XIINXALLOTE BIRXICHO 33
‘Macciishshitannoꞌneri’ Gattanno
“Ateneenna rosiisatto roso seekkite agadhi; konne coye jaatte assi. Hatto assittoro, ateneenna macciishshitannohere gatisatto.”—1 XIM. 4:16.
FAARSO 67 “Qaale Kuli”
GUULCHOa
1. Ninke baalunku maatenkera maa halchineemmo?
POOLIINIb yinanni rodoo togo yitino: “Halaale rosa hanafumma yannanni kayise, maateꞌya gudisante ane ledo Gannate eꞌara halchoomma. Roorenkanni minaanniꞌya Weeyininna wedellichu beettinke ledo Yihowara soqqama hasiꞌroomma.” Ate maate giddono Yihowara soqqantannokkiri nooha ikkiro, Pooliini gede atino insa ledokki Yihowara soqqantara halchattoha ikkara dandaanno.
2. Konni birxichira hiikkuri xaꞌmuwara dawaro afiꞌneemmo?
2 Maatenke dancha duduwo macciishshitanno gede giddeessa didandiineemmo; ikkirono Qullaawu Maxaafi sokka macciishshitanno gede jawaachinshammonsara dandiineemmo. (2 Xim. 3:14, 15) Maatenkera farciꞌra hasiissannonkehu mayiraati? Hedonsa huwatate woꞌnaala hasiissannonkehu mayiraati? Maatenke ninke gede Yihowa baxxanno gede kaaꞌlate maa assa dandiineemmo? Songonkera noo roduuwi kaaꞌlitankera dandiitannohu hiittoonniiti?
MAATENKERA FARCIꞌRA HASIISSANNONKEHU MAYIRAATI?
3. Layinki Pheexiroosi 3:9 kultanno garinni maatenkera farciꞌra hasiissannonkehu mayiraati?
3 Muli yannara Yihowa tenne alame hunanno. Hatte yannara “hegere heeshsho afiꞌrate gara ikkitinoti wodanu dooꞌꞌo noonsari” calla gattanno. (Soq. 13:48, NW) Qoqqowinkera heeꞌrannohura anfoommokki mannira sabbakate sharrammeemmonte gede, ledonke Yihowara soqqantanno gede maatenkerano farciꞌra hasiissannonke. Baxillaanchu Anninke Yihowa ‘baalunku aagintaawe higara ikkinnina ayeno baꞌꞌara dihasiꞌranno.’— 2 Pheexiroosi 3:9 nabbawi.
4. Maatenkera farciꞌneemmo woyite mayi soꞌro loonsammora dandiineemmo?
4 Gatote sokka sabbankeemmoti gara ikkitinotinna gara ikkitinokki doogo noota dea dihasiissannonke. Anfoommokki mannira hayyotenni farciꞌneemmoha ikkirono, maatenkera kayinni qorophinummokki farciꞌneemmoha ikkara dandaanno.
5. Maatenkera halaale farciꞌnammora albaanni maa heda hasiissannonke?
5 Umo maatenkera farciꞌnoommo gari dancha ikka hoogiro, ‘Mayi hakkawoyite hayyotennilla farciꞌro’ yine gaabbineemmoha ikkara dandaanno. Soqqamaasinchu Phaawuloosi Kiristaana togo yee amaalino: “Mittu mittunkura labbanno dawaro qola dandiitinanni gede, coyiꞌne woꞌmanka woyite coomminohanna gumu nooha ikko.” (Qol. 4:5, 6) Maatenkera farciꞌneemmo woyite tenne amaale qaaga danchate. Hatto assa hoongummoro, macciishshitannonke gede kaaꞌlantenni koffi assinammonsara dandiineemmo.
MAATENKE KAAꞌLATE MAA ASSA DANDIINEEMMO?
Wolootu hedo huwatate woꞌnaalaꞌnenna danchu akatiꞌne mannu halaale macciishshano gede assara dandaanno (Gufo 6-8 lai)d
6-7. Yihowa Farciꞌraasincho ikkinokki minaannira woy minaamara hedonsa huwata hasiissannota leellishanno lawishsha kuli.
6 Hedonsa huwatate woꞌnaallo. Aleenni kulliti Pooliini togo yitino: “Umi qara minaanniꞌya ledo Maganunna Qullaawu Maxaafi daafira calla hasaawa hasiꞌreemma. Barru hoshshare dihasaambeemmo.” Ikkollana, minaannise Weeyinira gariti Qullaawu Maxaafi egenno noosikki daafira, ise yitannori dileellinosi. Weeyinira, minaamasi ammaꞌnosere calla heddannoha lawinosi. Qoleno isi minaamasi soꞌrisiisaanote miila ikkitino yee yaadino.
