasiissannonsa. (1 Pheexiroosi 5:2, 3) Qullaawu Maxaafi aliidi laꞌꞌaasine, “mundeesinni woxxinota Maganu Beetekiristaane [“songo,” NW] allaalle” yaanno. (Soqqamaasinete Looso 20:28) Tini amaale cimeeyye Maganu hoshsha giddo nooha mitto mittonka rodoo shaqqillunni towaattanno gede assitannonsa.
13 Hanni tenne huwatate mitto lawishsha hendo. Mittu lubbote jaalikki jajjasi agaratto gede eeggo uyihe. Hakkonne jajja lowo woxinni hidhinota afootto. Ikkina hakko jajja mulla gede assattoni? Hatteente gede, Maganuno cimeeyyete muxxe jajja agartanno gede qeecha uyinonsa; kuni jajji songote giddo noore geꞌreewunni lawinsoonni roduuwaati. (Yohaannisi 21:16, 17) Yihowa geꞌreewosi lowo geya baxanno; isinni insa baxannohu mittu Beettisi Yesuusi Kiristoosi mundeenni woxxinoreeti. Yihowa geꞌreewisira lowo waaga baatino. Umonsa heeshshi assitanno cimeeyye tenne affino daafira Yihowa geꞌreewo shaqqillunni towaattanno.
Maganu Qaalinni Ronseemmore
w06 3/1 11 guf. 4
Asteeri Maxaafita Luphi Yitino Hedo
9:10, 15, 16—Fushshinoonni seeri diininsa jajja saantanno gede fajjannoha ikkirono Yihudootu kayi hatto assitinokkihu mayiraati? Insa hatto assa giwansa, olantinohu dureeyye ikkate hedde ikkikkinni insaneeto gargadhate ikkinota leellishshannoti dihuluullissannote.
BIRRA 2-8
MAGANU QAALI GIDDO NOOTA MUXXE JIRO | IYYOOBI 1-3
“Yihowa Mageeshshi Geeshsha Baxxinanniro Leellisha Agurtinoonte”
Ammanatenninna Hajajamatenni Nohi, Daanieelinna Iyyoobi Lawishsha Harunse
16 Iyyoobira iillinosi qarra. Iyyoobira addi addi fonqoli iillinosi. Qarru iillasira albaanni “jirotenninna jawaantetenni isi geeshsha ikkanno manchi soojjaati gobbara dino.” (Iyo. 1:3) Isi hoqino dureessaati, maccahonna ayirrado manchooti. (Iyo. 29:7-16) Iyyoobira kuni baaluri noosiha ikkirono, wole manna baala roorannohu, woy Maganu hasiisannosikkihu gede asse dihedino. Isinni Yihowa iso “soqqamaanchoꞌya” yee woshshinosi, hattono ‘isi keeraanchohonna suwashshoho, qoleno bushu coyiwiinni fafe ane ayirrisanno manchooti’ yee farciꞌrinosi.—Iyo. 1:8.
17 Ikkollana shiima yanna giddo Iyyoobi heeshsho woꞌmunni woꞌma soorrantino. Iso angate anje amaddinosi, hattono hexxo mudhino. Ninke Iyyoobira konne qarra baala abbinosihu Sheexaane ikkinota anfoommo; Sheexaanu, Iyyoobi Maganoho soqqamannohu horo afiꞌrino daafiraati yee suꞌmasi hunino. (Iyyoobi 1:9, 10 nabbawi.) Yihowa tenne lashshi asse diagurino. Hatteentenni Isi Iyyoobi ammaname soqqamannosihu baxillunni kae ikkinota leellishanno faro faninosi.
Minshe Nookkire Ikkitine Heedhe!
10 Sheexaanu ninke mitto mittonka kassasinonke. Tini kisse ateno laꞌannohu hiittoonniiti? Sheexaanu, ‘Magano Yihowa goowi alella baxatto; mittu qarri iillihero umokki gatisate yite isira soqqama aguratto; qoleno minshe nookkiha ikke heeꞌreemmo yaakki kaphoho’ yiinohu gedeeti! (Iyo. 2:4, 5; Aju. 12:10) Sheexaanu hatto yaasinni atera mayi macciishshamannohe? Tini lowo geeshsha xissiissannota diꞌꞌikkitino? Ikkirono hanni tenne hedi: Yihowa ammanannohe daafira isira ammanamoottota leellishatto faro faninohe. Yihowa, Sheexaanu ammanamakki jifanno gede fajjino. Yihowa, minshe noohekkiha ikkite Sheexaanu kaphaancho ikkinota leellisha dandaattota dihuluullamanno. Qoleno Isi kaaꞌlahera qaale eino. (Ibi. 13:6) Kalqete alame Gashshaanchi ammanannonkere ikkanke lowo ayirrinyeeti! Minshe nookkire ikke heeꞌra mageeshshi geeshsha hasiissannoro wodanchitto? Minshe nookkire ikkine heeꞌranke Sheexaanu kaphaancho ikkinota leellinsheemmo gede, Anninke suꞌmi ayirranno gedenna gashshootisi wido ikkineemmo gede assitannonke. Ikkina minshe nookkire ikkine heeꞌrate murciꞌra dandiineemmohu hiittoonniiti?
