Woꞌma Yanna Soqqansho Giddo Noore Deꞌinoonte
‘Ammanate loosoꞌnenna baxillu kakkayiseennaꞌne daafurtinanni daafuro ayewoteno dideꞌneemmo.’—1 TES. 1:3.
1. Phaawuloosi isi waro Yihowara diinaggaabbe soqqantannore mayino?
HAWAARIYA PHAAWULOOSI danchu duduwira yite diinaggaabbe loossannore horo dideino. Isi togo yee borreessino: “Ammanate loosoꞌnenna baxillu kakkayiseennaꞌne daafurtinanni daafuro, hattono Mootichanke Yesuusa hexxitine kaajjitine uurritinoonnita Maganinkenna Anninke albaanni ayewoteno dideꞌneemmo.” (1 Tes. 1:3) Yihowano wolqansa assitu deerrinni isira ammanante soqqantannori baalunku daafurtanno daafuro horo dideanno.—Ibi. 6:10.
2. Konni birxichira maa ronseemmo?
2 Hundano ikko yannankera batinye Yihowa soqqamaano isira woꞌma yanna soqqamate yite lowore agurtino. Hanni umi xibbi diro mitootu soqqantino gara laꞌno. Qoleno, dirinkera woꞌma yanna soqqansho giddo mite hiitteetironna Maganoho baxxino garinni soqqamate insaneeto shiqishshinore deꞌneemmokkita leellisha dandiineemmo gara laꞌneemmo.
UMI XIBBI DIRI KIRISTAANA
3, 4. (a) Umi xibbi diro mitu Kiristaani soqqaminohu ma garinniiti? (b) Insa maalaamittete hasiisannonsare afidhannohu hiittoonniiti?
3 Yesuusi cuuamihu gedensaanni hakkawontenni, alame woꞌmate loosamanno looso safino. (Luq. 3:21-23; 4:14, 15, 43) Isi reyi gedensaanni, hawaariyaatesi konni sabbakate loosira albisa ikkitino. (Looso 5:42; 6:7) Mitu Kiristaani lawishshaho Filiphoosi Paalestiinu gobbara sawaakenna misiyoone ikke soqqamino. (Looso 8:5, 40; 21:8) Phaawuloosinna wolootu qolte hakkiinni saꞌe xeertidhe hadhino. (Looso 13:2-4; 14:26; 2 Qor. 1:19) Mitootu lawishshaho Silvaanoosi (Sillaasi), Marqoosinna Luqaasi borreessaano ikkiteno soqqantino. (1 Phe. 5:12) Kiristaanu meentino kuri ammanamino roduuwi ledo soqqamino. (Looso 18:26; Rom. 16:1, 2) Kuri meyanna labbaa roduuwita hagiirsiissanno temokkiro Girikete Afiite Qullaawa Borro giddo nabbawa dandiineemmo; insa xagge Yihowa soqqamaanosi looso lowo geeshsha naadannotanna towaatannonsata buuxissanno.
4 Hakkawaro woꞌma yanna soqqamaano maalaamittete hasiisannonsare afidhannohu hiittoonniiti? Mito wote ammanate roduuwinsa wosinsitannonsa hattono wolu gari kaaꞌlo uyitannonsa; insa kayinni togoo kaaꞌlo dixaꞌmidhino. (1 Qor. 9:11-15) Mitu roduuwinna songuwa uminsa fajjonni togoo roduuwa kaaꞌlitino. (Looso 16:14; Hawaariyaatete Looso 16:15 nabbawi;a Fil. 4:15, 17, 18; Filiphisiyusi 4:16 nabbawi.b) Phaawuloosinna ledosi hadhanni soqqantannori hasiisannonsare afiꞌrate gama saate uminsa loosono loossanno.
