Halaalu Salaame ‘Ikkikkinni Ola Haare Daanno’

1, 2. (a) Xa hiikkonne keere afiꞌnoommo? (b) Tenne alamera heeꞌne woꞌmunni woꞌma salaame afiꞌneemmokki gede assannonkeri maati? (Umi misile lai.)

NINKE baalunku yaandummokkinni salaametenni heeꞌra hasiꞌneemmo. Yihowa ‘keeresi’ aannonke daafira lowo geeshsha galanteemmosi! Kuni keeri mitiinsitannonna yaachishshanno hedo giddonkera eꞌannokki gede agarannonke. (Fil. 4:6, 7) Ninkeneeto Yihowara sayinse uyinoommo daafira, Isi ‘ledo keere heeꞌneemmo’ yaano isi jaalla ikka dandiinoommo.—Rom. 5:1.

² Ikkirono, Maganu woꞌmunni woꞌma keere abbanno yanna didaggino. Konni qarrisannohu goofimarchu dirira gibbo woꞌmitino, hattono insa insanaawa sumuu yaannokki manni batiꞌrino. (2 Xim. 3:1-4) Kiristaana ikkinoommo daafira, Sheexaanunna isi halashshannohu kaphu rosi ledo ayyaanaamittete ola olammanni heeꞌnoommo. (2 Qor. 10:4, 5) Yihowa Farciꞌraasine ikkinokki fiixi heeꞌrinkero, tini roorenka salaamenke huntara dandiitanno. Fiixinke giddo mitu ammananke mishe coyiꞌrara, maatete mereero babbadooshshe kalaqqinoonni yee suꞌmanke hunara, woy Yihowara soqqama agura hoongummoro xaate fiixansa ikkinoommokkita kulankera dandaanno. Maatenke ammanankenni kainohunni gibbannonke wote, maa assa hasiissannonke? Konne fonqolo qeela dandiineemmohu hiittoonniiti?

MAATENKE AMMANANKENNI KAINOHUNNI GIBBANNONKE WOTE MAA ASSA HASIISSANNONKE?

3, 4. (a) Yesuusi rosi maa abbara dandaanno? (b) Yesuusa harunsa roore qarra ikkitannohu hiittoo woteeti?

³ Yesuusi, rosiisino rosi manna babbadannotanna harunsaanosi mannu giwannonsa wote tenne qeele saꞌꞌate worbuulle ikka hasiissannonsata afino. Tini qolte maatete mereero noo keere huntara dandiitanno. Yesuusi togo yiino: “Ani baattote aanira keere abbammora dayommoha lawoonkeꞌne. Ani ola ikkinnina keere abbammora didayommo. Ani labbaa beetto annu aana, meyaa beetto amate aana, beettu beetto ballote aana kayisammora dayommo. Kunnira, mannaho umisi mini manni diina ikkanno.”—Mat. 10:34-36.

⁴ Yesuusi “keere abbammora dayoommoha lawoonkeꞌne” yiinohu macciishshaanosi iso harunsansanni kainohunni iillannonsa qarra heddanno gede assa hasiꞌreeti. Sokkasi mannu mereero babbadooshshe kalaqqara dandiitannote. Hige Yesuusi uullara dayinohu Maganu sokka duduwateeti ikkinninna, mannu mereero babbadooshshe kalaqate diꞌꞌikkino. (Yoh. 18:37) Ikkirono, mittu manchira muli jaalisi woy minisi manni halaale adha giwiro, Yesuusi harunsaancho ikka qarra ikkitasira dandiitanno.

5. Yesuusi harunsaanora mayi fonqoli iillinonsa?

⁵ Yesuusi harunsaanosi cincite saꞌꞌa hasiissannonsa qarri giddo mittu, ammantinokki maatensawiinni iillannonsa fonqolo ikkinota coyiꞌrino. (Mat. 10:38) Yesuusi harunsaano, maatensa qacifattannonsanna effidhe gibbannonsa wote, cincite saꞌꞌa hasiissinonsa. Ikkirono, insa Yesuusa harunsate yite agurtanno coyinni roorinore afidhino.—Maarqoosi 10:29, 30 nabbawi.