Maganu Qaalinni Ronseemmore
Yesuusi Reyara Albaanni Coyiꞌrinorinni Maa Ronseemmo?
9 Yesuusi mayino? Yesuusi reyara kae heeꞌre “Maganoꞌya, Maganoꞌya, mayira agurittoe?” yiino. (Mat. 27:46) Qullaawu Maxaafi Yesuusi hatto yiinohu mayiraatiro xawise dikulanno. Kayinni isi coyiꞌrinorinni huwanteemmori no. Umihunni, Yesuusi hatto yee coyiꞌrasi Faarso 22:1 noo masaalo woꞌmitanno gede assitino. Hakkiinnino sae, Yesuusi coyiꞌrinori Yihowa Beettisira qarru iillannosikki gede ‘huxxa ikkinosikkita’ leellishanno. (Iyo. 1:10) Yesuusi, diinnasi jeefote geeshsha fonqoltannosi gede Annisi fajjinota afino; Yesuusi geeshsha fonqolaminohu mittu manchino dino. Qoleno Yesuusi coyiꞌrinori, shinannisi gede assanno cubbo loosinokkita leellishanno.
Lallawo
Yesuusihu Maaꞌnu Rodiiwiinni Rosse
11 Yaiqoobira ammanate roduuwisi qarri leellinosi. Yaiqoobi borreessino sokka isi ammanate roduuwisira qarra ikkinonsare afinota leellishshanno; hattono isi konne qarra qeela dandiitanno gara kulinonsa. Lawishshaho mitu Kiristaani amaalloonninsa amaale rahe diharunsannoho. (Yai. 1:22) Wolootu kayinni dureeyyete roorsidhannoreeti. (Yai. 2:1-3) Mitootaho kayinni arrawo eemadha qarra ikkitinonsa. (Yai. 3:8-10) Kuri Kiristaanira lowo qarri noonsaha ikkirono, Yaiqoobi kayinni hexxo mudhe insa kaaꞌla diagurino. Isi shaqqillunni kayinni xaaddotenni amaalinonsa; hattono ayyaanaamittete jawaante hasiissannonsari, cimeeyye kaaꞌlo xaꞌmidhanno gede jawaachishinonsa.—Yaiqoobi 5:13-15 nabbawi.
12 Maa ronseemmo? Wolootu qarri leelloꞌne hattono insa daafira dancha danchare hedde. Qullaawa Maxaafa xiinxallinseemmohu batinyu mannira Qullaawu Maxaafi amaale harunsa qarra ikkitansara dandiitanno. (Yai. 4:1-4) Insa busha rosicho agurte Kiristoosite gedee akatta leellishate yanna hasiissannonsaha ikkara dandaanno. Ninkeno Yaiqoobi lawishsha harunsine, rosaanonke maa biddi assiꞌra hasiissannonsaro kulate worbuulle ikka hasiissannonke. Yihowa umonsa heeshshi assanno manni isiwa daanno gede assannotanna biddi assiꞌra hasiissannonsare biddi assidhanno gede jawaante aannonsata addaxxine dancha danchare heda hasiissannonke.—Yai. 4:10.
13 Yaiqoobira umisi daafira gara ikkitino lao noosi. Yaiqoobi Yesuusi rodoo ikkino daafira woy lowo qoosso noosi daafira wolootunni roorinohu gede asse dihedino. Isi ammanate roduuwasi, “Baxantinoonni roduuwaꞌya!” yiino. (Yai. 1:16, 19; 2:5) Yaiqoobi mannu iso guutaho yee hedanno gede diassiꞌrino. Hatteentenni isi togo yiino: “Ninke baalunku woꞌmanka woyite soꞌneemmo.”—Yaiqoobi 3:2 nabbawi.
14 Maa ronseemmo? Ninke baalunku soꞌneemmore ikkinoommota qaango. Rosiinseemmo manna roorreemmohu gede assine heda dihasiissannonke. Mayira? Qullaawa Maxaafa xiinxallinseemmo manchi, soꞌneemmokkiri gede asse hedanno gede assineemmoha ikkiro, isi Maganu biddishsha harunsa didandeemmo yee hedara dandaanno. Ikkollana ninkerano Qullaawu Maxaafiha xintu seera harunsa qarra ikkitannonke woyiti nootanna, Yihowa qarra ikkinonkere qeelle saꞌneemmo gede kaaꞌlinonke gara kullummosiro isino Yihowara soqqama dandaannota huwatanno gede kaaꞌlineemmosi.
