Qullaawu Maxaafi Baꞌꞌannokki Gede Assinori Maati?

Qullaawu Maxaafi baikkinni gatino. Konni daafira atino konne maxaafa afiꞌranna nabbawa dandaatto. Dancha gede assine tirroonnita Qullaawa Borro tiro doodhittoro, nabbabbanni noottohu hundi borro giddo noo hedo amadinoha addaxxinanni maxaafa ikkinota huwatatto.a Ikkina, Qullaawu Maxaafi tattae baikkinni, mannu Qullaawa Maxaafa hunatenna giddosi noo sokka soorrate sharramanni heeꞌreenna, duucha hige dhagge ikkanno garinni gate saꞌꞌanno gede assinori maati? Isi kuni maxaafi afiꞌrinori nooho ikka?

Qullaawa Maxaafa xiinxallannohu batinyu mannira soqqamaasinchu Phaawuloosite gedee hedo noonsa; isi togo yiino: “Qullaawa Borro baala Maganunnihu Qullaawu Ayyaani kulanna borreessinoonnite.” (2 Ximootewoosi 3:16) Kuni manni Qullaawu Maxaafi baikkinni gatinohu baxxinoha Maganu Qaale ikkinohuranna Maganu kuni maxaafi baꞌꞌannokki gede assinohura ikkinota ammananno. Hanafote birxichira qummi assinihu Faayizaali gale hose, mannu Qullaawu Maxaafi daafira coyiꞌrannori adda ikkasinna hoongesi buuxate konne maxaafa xiinxallate murciꞌrino. Isi xiinxalle huwatino coyi dhagge ikkinosi. Isi shiima yanna gedensaanni, Suꞌmu Kiristinni rosiisannohu batinyu rosi Qullaawu Maxaafi giddo nookkita huwatino. Qoleno isi, Maganu Qaalisi giddo uullate daafira uyino hexxo afiti dhagge assiꞌrino.

Isi togo yiino: “Qullaawu Maxaafi Maganu uyino aamamooshshe ikkinota xa ammaneemmo. Kalqete alame kalaqino Magani, ninkera mitto maxaafa aanna hakku maxaafi baikkinni heeꞌranno gede assa hoogannoni? Tenne assate wolqa dinosi yee coyiꞌra Maganu wolqa, hakko iso Duuchankare Dandaanno Magani wolqa ajishe laꞌꞌate! Ikkina tenne assate geeshsha ane mayi massie?”—Isayaasi 40:8.