6. Maatenke Yihowa magansiꞌrankenni kainohunni gibbunkero maa qaaga hasiissannonke?

⁶ Fiixinke Yihowa magansiꞌrankenni kainohunni giwinkerono insa baxa diagurreemmo; ikkirono, roorsine baxa hasiissannonkehu Yihowanna Yesuusa ikkinota hamboonke. (Mat. 10:37) Qoleno Sheexaanu maatenkera noonke baxille horoonsiꞌre, Yihowara ammanammeemmokki gede assate sharramannota dea dihasiissannonke. Hanni xa maatenkewiinni iillannonke fonqolonna konne fonqolo qeelle saꞌꞌa dandiineemmo gara laꞌno.

YIHOWA FARCIꞌRAASINCHO IKKINOKKI MINAANNA WOY MINAAMA

7. Ammaninokki minaanni woy minaama noonsa Kiristaani maa assa hasiissannonsa?

⁷ Qullaawu Maxaafi “adhantannore lowo qarri amadannonsa” yee kulanno. (1 Qor. 7:28) Hakko iso minaannikki woy minaamakki Yihowa Farciꞌraasincho ikka hoogguro, galtekki giddo lowohu yaachishanno coyi iillahera dandaanno. Ikkirono, tenne hajo Yihowa laꞌꞌanno garinni laꞌꞌa hasiissannohe. Yihowa, xa minaannikki woy minaamakki Yesuusi harunsaancho ikka gibbino daafira calla babbaxxitinara woy adhamaꞌne diigginara dihasiꞌranno. (1 Qor. 7:12-16) Kiristaancho ikkitino minaama, ammaninokki minaannise maatesi ayyaanaamittetenni jawaattanno gede kaaꞌla hoogirono, isi maatete umo ikkino daafira ayirrisa hasiissannose. Kiristaancho ikkino minaannino, Yihowa Farciꞌraasincho ikkitinokki minaamasi umisi horo agure ise giddonni kae baxa hasiissannosi.—Efe. 5:22, 23, 28, 29.

8. Minaannikki woy minaamakki Maganoho hasiꞌrootto garinni soqqamattokki gede assate woꞌnaaltanno wote ateneeto mayite xaꞌma dandaatto?

⁸ Ammaninokki minaannikki woy minaamakki Yihowara hasiꞌrootto garinni soqqamattokki gede assatella woꞌnaaltu? Lawishshaho, mitte minaamara minaannise lamalate giddo soqqansho gama barra calla fultanno gede kulinose. Atera togoo coyi iillinoheha ikkiro ateneeto togo yite xaꞌmi: ‘Galteꞌya Magano magansiꞌra aguri yitinoeni? Magano magansiꞌra aguri yaalla hoogguero, ise yitinoere assa dandeemmo?’ Quwa saꞌꞌa hoogakki galteꞌne mereero kaꞌanno gibbo ajishshara dandiitanno.—Fil. 4:5.

9. Oosoꞌne ammantinokki galteꞌne ayirrissanno gede rosiisa dandiitinannihu hiittoonniiti?

⁹ Galtekki Yihowa Farciꞌraasincho ikka hoogguro, oosokki qajeelsa qarra ikkitahera dandiitanno. Lawishshaho, oosokkira “Annakkinna amakki ayirrisi” yitannota Qullaawu Maxaafi hajajo rosiisa hasiissannohe. (Efe. 6:1-3) Kayinni minaannikki woy minaamakki Qullaawu Maxaafiha xintu seera harunsannokkihalla ikki? Tenne yannara minaannakki woy minaamakki ayirrisse oosokkira dancha lawishsha ikki. Minaannikkite woy minaamakkite dancha akatta aana illachishi, hattono assannohu danchu coyira galati. Oosokki albaanni minaannikki woy minaamakki daafira gara ikkinokkire coyidhooti. Hatteentenni, oosokkira mittu mittunku manchi Yihowara soqqama woy soqqama hooga doodha dandaannota kuli. Oosoꞌnera dancha akatta heedhunsaro, galteꞌne tenne laꞌe halaalaancho Magano magansidhannore ikkitara dandiitanno.

