Ati Tenne Afootto?

Yesuusi ‘Xaartinoonte’ yiinohu hiikkonne Ayihudete rosicho giweeti?

MUSE SEERI garinni xaara hasiissanno woti no. Ikkollana, Yesuusi waro Ayihude coyidhinori halaale ikkinota lellishate kaꞌurira baalaho xaara roso assidhino. Insa xaartannohu coyidhanno coye ammannara yiteeti; Yesuusi kayinni togoo rosicho giwannota lame hige coyiꞌrino. Togo yino: “Coyidhinanniri addahoro, ‘Ee,’ kaphohoro, ‘Deeꞌni’ yiiyye.”—Mat. 5:33-37; 23:16-22.

Teolojiikaali Dikishineerii ovi Niwu Testamenti yinanni maxaafi, Talmudi yinanni borro aana borreessinoonniri “Ayihudete manni kairira baalaho xaarate rosichi noonsata” leellishannota xawisino; Talmudi shota ikkitino xaaronna shota ikkitinokki xaaro xawise kulanno.

Kaꞌnirira baalaho xaarranita giwinohu Yesuusa calla diꞌꞌikkino. Lawishshaho, Ayihudennihu xaggete borreessaanchi Filaviyusi Joosefesi mitte Yihudunnite ammaꞌnote gaamo daafira borreessanni togo yiino: “Insa [ammaꞌnote gaamo] xaaro kaphunni farciꞌratenni roore busha ikkitinohu gede assite laꞌanno daafira, xaara qorophitanno; korkaatuno Maganu suꞌminni xaara hoogiro ammannannikki manchi wonanni diammanaminoho.” Wisdemi ovi Siiraaki woy Ekiliziyastikesi (23:11) yinanniti Ayihudete borro togo yitanno: “Xaaro baxanno manchi finqilaho.” Yesuusi xaaro ajinshe laꞌnannita hoolino. Woꞌmanka wote halaale coyiꞌneemmoha ikkiro, mannu ammanankera yine xaara dihasiissannonke.