Yihowahu Bagamannokki Baxilli Kaaꞌlannonkehu Hiittoonniiti?

1. Yihowa ma assineemmo gede jawaachishinonke?

YIHOWA bagamannokki baxille lowo geeshsha naadanno. (Hos. 6:6, NW) Soqqamaanosino hatto assitanno gede jawaachishinonsa. Maganinke bagamannokki baxille naandeemmo gede jawaachishinonke. Kayinni hatto assinammora albaanni bagamannokki baxilli maatiro afa hasiissannonke.

2. Bagamannokki baxilli noosi manchi maa assanno?

² Bagamannokki baxilli maati? “Bagamannokki baxille” yitanno yaatto Qullaawa Borrote Haaro Alame Tiro giddo mite 230 basera no. Kuni baxilli maati? Mittu manchi bagamannokki baxilli noosiha ikkiro wole mancho lowo geeshsha baxanno hattono iso baxa diaguranno. Yihowa bagamannokki baxille leellishate taalle nookki lawishshankeeti. Konni birxichira Yihowa mannaho bagamannokki baxille leellishinohu hiittoonniitiro ronseemmo. Aananno birxichira, ninkeno mimmitoho bagamannokki baxille leellinshe Yihowa lawishsha harunsa dandiineemmo gara ronseemmo.

YIHOWAHU ‘BAGAMANNOKKI BAXILLI BATIꞌRAHO’

3. Yihowa Musera ayimmasi xawisinohu hiittoonniiti?

³ Israeele Gibitsetenni fultuhunni shiima yanna gedensaanni, Yihowa Musera suꞌmasinna akattasi kule ayimmasi xawisinosi. Togo yiinosi: “Ani Kaaliiqi [Yihowa, NW] maareemmohonna hanqoho muddameemmokkiho; mararaancho Maganooti; ammanamaꞌyanna bagamannokkihu baxilliꞌya batiꞌraho.” (Ful. 34:6, 7) Yihowa tenne jawaachishshanno hedo coyiꞌre, Musera bagamannokki baxillisi baxxinoha ikkinota kulinosi. Kuni baxilli maati?

4-5. (a) Yihowa ayimmasi xawisinohu hiittoonniiti? (b) Hiikkuri xaꞌmuwa laꞌneemmo?

⁴ Yihowa bagamannokki baxilli noosita calla ikkikkinni, ‘bagamannokki baxillisi batiꞌra’ ikkinota xawisino. Tenne yaatto Qullaawu Maxaafi giddo wolewa lee bayichono qummi assinoonni. (Kir. 14:18; Neh. 9:17; Far. 86:15; 103:8; Iyu. 2:13; Yon. 4:2) Baalante basera tenne yaatto horoonsiꞌnoonnihu Yihowara callaati; mannaho tenne yaatto horo dihoroonsiꞌnoonni. Yihowa bagamannokki baxillesi konni garinni luphi asse kulasi dhagge diꞌꞌikkitanno? Isi bagamannokki baxille lowo geeshsha naadannoti dihuluullissannote.b Moote Daawiti aane noore coyiꞌrinohu iseraati: Isi togo yiino: “Kaaliiqa! Bagamannokkihu baxillikki gordoho qasiꞌrino.  . . Kaaliiqaꞌya, bagamannokkihu baxillikki maalaꞌlinanniho; mannu baalunku qoolikki caalira fooliishshiꞌranno.” (Far. 36:5, 7) Daawiti gede Yihowaha bagamannokki baxille lowo geeshsha naandeemmo?

⁵ Hanni bagamannokki baxilli maatiro albinni roore huwatate lame xaꞌmo laꞌno: Yihowa bagamannokki baxille leellishannohu ayeooraati? Yihowahu bagamannokki baxillinni horo afiꞌra dandiineemmohu hiittoonniiti?

YIHOWA BAGAMANNOKKI BAXILLE LEELLISHANNOHU AYEOORAATI?

6. Yihowa bagamannokki baxille leellishannohu ayeooraati?

⁶ Yihowa bagamannokki baxille leellishannohu ayeooraati? Qullaawu Maxaafi banxeemmohu lowo coyi noota lawishshaho, “baatto loosiꞌra,” “woyinenna buuro,” “seejjo” hattono “egenno” banxeemmota kulanno. (2 Dud. 26:10; Law. 12:1; 21:17; 29:3) Ikkirono bagamannokki baxille leellinshannihu wole coyibbara ikkikkinni mannaho callaati. Yihowa bagamannokki baxille leellishannohu kayinni baalunku mannira diꞌꞌikkino. Isi konne baxille leellishannohu isi ledo muli jaaloomi noonsariraati. Maganinke jaallasira ammanaminoho. Isi insara dhagge ikkitanno hexxo uyinonsa hattono baxa diagurannonsa.