BIRRA 9-15
MAGANU QAALI GIDDO NOOTA MUXXE JIRO | IYYOOBI 4-5
“Kaphu Mashalaqqe Qorophe”
it-1 713 guf. 11
Elifaazi
2. Iyyoobite sase jaalla giddo mittoho. (Iyo 2:11) Kuni Temaani katami manchi Eesawuhu bayiru beetti sircho ikkikki digatino; konnira isi Abirihaami sirchootinna Iyyoobira tarete fiixaati. Isino ikko sirchisi egennonsanni naaxxitanno. (Er 49:7) Iyyoobi sheshifachishshara dagginori sasente jaallasi giddo Elifaazi ayirradonna maccaha ikkikki digatino; tini qolte isi insara bayira ikkara dandaannota leellishshanno. Sasente yannara umo coyiꞌrinohunna lowore coyiꞌrinohu isooti.
w05 9/15 26 guf. 2
Busha Hedo Gargadhe!
Elifaazi mitte hige tuncu yiinosiha maalaꞌlisanno coye qaage togo yiino: “Ayyaanu albaꞌyaanni hige sai; mannimmaꞌya baalano qiiddu. Hakkiicho mitturichi uurre no; danasi kayinni bade afammora didandoommo; caꞌlamaddi yiino darginni mitte huuro macciishshoommo.” (Iyo 4:15, 16) Elifaazi macciishshinoti hiittoo ayyaani hurooti? Elifaazi hakkiinni aane coyiꞌrinori, kuni ayyaani Maganunniha qullaawa sokkaancho ikkinokkita leellishanno. (Iyo 4:17, 18) Hakko ayyaani busha ayyaanaati. Hatto ikka hoogoommero Yihowa Elifaazino ikko lamenta jaallasi coyidhinorira rufannonsa? (Iyo 42:7) Elifaazi macciishshinoti agaanintete huurooti. Isi coyiꞌrinoti Maganu hedo diꞌꞌikkitino.
w10 2/15 19 guf. 5-6
Sheexaanu Totao Qorophe
Sheexaanu, Iyyoobite sase jaalla giddo Elifaazi kaxxe mannu Magano hagiirsiisa dandaannokkita coyiꞌrino. Elifaazi mannu “cuuncichu gede mircaannoha, bushshunni kalanqoonniha” ikkinota coyiꞌrihu gedensaanni Iyyoobira, “Soodonna hawarro mereero cancanamanno; ayino hedikkinni hegerera baꞌꞌanno” yiino.—Iyo. 4:19, 20.
Qullaawa Borro giddo wole baserano manna hawa gede hiiqqamara dandaannohu “doru uduunnichi” ledo lawinsoonni. (2 Qor. 4:7) Ninke cubbo ragiꞌnoommo daafiranna guuntete xeꞌne noonkehura wolqiweelootaho. (Rom. 5:12) Uminke wolqanni Sheexaanu siannonketa gargadha didandiineemmo. Kayi Kiristaana ikkinoommo daafira kaaꞌlannonkehu no. Wolqiweellummorono Maganu albaanni lowo waagi noonke. (Isa. 43:4) Hatteeno agurranna Yihowa huuccidhannosirira qullaawa ayyaanasi aannonsa. (Luq. 11:13) Maganu ayyaani Sheexaanu abbannoha aye qarrano dandiine saꞌneemmo gede “jawa wolqa” aannonke. (2 Qor. 4:7; Fil. 4:13) ‘Ammanatenni kaajjine’ Daawuloosi gimbummoro Maganu jawaantenna wolqa aannonke. (1 Phe. 5:8-10) Konnira Sheexaane waajja dihasiissannonke.
Kaphu Mashalaqqenni Dogantooti
● Mashalaqqe mamiinni fultinoteronna hiittootero buuxi
Qullaawu Maxaafi mayyaanno?: “Baalanka coye fonqoltine laꞌe.”—1 Teselonqe 5:21.
Mitte mashalaqqe lowo manni afinota woy odoote marro marro hinge kulloonnita ikkituro nafa woleho soyattora albaanni halaale ikkase buuxi. Hatto assa dandaattohu hiittoonniiti?
Hatte Mashalaqqe fultinohu addaxxinanni buichonni ikkinoronna teꞌee buuxi. Odoote uurrinshanna wole dirijjitta woxe afiꞌrate woy poletiku hajora yite mitte mashalaqqe shokkishshe kultara dandiitanno. Mitte odoora laꞌoottore wole odoote buicho ledo heewisiisi. Mito woyite jaallakki heddukkinni gara ikkitinokki mashalaqqe borreessite sokkahera woy dagoomittete webisayitera wortara dandiitanno. Hakko daafira mitte odoo addaxxinanni buichonni fultinota ikkitinoronna teꞌee buuxitokkinni ammantooti.