7 Pooliini duucha woyite hawarro hawarro hattono Qidaamenna Sambata gambooshshe hadhanni, farcidhanni, hattono roduuwa minensa marte xaꞌmitanni insa ledo yanna sayissannota coyidhino. Pooliini, “Mite yannara Weeyini qaera daanno woyite mine mittuno heeꞌrannokki daafira callatanno” yitino. Weeyini minaamasinna qaaqqisi qaete heeꞌrara hasiꞌrannoti dihuluullissannote. Isi, insa hiittoo manni ledo hossannoro diafino; qoleno minaamasi isinni roore haaro jaallase roorsidhinoha lawinosi. Konnira isi, adhamansa diigannota kule Pooliini waajjishiishino. Pooliini minaannise hedo huwattannota leellishate maa assa dandiitannoha lawannohe?
8. Umi Pheexiroosi 3:1, 2 kultanno garinni, maatenke roore woyite maa huwattanno?
8 Dancha lawishsha ikke. Duucha woyite maatenke coyiꞌneemmorinni roore assineemmore wodanchitanno. (1 Pheexiroosi 3:1, 2 nabbawi.) Pooliini galte hossanni tenne huwattino. Ise togo yitino: “Weeyini baxannonketanna adhamanke diigeemmo yiinohu godowinta ikkinokkita afoomma. Kayinni isi hatto yee waajjishiishiehu gedensaanni Yihowa minaanniranna minaamara uyino biddishsha harunsa hasiissannoeta huwatumma. Lowore coyiꞌrantenni akatiꞌyanni dancha lawishsha ikka hasiissinoe.” Pooliini, Weeyini Qullaawu Maxaafire hasaawanno gede xixxiiwa agurte, ise isi ledo barru hoshshare hasaawa hanaffino. Weeyini minaamasi salaame nooseta ikkitinotanna beettinsa shooshaqanna hajajamannoha ikkinota huwatino. (Law. 31:18, 27, 28) Weeyini Qullaawu Maxaafi sokka maatesi woyyeessitino gara laiti, isino Qullaawa Maxaafa xiinxallate sumuu yiino.—1 Qor. 7:12-14, 16.
9. Maatenke kaaꞌlate sharrama agura hasiissannonkekkihu mayiraati?
9 Maateꞌne kaaꞌlate sharrama agurtinoonte. Mannu dancha duduwo macciishshe hegere heeshsho afiꞌranno gede “marro marro” hige faro fane Yihowa dancha lawishsha ikkinonke. (Erm. 44:4) Soqqamaasinchu Phaawuloosi, Ximootewoosi woloota kaaꞌla agurannokki gede amaalino. Mayira? Korkaatuno isi hatto assiro, isonootonna macciishshannosi manna gatisanno. (1 Xim. 4:16) Maatenke banxeemmo daafira, Maganu Qaali giddo noo halaale affara hasiꞌneemmo. Pooliini coyidhinorinna assitinori gale hose maatese halaale macciishshitanno gede assino. Xa ise minaannise ledo Yihowara hagiirrunni soqqantanni no. Xa insa lamunku suwisaano ikke soqqamanni no; qoleno Weeyini songote cimeessa ikkino.
10. Cincineemmore ikka hasiissannonkehu mayiraati?
10 Cincitinannire ikke. Albi ammaꞌnonke agurre Yihowa biddishsha harunsa hananfeemmo woyite, maatenkera tenne ammane adha qarra ikkitansara dandiitanno. Insa xaate ledonsa ammaꞌnote ayyaanna ayirrinseemmokkitanna poletiku hajora anga wodhineemmokkita huwattanno. Konnira umi qara mite maatenke miilla hanqitara dandiitanno. (Mat. 10:35, 36) Ikkirono, hexxo mudhine insa kaaꞌla agura dihasiissannonke. Ammananke huwattanno gede kaaꞌlate sharrama agurrummoro, hegere heeshsho afiꞌra dihasiissannonsareeti yine yoo yinanni heeꞌnoommohu gedeeti. Yihowa yoo yaate silxaane diuyinonke; tenne silxaane uyinohu Yesuusiraati. (Yoh. 5:22) Cincineemmore ikkinummoro, maatenke galte hosse Qullaawu Maxaafi sokka macciishshitara dandiitanno.—“Webisayitenke Horoonsidhine Rosiisse” yitanno saaxine lai.
