Maganu Baxannokki Budiwiinni Xeertidhe!

YESUUSI KIRISTOOSI, “Halaalu keere fushshannoꞌne” yiino. (Yoh. 8:32) Ee, Kiristoosi harunsa haafa ammananni, kaphu rosinna hexxonni, hattono sholladu assootinna gadenni keere fushshitanno.

Ikkirono, hundi yannante gede yannankera noo Kiristaanino albi budinsawa higanno gede xixxiiwannori duucha wote tuncu yaannonsa. (Galaatiya 4:9, 10) Hige baalunku budinna woga gawajjitannote yaa diꞌꞌikkino. Mittu Kiristaanchi qooxeessisira nooha kaaꞌlannohanna bunshe afiꞌrinokki bude harunsate doodhara dandaanno. Ikkollana, mittu budi Maganu Qaali rosiisannori ledo sumuu yaannokkiha ikkiro Kiristaanu diharunsanno. Konni daafira Yihowa Farciꞌraasine Gannu ayyaana, ilantino barranna Maganu Qaali ledo xaadannokkiha wole bude ayirrissannokkita lowo manni afino.

Yihowa soqqamaano waajjitukki tenne assa gibbino daafira jaallansa, olliinsa manninna ammaninokki fiixinsa baasa qacifatinonsa hattono taqaawwaminonsa. Hakko iso mannu madaarshunna sargete yannara hattono ilamino barra ayirrisanno wote baca bude harunsannowa mite mite Afiriku gobbuwara roduuwinkera togoori iillannonsa. Roduuwinke togoo budira karsantanno gede assate mannootu lowonta gadachitannonsa; lawishshaho waajjishiishshannonsa hattono wolqatenni addi addire assitanno. Ikkina Kiristaanu kaajje uurra dandaannohu hiittoonniiti? Hasiissannokki heewo giddora eꞌnikki togoo budira karsamatenni gata dandiinanni? Tenne xaꞌmuwara dawaro afiꞌrate, hanni ammanamino Kiristaani Qullaawa Borro ledo sumuu yaannokki budiwiinni xeertiꞌra dandiino gara laꞌno.

MADAARSHU LEDO XAADO AFIDHINOTA HAAFA AMMANA

Wodiidi Afirikira mannu harunsannohu wiꞌlatenna madaarshu ledo xaado afiꞌrinohu lowo budi no. Wiꞌlaanchu wiꞌlate mine giira hashsha woꞌma bubbanno gede assineenna mitto woy haammata hashsha ofolle galansa rosantinote. Shiidhino maate wido ikkitinori sagale raissara, umo haxidhara, woy madaarshu barri saꞌꞌa geeshsha biso nafa hayishshidhara difajjinanni. Hakkiinnino daro udulle baxxino garinni karsiinse qixxeessineenna biso hayishshidhanno. Kiristaanu togoo bude harunsa hasiissannonsa? Dihasiisannonsa. Kuni baalunku lubbo direyitanno yine ammannannita hattono reyitinore quwa saꞌne waajjinannita leellishanno assooteeti.

Mekibibi 9:5 togo yitanno: “Heeshshote noori reyitannota affino; reyitinori kayinni mittoreno diaffanno.” Mittu manchi konne halaale afiro ‘reyino manni ekera’ yinannire waajjatenni keere fulanno. Ikkina mittu Kiristaanchi ayiddisi isira danchare hede togoo budira karsamara xixxiiwannosi wote ma assa hasiissannosi?

Hanni Afirikaho heedhannotera anna shiidhinote Jeeni yinanni rodoora iillinore laꞌno. Ise wiꞌlate minira marte eꞌanni heedheenna, reyino annise ekera hagiirsiisate isenna ayiddise gudisire reeshsha doyisse hashsha woꞌma sirba hasiissannonsata kullise. Jeeni togo yitino: “Ani Yihowa Farciꞌraasincho ikkoomma daafira togoore asseemmakkita kulummansa. Ikkollana layinki barra madaarshu gedensaanni, ayiddu giddo jajjabba ikkitinori reyino anninke ekera gawajjitannonkekki gede maatete miilla baalantera biso hayishshitara kaꞌinota coyidhu. Hakkawoteno togoorira karsama giwumma. Hatte yannara amaꞌya mitto mine bande worroonni. Isewa mara hasiꞌrannohu baalunku balaxe tennera hende qixxeessinoonni agatto aga hasiissannosi.