Mashalaqqete fushshinoonniri keeshshinokkihanna halaale ikkasi buuxi. Kullanni heeꞌnoonniri halaale ikkasinna teꞌee buuxate barra, mashalaqqe halaale ikkase leellishannorenna kaajja taje afiꞌrate woꞌnaali. Raqaxantino mashalaqqe shotinse kulliro woy togoo mashalaqqe manna kakkayisate hende qixxeessinoonniha ikkiro qoropha hasiissanno.
Maganu Qaalinni Ronseemmore
w03 5/15 22 guf. 5-6
Kaajjitine Uurre, Hattono Heeshshote Qolchansho Qeelle
Alamete doyichora noohu Yihowa halaalunni Magansiꞌranno manni wido ikka kaajje uurrate lowo geya kaaꞌlitannonke. Kuri mimmito baxanno roduuwi wido ikka lowo atooteeti! (1 Pheexiroosi 2:17) Wolootu ammanate roduuwinkeno kaajjite uurritanno gede kaaꞌla dandiineemmo.
Hanni keeraanchu manchi Iyyoobi assinore hendo. Suꞌmira iso sheshifachishate marinohu Elifaazi nafa togo yee coyiꞌrino: “Qaalikki ubbinore kayisino; ati shaqqitino wolqa jawaachishootto.” (Iyyoobi 4:4) Ninkena? Ninke mittu mittunkura ammanate roduuwinke kaajjite uurrite Maganoho soqqantanno gede kaaꞌlate qeechi noonke. Insa ledo heeꞌneemmo woyite togo yine qullaawu ayyaaninni borreessinoonni hedo harunsa dandiineemmo: “Daafurtino anguwa jawaachishshe! Leqe leqe yitino gulubba kaajjishshe!” (Isayaasi 35:3) Konnira ammanate roduuwikki ledo xaadatto woyite mitto woy lame rodoo jawaachishate mixo fushshiꞌra dandaatto. (Ibiraawoota 10:24, 25) Insa Yihowa hagiirsiisate sharrantannotera galatattonsaha ikkiro, tini heeshshote qolchansho qolchantanno woyite kaajjite uurritanno gede kaaꞌlitansara dandiitanno.
BIRRA 16-22
MAGANU QAALI GIDDO NOOTA MUXXE JIRO | IYYOOBI 6-7
“Heeshsho Duha Ikkitannoꞌne Woyite”
w06 3/15 14 guf. 10
Iyyoobi Maxaafita Luphi Yitino Hedo
7:1; 14:14—“Daafurunnita” woy “qaxarame loosanno manchihu gedeeha” yaa mayyaate? Iyyoobira lowo fonqoli iillinosi daafira mannu heeshsho daafurunnite yee hedino. (Iyyoobi 10:17) Mittu manchi reyihu gedensaanni Sioolete keeshshannohu baxe ikkinokki daafira, Iyyoobi tenne yanna qaxarame loosanno manchi ledo lawisino.
Yihowa ‘Dadillunni Hiiqqantinore Gatisannonsa’
MITO woyite, ‘mannu heeshsho haranchonna qarru woꞌminota’ ikkitinota hendammora dandiineemmo. (Iyo. 14:1) Tini mito woyite hexxo mudhineemmo gede assitannonke. Hundi yannara lowoti Yihowa soqqamaasine hexxo mudhitino woyiti no. Mitu isinni reyo nafa halchitino. (1 Mot. 19:2-4; Iyo. 3:1-3, 11; 7:15, 16) Ikkirono, addaxxitanno Magani Yihowa insa duucha hige sheshifachishinonsa hattono jawaachishinonsa. Insa xagge borreessinoonnihu ninke sheshonna roso afiꞌneemmo gedeeti.—Rom. 15:4.
g 1/12 16-17
Heeshsho Giwissannohe Woyite
Boosaallu boono ikkiherono togoori tuncu yaanni noohu ate callira ikkinokkita qaagi; xaa yannara baalunku mannira qarru iillanni no yaa dandiinanni. Qullaawu Maxaafi, “Kalaqamu baalu mitteenni techo geeshsha gametenni amadame uranni noota” kulanno. (Roomu Sokka 8:22) Amadinohe qarri bayichonkonni hoꞌlannokkiha lawirono yanna saꞌanni hadhu kiiro duucha woyite coyi woyyaawara dandaanno. Ikkina hakka geeshsha mayi kaaꞌlahera dandaanno?