DIRINKERA NOORE WOꞌMA YANNA SOQQAMAANO
5. Mittu minaanninna minaama woꞌma yanna soqqansho giddo sayissino heeshsho daafira mayi macciishshaminonsa?
5 Dirinkerano batinyu roduuwi woꞌma yanna soqqansho giddora eꞌe diinaggaabbe soqqantanni no. (“Babbaxxitinota Woꞌma Yanna Soqqansho” yitanno saaxine lai.) Insa togoo heeshsho heeꞌra doodhitinohura mayi macciishshamannonsa? Insa tenne xaꞌmo xaꞌmittoha ikkiro, jawaachishannore macciishshattoti egennantinote. Hanni mitto lawishsha laꞌno: Woꞌma yanna suwisaancho, baxxino suwisaancho, misiyoonenna wole gobbara Beeteelete maate miila ikke soqqaminohu mittu rodii togo yiino: “Heeshshoꞌya giddo doodhoommo coyi baalunkunni roortannoti woꞌma yanna soqqansho giddora eate. Tonaa settu dirihu noommo waro, yuniversitete qajeelshi, woꞌma yanna maalaamittete loosinna suwisaancho ikkate giddo mitto doodha hasiissinoe. Yihowa isira woꞌma yanna soqqamate yine agurreemmo coye hawannokkita umiꞌya temokkironni buuxoommo. Yihowa uyinoe ogimmanna dandoo baalanta maalaamittete looso loosoommoro horoonsiꞌre afeemmokki garinni horoonsiꞌra dandoommo.” Minaamasi qolte togo yitino: “Uyinoonninkehu mittu mittunku loosi lopheemma gede kaaꞌlinoe. Marro marro Yihowa agarooshshenna biddishsha afiꞌra dandiinoommo; ronsoommota qawaaxxote heeshsho agura hoongoommoro togoore diafiꞌneemmo. Woꞌma yanna soqqamaano ikkine heeꞌneemmo heeshsho daafira Yihowa barru baala galaxxeemmasi.” Atina hattoo heeshsho heeꞌra dihasiꞌratto?
6. Yihowa isira soqqammeemmo soqqansho ma garinni laꞌꞌanno?
6 Hige mitu roduuwira heeshshonsa gari woꞌma yanna soqqansho giddora eate injaannonsakkiti egennantinote. Yihowa insa isira woꞌma lubbonsanni soqqamate sharrantanno sharro lowo geeshsha naadannota dihuluullammeemmo. Hanni Phaawuloosi Filimoona 1-3 qummi assinoha Qolasiyaasi songo Kiristaananna woloota hattee songo miilla hedi. (Xiqise nabbawi.c) Phaawuloosi insa naadinonsa; Yihowano hattonni naadannonsa. Iimi Anninke kiꞌne soqqanshono naadanno. Ikkina woꞌma yanna soqqansho giddo noore kaaꞌlitinara dandiitinannihu hiittoonniiti?
SUWISAANO KAAꞌLA
7, 8. Suwisaano soqqantannohu ma garinniiti? Wolootu songote miilla insa kaaꞌla dandiitannohu hiittoonniiti?
7 Umi xibbi diro heedhino sawaakootinte gede, diinaggaabbe soqqantanno suwisaano songote lowo jawaante ikkitanno. Batinye suwisaano aganu kiiro 70 saate soqqantanno. Kore suwisaano kaaꞌla dandiitinannihu hiittoonniiti?
8 Shaarii yinanniti mitte suwisaancho togo yitino: “Suwisaano barru baala soqqansho fultanno daafira daafurtannokkire labbanno. Ikkirono, jawaachishannohu hasiisannonsa.” (Rom. 1:11, 12) Boode dirra suwisaancho ikkite soqqantinoti wole rodoo songonsara noo suwisaano daafira togo yitino: “Insa woꞌma wote diinaggaabbe soqqantanno. Wolootu soqqansho makeenunni haadhe hadhannonsaha, sagale koyissannonsaha, nadaajete boode woxe uyitannonsaha woy wolu garinni woxu kaaꞌlo uyitannonsaha ikkiro insa galattanno. Tini addinta insa daafira assaabbinannita huwattanno gede assitannonsa.”
9, 10. Mitu roduuwi songonsa giddo noo suwisaano kaaꞌlate ma assitino?
