Yesuusi Qarraminohunna Reyinohu Mayiraati?

Mittu manchi “Hegerera heeꞌra hasiꞌratto?” yee xaꞌmihero mayite qolatto? Rooru manni hegerera heeꞌra hasiꞌrannota coyiꞌrannoha ikkirono kuni dandaamannokki coye ikkinohu gede asse hedanno. Insa, reyo noore ikkitinotanna mannu ooso reyansa gattannokkita coyiꞌranno.

Hanni xa aleenni noo xaꞌmo soorrine “Reya baxatto?” yine xaꞌminoonnihehu gede assite hedi. Surre fayyu manchi reya dihasiꞌranno. Tini maa leellishshanno? Baxi geeshshi fonqolinna qarri iillinkerono lubbote heeꞌra hasiꞌneemmo. Qullaawu Maxaafi Maganu mannu ooso kalaqinohu hegerera heeꞌrate hasatto wore ikkinota kulannonke. Isinni Qullaawu Maxaafi “isi [mannu] wodanira hegere heeshsho worino” yaanno.—Mekibibi 3:11.

Xaa yannara mannu ooso hegerera heedhannokkiti egennantinote. Mayira? Maganu mannu hegerera heeꞌranno gede assino qixxaawo no? Qullaawu Maxaafi kuri xaꞌmuwara qolanno dawaro sheshifachishshannote; hattono Yesuusi qarraminohunna reyinohu mayiraatiro afate kaaꞌlitannote.

MANNU HEGERERA HEEꞌRANNI NOOKKIHU MAYIRAATI?

Qullaawu Maxaafi kifile ikkinohu Kalaqote maxaafiti umiti sase fooliishshuwa Maganu umi minaanniranna minaamara yaano Addaamiranna Heewanira hegerera heeꞌrate hexxo uyinonsatanna tenne hexxo afiꞌrate maa assa hasiissannonsaro kulinonsata coyidhanno. Hakkiinni insa Maganoho hajajama gibbinotanna isi uyinonsa hexxo huꞌnitinota kultannonke. Tini xagge borreessantinohu huwatate qarrisannokki garinni ikkinohura mitu manni maattote gede asse hedanno. Ikkollana Kalaqote Maxaafino Wongeellate gede gara ikkitino xagge amadinota leellishshanno taje no.a

Addaami hajajama giwasi maa abbitino? Qullaawu Maxaafi togo yee kulannonke: “Cubbu mittu manchi [Addaami] widoonni alame ei, reyo qolte cubbu widoonni eꞌino; baalunku cubbo loossino daafira reyo manna baalaho iillitino.” (Roomu Sokka 5:12) Addaami Maganoho hajajama giwe cubbo loosino. Tini qolte hegerera heeꞌrate hexxosi huꞌnanno gedenna yannate gedensaanni reyanno gede assitinosi. Ninke isi ooso ikkinoommohura, cubbosi ragiꞌnoommo. Xiwammeeemmohu, geedhineemmohunna reyineemmohu iseraati. Mayira reyineemmoro kulannohu kuni xawishshi sayinsete fullahaano ooso anninsawiinninna amansawiinni ragidhannohu mitu akati daafira coyidhannori ledo sumuu yaannoho. Ikkina Maganu konne coye biddi assate qixxeessinori no?

MAGANU MAA ASSINO?

Maganu Addaami oososi hoogganno gede assinore yaano hegerera heeꞌrate hexxo galagale aate qixxaawo assino; tenne assate isi lowo waaga baatino. Maganu tenne assinohu hiittoonniiti?

Qullaawu Maxaafi Roomu Sokka 6:23 aana “cubbu damoozi reyote” yaanno. Togo yaa reyote kori cubboho yaate. Addaami reyinohu cubbo loosinohuꞌraati. Hakko daafira, ninkeno cubbo loonsoommo daafira cubbu damooza ikkitinote reyotenni digantoommo. Ilammummo wote cubbo adhine ilammoommo; tennera xaꞌmammeemmori kayinni ninke umonke diꞌꞌikkinoommo. Maganu baxillunni Beettosi Yesuusa ‘cubbinke damooza’ baatanno gede soyino. Tenne assinohu hiittoonniiti?