Giddokkita gikki yiinohuranna ammaꞌnatto jaalikkira hasaaphi. Qullaawu Maxaafi, “Halaalaanchu jaali ayewoteno baxillaanchoho. Isi qarru barrira ilamanno rodooti” yaanno. (Lawishsha 17:17) Qullaawu Maxaafi giddo kulloonnihu keeraanchu manchi Iyyoobira lowo qarri iillisi woyite giddosita wolootaho hasaaphino. Isi togo yiino: “Heeshsho giwissinoena, hasiꞌrummo gede coyiꞌreemmo; heeshshoꞌya qaraartino gara leellisheemmo.” (Iyyoobi 10:1) Giddokkita wolootaho hasaapha xissokkinni beya afiꞌratto gedenna iillanni noohe fonqoli daafira gara ikkitino lao heedhannohe gede kaaꞌlitahera dandiitanno.
Giddokkita gudisse Maganoho kuꞌli. Mitootu huuccatto yaachishannonke coyinni beya afiꞌneemmo gedella assitannonke yite heddanno; Qullaawu Maxaafi kulannori kayi kawiinni baxxinoreeti. Faarso 65:2, Maganu Yihowa ‘huuccatto macciishshannoha’ ikkinota kultanno; hattono 1 Pheexiroosi 5:7, “Kiꞌnere malannohu isooti” yitanno. Qullaawu Maxaafi marro marro hige Magano addaxxa lowo geya hasiissannota ikkitinota kulanno. Lawishshaho:
“Woꞌmu wodanikkinni Kaaliiqa addaxxi ikkinnina, umikki egennora irkidhooti. Assattorira baalaho Magano albaanni qoꞌli; isino halaalaancho doogo kulannohe.”—LAWISHSHA 3:5, 6.
“[Yihowa] Ayirrissannosirira hasiisannonsare baala aannonsa; raarensa macciishshe gatisannonsa.”—FAARSO 145:19.
“Isiwa noonkehu hawaqiꞌneemmo coyi konneeti; isi hedino garinni huucciꞌneemmore baala macciishshannonke.”—1 YOHAANNISI 5:14.
“Kaaliiqi bushuulluwiinni fafe no; keeraanote huuccatto kayinni macciishshanno.”—LAWISHSHA 15:29.
Iillanni noohe fonqolo Maganoho kuꞌlattoha ikkiro isi kaaꞌlannohe. Qullaawu Maxaafi, “Woꞌmanka woyite iso addaxxe; . . . qarraꞌne baala isira hasaaphe” yee amaalannonkehu dimullaati.—Faarso 62:8.
Maganu Qaalinni Ronseemmore
Roduuwaꞌne Macciishshe, Egenne Hattono Mararrensa
10 Roduuwanke seekkine afate woꞌnaalle Yihowa lawishsha harunsa dandiineemmo. Roduuwaꞌne seekkitine affe. Gambooshshu hanafara albaanninna goofihu gedensaanni mimmitu ledo hasaabbe; ledo soqqamme; hattono dandiitinanniha ikkiro sagale wortine woshshensa. Hatto assitiniro, mitte mannunniwa gambo gibbannota labbinoꞌne rodoo waajjitannota ikkitinota, maalaamittete coye baxannoho yitine heddinanni rodii lowo geeshsha shaqqado ikkinota, hattono mitte gambooshshe barrisidhe dagganno maate gimbanninsata dandiite heedhannota huwattinara dandiitinanni. (Iyo. 6:29) “Manni coyi giddora” ea hasiissannonkekkiti egennantinote. (1 Xim. 5:13) Ikkirono, roduuwinke daafira afanna insa hattoore ikkitanno gede assinonsare huwatate woꞌnaala hasiissannonke.
Lallawo
Yesuusihu Maaꞌnu Rodiiwiinni Rosse
15 Yaiqoobi wodanaho coanno lawishsha horoonsiꞌrino. Iso Qullaawu ayyaani kaaꞌlinositi dihuluullissannote; ikkollana isi bayiru rodiisi Yesuusi horoonsiꞌrino lawishsha xiinxalleno lowore rosinoha ikkara dandaanno. Yaiqoobi sokkasi borreessi woyite horoonsiꞌrino lawishshi huwatate diqarrisannoho; hattono lawishshu amadino rosi xawe leellannoho.—Yaiqoobi 3:2-6, 10-12 nabbawi.
