Magano kalaqinohu ayeti?

Hanni mittu manchi lamalu diri qaaqqisi ledo hasaawanni noohu gede assite hedi. Annu togo yii: “Biꞌre birqiiqa, Maganu uullanna aanase noore baalankare kalaqi; qoleno arrishsho, agananna beeddahe kalaqino.” Qaaqqu shiima geeshsha hede kae, “Anna, Magano ayi kalaqinoyya?” yee xaꞌmi.

Annu qolannoti, “Magano kalaqinonku dino. Isi ayewoteno heeꞌrannoho” yii. Haranchunni hatto yee qola qaaqqoho hakkawotira baqete. Lophanni haꞌranno wote kayinni, tini xaꞌmo huluullite dhibbannosi. Mitturichi hanafo nookkiha heeꞌrannohu hiitto ikkeetiro huwata qarrissannosi. Wole agurina, kalqete alame nafa hanafo noote. Konnira, ‘Maganu kaimi mamaati?’ yitanno xaꞌmo qaaqqoho huluullitannosi.

Qullaawu Maxaafi tennera mayyaanno? Lawishshu aana kulli anni yee qoli garinni qolanno yaa dandiinanni. Muse togo yee borreessino: “Yihowa, . . . ilaalla kalaqantara woy uullanna guma uyitanno baatto kalaqattora albaanni, ati hegerenni hegere geeshsha Maganoho.” (Faarso 90:1, 2) Masaalaanchu Isayyaasino togo yiino: “Diafootto? Dimacciishshootto? Uullate qacce Kalaqaanchi Yihowa, hegere Maganooti”! (Isayyaasi 40:28) Yihudano Maganu “dirra baalantera albaanni” nooha ikkinota borreessino.—Yihuda 25.

Tini xiqisubbanna hawaariya Phaawuloosi yiinori Maganu “hegeri Nugusa” ikkinota buuxisanno. (1 Ximootewosi 1:17) Hatto yaa, aye geeshshano badhe qolle hendummoro Maganu nookki woti dino yaate. Isi albillitteno duuchanka wote heeꞌranno. (Ajuuja 1:8) Konni daafira hegerimma Duuchanka Dandaanno Magani akataati.

Tenne huwata kabbaade ikkitinonkehu mayiraati? Heeshshonke diri harancho ikkino daafira ninke yanna laꞌneemmo gari Yihowa laꞌꞌanno garinni lowonta baxxanno. Maganu hegereha ikkino daafira, kumu diri isira mittu barri gedeeti. (2 Pheexiroosi 3:8) Lawishshaho, mito 50 barra heeꞌranno koroꞌmiisi ninke heeꞌneemmohu 70 woy 80 diri mageeshshihoro hede afannoni? Horonta diafanno! Qullaawu Maxaafi, Bayira Kalaqaanchonke hendiro ninkeno koroꞌmiisu gedeere ikkinoommota kulanno. Assaawate dandoonke nafa Yihowata hendiro hilite. (Isayyaasi 40:22; 55:8, 9) Konnira mannu ooso Yihowa daafira gudisse huwata dandiitannokki coyi nooti dhagge assiꞌnannita diꞌꞌikkitino.

Maganu hegerimma huwatate kabbaade ikkitunkerono, isi hegereho yee heda garankolla. Magano wolu kalaqinohu heeꞌroommero, Kalaqaancho ikkannohu hakkoyeti. Qullaawu Maxaafi kayinni, “baalankare kalaqinohu” Yihowa ikkinota kulanno. (Ajuuja 4:11) Hakkiinni saeno, kalqete alame nookki woti noota anfoommo. (Kalaqo 1:1, 2) Kalqete alamera kaimu mamaati? Ise kalaqinohu isera albaanni nooha ikka hasiissannosi. Qoleno isi assaawate dandoo noosihu wolu mittuno heeꞌrara albaanni lawishshaho mittu Beettisinna sokkaano heedhara albaanni nooho. (Iyyoobi 38:4, 7; Qolasiyaasi 1:15) Konni daafira isi umo callisi heeꞌrannoho. Maganu noohu kalaqame diꞌꞌikkino; korkaatuno Kalaqaancho kalaqara dandaannohu isira albaanni noohu dino.

Ninke heeꞌranna kalqete alame gudisidhe hegeri Magani nootera taje ikkitanno. Halaꞌlado kalqete alamenke milli yitanno gede assinohu, hattono ise illaallissanno higguwa fushshino Kalaqaanchi ayewoteno nooha ikka hasiissannosi. Wolu baalunkura heeshshote foole aa dandaannohu iso callaati.—Iyyoobi 33:4.