9 Soqqansho ledonsa fultine suwisaano kaaꞌla hasidhinanni? Baabbii yinanni suwisaancho togo yite hedose kultino: “Lamalate mereero ledonke soqqamanno manni lowo geeshsha hasiisannonke.” Hatte songonkura nooti wole suwisaancho qolte, “Barra barra soqqanshote miila afiꞌra lowo geeshsha qarrissanno” yitino. Xa Birukiliini Beeteelera soqqantannoti mitte rodoo suwisaancho ikkite sayissino yannare kayisse hagiirrunni togo yitanno: “Makeenu nooseti mitte rodoo, ‘Ayewoteno soqqanshote miila hoogittaro, silke dowwolie; ledokki soqqameemmana’ yitinoe. Ise suwisaanchimmaꞌyanni kaajje uurreemma gede lowore kaaꞌlitinoe.” Shaarii qolte dea hasiissannokkiha mitto coye togo yite qummi assitino: “Soqqanshote gedensaanni, adhantinokki suwisaano roore wote calla heedhanno. Adhaminokkiha meyanna labbaa roduuwa saꞌne saꞌne maatete magansiꞌrara koyisa dandiinanni. Wolere assiꞌnanni woteno insa koyisa jawaantensa baꞌannokki gede kaaꞌlitannonsa.”
10 Woꞌma yanna soqqansho giddo 50 meddi yaanno diro keeshshitinoti mitte rodoo alba isenna wolootu mine assiꞌrinokki roduuwi kaaꞌlo afiꞌrino gara kultanni togo yitino: “Boodu agani sai kiiro cimeeyyenke dagge towaattannonke. Insa ordu keerenke, maalaamittete loosinke daafiranna qarrisinonkeri woluri nooro xaꞌmitannonke. Togoore xaꞌmitannonkehu addinta kaaꞌla hasidheeti. Insa kaaꞌlinanninkeri nooronna teꞌee afate qaenke dagganno.” Tini temokkiro Phaawuloosi Efesooni heeꞌrannohu maate noosihu mittu manchi assinosirira galatanni yiinore qaagiissitankera dandiitanno.—2 Xim. 1:18.
11. Baxxitino suwisaano soqqantannohu hiittoonniiti?
11 Mite songuwa baxxitino suwisaano mereeronsa noo daafira baraadhino. Kuri meyanna labbaa roduuwi aganunni 130 saate soqqantanno. Qanchu soqqanshoranna wole doogganni songo kaaꞌlate lowo saate sayissanno daafira maalaamittete looso hakkeeshshi geeshsha woy horonta diloossanno. Insa soqqanshonsa aana illachisha dandiitanno gede sinu biiro aganunni boodere uyitannonsa.
12. Cimeeyyenna wolu roduuwi baxxitino suwisaano ma garinni kaaꞌlitara dandiitanno?
12 Baxxitino suwisaano kaaꞌla dandiineemmohu hiittoonniiti? Batinye baxxitino suwisaano ledo xaadannohu sinu biirora soqqamannohu mittu cimeessi togo yiino: “Cimeeyye insa shiqqe hasaawisa, noo gara badde afanna, ma garinni kaaꞌlitannonsaro wossana hasiissannonsa. Baxxitino suwisaanora aganunni mitore uyinanninsa daafira mitu [roduuwira] mittoreno qarrantannokkiha lawannonsa; ikkollana songote giddo noo roduuwi duucha doogonni kaaꞌlitansara dandiitanno.” Woꞌma yanna suwisaanonte gede, baxxitino suwisaanono soqqanshote miila afidhuro tashshi yaannonsa. Kiꞌne insa hakko garinni kaaꞌla dandiitinakka?
WORADU ALIIDI LAꞌꞌAANO KAAꞌLA
13, 14. (a) Woradu aliidi laꞌꞌaano daafira dea hasiissannonkekkiri maati? (b) Woradu aliidi laꞌꞌaanonna minaamuwansa kaaꞌlate maa assa dandaattoha lawannohe?
13 Woradu aliidi laꞌꞌaanonna minaamuwansa duucha wote ayyaanaamittetenni jawaattinorenna dhuku noonsare ikkitino gede assine laꞌnanni. Tini garankolla; ikkirono, insarano jawaachishannohu, ledonsa soqqamannohu, hattono quwa sainokki boohaarshira koyisannonsahu hasiisannonsa. Insa xiwantara, hospitaale eꞌara, woy isinni biso dadha hasiissannonsaha ikkara dandaanno. Qooxeessaho noo roduuwi togoo yannara marte laꞌannonsahanna hasiisannonsare assitannoha ikkiro tini lowonta jawaachishshannonsa. ‘Baxamino hakimichinna’ Hawaariyaatete Loosi maxaafi borreessaanchi Luqaasi, bayichunni bayicho hadhanni songuwa jawaachishshannore Phaawuloosinna miillasi towaatinonsata heda dandiineemmo.—Qol. 4:14; Looso 20:5–21:18.