11-13. Aliise maatesera assitinorinni maa ronseemmo?
11 Shaqqadda ikke; kayinni maateꞌne ammanaꞌne soorritara wodhitinoonte. (Law. 15:2) Hanni Aliise lawishsha laꞌno. Ise Yihowa daafira rossinohu maatesewiinni xeertidhe wole gobba hadhe heedheeti; maatese Maganu noota ammantannokkitenna poletika baxxannote. Ise rossinoha dancha coye dandaamisero, maatesera mulenni kula hasiissannoseta huwattino. Aliise togo yitino: “Ronsoommoha haaro coye maatenkera keeshshine kulleemmonsaha ikkiro, gedensoonni affanno woyite roore hanqitara dandiitanno.” Ise maatese afa hasidhanno yite heddanno hajo doortuhu gedensaanni lawishshaho, baxillu daafira Qullaawu Maxaafi kulannore xawisse sokka borreessitanno; hakkiinni insa hedo xaꞌmitanno. (1 Qor. 13:1-13) Ise maatese loossitinosenna towaattinose daafira galattanno, hattono mitore hirte sokkannonsa. Ise maatese laꞌara martanno woyite, mini giddo amasera looso kaaꞌlitanno. Aliise maatesera haaro ammaꞌnose daafira kultunsata umi qara insa dihisatino.
12 Aliise maatesewa heedhanno woyiteno Qullaawa Maxaafa barru baala nabbawa diagurtanno. Ise togo yitino: “Hatto assaꞌya, amaꞌya Qullaawa Maxaafa lowo geeshsha baxeemmata huwattanno gede kaaꞌltinose.” Aliise annino beettosi heddanno gari soorraminohu mayiraatiro huwatatenna Qullaawu Maxaafi soꞌro afate xiinxallo hanafate murciꞌrino. Aliise togo yitino: “Qullaawu Maxaafi ledo ammansiissanno hedo borreesse oommasi.” Tini kaaꞌlitinori nooyya? Aliise anni Maganu Qaali giddo soꞌro diafino; isinni nabbawinori lowo geeshsha hagiirsiisinosi.
13 Fonqolu iillinkerono, hayyootanna shaqqadda ikka hasiissannonke. (1 Qor. 4:12) Lawishshaho, Aliise amase gibbuserono hexxo dimudhitino. Ise togo yitino: “Cuuamummata amaꞌya dihajajantannote yitinoe.” Aliise maa assituyya? Ise togo yitino: “Ammanaꞌya daafira hasaawa agurantenni Yihowa Farciꞌraasincho ikke heeꞌrate murciꞌroommatanna agureemmakkita ayirrinyunni kulummase. Qoleno amaꞌya xaano ikkiro baxeemmaseta kulummase. Hakkiinni lamenti wiꞌlinummo; gedensaanni dancha sagale worummase. Hatte yannanni kayisse amaꞌya Qullaawu Maxaafi heeshshoꞌya woyyeessinota huwattino.”
14. Maatenke Yihowara soqqammeemmokki gede assitankera wodha hasiissannonkekkihu mayiraati?
14 Maatenke, Yihowara soqqama ninkera mageeshshi geeshsha hasiissinota ikkitinoro mulenni huwata hooggara dandiitanno. Lawishshaho, Aliise maate ise kaffi yiino roso rossara hasidhanno; ise kayinni suwisaancho ikkite soqqamate murcidhino; amase tenne affuti xaano wirro wiꞌlitino. Aliise kayinni hexxo dimudhitino. Ise togo yitino: “Maatenke mitto doodhinoommo coye agurreemmo gede assitankera wodhinummoro, xaano wole coye hoolate woꞌnaaltara dandiitanno. Kayinni shaqqadda ikkinummoronna hexxo mudha hoongummoro maatenke giddo mitu macciishshitankera dandiitanno.” Aliise woꞌnaalshi tenne leellishanno. Xa Annisenna amase suwisaano ikke soqqamanni no; qoleno annise songote cimeessaati.
SONGONKERA NOO RODUUWI KAAꞌLITANKERA DANDIITANNOHU HIITTOONNIITI?
Songote roduuwi Yihowa Farciꞌraasine ikkitinokkita maatenke miilla kaaꞌla dandiitannohu hiittoonniiti? (Gufo 15-16 lai)e
15. Maatewoosi 5:14-16 nna 2 Pheexiroosi 2:12 kultanno garinni, wolootunnihu ‘danchu loosi’ maatenke kaaꞌlannohu hiittoonniiti?