7. Yihowa baalanka manna baxannota leellishinohu hiittoonniiti?

⁷ Yihowa baalanka manna baxannota leellishino. Yesuusi Niqoodimoosi yinanni manchira togo yiino: “Maganu baattote aana noo manna baala baxino daafira, iso ammaꞌninohu baalu hegere heeshsho afiꞌranno gede ikkinnina baꞌꞌannokki gede, Maganu mitto Beettosi uyino.”—Yoh. 3:1, 16; Mat. 5:44, 45.

8-9. (a) Yihowa soqqamaanosira bagamannokki baxille leellishannohu mayiraati? (b) Kawiinni aanchine maa ronseemmo?

⁸ Aleenni kullinte gede, Yihowa bagamannokki baxille leellishannohu isi ledo muli jaaloomi noonsa soqqamaanosira callaati. Moote Daawitinna masaalaanchu Daanieeli coyidhinori tenne leellishanno. Lawishshaho Daawiti togo yiino: “Bagamannokkiha baxillekki egentinoherira, . . . dirrisinsa. Kaaliiqi . . . waajjitannosirira baalaho, hegere geeshsha bagamannokkiha baxillesi leellishannonsa.” Daanieelino togo yiino: “Halaalaancho Magano Yihowa, ati baxxannoheriranna hajajokki agadhitannorira bagamannokki baxillekki leellishattonsa.” (Far. 36:10; 103:17; Dan. 9:4, NW) Tini qummeeshshuwa leellishshannonte gede, Yihowa soqqamaanosi iso egentinosinna waajjitannosi daafira hattono baxxannosinna hajajosi agadhitanno daafira bagamannokki baxillesi leellishannonsa. Yihowa bagamannokki baxillesi leellishannohu iso halaalunni magansidhannosirira callaati.

⁹ Yihowa isira soqqama hananfammora albaanni baalunku mannira leellishanno baxille ninkerano leellishinonke. (Far. 104:14) Ikkirono iso magansiꞌneemmore ikkinoommo daafira bagamannokki baxillesino leellishannonke. Yihowa soqqamaanosi togo yee jawaachishinonsa: “Ani ate baxoommo baxilli kayinni hegerera kaajje heeꞌranno.” (Isa. 54:10) Daawiti umisi heeshshonni lainonte gede, “Yihowa isira ammanantinore baxxino garinni towaatanno.” (Far. 4:3, NW) Yihowa baxxino garinni towaatannonketa afanke ma assineemmo gede assitannonke? Faarsaanchu togo yiino: “Egennaammu baalu konne coye huwatto; bagamannokkiha Kaaliiqi baxille wodanchito.” (Far. 107:43) Hanni tenne wodanaho wodhine ammanantinori Yihowa soqqamaano isi leellishannonsahu bagamannokki baxillinni horo afidhannota sase doogga laꞌno.

YIHOWAHU BAGAMANNOKKI BAXILLINNI HORO AFIꞌRA DANDIINEEMMOHU HIITTOONNIITI?

10. Yihowahu bagamannokki baxilli hegereha ikkinota afanke kaaꞌlitannonkehu hiittoonniiti? (Faarso 31:7)

¹⁰ Maganunnihu bagamannokki baxilli hegereho. Maganunnihu bagamannokki baxilli hegereha ikkinota Faarso 136te 26 hinge qummi assinoonni. Hanafote kiiro togo yitanno: “Shaqqado ikkinohura Kaaliiqa galattesi; bagamannokkihu baxillisino hegerehona.” (Far. 136:1) Kiiro 2 kayisse 26te geeshsha “bagamannokkihu baxillisino hegerehona” yitanno. Wole gattino kiiro nabbambeemmo woyite, Yihowa agurikkinni batinye doogganni bagamannokki baxille leellishanno gari dhagge ikkannonke. Duucha hinge yinoonniti “bagamannokkihu baxillisino hegerehona” yitanno yaatto, Yihowahu mannisira noosi baxilli soorramannokkiha ikkinota buuxissannonke. Yihowa soqqamaanosi cincannonsata afanke lowo geeshsha jawaachishshannonke! Isi ammanante soqqantannosire baxa diaguranno; roorenkanni qarru iillannonsa woyite ledonsa ikkanno. Horo afiꞌneemmo gara: Yihowa ledonke ikkannota afanke hagiidhineemmo gede assitannonke; qoleno qarru iillannonke woyite dandiine saꞌꞌate hasiissannonke jawaante afiꞌneemmo gedenna heeshshote doogonni fulleemmokki gede kaaꞌlitannonke.—Faarso 31:7 nabbawi.