“Ani kayinni konni baalunku coyira karsama giwumma. Minira haꞌre sagale worumma gedensaanni, haare amaꞌya noo minira haꞌrumma. Tennera ayiddiꞌya lowo geeshsha koffi yiino. Fiixiꞌya ane difayyote yee hedino.” Hakkiinni saeno insa qacifatinose, qoleno togo yee ruminose: “Ammanakkira yite budenke giwootta daafira, annikki ayyaani dielannohe. Isinni, ooso nafa diꞌꞌilatta.” Ikkirono, Jeeni diwaajjitino. Hakkiinni mayi maikkiyya? Ise togo yitino: “Hatte yannara lamu qaaqquulli nooe. Xa kayinni lee ikkitino! Layinkita ooso diꞌꞌilatta yiie manni tenne laiti saalfatino.”

SIIMU XAADINNI “KEERAAꞌMA”

Wolu budi kayinni mittu manchi galte shiiriro iso keereensate. Galte reyituro, ise ayiddi rodoose woy isera muli fiixa ikkitanno mancho shiirino minaannira haare massanno. Isi ise ledo siimu xaado assara giddeessinanni. Wole adha dandaannohu hakkuyi gedensaanniiti. Reyinohu minaanna ikkirono konne bude harunsinanni. Mannu konne bude harunsannohu, tenne assa lubbote noo galte reyi manchi “ayyaaninni” keereensitanno yee hedannohuraati.

Konni garinni “keeraaꞌma” giwanno manchira fiixu baasa hanqanno. Bohamara, mannu qacifatasira hattono rumasira dandaanno. Hattono ikkiro, Kiristaanu konne bude diharunsanno. Meessi galte ikkinokki manchi ledo siimu xaado assa “keereensitannota” ikkitukkinni Maganu albaanni batte ikkitinota Kiristaanu afino. (1 Qorontoosi 6:18-20) Qoleno, Kiristaanu “Mooticha ammaninoha calla” adha hasiissannonsa.—1 Qorontoosi 7:39.

Zaambiyaho heedhannoti Vayoleti yinanni Kiristaancho minaannase shiidhino. Hakkiinni fiixu mitto mancho haare masse isi ledo siimu xaado assitara wotto worise. Vayoleti maahoyye yaa gibbuta, ise qaxxaasate buetenni waa dirridhannota hoollise. Qoleno duuchu manni haꞌranno doogo widoonni saꞌannokki gede, gibbe hattee doogo hadhannoha ikkiro kayinni keere saꞌannokkita kullise. Ikkollana, ise fiixaseno ikko olliise manna waajjite dihuxidhino.

Gedensaanni Vayoleti qooxeessaho noohu yoote minira woshshinise. Ise amanyoote bainore assitannokkihu mayiraatiro Qullaawa Borro horoonsidhe yoote mine xawisse kultu. Yoote minino ammanase ledo sumuu yaannokkiha qooxeessu budenna woga harunsitara giddeessa dandiinannikkita kule isera faradi. Ise konni garinni kaajjite uurrase, hakko ollii giddo togoo budira karsamanno gede xixxiimbanni roduuwira iillanno qarri ajanno gede assitino.

Moniika yinannite Afirikaho heedhanno rodoorano minaannase shiidhu gedensaanni hattoori iillinose. Minaannise ayiddi ise wolu manchira aara murciꞌre kai. Moniika togo yitino: “Umi Qorontoosi 7:39 noo amaale harunsate qodhe kaoomma daafira maahoyye yaa giwumma.” Mannootu kayinni hexxo mudhite diagurtino. Ise togo yitino: “Insa waajjishiishshue. ‘Tenne giwittaro, layinkita adhannoheha diafiꞌratta’ yitue. Qolteno, wolu ammanate roduuwiꞌyano maaxame konni budi garinni keeraaꞌminota kulte ammansiissaera woꞌnaaltino.” Ikkirono, Moniika kaajjite uurritino. Ise togo yitino: “Lame diro adhamummakki keeshshumma; hakkuyi gedensaanni, Kiristaanu harunsanno seeri garinni adhamumma.” Xaa yannara Moniika woꞌma yanna suwisaancho ikkite soqqantanni no.

UMO KAꞌꞌANNA REYINO QAAQQO ILA

Wodiidi Afirikira heeꞌranno Kiristaani, umo kaꞌnanni wotenna reyino qaaqquulli ilamanno wote harunsinanni budeno giwa hasiissinonsa. Togoohu lowo geeshsha xissiisanno coyi ikkannohu Maganu hanqinni ikkikkinni guuntete xeꞌne noonke daafiraati. (Roomu Sokka 3:23) Ikkirono Afirikaho mitu qooxeessira mitte mancho umo kaꞌanno wote, mannu ise battaabbinote gede asse mite yanna geeshsha madde qolanno.

