AANIIDI QOOLIHA COYI UMO | MAGANU WAAGAHO KIIRANNOHEHA LAWANNOHE?
Maganu Atera Assaawanno?
“Ani kaaꞌlannoehu nookkihonna buxichoho; Yihowa kayinni dideannoe.”a—HUNDIHU ISIRAEELETE MANCHI DAAWITI
Daga baalanti “wayi copho gedeeti.”—ISAYYAASI 40:15
Daawiti, Maganu anera assaawanno yee hedasi garaho? Aterana Maganu assaawanno? Batinye manna duuchanka dandaanno Magani insara assaawannota ammana qarrissannonsa. Mayira?
Tennera korkaata ikkannori giddo mittu, Maganu mannu oosowiinni lowo geeshsha roore ikkasiiti. Isi lowimma hendiro, daga baalanti “baaldete giddo noote wayi copho gedeeti, hattono miizaanu aana noo bukicho gedeeti.” (Isayyaasi 40:15) Yannankera mittu borreessaanchi quwa sae togo yaate geeshsha iillino: “Mittu mittunku manchira assaawannohunna assinanni coyira giddaawanno Magani no yee ammana beebbate.”
Mitootu kayinni, amanyootiꞌya Maganu assaawannoe gede assannoha diꞌꞌikkino yite heddanno. Lawishshaho, Jiimi yinanni manchi togo yiino: “Salaame heedhannoe gedenna aneneeto qeeꞌla dandeemmo gede, duucha hige huucciꞌroommo; kayinni hanqoꞌya hooꞌla didandoommo. Gedensaanni, bunshete quwa saoommoha ikkoommo daafira Maganu kaaꞌla hooginoe yee hedummo.”
Maganu mannu ooso caaqqi yee nafa laꞌꞌannokki gede ikke xeertiꞌrino yaateni? Guunte afidhinokki kalaqosi daafira mayi macciishshamannosi? Maganu umisi kulinkero ikkinnina, Isi daafira kuni konneeti yee coyiꞌranna tenne xaꞌmuwara dawaro qola dandaannohu dino. Ikkirono, Maganu ayyaanisinni mannu oosora uyino sokka yaano Qullaawu Maxaafi, isi mannu oosori dhiwannosikkiha xeertote Magano ikkinokkita kulanno. Qullaawu Maxaafi, “Isi mitti mittinkewiinni xeertiꞌrinoho yaa diꞌꞌikkino” yaanno. (Hawaariyaatete Looso 17:27) Aante noote shoole birxichuwara, Maganu manna ma garinni laꞌꞌannoronna hunda manna ma garinni amadinoro Qullaawu Maxaafi kulannonkere laꞌneemmo.
a Faarso 40:17; Qullaawu Maxaafi yaanno garinni Maganu suꞌmi Yihowaati.