Woxu Ledo Xaado Afiꞌrino Coye Tira

Hawaariya Phaawuloosi 1 Qorontoosi 6:1-8 (NW) geeshsha ammanate roduuwi mereero heedhara dandiitannota higgete yekkeero xawisino. Mitu Qorontoosi Kiristaani ‘mittore bashshi yitukki coyensa finqilaasinete albaanni shiqishiꞌrate yoote minira haꞌransanni’ Phaawuloosi hagiidhinokkita xawisino. (Kiiro 1) Qoleno isi, Kiristaanu mimmito kassasanni alamete daanynyootiwa haꞌra hasiissannonsakkihunna coyensa songote uyinoonni biddishshi garinni tidha hasiissannonsahu baqete korkaati noota coyiꞌrino. Qullaawu ayyaani marraeennasi borreessinoti tini amaale mayira hasiissinoro hanni laꞌno; hakkiinnino tenne amaale harunsinannikkihu hiittoo woteetiro laꞌneemmo.

Ammanate rodiinke ledo woxu coyi heeꞌrinkero hakko coye tirate umo assine woꞌnaala hasiissannonkehu uminke doogonni ikkikkinni Yihowa fushshino siraati garinniiti. (Lawishsha 14:12) Yesuusi yiinonte gede, kawanna kaꞌaa higino coyi lophphe lowo deerra iillikki tira sainori dino. (Maatewoosi 5:23-26) Mitu Kiristaani kayinni lowo yekkeero mereeronsa kalaqanteenna coyensa yoote minira massate geeshsha iillino; tini dadillissannote. Phaawuloosi togo yiino: “Kiꞌne kiꞌneneewa kassasantine yoote minira haꞌraꞌne kiꞌnera lowo geeshsha qeelamate.” Togo yiinohu mayiraati? Tennera qaru korkaati, togoo kisse songonnihanna magansiꞌneemmo Maganiha dancha suꞌma huntanno daafiraati. Konnira Phaawuloosi, “Hatteentenni kiꞌne miicantiniro diwoyyanno?” yee xaꞌmino xaꞌmo seekke assaawa hasiissannonke.—Kiiro 7

Qoleno Phaawuloosi wole korkaata xawisanni, kawanna kaꞌaa higino coye tirate kaaꞌlitannota dancha qixxaawo Maganu songote giddo worinota coyiꞌrino. Songote cimeeyye Qullaawa Borro egenno noonsa daafira hayyootaho; Phaawuloosi insa ‘heeshshote giddo tuncu yitanno hajo lainohunni roduuwu mereero farada dandiitannota’ coyiꞌrino. (Kiiro 3-5) Suꞌma hunanna awaawura labbinoti kabbaade miico lamu roduuwi mereero kalaqantanno wote coye sasu deerrinni tira hasiissannota Yesuusi coyiꞌrino: umihunni, baddalihunna baddalamihu calla gamba yee coye tirate woꞌnaalate; layinkihunni, tini tira hoogguro mittu woyi lamu manchi ledo tirate woꞌnaalate; sayikkihunni, tinino tirtannokkiha ikkiro, coye songo riqibbannoriwa cimeeyyenniwa massate.—Maatewoosi 18:15-17.

Songote cimeeyye togoo coye tirate higgete ogeeyye woyi daddalaano ikka dihasiissannonsa. Insa ammanate roduuwi mereero kalaqaminoha woxu coye tirate uminsa siraata difushshitanno. Hatteentenni cimeeyye, coyi kawanna kaꞌaa higinonsa roduuwi Qullaawa Borro amaale harunsite coye awunni tidhitanno gede kaaꞌlate woꞌnaaltanno. Lowonta sarraaqamino coyi tuncu yiinsaro kayinni, woradu aliidi laꞌꞌaancho woyi Yihowa Farciꞌraasineta sinu biiro kaaꞌlo xaꞌmidhanno. Ikkollana, Phaawuloosi uyino amaalera gobbaanni ikkitino hajo heedhara dandiitanno. Hattoo hajo giddo gama hiitteeti?

Mitte hajo woloota goddaasannokki garinninna salaametenni tirate, yoote minira haꞌra mito wote woga wonsha woyi higgete giddeeta ikkitara dandiitanno. Lawishshaho adhanna adhama diigantanno wote, ooso lossiꞌrate qoosso xaꞌmiꞌrate, adhama diigantu gedensaanni minaanni woyi minaama murtanno woxe wossannanni gede assiꞌrate, inshuraansete kaasa xaꞌmiꞌrate, mitte dirijjite kassartanno wote woxe qollanni manni ledo kiiramatenna nuzaaze wossannanni gede assiꞌrate yoote minira haꞌra hasiissannoha ikkanno. Qoleno mittu rodii higge xaꞌmitannosikki gede assiꞌrate mitto rodoo kassasa hasiissannosi yanna heedhara dandiitanno.a

Konni garinni higgete bayichcho haꞌra yekkeerama banxe assinannita ikka hooggu geeshsha, Phaawuloosi ayyaanu marraeennasi uyino amaale diiga diꞌꞌikkitino.b Ikkeennano mittu Kiristaanchi duuchchunku coyinni roorse Yihowa suꞌmi qullaawanno gara, hattono songote salaamenna mittimma agarantanno gara hasa hasiissannosi. Kiristoosi harunsaano roorenka baxxite leeltannohu mereeronsa noo baxillinniiti; ‘baxillu duuchchankare, “Umiꞌyara calla ikkoe,” diyaanno.’—1 Qorontoosi 13:4, 5; Yohaannisi 13:34, 35.