Mittu guutu manchi Addaami hajajama giwe cubbonna reyo abbinohura, reyotenni gatisannonkehu mittu hajajamannohu guutu manchi reya hasiissino. Qullaawu Maxaafi togo yaannonke: “Mittu manchi hajajama giwino daafira lowo manni cubbaataamo ikkinonte gede, mittu manchi hajajamino daafira lowo manni keeraano ikkanno.” (Roomu Sokka 5:19) Kowiicho kullihu “mittu manchi” Yesuusaati. Isi iiminni daye guuta manchob ikkino; hattono ninkera yee reyino. Hakko garinni, Maganu albaanni keeraanote gede ikkine kiirama dandiinoommo; hattono hegerera heeꞌrate hexxo afiꞌnoommo.

YESUUSI QARRAMINOHUNNA REYINOHU MAYIRAATI?

Kuni ikkanno gede Yesuusi reya mayira hasiissino? Duuchanka Dandaanno Magani Addaami ooso hegerera heedhanno gede fajjinoonninsata kulanno awaajje fushshe agura didandaanno? Isira hatto assate silxaane noositi egennantinote. Ikkollana tini isi cubbu damoozi reyote yee fushshino higge ledo sumuu diyitanno. Tini higge hasiꞌniro shaarrannita woy soorrinannita shota wodho diꞌꞌikkitino. Taashsho heedhannohu tini higge heedhurooti.—Faarso 37:28.

Maganu tenne haja lainohunni taashsho xeꞌinore assoommero, mannu isi wolu coyinkura taashsho noore assannota huluullamara dandaanno. Lawishshaho, isi Addaami ooso giddo hegere heeshshora ikkado ikkanno manna dooranno wote taashsho noore assa ikka? Isi eino qaale agadhakka? yee hedara dandaanno. Maganu ninke gatisate assino qixxaawo taashsho noota ikkase isi ayewoteno gara ikkinore assannota buuxissannonke.

Yesuusite wodote kakkalo widoonni Maganu uullate aana Gannatete hegerera heeꞌrate hexxo afiꞌnanni faro fanino. Yesuusi Yohaannisi 3:16 aana togo yiino: “Maganu alame lowo geeshsha baxino daafira, Beettosi ammanannota loosunni leellishannohu baalunku hegere heeshsho afiꞌranno gede ikkinnina baꞌꞌannokki gede, mitto Beettosi uyino.” Yesuusi reyo, Maganu taashsho calla ikkikkinni, mannu oosora noosiha bayira baxille leellishshanno.

Ikkina Yesuusi Wongeellate giddo kulloonni garinni qarraminohunna shete reyinohu mayiraati? Yesuusi buutote fonqoli iille heeꞌreennasinni ammanaminoha ikke, Daawuloosi mannu qarramiro Maganoho ammanaminoha diꞌꞌikkanno yiinoti kapho ikkitinota buuxisino. (Iyyoobi 2:4,  5) Sheexaanu guuta mancho Addaami soꞌrisiisino daafira tini yaattosi adda labbara dandiitanno. Ikkollana Addaami gede guuta ikkinohu Yesuusi, buutote qarri iillisirono hajajaminoha ikkino. (1 Qorontoosi 15:45) Hakko garinni isi Addaamino hasiꞌroommero Maganoho hajajama dandaannota leellishino. Yesuusi qarra dandee sae, dancha lawishsha ikkinonke. (1 Pheexiroosi 2:21) Maganu Beettisi woꞌma lubbosinni hajajaminosihura iima reyinannikki heeshsho ee kiisinosi.

YESUUSI REYASI KAAꞌLITANNOHEHU HIITTOONNIITI?

Yesuusi reyasi halaaleho. Isi reyo hegerera heeꞌneemmo faro fantinonke. Hegerera heeꞌra hasiꞌratto? Yesuusi maa assa hasiissannonkero kulanni togo yiino: “Hegere heeshsho afidhanno gede, ati callu halaalaancho Magano ikkoottoha atenna soottoha Yesuusi Kiristoosi afa hasiissannonsa”—Yohaannisi 17:3.

Tenne metseete qixxeessituri, halaalaanchu Magani Yihowarenna Beettisi Yesuusi Kiristoosire ledde rosattora koyissinohe. Qooxeessikkira nooti Yihowa Farciꞌraasine ate kaaꞌla hasidhanno. Qoleno, www.jw.org/sid yinanni webisayitenke daaꞌꞌatte dancha mashalaqqe afiꞌrattora dandaatto.