16 Maa ronseemmo? Wodanaho coanno lawishsha horoonsidhe. Malino lawishsha horoonsiꞌneemmoha ikkiro, mannu rosiinseemmo roso macciishshanno gede calla ikkikkinni rosino rosi surrensarano qaꞌmanno gede kaaꞌlineemmo. Tini, rosiinseemmo manni Qullaawu Maxaafiha qara halaale qaaganno gede kaaꞌlitanno. Yesuusi wodanaho coanno lawishsha horoonsiꞌrate fullahinoho; rodiisi Yaiqoobino isi lawishsha harunsino. Hanni Yaiqoobi horoonsiꞌrino lawishshi giddo mitto laꞌno; hattono kuni lawishshi wodanaho coannoho yineemmohu mayiraatiro laꞌneemmo.
17 Yaiqoobi 1:22-25 nabbawi. Yaiqoobi hincilaallote daafira horoonsiꞌrino lawishshi wodanaho coannoho yineemmo gede assannonkehu duuchu korkaati no. Isi Maganu Qaalinni horo afiꞌra hasiꞌnummoro nabbawa calla ikkikkinni nabbamboommore loosu aana hosiisa hasiissannonketa kula hasiꞌrino. Yaiqoobi horoonsiꞌrino lawishshi, isi borreessino sokka nabbawanno manni bayichonkonni, hincilaallotenni layiꞌranni noo mancho hedanno gede assannoho. Isi rosiisara hasiꞌrino rosi maati? Mittu manchi hincilaallotenni layiꞌre kae biddi assiꞌra hasiissannosire biddi assiꞌrikkinni aguriro tini gowwimmate. Hatteente gede, Maganu Qaale nabbambe kaꞌne heeshshonke giddo biddi assiꞌra hasiissannonkere biddi assiꞌnummokki agura gowwimmate.
18 Lawishsha horoonsiꞌneemmo woyite aane nooha sase coye assine Yaiqoobi lawishsha harunsa dandiineemmo: (1) Horoonsiꞌratto lawishshi rosiissanni nootto roso xawisate malinoha ikkasi buuxi. (2) Macciishshanni noohe mannira huwatate qarrisannokki lawishsha horoonsiꞌri. (3) Lawishshunni kuloottori xawe leellanno gede assi. Malino lawishsha afiꞌra qarra ikkituhero, Agarooshshu Shae Borro Indekse (Ingilizete Afoo) lai. Hakkiicho “Lawishshuwa” yaannohu hunda, lowo lawishsha afiꞌra dandaatto. Lawishshu mayikirafoonete gedeeti; mayikirafoone huuro luphi assitannonte gede, lawishshuno rosiinsanni rosi luphi yee leellanno gede assannota qaagi. Hakko daafira lawishsha, qara roso luphi assate calla horoonsiꞌri. Rosiisate dandoonke woyyeessiꞌneemmohu qaru korkaati, mannu jajankera ikkikkinni, dandaaminke deerrinni batinyu mannu hagiirraame Yihowa maate wido ikkanno gede kaaꞌlate.
BIRRA 23-29
MAGANU QAALI GIDDO NOOTA MUXXE JIRO | IYYOOBI 8-10
“Maganunnihu Bagamannokki Baxilli Sheexaanu Kaphinni Agarannonke”
Magano Hagiirsiisa Dandiineemmo?
Iyyoobira lowo qarri iillinosi; iillinosi qarri miincoonnie yee hedanno gede assinosi. Iyyoobi Maganoho ammanamirono ammanama hoogirono Maganu tenne bushshahono dikiiranno yee hedino; togo yee heda gara diꞌꞌikkitino. (Iyyoobi 9:20-22) Isi ani keeraanchoho yee kade coyiꞌrino; hatto yaasi ani Maganunni roore keeraanchoho yee coyiꞌrate gedeeti.—Iyyoobi 32:1, 2; 35:1, 2.
Yihowahu Bagamannokki Baxilli Kaaꞌlannonkehu Hiittoonniiti?
14 Maganunnihu bagamannokki baxilli ayyaanaamittete agarooshshe ikkannonke. Daawiti Yihowa huucciꞌranni togo yiino: “Ati anera maaxameemmo dargaati; qarrunni agarattoe; gatisaanchimmakkinni gaangeessoottoe daafira, qoonqoꞌya naggi asse faarsiꞌreemmohe. . . . Kaaliiqa addaxxitannore kayinni maaro doyissitannonsa.” (Far. 32:7, 10) Biꞌre hunda katama doyissine huxxinanni huxxi katamu giddo noo mannira agarooshshe ikkannonte gede, Yihowahu bagamannokki baxillino Yihowa ledo noonke jaalooma hunanno coyinni agarannonke. Hakkiino sae Yihowa bagamannokki baxillisinni isiwa shinqeemmo gede assannonke.—Erm. 31:3.
Maganu Qaalinni Ronseemmore
w10 10/15 6-7 guf. 19-20
“Kaaliiqi Hedo Afannohu Ayeti?”