10. Ammaꞌnotenni bebbeehantino maate giddo Kiristaana ikkino anni woy ama oosonsara Qullaawu Maxaafi halaale rosiisa dandaannohu hiittoonniiti?

¹⁰ Mito wote ammaninokki minaanni woy minaama oosonsa kaphu maganna magansiꞌranno manniwiinni daggino ayyaanna ayirrissanno gede hasidharanna kaphu ammaꞌno roso rosiissansara dandiitanno. Mitu minaannuwi, Yihowa Farciꞌraasincho ikkitino galtensa oosonsara Qullaawa Maxaafa rosiissannota hooltara dandiitanno. Ikkirono Yihowa Farciꞌraasincho ikkitino minaama, oososera Qullaawu Maxaafi halaale rosiisate dandiiture baala assa hasiissannose. (Soq. 16:1; 2 Xim. 3:14, 15) Lawishshaho, Yihowa Farciꞌraasincho ikkinokki minaanni, minaamasi oososera Qullaawa Maxaafa xiinxallissannotanna Kiristaanu gambooshshe haadhe hadhannota hoolasera dandaanno. Ise minaannase ayirrissannoha ikkirono, afidhu faro baala horoonsidhe oosose noowa ammanasere coyiꞌra dandiitanno; togo assase oosose Yihowa daafiranna danchu amanyooti daafira rossanno gede kaaꞌlitannonsa. (Soq. 4:19, 20) Oosose lophituro Yihowara soqqantannoronna teꞌee uminsa doodha hasiissannonsati egennantinote.—Mar. 30:19, 20.a

HALAALU MAGANSIꞌRA GIWANNO FIIXA

11. Yihowa Farciꞌraasine ikkinokki fiixinke mereero qarru kalaqamanno gede assannori maa ikkara dandaanno?

¹¹ Umi qara, Yihowa Farciꞌraasine ledo Qullaawa Maxaafa xiinxallinanni heeꞌnoommota maatenkera kula hasiissannonkekkiha ikkara dandaanno. Ammananke lexxitanni hadhanno wote kayinni, maatenkera tenne xawinse kula hasiissannonketa huwantammora dandiineemmo. (Maq. 8:38) Maganoho ammanamakki atenna fiixikki mereero qarru kalaqamanno gede assitinoha ikkara dandaanno; hatto ikkiro, hanni xa Yihowara ammanante heedhenni fiixikki mereero kalaqamanno qarra ajisha dandaattota mite doogga laꞌno.

12. Yihowa Farciꞌraasine ikkinokki fiixinke giwannonkehu mayira ikkara dandaanno? Ninke insara hendeemmota leellisha dandiineemmohu hiittoonniiti?

¹² Ammaninokki fiixiꞌne giwannoꞌnehu mayiraatiro wodanchate woꞌnaalle. Ninke Qullaawu Maxaafi halaale rosankenni hagiidhinoommoha ikkirono, fiixinke tenne afinokki daafira, dogammoommoha woy hashshi-gedeno daggino ammaꞌno hingoommoha lawansara dandaanno. Ayyaana ledonsa ayirrinseemmokki daafira, xaate insa gimboommonsaha lawansara dandaanno. Qoleno insara gate baꞌꞌannonkeri nooha lawansara dandaanno; insa coyidhanno wote seekke macciishshanke huluullisinonsari maatiro afate kaaꞌlitannonke. (Law. 20:5) Soqqamaasinchu Phaawuloosi mannaho dancha duduwo kulate yee “baalunku manni” hedo wodanchate woꞌnaalino; ninkeno hatto assanke kaaꞌlitankera dandiitanno.—1 Qor. 9:19-23.

