AANIIDI QOOLIHA COYI UMO | ISI ADDINTA SHEEXAANU NO?
Sheexaane Waajja Hasiissannonke?
Mittu minaanninna galtesi hadhaawino mininsanni fule dancha ayyare noowa gobbara xooqanni no
Nootanna teꞌee bade afa qarraho. Danano fooleno diafidhino; hakko daafira lowo manna bade afikkinni gawajjitanno. Alame deerrinni hadhotenni reyanno manni baalunku giddo darate saꞌꞌannohu ise shitinoho; tini buutaame gaaze kaarbooni monokisayide yinannite hadho afidhino gaazeeti. Ikkollana waajja dihasiissannonke. Tenne gaaze bade afanna gargadha dandiinanni doogga no. Batinyu manni tini gaaze noota kulanno uduunnicho mine wodhanno; hakkiinni hakko uduunnichi tini gaaze noota leellishanno wote lubbonsa gatisiꞌrate xooqanno.
Kaarbooni monokisayidete gede, Sheexaanuno illete dileellanno; mannu isi noota afate lowonta qarramanno, qoleno isi horo allaggichoho. Ikkollana Maganu kaaꞌlannonke. Aante noota Maganu shiqishino elto horoonsiꞌrattoha ikkiro Sheexaane waajja dihasiissannohe.
Doodhate dandoo. Yaaqoobi 4:7 togo yitannonke: “Daawuloosi gibbe, isi kiꞌnewiinni xooqanno.” Sheexaanu wolqaataamo ikkirono, assa hasiꞌrattokkire assatto gede giddeesse diafanno. Doodhate dandoo noohe. Umi Pheexiroosi 5:9 togo yitanno: “Ammanatenni kaajjitine [Daawuloosi] gibbe.” Yesuusi sasunku fatanira anga aa giwita Sheexaanu agure haꞌrinota qaagi. (Maatewoosi 4:11) Atino hasiꞌrittoro Sheexaanu abbanno fatana qeela dandaatto.
Maganu ledo jaalooꞌma. Yaaqoobi 4:8 “Maganunniwa shiqqe” yite amaaltannonke. Yihowa isi ledo jaalooma kalaqiꞌrattora koyisinohe. Tenne assa dandaattohu hiittoonniiti? Tennera kaaꞌlitannoti qara doogo, Qullaawa Maxaafa xiinxallite Magano afate. (Yohaannisi 17:3) Yihowa daafira rosatto coyi iso baxatto gede assannohe; baxillu qole fajjosi assatto gede kakkayisannohe. (1 Yohaannisi 5:3) Ati iimi Annikkiwa shiqittoro isi ma assannoyya? Yaaqoobi lede togo yiino: “[Maganuno] kiꞌnewa shiqanno.”
Yihowa agarooshshe afiꞌrattora yee ayyaanaamittete qixxaawo qixxeessino
Agarankera eino qaale. Lawishsha 18:10 togo yitanno: “Yihowa suꞌmi kaajjado gimbeeti. Keeraanchu manchi isiwa xooqe, agarooshshe afiꞌranno.” Hatto yaa kayinni, Maganu suꞌmi digintete wolqa afiꞌrino yaa diꞌꞌikkino. Hatteentenni, Maganu suꞌma addinta ayirrissannori ayewoteno agarooshshe afiꞌrate Magano woshshiꞌra dandiitanno yaate.
Harunsa dandiinanni lawishsha. Hawaariyaatete Looso 19:19 haarote Kiristaana ikkinohu Efesooni manni daafira togo yite kultannonke: “Digintete looso loossannori giddo lowo manni maxaaffansa gamba asse abbe mannu baalunku albaanni giiri. Tenne maxaaffa waaga shallagguta 50,000 birru saantuwa ikkino.”a Kuni Kiristaani, lowo waaga fushshannoha ikkirono agaanintete ledo xaado afiꞌrino uduunne baala hunino. Ninke konni lawishshinni lowore ronseemmo. Tini alame kiilunna agaanintete loosi woꞌminote. Mittoreno gawajjannokkiha lawannohu digintetenna kiilu uduunninna assooti agaaninte abbannoha ikkara dandaanno. Konni daafira, togoo coyibba lowo waagi noore labburono xeertiꞌra hasiissannonke.—Marro 18:10-12.
Umi birxichira qummi assinihu Roheliyo, 50 diro ikkasi geeshsha Sheexaanu no yee diammanino. Gedensaanni kayinni hedosi haaro ikke layiꞌrino. Mayira? Isi togo yiino: “Mite yee Qullaawa Maxaafa hidhummo. Qullaawu Maxaafinni afiꞌroommo egenno, Daawuloosi noota ammaneemmo gede assitinoe. Xaano ikkiro, woshshaadosi giddora eꞌꞌeemmokki gede agartinoeti tenne egennooti.”
“Qullaawu Maxaafinni afiꞌroommo egenno, Daawuloosi noota ammaneemmo gede assitinoe. Xaano ikkiro, woshshaadosi giddora eꞌꞌeemmokki gede agartinoeti tenne egennooti”
Sheexaanu heeꞌrannokki yanna daggara halchatto? Hatti yanna daase digattanno. Qullaawa Borro, lowo manna soꞌrisiisannohu Daawuloosi albillitte ‘giiratenna dinyete baari giddora tugamannota’ kultanno. (Ajuuja 20:10) Ninke horoonsiꞌneemmo giiranna dinye illete leellannokkiha ayyaanu kalaqo ita dandiitannokkiti egennantinote. Konni daafira, kuni giirate baari hegeri bao riqiwannoho. Sheexaanu hegerera baꞌꞌanno. Hatti yanna Magano baxxannorira lowo geeshsha hagiirsiissannota ikkitanno!
Hakka geeshsha kayinni, dandiitto geeshsha Yihowarenna doogosi daafira rosa agurtooti.b Albillitte, “Sheexaanu dino!” yinanni yannara heeshshote heeꞌra mageeshshi geeshsha hagiirsiissannoro hanni hedi!
a Koye kulli saantuwa Roomu daga diinaare ikkituro, kuni waagi 50,000 loosaasinera barrunni kaffallanni damoozi ledo taaloho; kuni woxi dimajjaho!
b Sheexaanenna agaanintete looso Maganu ma garinni laꞌꞌannoro ledde afate, Qullaawu Maxaafi Addinta Mayyee Rosiisanno? yaanno maxaafa fooliishsho 10 lai. Konne maxaafa Yihowa Farciꞌraasine xaꞌmite afiꞌra, woy www.jw.org/sid yinanni webisayite aana nabbawa dandaatto.