15 Yihowa Kiristaanu songohu ‘danchu loosi’ widoonni qole mannu isiwa daanno gede assanno. (Maatewoosi 5:14-16 nna 1 Pheexiroosi 2:12 nabbawi.) Galtekki Yihowa Farciꞌraasincho ikkitinokkiha ikkiro, songokkira noo roduuwi ledo egensiisate woꞌnaalootto? Aleenni kulliti Pooliini roduuwa minisera koyissanno daafira minaannise Weeyini roduuwu ledo egennamino. Weeyini, mittu rodii Yihowa Farciꞌraasine hiittoo mannaatiro huwatanno gede kaaꞌlate assinosire qaage togo yiino: “Isi ane ledo televizhiinetenni kaase laꞌꞌate yee looso hosino. Insano wolu manni gedeere ikkitinota huwatummo.”
16. Maatenke gambooshsheho koyisa hasiissannonkehu mayiraati?
16 Maatenke kaaꞌlineemmoti mitte kaajja doogo ninke ledo gambooshshe hadhanno gede koyisate. (1 Qor. 14:24, 25) Weeyini mite yee gambooshshe dayinohu Qaagooshshu Ayyaani barraati; korkaatuno konne gambooshshe assinannihu loosu yanna gedensaanniiti; hattono pirogiraame haranchote. Isi togo yiino: “Shiqqino lallawo woꞌmunni woma dihuwatoommo; mannu ikkito kayinni horo dihaweemmo. Insa faasiiqqe anga cuꞌmite keere haadhinoe. Insa dancha mannaati.” Mittu minaanninna minaama Pooliininna beettisira baxxino shaqqille leellishino; insa isenna qaaqqose gambooshshunniwanna soqqanshonniwa kaaꞌlannonsa. Gedensaanni Weeyinni Pooliinite haaro ammaꞌno daafira roore afa hasiꞌrino daafira hakku minaanni Qullaawa Maxaafa xiinxallisannosi gede xaꞌmiꞌrino.
17. Ninkeneeto bushiisha hasiissannonkekkihu mayiraati? Maatenke kaaꞌlate sharrama agura hasiissannonkekkihu mayiraati?
17 Maatenke baalanti ninke ledo Yihowara soqqantara halchineemmo. Maatenke Maganoho soqqantanno gede dandiinummore baala assinoommoha ikkirono, halaalu minira daa hooggara dandiitanno. Hatto ikkiro tennera ninkeneeto bushiisha dihasiissannonke. Korkaatuno ayeno ammananke harunsanno gede giddeessa didandiineemmo. Ikkirono, Yihowara soqqamaꞌnenni hagiirraamma ikkitinoonnita afansa kaaꞌlitannonsata deꞌinoonte. Insa daafira huuccatto asse; hattono hayyotenni hasaawissensa. Maateꞌne kaaꞌlate woꞌnaala agurtinoonte. (Soq. 20:20) Yihowa maateꞌne kaaꞌlate assitinannirira maassiꞌrannoꞌneta horo huluullantinoonte. Maateꞌne kiꞌne macciishshituha ikkiro gattanno!
FAARSO 57 Duuchunku Gari Mannira Sabbaka
a Maatenke Yihowa affara hasiꞌneemmoha ikkirono, isira soqqama woy soqqama hooga doodhitannori insaati. Konni birxichira, fiixinkera kulleemmonsa sokka macciishshanno gede maa assa dandiineemmoro ronseemmo.
b Mite suꞌmuwa soorrinoonni. Konni birxichira “maate” yaanno qaale horoonsiꞌnoonnihu, xaa yannara Yihowara soqqantannokki maatenkenna fiixanke kulateeti.
c MISILLATE XAWISHSHA: Mittu wedellichu rodii Yihowa Farciꞌraasincho ikkinokki annisi makeena biddi assiꞌranni noowa farciꞌranni no. Isi injiitanno yannara jw.org® aaninni viidiyo leellishanni no.
d MISILLATE XAWISHSHA: Mitte rodoo Yihowa Farciꞌraasincho ikkinokki minaannise barru hoshshasi daafira kulannase seekkite macciishshitanni no. Ise gedensaanni maatese ledo boohaartanni no.
e MISILLATE XAWISHSHA: Ise songote roduuwa minisera koyisse no. Insa minaannise ledo hasaabbanni no. Gedensaanni isi minaamasi ledo Qaagooshshu Ayyaana ayirrisanni no.