Haaro Alamera Heeꞌra Dandaatto Gara

Saꞌu birxichuwara laꞌnummonte gede, muli yannara Maganu tenne Maganiweelo alamenna qarra baalanka hunanno. Kuni ikkannota dihuluullammeemmo. Mayira? Maganu Qaali Qullaawu Maxaafi togo yitanno hexxo kulanno:

“Alame . . . saꞌanno.”—1 YOHAANNISI 2:17.

Tini alame baꞌanno woyite gatanno manni kayinni heeꞌranno; mayira yiniro, aleenni kulli qummeeshshi lede togo yaanno:

“Maganu hedinore assannohu kayinni hegere geeshsha heeꞌranno.”

Konni daafira, gate saꞌꞌate Maganu hedinore woy fajjosi wonsha hasiissannonke. Maganu fajjo maatiro afate, balanxe iso afa hasiissannonke.

BAOTENNI GATATE ‘MAGANO AFI’

Misilla: 1. Hospitaalete loossanno nersitte loosunni daafurtenna dadillite uulla quphi yite no. 2. Ise fooliishshidhara shaete mine ofolte heedhe, ledose loossanno beetto metseete nabbabbanni hagiidhitanna laꞌanni no. 3. Ledose loossannoti Qullaawu Maxaafi qummeeshsha nabbabbusehu gedensaanni, jw.org kaarde uyitinose.

Yesuusi togo yiino: “Ati callu halaalaancho Magano ikkoottoha ate . . . afa hegere heeshshooti.” (Yohaannisi 17:3, NW) Alamete goofimarcho gate saꞌꞌatenna hegerera heeꞌrate, ‘Magano afa’ hasiissannonke. Magano afate yaa, Maganu noota ammananna isi daafira mito mitore afa calla diꞌꞌikkitino. Isi ledo jaalooꞌma hasiissannonke. Mittu manchi ledo muli jaaloomi heeꞌrankera hasiꞌnummoro, hakko manchi ledo yanna sayinseemmo. Maganu ledo jaalooma kalaqiꞌneemmohuno hakko garinniiti. Hanni Maganu ledo jaalooma kalaqiꞌratenna jaallasi ikkine heeꞌrate kaaꞌlannonkeha Qullaawu Maxaafi rosiisannoha mito halaale laꞌno.

Qullaawu Maxaafinni Ronseemmo Halaale

Maganu kalaqinonkehu Gannatete heeꞌnammora hede ikkinota ronseemmo.

Maganu umi manna Addaaminna Heewani kalaqihu gedensaanni, Edeni Gannatete yinanniwa biifado bayicho worinonsa. Insa mitte xeꞌneno nookkireeti; qoleno Maganu, insa hagiidhanni heeꞌranno gede hasiisannonsare baalankare uyinonsa. Insa gawalo nookki heeshsho heeꞌra dandaannonka. Maganu jaalla ikkite heedhu geeshsha, horo direyitanno. Ikkirono insa Maganu uyinonsata qarrissannokki hajajo affanni heedhenni diiggino.

Xaa yannara qarrammeemmohu mayiraatiro ronseemmo.

Umi manchi Addaami Maganoho hajajama giwino daafira, isino sirchisino hegerera heeꞌranno faro hoogino. Qullaawu Maxaafi togo yee xawisanno: “Mittu manchinni kainohunni cubbu tenne alame eino; reyo cubbu widoonni higge daggino. Mannu baalu cubbo loosino daafira, reyo manna baala amaddino.” (Roomu Sokka 5:12) Mittu manchi annisinna amasiwiinni muso ragiꞌrara dandaannonte gede, Addaami ooso baalantino isiwiinni guuntete xeꞌne ragidhino. Geedhineemmohunna reyineemmohu iseraati.

Maganu ninke kaaꞌlate assinore ronseemmo.