13. Yihowa Farciꞌraasine ikkinokki fiixanke magarinni hasaawisa hasiissannonke?

¹³ Awu afiinni hasaawisse. Qullaawu Maxaafi “Coyiꞌne woꞌmanka woyite coomminohanna gumu nooha ikko” yaanno. (Qol. 4:6) Ammaninokki fiixinke ledo hasaambeemmo wote awu afiinni hasaawisa dandiineemmo gede kaaꞌlannonkeha qullaawa ayyaanasi aannonke gede Yihowa huucciꞌra dandiineemmo. Ammaꞌnonsa rosiissannoha kaphu roso baala kayinse insa ledo heewisama dihasiissannonke. Insa coyidhannorinni woy assitannorinni miiccunkero, soqqamaasinete lawishsha harunsa hasiissannonke. Phaawuloosi togo yee borreessino: “Rummanninke woyite, maassiꞌneemmo; xiimbanninke woyite, cincineemmo. Xonnanninke woyite, owaatu qaalinni coyiꞌneemmo.”—1 Qor. 4:12, 13.

14. Danchu amanyooti maaho kaaꞌlanno?

¹⁴ Woꞌmanka wote danchu akati heeꞌroꞌne. Yihowa Farciꞌraasine ikkinokki fiixanke awu afiinni hasaawisa insa ledo dancha aante heedhannonke gede kaaꞌlitannonkeha ikkirono, danchu amanyooti isinni hakkiinni roore kaaꞌlankera dandaanno. (1 Pheexiroosi 3:1, 2, 16 nabbawi.) Fiixiꞌne kiꞌne lawishsha lae, Yihowa Farciꞌraasinera adhamansa hagiirraame ikkitinota, insa oosonsa danchu garinni lossidhannota, hattono xuru nookkitanna hagiirraame heeshsho heedhannota huwatanno gede asse. Fiixinke halaalu minira daa hoogirono, Yihowa hagiirsiinsanni heeꞌnoommota afanke tashshi assitannonke.

15. Ammaninokki fiixinke ledo heewisammeemmokki gede balanxe qixxaawa dandiineemmohu hiittoonniiti?

¹⁵ Balaxxine qixxaabbe. Gibbo kayisara dandaanno coye balaxxine huwattine, hakkonne coye tira dandiitinanni gara hedde. (Law. 12:16, 23) Mitte Awustiraaliyaho heedhanno rodoo togo yitino: “Balliꞌya halaale effire giwanno. Isira silke bilbillammora albaanni, minaanniꞌyanna ani isi hanqe coyiꞌranno wote ninkeno hanqine qolleemmokki gede kaaꞌlankera Yihowa huucciꞌneemmo. Isi ledo baxillunni hasaawa dandiineemmo gede hasaambeemmo haja balanxe qixxaambeemmo. Lowo yanna hasaambanni ammaꞌnote haja kayinse heewisammeemmokki gede, isi ledo hasaambeemmo yanna dibatinseemmo.”

16. Fiixikki ledo sumuu yaa hoogakkinni macciishshamannohe dadille qeelate mayi kaaꞌlannohe?

¹⁶ Ammaninokki fiixikki ledo sumuu yaattokki gede assannohe coye baala hoola dandaattokkiti egennantinote. Mereeroꞌne gibbo kaꞌanno wote, fiixakki baxatto daafiranna woꞌmanka wote insa hagiirsiisa hasiꞌratto daafira, bushu ate ikkoottohu gede assite hedattoha ikkara dandaanno. Hatto ikkiro, Yihowara noohe baxilli maatekkira noohe baxille roora hasiissannosita deꞌooti. Fiixikki tenne laꞌꞌanno wote, Qullaawu Maxaafi biddishsha harunsa lowo geeshsha hasiissannota ikkitinota huwatara dandaanno. Mittu manchino halaale macciishshe adhanno gede giddeessa didandaatto. Kayinni wolootu Yihowa biddishsha harunsa kaaꞌlitinohe gara huwattanno gede assa dandaatto. Baxillaanchu Maganinke ninkera assinonte gede, insarano isira soqqama doodhitanno gede faro faninonsa.—Isa. 48:17, 18.

