Ajuuja Fooliishsho 17 Kullihu Duumu Xiille Moyichi Maati?

Qullaawu Maxaafi mayyaanno?

Ajuuja fooliishsho 17 kullihu duumu xiille moyichi mitte kalqoomu uurrinshara lawishshaho; tenne uurrinsha mixo alamete gashshootubba mittoonsatenna insa riqiwe loosate. Alba tenne uurrinsha Qaalu Gondoori Maamara yinanni; xa kay Halantino Gashshootubba yinanni.

Duumu xiille moyichi mayimma afate kaaꞌlannonkere

1. Polotiku uurrinshaati. Duumu xiillichu moyichira “lamalu umi” noosi; kuni lamalu umi ‘lamalu ilaalinna’ “lamala mootoolla” (woy gashshootubba) lawishshaati. (Yohaannisi Ajuuja 17:9, 10) Qullaawu Maxaafi giddo ilaallanna moyicho gashshoote kulate horoonsiꞌnoonni.—Ermiyaasi 51:24, 25; Daanieeli 2:44, 45; 7:17, 23.

2. Kalqoomu polotiku gashshooti malaateeti. Duumu xiillichu moyichi, Ajuuja fooliishsho 13 kulliha lamala umo afiꞌrino moyicho lawanno; kuni gedensiidi moyichi kalqoomu (alamete) polotiku gashshooti lawishshaati. Lamunku moyichi lamala umo, tonne buudanna Magano xontanno suꞌmuwa afiꞌrino. (Yohaannisi Ajuuja 13:1; 17:3) Lamunku moyichi togo mitto gara ikkansa mulla hedeweelcho ikkinore diꞌꞌikkino. Duumu xiille moyichi kalqoomu polotiku gashshooti misileeti woy malaateeti.—Yohaannisi Ajuuja 13:15.

3. Biilloonye addi addi gashshootiwiinni afiꞌrino. Duumu xiille moyichi ‘fulinohu’ woy heeꞌra dandiinohu wole gashshootubbanniiti.—Yohaannisi Ajuuja 17:11, 17.

4. Ammaꞌnote ledo waaxamino. Alame woꞌmate noote kaphu ammaꞌnora lawishsha ikkitannoti Batiꞌra Baabiloone duumu xiille moyichi aana ofolte no; tini qolte moyichu ammaꞌno yitannore macciishshannota leellishshanno.—Yohaannisi Ajuuja 17:3-5.

5. Magano shollishannoho. Konni moyichira “Magano xonate suꞌmuwa aanasi borreessinoonni.”—Yohaannisi Ajuuja 17:3.

6. Boode yanna wolqa baꞌꞌanno. Duumu xiille moyichi yannate geeshsha “diimete”a keeshshanno, yaano wolqiweelo ikkanno; kay wirro kaꞌꞌanno.—Yohaannisi Ajuuja 17:8.

Qullaawu Maxaafi himani woꞌmino

Duumu xiille moyichi daafira kultannoti Qullaawu Maxaafi masaalo, Halantino Gashshootubba Uurrinshanna ise faashaanchi Qaalu Gondoori Maamari aana woꞌmitino gara laꞌno.

1. Polotiku uurrinshaati. Halantino Gashshootubba Uurrinsha ‘baalante miillase taalleenya agarsiisatenni’ polotiku gashshoote irkissanno.b

2. Kalqoomu polotiku gashshooti malaateeti. Coy gedera, 2011, Halantino Gashshootubba Uurrinsha wido ikkitino gobbuwa kiiro 193 ikkitino. Hakko daafira, alamete aana noo daganna gosa giddo rooriidita riqimbeemmo yitanno.

3. Biilloonye addi addi gashshootiwiinni afiꞌrino. Halantino Gashshootubba Uurrinsha heeꞌra dandiitinohu miilla ikkitino gobbuwanniiti; qoleno tenne uurrinsha biilloonyi hatti gobbuwa uyituse bikkinniiti.

4. Ammaꞌnote ledo waaxamino. Qaalu Gondoori Maamarino ikko Halantino Gashshootubba Uurrinsha ammaꞌnotewiinni kaaꞌlo afidhanni heedhino.c

5. Magano shollishannoho. Halantino Gashshootubba Uurrinsha xintantinohu “kalqoomu keerenna hobbaate agarsiisateeti.”d Tini mixose dancha labburono, ise kay Magano xontanni no; mayira yiniro, tini uurrinsha asseemma yitanni noori Maganu Gashshootisi calla assanno yiino coyeeti.—Faarso 46:9; Daanieeli 2:44.

6. Boode yanna wolqa baꞌꞌanno. Umihu Alamete Oli gedensaanni keere agarsiisate xintaminohu Qaalu Gondoori Maamari, mitte gobba wole wolqatenni horritannota hoola didandiino. Qoleno 1939 Layinkihu Alamete Oli kaita kuni maamari loosa agurino. Layinkihu Alamete Oli uurrihu gedensaanni, 1945, Halantino Gashshootubba Uurrinsha xintantino. Tenne uurrinsha mixo, loossanno garinna, qinaabbino garino Gondooru Maamari ledo mitto garaati.