19 “Kaaliiqi hedo” daafira maa ronsoommo? Yihowa hedo anfeemmo gede Maganu Qaale seekkine xiinxalla hasiissannonke. Mitto coye woꞌmunni woꞌma huwata dandiineemmokki daafira, uminke hedonni kaꞌne Yihowa daafira horontanni yoo yaa dihasiissannonke. Iyyoobi, “Tumo qoleemmosikki gedenna, ledosi yoote haꞌreemmokki gede, isi ane gede mancho diꞌꞌikkino” yiino. (Iyo. 9:32) Iyyoobi gede ninkeno Maganu hedo huwanteemmo woyite togo yine coyiꞌneemmo: “Kuni baalu Maganu loosinori giddonni shiimiidiho; loosinori giddonni macciishshinoommori hilireeti; wolqasi lowimma hiitto assine afa dandiinanni?”—Iyo. 26:14.
20 Qullaawa Borro nabbambeemmo woyite, hakko iso Yihowa hedo daafira huwatate qarrissanno hedo tuncu yitannonke woyite maa assa hasiissannonke? Hatte hajo daafira seekkine xiinxallinummohu gedensaanni xabbe leeltanno dawaro hoongummoro, tenne Yihowa addaxxineemmoronna teꞌee buuxiꞌneemmo faro gede assine laꞌꞌa dandiineemmo. Mito woyite, mite Qullaawu Maxaafi xagge Yihowara noonke ammana leellinsheemmo faro fantannonketa qaango. Yihowa assanno coyi daafira mitto mittonka coye gudinse afa dandiineemmokkita umonke heeshshi assine ammana hasiissannonke. (Ros. 11:5) Togo assanke soqqamaasinchu Phaawuloosi coyiꞌrino hedora sumuu yinoommota leellishshanno; isi togo yiino: “Maganu jiro, hayyosinna egennosi dandiinannikkite! Yoosino fonqollannikkite; doogosino anfannikkite. Kaaliiqi hedo afannohu ayeti? Isira mala aannosihu nooni? Maganoho liqiissannohunna, iso asale yaaꞌnannohu nooni? Baalunkuri isiwiinniiti, isinniiti, isiraati. Isira hegere ayirrinyi iillosi! Hamiiꞌni!”—Rom. 11:33-36.
BIRRA 30–BOCAASA 5
MAGANU QAALI GIDDO NOOTA MUXXE JIRO | IYYOOBI 11-12
“Hayyo Afiꞌranna Horoonsiꞌra Dandiinannita Sase Doogo”
w09 4/15 6 guf. 17
Iyyoobi Yihowa Suꞌma Guwisino
17 Iyyoobi ammaname heeꞌranno gede kaaꞌlinosiri maati? Isira fonqolu iillasira albaanni Yihowa ledo danchu jaaloomi heeꞌrannosi gede assiꞌrinoti egennantinote. Iyyoobi, Sheexaanu Yihowa hettisanni noota afinota leellishannori nookkiha ikkirono, isi Yihowara ammaname heeꞌrate murciꞌrino. Isi, “Reyammo geeshsha keeraanchimmaꞌya diagureemmo” yiino. (Iyo. 27:5) Iyyoobi Yihowa ledo noosi jaalooma kaajjishiꞌrinohu hiittoonniiti? Isi tarete fiixisi Abirihaami, Yisaaqinna Yaiqoobi Yihowa ledo jaalooꞌmitino gara macciishshinotinna tini Yihowawa shiqanno gede kaaꞌlitinositi dihulullissannote. Hatteeno agurranna Iyyoobi kalaqama lae Yihowa akatta huwata dandaanno.—Iyyoobi 12:7-9, 13, 16 nabbawi.
Yihowa Ledokki Noo Daafira Callakki Diꞌꞌikkootto
10 Ammanamino roduuwi ledo jaalooꞌmi. Dirinsa woy lophitino gari ikkihano ikkiro, songote giddonni dancha lawishsha ikkitannohe jaalla hasiꞌri. Qullaawu Maxaafi “Egenno geerruwiinni afiꞌnanni” yaanno. (Iyo. 12:12) Jajjabbu roduuwino ammanantino wedelliwiinni lowore rosa dandiitanno. Yoonaataani Daawitira lowo diro bayiꞌrannoha ikkirono, tini insa mimmitoho lubbote jaala ikkitannokki gede diassitinonsa. (1 Sam. 18:1) Daawitinna Yoonaataani qarru yannara nafa mimmitoho kaaꞌlante Yihowara soqqantino. (1 Sam. 23:16-18) Maatese Yihowa Farciꞌraasine ikkitinokkiti Iriina yinanni rodoo togo yitino: “Ammanate roduuwinke, ayyaanaamittete annanna ama woy roduuwa ikkitannonke. Yihowa hasiisannonkere wonshate insa horoonsiꞌrara dandaanno.”