14 Woradu aliidi laꞌꞌaanoranna minaamuwinsara muli jaala ikkannohu hasiisannonsa. Mittu woradu aliidi laꞌꞌaanchi togo yee borreessino: “Jaallaꞌya jawaachishannoe manni hasiisannoe yanna badde affino yaa dandeemmo. Insa wodanchatenni xaꞌmo xaꞌmitannoe; tini qolte dhiwinoe coye fushshe hasaapheemmo gede kaaꞌlitannoe. Dancha gede macciishshansa calla lowore kaaꞌlitanno.” Woradu aliidi laꞌꞌaanonna minaamuwinsa roduuwu insawa shiqqe jaallansa ikkitannota lowonta naaddanno.
BEETEELETE MAATE MIILLA IRKISA
15, 16. Beeteelete maate miillanna Gambooshshu Addaraashera soqqantannori mayi kaaꞌlo uyitanno? Ninke insa kaaꞌla dandiineemmohu hiittoonniiti?
15 Alamete aana Beeteeletenna Gambooshshu Addaraashera soqqantanno roduuwi, sinu biironsa hunda noo gobbuwara loosamannohu Maganu Mangiste loosira lowore assitanno. Songoꞌnera woy woradiꞌne giddo Beeteelete maate miilla nooha ikkiro, insa deꞌinannikkita leellisha dandiitinannihu hiittoonniiti?
16 Insa Beeteele eꞌanno wote umi qara ayiddensanna jaallansa qalli yitara dandiitanno. Ledonsa Beeteelete soqqantannorinna haaro songonsara noo roduuwi jaalla ikkitannonsaha ikkiro tashshi yaannonsa! (Marq. 10:29, 30) Insa rosamino loosonsano agurranna lamalate kiiro songote gambooshshe beeqqanna soqqansho fula dandiitanno. Ikkollana, Beeteelete soqqantannori saꞌe saꞌe wole lexxino loosono loossanno. Songuwa tenne huwattannohanna insanna loosonsa naaddannoha ikkiro, duuchunku horo afiꞌranno.—1 Tes. 2:9.
WOLE GOBBARA SOQQANTANNORE WOꞌMA YANNA SOQQAMAANO KAAꞌLA
17, 18. Wole gobbara hadhe soqqantanno roduuwi maa maa assitanno?
17 Wole gobbara soqqantara sonkanni roduuwi rossinotenni baxxitino sagale, qaali, budinna heeshshote gari noowa martara dandiitanno. Wole gobbara hadhe soqqantannori maa maa loossanno?
18 Mitootu roore wote qanchoho soqqantanno misiyooneeti; insa adhitinohu baxxino qajeelshi martinowa noorira lowore kaaꞌlanno. Sinu biiro misiyoonete bikka afiꞌrinoha heedhanno minenna hasiisannore mitore wonshiꞌrate kaaꞌlannoha boode woxe uyitannonsa. Wole gobbara soqqantannori wolootu qolte sinu biiro giddo soqqantanno, woy sinu biirora ikkanno hintsa, tirote biiro, Gambooshshu Addaraashenna Mangistete Addaraashe minate looso kaaꞌlitanno. Insara sagale, bikka afiꞌrino minenna wole hasiisannonsare uyinanninsa. Beeteelete maate miilla gede, insano ganyite gambooshshe beeqqitannohuranna soqqansho fultanno daafira roduuwaho duuchu garinni atooteho.