11. Faarso 86:5 kultanno garinni, Yihowa gatona yaanno gede kakkayisannosiri maati?

¹¹ Maganunnihu bagamannokki baxillisi gatona yaanno gede kakkayisannosi. Yihowa cubbo loosino manchi maaro einotanna busha assootesi agurinota laꞌꞌanno woyite, bagamannokki baxillisi hakkonne mancho gatona yaanno gede kakkayisannosi. Faarsaanchu Daawiti Yihowa daafira togo yee borreessino: “Cubbinke deerrinni diqorichishannonke; saonke garinni dihanqannonke.” (Far. 103:8-11) Daawiti iillinosihu buutote qarrinni, tiiu bushiishiro mageeshshi geeshsha waadannoro afino. Ikkirono isi Yihowa ‘cubbonke agurate’ qixxaawinoha ikkinota wodanchino. Yihowa cubbo gatona yaanno gede kakkayisannosiri maati? Tenne xaꞌmora dawaro Faarso 86:5 aana no. (Qummeeshsha nabbawi.) Daawiti huuccatto assiꞌranni yiinonte gede, Yihowa gatona yaannonsahu woshshidhannosirira baalaho bagamannokki baxillesi leellishannonsa daafiraati.

12-13. Alba loonsoommo soꞌrora tiiꞌꞌinke bushiishanni noonkeha ikkiro mayi kaaꞌlannonke?

¹² Cubbo loonsummoro gaabba danchate ikkinnina bunshe diafidhino. Tini maaro eꞌneemmo gedenna soꞌronke biddi assiꞌneemmo gede assitankera dandiitanno. Mite Maganu soqqamaano tiiꞌꞌinsa alba loossino soꞌrora bushiishanni waadinonsa. Insa maaro eꞌinohanna busha assootensa agurtinoha ikkiro nafa Yihowa gatona yaannonsakkihu gede assite heddanno. Aterano togoori macciishshamannoheha ikkiro, Yihowa soqqamaanosira bagamannokki baxillesi leellishannonsata afakki kaaꞌlitannohe.

¹³ Horo afiꞌneemmo gara: Guuntete xeꞌne noonkere ikkinummorono Yihowara hagiirrunninna xalalu tiiꞌꞌinni soqqama dandiineemmo. Kuni ikkara dandaannohu “Beettisi Yesuusi mundee cubbu baalunni keereensitannonke” daafiraati. (1 Yoh. 1:7) Guuntete xeꞌne hexxo mudhatto gede assitannohe woyite, Yihowa cubbo loosse maaro eꞌannore gatona yaannotanna tenne assate quqquxamannota qaagi. Daawiti bagamannokki baxillinna gatona yaate mereero noo xaadooshshe xawisino gara wodanchi. Isi togo yiino: “Gordu baattotewiinni xeertiꞌrinohu geeshsha, Kaaliiqi waajjitannosirira bagamannokkiha baxillesi hatto asse halashshi. Soojjaati galchimiwiinni fafinohu geeshsha, Kaaliiqi ninkewiinni cubbonke fafisanno.” (Far. 103:11, 12) Addanko Yihowa ‘maaro batiꞌrate.’—Isa. 55:7.

14. Daawiti Maganunnihu bagamannokki baxilli agarooshshe ikkannonke gara xawisinohu hiittoonniiti?

¹⁴ Maganunnihu bagamannokki baxilli ayyaanaamittete agarooshshe ikkannonke. Daawiti Yihowa huucciꞌranni togo yiino: “Ati anera maaxameemmo dargaati; qarrunni agarattoe; gatisaanchimmakkinni gaangeessoottoe daafira, qoonqoꞌya naggi asse faarsiꞌreemmohe. . . . Kaaliiqa addaxxitannore kayinni maaro doyissitannonsa.” (Far. 32:7, 10) Biꞌre hunda katama doyissine huxxinanni huxxi katamu giddo noo mannira agarooshshe ikkannonte gede, Yihowahu bagamannokki baxillino Yihowa ledo noonke jaalooma hunanno coyinni agarannonke. Hakkiino sae Yihowa bagamannokki baxillisinni isiwa shinqeemmo gede assannonke.—Erm. 31:3.

