Cinca Hexxotenni Agadhate

HEEꞌNOOMMOHU lowo geeshsha qarrisannohu “goofimarchu barra” ikkino daafira, Yihowa mannira albinni roore cinca hasiissannonsa. (2 Xim. 3:1-5) Alamete aana rooru manni umonsa baxannoho, sumuu yaa baxannokkihonna insaneeto qeeꞌlannokkiho. Togoo mannira cincate yinanniri coꞌonta dinonsa. Konni daafira mittu mittunku Kiristaanchi isonooto togo yee xaꞌma hasiissannosi: ‘Anino alamete noohu rooru manni gede cinca hoogeemmo? Isi cincate yaa mayyaate? Heeshshoꞌya baalantenni konne kaajja akata leellisha dandeemmohu hiittoonniiti?’

CINCATE YAA MAYYAATE?

Qullaawu Maxaafi giddo cinca yaanno qaale horoonsiꞌnoonnihu mitto qarrisanno coye dandee saꞌꞌa calla xawisate diꞌꞌikkino. Cincanno manchi togo assannohu hexxotenniiti. Konnira miincinkero woy koffi assininkero nafa koffi assinonke manchi ledo noonke aante woyyaabbara dandiitanno yine hexxineemmo. Cincanno manchi isiniitira calla ikkikkinni koffi assinosi manchira hedanno. Maganu Qaali baxillu giddonni burqitanno akatta giddo mitte ‘cinca’ ikkitinota kulannohu iseraati.a (1 Qor. 13:4) Qoleno Qullaawu Maxaafi kulanno garinni “ayyaanu laalo” giddo mitte “cincate.” (Gal. 5:22, 23) Ikkina konne akata lossiꞌra dandiineemmohu hiittoonniiti?

CINCA LEXXITANNO GEDE ASSIꞌRA DANDIINANNI GARA

Cincate akatinke lexxanno gede Yihowa ayyaani kaaꞌlo afiꞌrate huucciꞌra hasiissannonke; Yihowa addaxxitannosirira ayyaanasi aannonsa. (Luq. 11:13) Maganu ayyaani lowo wolqa afiꞌrinoha ikkirono, ninkeno huuccattonke ledo sumuu yaannore assa hasiissannonke. (Far. 86:10, 11) Hatto yaa kuni akati wodaninke giddo rumuxxanno gede barru baala cincineemmore ikkate sharrama hasiissannonke yaate. Ikkollana heeshshonke woꞌmantenni cincineemmore ikkate hakkiinni sainore assa hasiissannonke. Ikkina tennera kaaꞌlannonkeri woluri maati?

Yesuusi cinca leellishino gara seekkine xiinxallinummoronna faalesi harunsinummoro, albinni roore cincineemmore ikka dandiineemmo. Soqqamaasinchu Phaawuloosi “haaro mannimma” daafira coyiꞌri gedensaanni, “Kiristoosi keeri wodaniꞌnera mooho” yiino; “haaro mannimma” giddo mitte cincate. (Qol. 3:10, 12, 15) Yesuusi cincinohu Maganu yannasira baalanka coye biddi assanno yee addaxxino daafiraati; ninkeno Yesuusi lawishsha harunsine isi ‘keeri wodaninkera moohanno’ gede assiꞌra dandiineemmo. Yesuusi faale harunsineemmoha ikkiro, baxiri iillinkerono cinca dihoongeemmo.—Yoh. 14:27; 16:33.

Maganu haaro alame abbanno yanna quqquxamme agadhineemmoha ikkirono, Yihowa ninke cincinonke gara hendeemmo woyite ninkeno cinca ronseemmo. Qullaawa Borro togo yitanno: “Mitu mitu heddanno garinni ikkikkinni, Mootichu uyino hexxo wonshate dikeeshshanno. Ikkollana, baalunku aagintaawe higaranna ayino baꞌꞌara hasiꞌrannokki daafira kiꞌnera yee cincanno.” (2 Phe. 3:9) Yihowa cincinonke gara hiincanke, ninkeno woloota cincineemmo gede diassitannonke? (Rom. 2:4) Ikkina cinca hasiissannonkehu hiittoo yannaraati?

CINCA HASIISSANNONKE YANNA

Xaa yannara barru baala cincanke fonqolannori iillannonke. Lawishshaho, mittu coyiꞌnammora hendoommohu lowo geeshsha hasiisanno coyi heeꞌriro, wolootu coyidhanna mereero ea hoogate yine cincineemmo. (Yai. 1:19) Ikkitonsa baxissannohekki roduuwi ledo heeꞌratto woyiteno cinca hasiissannoheha ikkara dandaanno. Hatte yannara hanqe fooggala agurre, Yihowanna Yesuusi laanfenke cincitino gara heda hasiissannonke. Yihowanna Yesuusi shiimmaadda laanfe batisse dilaꞌanno. Hatteentenni insa dancha akattankenna akattanke woyyeessiꞌrate sharrammeemmota laꞌanno.—1 Xim. 1:16; 1 Phe. 3:12.

Wolootu coyiꞌnoommori woy assinoommori gara ikkinokkita kultannonke woyiteno cinca hasiissannonke. Hattoo yannara, koffi yaa woy soꞌronke ammana giwa rakkankera dandiitanno. Qullaawu Maxaafi kayinni kawiinni baxxinore assineemmo gede kulannonke. Togo yaanno: “Booꞌnaleessunkunni cincaaleessu woyyate. Koma amada gowwimma ikkitino daafira, ati hanqoho muddantooti.” (Ros. 7:8, 9) Konni daafira, assinoommokkire assitinoonni yininkero nafa, qolleemmo dawaro cincine heda hasiissannonke. Yesuusino wolootu beebbate suꞌmasi huntu yannara hatto assino.—Mat. 11:19.