MAATEKKI MIILI HALAALU MININNI FULANNO WOTE

17, 18. Maatekki miili Yihowa magansiꞌra aguranno wote macciishshamannohe dadille dandee heeꞌrate mayi kaaꞌlannohe?

¹⁷ Maatekki miili songotenni bohamanno wote woy umisinni halaale aguranno wote bisetenni qansoonnihu gede xissiisirattora dandaatto. Tenne xisso dandee heeꞌrate mayi kaaꞌlannohe?

¹⁸ Ayyaanaamittete coye assa agurtooti. Qullaawa Maxaafa ganyite nabbawa, Kiristaanu gambooshshe qixxaabbe haꞌra, soqqansho fulanna cincatto gede kaaꞌlahera Magano huucciꞌra ammanakki kaajjitanno gede kaaꞌlitannohe. (Yih. 20, 21) Kayinni kuri coyibba assitanni heedheenna, macciishshantannohe xisso aguralla hoogguhe? Hexxo mudhite ayyaanaamittete coye assa agurtooti! Ayyaanaamitte coye assa agura hoogittoro, macciishshantannohe hedo qeeꞌla dandaatto. Hanni 73^ki Faarso borreessaanchi lawishsha hedi. Isi gara ikkinokkire hedino, hattono lowo geeshsha yaadino; ikkollana isi Magano magansiꞌnanni bayicho haꞌrasi hedosi biddi assiꞌranno gede kaaꞌlitinosi. (Far. 73:16, 17) Atino Yihowara ammanante soqqamakki hatto assate kaaꞌlitannohe.

19. Yihowa manna seejjate qixxeessino qixxaawo ayirrinseemmota leellisha dandiineemmohu hiittoonniiti?

¹⁹ Yihowa manna seejjate qixxeessino qixxaawo ayirrisi. Yihowa seejjanno seejjo umi qara dadillissannota ikkiturono, galte hosse cubbo loosino manchono ikko wole baalanka manna kaaꞌlitannote. (Ibiraawoota 12:11 nabbawi.) Lawishshaho, Yihowa cubbo loose kae maaro eannokki manniwa aanneemmokki gede hajajinonke. (1 Qor. 5:11-13) Songotenni bohaminohu maatenke miiliwa aana hooga xissiissankera dandiitanno; ikkirono insara hasiisikkinni silke bilbila, sokka borreesse soya, iimeeletenni woy wolu xaadooshshu buusi widoonni sokka soya dihasiissannonke.

20. Songotenni bohamino manchi ma ikkanno yine hexxa dandiineemmo?

²⁰ Hexxo mudhitooti. “Baxillu baalanka hexxanno;” konni daafira Yihowa magansiꞌra agurino manchi wirro iso magansiꞌranno yine hexxa dandiineemmo. (1 Qor. 13:7) Songotenni bohaminohu maatekki miili mito geeshsha hedosi biddi assiꞌrinota huwatattora dandaatto; tenne yannara isi Qullaawu Maxaafinni jawaante afiꞌranno gedenna Yihowa “Anewa higi” yee koyisinosi koyishsha adhanno gede huuccatto assa dandaatto.—Isa. 44:22.

21. Yesuusi harunsaancho ikkakkinni maatekki mereero babbadooshshu kalaqamiro maa assa hasiissannohe?

²¹ Yesuusi aye manchinnino roorsine iso banxeemmo gede kulinonke. Ikkirono, Yesuusi rosaanosi maatensa gibbunsarono insa Yihowara ammanante soqqantannota addaxxino. Yesuusa harunsakki maatekki giddo “ola” abbitinoha ikkiro, konne qarra qeela dandaatto gede kaaꞌlahera Yihowa huucciꞌri. (Isa. 41:10, 13) Yihowanna Yesuusi baxxannore assattoha ikkiro, insa lowo geeshsha hagiidhitanno; qoleno insa kiissannohe; tenne afakki lowo geeshsha tashshi assitannoheti egennantinote.