19. Gobbaꞌnera dagge soqqantanno roduuwi daafira dea hasiissannonkekkiri maati?
19 Wole gobbanni gobbaꞌne dagginore woꞌma yanna soqqamaano kaaꞌla dandiitinannihu hiittoonniiti? Hakko iso umi qara, kiꞌnewa rosantinota mite sagale rosa qarrissansara dandiitannota deꞌinoonte. Hakko daafira sagale koyissinanninsa wote tenne hawa hoogaꞌne danchate; balaxxine maa woꞌnaalte laꞌꞌa hasidhannoro woy horonta ita baxxannokkiri nooro xaꞌma dandiitinanni. Qooxeessu qaalenna bude rossanno wote cincitine kaaꞌlensa. Coyidhinannire baalankare huwatate yanna hasiissannonsa; ikkirono, qaale coyiꞌrate woꞌnaaltanno wote shaqqillunni kaaꞌlensa. Insa rosa hasidhannoreeti!
20. Woꞌma yanna soqqamaanonna annuwansanna amuuwansa deꞌneemmokkita leellisha dandiineemmohu ma garinniiti?
20 Woꞌma yanna soqqamaanono ikko ayiddinsa gale hosanni geedhansa digattanno. Yihowa Farciꞌraasine ikkino anninna ama, oosonsa woꞌma yanna soqqansho giddonni fultukki heedhara lowonta hasidhannoti egennantinote. (3 Yoh. 4) Woꞌma yanna soqqamaano anninsaranna amansara kaaꞌlo hasiissuro kayinni, insa irkisate dandiitannore baala assitanno; hattono albinni roore mule mule marte towaaxxitanno. Ikkirono, geedhino anninna amara kaaꞌlo hasiissannoha ikkiro mule noo roduuwi kaaꞌlate insaneeto shiqishshe woꞌma yanna soqqansho giddo noo ooso irkisa dandiitanno. Woꞌma yanna soqqamaano alamete aana loosamanni noohu wolu baalunku loosinni roore hasiisanno loosira lowore assitanni noota deꞌinoonte. (Mat. 28:19, 20) Woꞌma yanna soqqamaano anninna amara kaaꞌlo hasiissinoha ikkiro, kiꞌne woy songoꞌne kaaꞌlite affakka?
21. Woꞌma yanna soqqamaano wolootu kaaꞌlitannonsatanna jawaachishshannonsata ma garinni laꞌanno?
21 Woꞌma yanna soqqansho giddora eꞌannori konne assitannohu miinja afiꞌrate ikkikkinni noonsare Yihowaranna wolootaho aateeti. Insa kaaꞌlitinanninsa kaaꞌlo baalanta baasa naaddanno. Wole gobbara hadhe soqqantannoti mitte rodoo yitinori duuchu roduuwi hedo xaphi asse kulannoho: “Naandannita kaardete aana borreessine aa umise wolootu ninke daafira assaabbannotanna loonseemmo loosi hagiirsiisannonsata leellishshanno.”
22. Woꞌma yanna soqqansho daafira mayi macciishshamannohe?
22 Yihowara woꞌma yanna uyine soqqama lowo geeshsha kiissannote. Togoo soqqansho fatanu noota ikkiturono, lowore rosiissannote, hattono harshammi assitannote. Qoleno, ammanantinori Yihowa soqqamaano baalanti Mangistesi hunda soqqantannote hegere soqqanshora dancha gede qixxaawate kaaꞌlitannote. Ninke baalunku woꞌma yanna soqqamaanoha ‘ammanate loosonna baxillu kakkayiseennansa daafurtanno daafuro ayewoteno deꞌnoonke.’—1 Tes. 1:3.
a Hawaariyaatete Looso 16:15: “Hakkiinni isenna minise manni cuuami gedensaanni, ‘Ane Yihowara ammanamoommata ikkoomma gede assitine kiirtiniero, miniꞌyara eꞌine fooliishshidhe’ yite eeggifattunke. Eꞌneemmo gedeno giddeessitunke.”
b Filiphisiyusi 4:16: “Teselonqete noommo yannara, hasiisannoere mitte higgine calla ikkikkinni lame higgine sokkinoonnie.”
c Filimoona 1-3: “Kiristoosi Yesuusira yee usuraminohu Phaawuloosinna rodiinke Ximootewosi: loosu miilanke ikkinohuranna baxaminohura Filimoonira, rodoonke Afibiyara, ledonke wottaaddara ikkinohura Arkiphara, hattono minekki noo songora: Maganu Anninkewiinninna Mootichinke Yesuusi Kiristoosiwiinni eltonna salaame kiꞌnera ikkito.”