Roorenkanni annuwunna amuuwu oosonsara gara ikkitinokki hedo woy lao noonsata wodanchite tenne biddi assate woꞌnaaltanno woyite cinca hasiissannonsa. Hanni mitte Awuroppaho noo Beeteelera soqqamannohu Maatiyaasi lawishsha laꞌno. Maatiyaasi wedellichu heeꞌreenna rosu mine ooso ammanasinni kainohunni haarintannosi. Umi qara annisinna amasi tenne diafino. Ikkollana gedensoonni qaaqqinsa ammanannore huluullama hanafinota wodanchino. Maatiyaasi anni Yuliisi “Hatte yannara cinca hasiissinonke” yiino. Maatiyaasi togo yee xaꞌmanno: “Maganu ayeti? Qullaawu Maxaafi Maganu Qaale ikkalla hoogi? Mitto coye assineemmo gede hajajinonkehu Magano ikkinota mayinni anfeemmo?” Qoleno isi annasi, “Atera noohe gedee lao woy ammana nooekki daafira calla soꞌroommo yaa dandiinannini?” yee xaꞌmanno.

Yuliisi togo yiino: “Mito woyite qaaqqinke xaꞌmo hanqanni xaꞌmanno; ikkollana hanqinohu anera woy amasira ikkikkinni halaalehooti; halaalu heeshshosi qarraataame assinoha lawinosi.” Ikkina Yuliisi maa assiyya? Isi togo yiino: “Aninna qaaqqiꞌya lowo saate hasaambeemmo. Hedosinna laosi leeltannoe gede duucha woyite sammi yee macciishsheemmo; mito woyite kayinni xaꞌmo xaꞌmeemmosi. Wole woyite qole xaꞌmote dawaro qolummo gedensaanni mitto barra woy haammata barra hattenne hedanno gede asseemmo. Konni garinni duucha hinge hasaawanke Maatiyaasi wodote, Maganu aliidimmanna Yihowa baxilli daafira kulanno roso sunu sununni wodanchannonna ammane adhanno gede assitinosi. Togo assa shota diꞌꞌikkitino, qoleno tennera yanna hasiissanno; ikkirono Maatiyaasi gale hose Yihowara noosi baxilli lexxanno gede assiꞌrino. Aninna minaamaꞌya qaaqqinke anje heeꞌreenna halaalu wodanisira qaꞌmiranno gede kaaꞌla dandiinoommo daafira tashshi yiinonke.”

Yuliisinna minaamasi qaaqqonsa cincite kaaꞌlitanno woyite Yihowa irkisannonsata addaxxino. Yuliisi hakkawarita qaage togo yiino: “Aninna amasi halaale seekke huwatanno gede kaaꞌlasira Yihowa huuccineemmota Maatiyaasira kuleemmosi; qoleno hatto assineemmohu banxeemmosi daafira ikkinota kuleemmosi.” Kuri anninna ama lowo geeshsha hasiisannoha cincate akata leellishansanni tashshi yiinonsa!

Addu Kiristaani woloota ayyaanaamittetenni kaaꞌla agurranna darga assiꞌrino dhibbi amadinonsare maatensa miillanna jaallansa kaaꞌlanna irkisa hasiissannonsaha ikkara dandaanno. Hanni Awuroppaho heedhannote Elleenib lawishsha laꞌno.

Mitu settu diri albaanni, Elleeni minaannira lame higge surrete giddo mundee duꞌnanteenna surresi baasa gawajjantino. Konninni kainohunni isi marara, hagiidhanna dadilla didandiino. Tini qolte, Elleenira shetto ikkitinose. Ise togo yitino: “Cincanna ganye huuccatto assiꞌra hasiissinoe. Lowo geeshsha sheshifachishinoehu Filiphisiyusi Sokka 4:13 te nooho ‘Wolqa aannoehunni isinni baalankare assa dandeemmo’ yaanno qummeeshshaati.”c Elleeni, Yihowa wolqanna jawaante uyinose daafira, cincite kaajjitino.—Faarso 62:5, 6.

YIHOWA GEDE CINCITINANNIRE IKKE

Cincate baalunkunni roore dancha lawishsha ikkinonkehu Yihowaati. (2 Phe. 3:15) Maganu Qaali giddo Yihowa cincinota leellishshannoti batinye dhagge no. (Neh. 9:30; Isa. 30:18) Yihowa Soddoomu katama huneemmo yiita Abirihaami tenne daafira duucha hige xaꞌmino. Ikkina Yihowa maa assiyya? Umo Yihowa Abirihaami coyiꞌranna mereero dieino. Hatteentenni Abirihaami xaꞌmo xaꞌmannanna huluullinosire kuꞌlanna Yihowa cince macciishshino. Hakkiinni Yihowa Abirihaami coyiꞌrinore qole coyiꞌre macciishshanni noosita leellishino; qoleno Soddoomu katamira tonne keeraano heedhuro nafa hunannokkita buuxisinosi. (Kal. 18:22-33) Ee, Yihowa cince macciishshatenninna rahe hanqa hoogatenni dancha lawishsha ikkinonke!

Cinca baalunku Kiristaani uddiꞌra hasiissannonsate haaro mannimma kifileeti. Konne muxxe akata lossiꞌrate sharrammeemmoha ikkiro, baxillaanchonna cinca ikkinoha iimi Annanke ayirrinseemmota leellinsheemmo; qoleno “Maganu qaale eino coye ammanatenninna cincatenni” ragidhannori wido ikkineemmo.—Ibi. 6:10-12.