Muli yannara umo kaꞌinoti mitte mancho mittu Yihowa Farciꞌraasinchi ise miniwa hige maranna laꞌe dhagge assidhino. Isi shiqe marita mulisera iillikki togo yitu: “Kawa higge daggooti! Budinke garinni, muli yannara umo kaꞌino manchowa dimarranni.” Marino rodii kayinni Yihowa Farciꞌraasine Qullaawu Maxaafi sokka duuchunku gari mannira kultannotanna umo kaꞌꞌate ledo xaado afiꞌrinoha qooxeessu bude harunsitannokkita kulise. Hakkiinni Isayyaasi 65:20, 23 nabbawe Maganu Mangiste gashshitanno wote umo kaꞌꞌanna reyino qaaqqo ila heedhannokkita xawise kulise. Konninni kainohunni, mancho Qullaawa Maxaafa xiinxallate maahoyye yitino.

Mannu reye ilamino qaaqqi madaarshi yannarano haafa ammana ledo xaado afiꞌrino bude harunsanno. Jooseefi yinannihu Yihowa Farciꞌraasinchi togoo madaarsha fule noowa, marino manni baalunku darotenni karsiinse qixxeessinoonni xagganni anga hayishshiꞌranna gagasoho buudha hasiissannonsata kullisi. Konne assinannihu qaaqqu “ayyaani” galagale daye gawajjannonsakki gedeeti yinisi. Jooseefi reyitinori lubbote noore gawajjitannokkita Qullaawu Maxaafinni rosino daafira, togoore assannokkita ayirrinyunni kulinsa. Hakkuyi gedensaannino, mitu manni hakkoye xagicho buudhanno gede iso xixxiiwa diagurino. Jooseefi kayinni maahoyye diyiino. Madaarsha fulinohu wolu mannino kuni Kiristaanchi waajjikki kaajje uurrinota laiti, hakkoye xagicho adha giwi.

HASIISSANNOKKI HEEWO GIDDORA EꞌINOONTE, KAYINNI KAAJJITINE UURRE

Manna waajjanna dagoomu giddonni bonkannie yine waajja anga uyinanni gede assitara dandiitanno. Lawishsha 29:25, “Manna waajja woshshaadote” yitanno. Kageeshsha laꞌnummo temokkiruwa tenne xiqiseti layinki assaawe halaale ikkitinota leellishshanno: “Yihowa addaxxannohu kayinni agarooshshe afiꞌranno.”

Ikkihano ikkiro, roore wote hasiissannokki heewonni gata dandiinanni. Lawishshaho, mittu Kiristaanchi fiixu wiꞌla fulanno wote, anga oye qeelamanno gede assasira dandaanno coyi kalaqama geeshsha sammi yee agara dihasiissannosi. “Busulu manchi busha coye lairo maaxame sayisanno; egenno xeꞌinosihu kayinni aanaho haꞌranno, qarruno iillannosi.”—Lawishsha 27:12.

Madaarshunniwa maa maa assinaraatiro hayyotenni balanxe xaꞌma busullete. Kiristaanchu kullannisi budi gariweelo ikkiro, hattee faro horoonsiꞌre togoo budira karsamannokkihu mayiraatiro “shaqqillunninna ayirrinyunni” kula dandaanno. (1 Pheexiroosi 3:15) Mittu Kiristaanchi Qullaawu Maxaafi aana xintantino ammanasi umonni xawise kulannoha ikkiro, fiixisi ammanasi roore ayirrisanno hattono iso waajjishiishate kaꞌꞌa hoogara dandaanno.

Fiixu baxire yiirono, mittu Kiristaanchi waajjishiinshoonnisi daafira woy gariweelo coye assinoonnisi daafira calla waajje Maganu ayirrannokki gede assanno bude harunsa dihasiissannosi. Beebbate waajjanni keere fulloommo. Hawaariya Phaawuloosi togo yee kaajjishe amaalino: “Kiristoosi togoo wolapho afiꞌneemmo gede assinonke. Hakko daafira, kaajjitine uurre hattono kiꞌneneeto borojjimmate qambari giddora galagaltine eessitinoonte.”—Galaatiya 5:1.

[Qoola 30 noo misile]

“Umi Qorontoosi 7:39 noo amaale harunsate qodhe kaoomma daafira maahoyye yaa giwumma”