11 Hakko iso waajjattoha ikkiro, roduuwu ledo jaalooma kalaqiꞌra shota ikka hooggahera dandiitanno. Hanni Retiina yinanni rodoo woꞌnaalsha laꞌno; ise halaale rossinohu mannu giwanni heeꞌreennaseeti; qoleno ise waajjitannote; togo yitino: “Ayyaanaamittete maateꞌya kaaꞌlonna irko hasiissannoeta ammane adha hasiissinoe.” Wolu manchira giddokkita fushshite hasaapha qarra ikkitahera dandiitanno; ikkirono, dancha jaalooma kalaqiꞌrate hatto assa hasiissannote. Jaallakki ate jawaachishanna kaaꞌla baxxanno; kayinni kaaꞌlitannohehu hiittoonniitiro atewiinni afa hasidhanno.
12 Ammanate roduuwinke ledo jaalooma kalaqiꞌra dandiineemmo doogga giddo mitte insa ledo soqqansho fulate. Aleenni qummi assiniti Kaarooli togo yitino: “Roduuwu ledo soqqansho fulaꞌyanna insa ledo wole Yihowa looso loosaꞌya lowo jaalla afiꞌreemma gede kaaꞌlitinoe. Lowo diro Yihowa kuri jaallaꞌya widoonni kaaꞌlinoe.” Ammanantino roduuwi ledo jaalooma kalaqiꞌrate sharrama gaabbissannota diꞌꞌikkitino. Yihowa callimmano ikko wole yaachishannohe coye qeelte saꞌꞌatto gede ate kaaꞌlate kuri jaallakki horoonsiꞌranno.—Law. 17:17.
it-2 1190 guf. 2
Hayyo
Maganu Hayyo. Woꞌmunni woꞌma hayyo afiꞌra dandiinannihu callichisi hayyicha Magano ikkinohu Yihowawiinniiti. (Ro 16:27; Aj 7:12) Egennote yaa halaale huwatate; Yihowa “hegere hegerera” kalaqaancho ikkino daafira (Fa 90:1, 2), kalqete alame, qinaabbino garanna ma garinni nooro seekke afino. Mannu mito coye xiinxallatenna haarore kalaqate kalaqamu seera, doyichonna wodho horoonsiꞌranno; kuri coye kalaqinohu Yihowaati; kuri coyi hoogoommero mannu tenne assa didandaanno. (Iyo 38:34-38; Fa 104:24; La 3:19; Er 10:12, 13) Isi fushshinohu amanyootu seeri beꞌe yinummokkinni heeꞌrate, dancha doorsha doodhatenna qinaabbino heeshsho heeꞌrate lowo geya hasiisannonke. (Mar 32:4-6; YIHOWA [Amanyootu seera fushshanno Magano] yaannoha lai.) Isi huwata dandaannokkiri dino. (Is 40:13, 14) Qullaawa ikkinohu amanyootu seerisi ledo sumuu yaannokkiri yannate geya heeꞌrannonna halaꞌlanno gede fajjinoha ikkirono, albillitte kayi isi hasiꞌrinore assa dandaanno; qoleno ‘afiisinni fulino qaalinna hedinori woꞌmikkinni’ digatanno.—Is 55:8-11; 46:9-11.
Maganu Qaalinni Ronseemmore
w08 8/1 11 guf. 5
Oosoꞌne Ledo Hasaawate Sharramme
▪ ‘Qaaqqiꞌya mitto coye coyiꞌrannohu maa hedeetiro huwateemmo?’ Iyyoobi 12:11, “Arrawu sagale qamasannonte gede, macca coyiꞌnanni coye badde affanno” yitanno. Qaaqqiꞌne woy qaaqqoꞌne coyidhannore ‘baddine afate’ sharrama hasiissannoꞌne. Wedellootu duucha woyite insa sodhannokkihu gede assite coyidhanno. Lawishshaho beettiꞌne, “Woꞌmanka woyite qaaqqullu gede assite laꞌꞌattoe!” woy “Ani yeemmore horontanni dimacciishshatto!” yaaꞌnera dandaanno. “Woꞌmanka woyite” woy “horontanni” yiinota haadhine isi ledo heewisama agurtine isi yaate hasiꞌrinore huwatate woꞌnaalle. Lawishshaho, “Woꞌmanka woyite qaaqqullu gede assite laꞌꞌattoe!” yaasi “Diammanattoe” yaa ikkitara dandiitanno; qoleno “Ani yeemmore horontanni dimacciishshatto!” yiinohu “Hasaaphammohera hasiꞌroommori no” yaate ikkara dandaanno. Konnira isi mitto coye coyiꞌrannohu mayyaate hasiꞌreetiro huwatate woꞌnaalle.