Qullaawu Maxaafi togo yaanno: “Maganu baattote aana noo manna baala baxino daafira, iso ammaꞌninohu baalu hegere heeshsho afiꞌranno gede ikkinnina baꞌꞌannokki gede, Maganu mitto Beettosi uyino.” (Yohaannisi 3:16) Maganu ninke daafira yee heeshshosi sayise aanno gede Yesuusa uullara soyino. Hindete gobbara heeꞌrannohu Piraabaakaari yinannihu 86 diri manchi, Maganu leellishinonkehu konni baxilli daafira togo yiino: “Tini Yihowaa lubbora baxannoeta leellishshanno. Baxillisi hegere heeshsho hexxo heedhannoe gede assino.”

Maganu assinonkere naandeemmota leellisha dandiineemmo gara ronseemmo.

Qullaawu Maxaafi rosiisanno garinni, Maganu assinonkere naandeemmota leellinsheemmohu ‘hajajosi wonshineeti.’ (1 Yohaannisi 2:3) Maganu Yihowa xa hagiirru noo heeshsho heeꞌrate maa assa hasiissannonkero baxillunni rosiisannonke. (Isayaasi 48:17, 18) Maganu qarrammammora dihasiꞌranno. Isi, biddishshisi garinni heeꞌneemmoha ikkiro xa hagiirru noo heeshsho heeꞌra calla ikkikkinni hegerera heeꞌrate hexxo afiꞌneemmota kulinonke.

MAGANU QAALE QULLAAWA MAXAAFA BARRU BAALA NABBAWI

Nersitte barra sagalete yannara Qullaawa Maxaafa nabbabbuhu gedensaanni iima higge laꞌanni no. — Kaaꞌlannohe gede Magano huucciꞌrittoronna fajjosi wonshittoro, alamete goofimarchi yannara gata dandaatto

Heeshshote heeꞌrate sagale ita hasiissannonke. Yesuusi kayinni togo yiino: “Mannu Maganu afiinni fulanno qaali baalunni ikkinnina, sagale callatenni diheeꞌranno.”—Maatewoosi 4:4.

Xaa yannara Maganu afiinni fulanno qaale afiꞌneemmohu Qullaawu Maxaafi giddooti. Qullaawa Maxaafa xiinxallittoro, Maganu alba maa assinoro, xa maa assanni nooronna albillitte maa assannoro rosatto.

KAAꞌLANNOHE GEDE MAGANO HUUCCIꞌRI

Maganoho hajajama baxxe heedheenna isi bushaho yiino coye agura qarra ikkitinoheha ikkiro maa assa dandaatto? Hatto ikkiro, Magano seekkite afa lowo geeshsha kaaꞌlitannohe.

Hanni Iisiyaho heedhannote mitte mancho lawishsha laꞌno. Ise alba foortannote. Ise Qullaawa Maxaafa xiinxalla hanaffuti, Maganu “Foorretewiinni xooqqe!” yee hajajinota affu. (1 Qorontoosi 6:18) Tini mancho Maganu jawaante aasera huuccatto assidhu; hakko daafira konne busha rosicho agura dandiitino. Kayinni fonqolo ikkannose coye gargadha hasiissannose. Ise togo yitino: “Busha hedo surreꞌyara dagganno woyite, umiꞌya gargadhe hooꞌla dandeemmakkita afoomma daafira maaxummakki huuccattotenni Yihowara hasaapheemma. Huuccatto afidhino wolqa laꞌꞌaꞌya Yihowawa albinni roore shiqeemma gede kaaꞌlitinoe.” Tenne mancho gede, lowo miliyoone ikkanno manni Magano afanni no. Maganu, kuni manni heeshshonsa biddi assiꞌre iso hagiirsiisanno garinni heeꞌranno gede jawaante aanni noonsa.—2 Qorontoosi 4:7.

Magano albinni roore affanni haꞌritto kiiro, Maganuno ate jaalisi gede asse roore ‘egennannohe.’ (Galatiyu Sokka 4:9; Faarso 25:14) Hakkiinni baotenni gatte Maganu abbannote haaro alamera heeꞌrate ikkado ikkatto. Ikkina hatti haaro alame hiittootekka? Aananno birxichi tenne kulanno.

a Qullaawu Maxaafi Maganu suꞌmi Yihowa ikkinota kulanno.