15. Yihowahu bagamannokki baxillinna golo ikkate mereero mayi xaadooshshi no?

¹⁵ Daawiti Maganu manni afiꞌranno agarooshshe kulate wole lawishshano horoonsiꞌrino. Isi togo yee borreessino: “Gargaraanchoꞌya! Ati anera goloꞌyaati; baxattoe [“bagamannokki baxille leellishattoe,” NW] Maganooti.” Daawiti lede togo yiino: “Kaaliiqi haleꞌyaatinna goloꞌyaati; mineꞌyaatinna gatisaanchoꞌyaati; iso addaxxe keere heeꞌreemmo.” (Far. 59:17; 144:2) Daawiti Yihowaha bagamannokki baxille golu ledo heewisiisinohu mayiraati? Heeꞌneemmo bayichi ikkihano ikkiro isi soqqamaano ikkinummo geeshsha, Yihowa isi ledo noonkeha muxxe jaalooma hunara dandaanno coye gargadhate hasiisannonkere baalare qixxeessannonke. Faarso 91te, tini adda ikkase buuxissanno hedo no. Tenne faarso borreessaanchi togo yiino: ‘Kaaliiqa, Ati qiishoꞌyaatinna goloꞌyaati.’ (Far. 91:1-3, 9, 14) Museno Yihowa golo ikkinota xawissanno hedo coyiꞌrino. (Far. 90:1) Muse reyara shiima yannara albaanni lowo geeshsha jawaachishshanno hedo lede coyiꞌrino. Togo yiino: “Hegere Magani godankeeti; hegereti cigilesino irkissannonke.” (Mar. 33:27) “Hegereti cigilesino irkissannonke” yitanno yaatto Yihowa daafira maa kultannonke?

16. Yihowa hiittenne lame doogganni kaaꞌlannonke? (Faarso 136:23)

¹⁶ Yihowa golonke ikkiro beꞌe diyineemmo. Mito woyite kayi hexxo mudhinammoranna shesho hoongammora dandiineemmo. Togoo woyite Yihowa kaaꞌlannonkehu hiittoonniiti? (Faarso 136:23 nabbawi.) Isi cigilesinni irkise kaaꞌlannonke hattono sheshifachishannonke. (Far. 28:9; 94:18) Horo afiꞌneemmo gara: Yihowa woꞌmanka woyite irkisannonketa afanke isi lame doogganni kaaꞌlannonketa qaangeemmo gede assitannonke. Umihunni, isi heeꞌnummowano heeꞌnummoro golo ikkannonke. Layinkihunni, baxillaanchu iimi Anninke ninke daafira lowo geeshsha hedanno.

YIHOWA BAGAMANNOKKI BAXILLESI LEELLISHANNONKETA ADDAXXA DANDIINEEMMOHU MAYIRAATI?

17. Maganu bagamannokki baxillesi leellishannonke daafira maa addaxxa dandiineemmo? (Faarso 33:18-22)

¹⁷ Aleenni ronsummonte gede, qarru iillannonke woyite Yihowa isi ledo noonke jaaloomi baꞌꞌannonkekki gede kaaꞌlannonketa addaxxa dandiineemmo. (2 Qor. 4:7-9) Masaalaanchu Ermiyaasi togo yiino: “Baꞌnummokkinni gantoommohu, bagamannokkihu Kaaliiqi baxilli hegereha ikkino daafiraati; maarosino gooffannokkite.” (Erq. 3:22) Yihowa woꞌmanka woyite bagamannokki baxillesi leellishannonketa addaxxa dandiineemmo. Korkaatuno Qullaawu Maxaafi, “Kaaliiqi ille waajjitannosirenna, bagamannokkiha baxillesi addaxxitannore laꞌanno” yaanno.—Faarso 33:18-22 nabbawi.

18-19. (a) Dea hasiissannonkekki coyi maati? (b) Aananno birxichira maa ronseemmo?

¹⁸ Dea hasiissannonkekki coyi maati? Yihowara soqqama hananfammora albaanni isi baalunku mannira leellishanno baxille leellishinonke. Ikkirono iso magansiꞌneemmore ikkinoommo daafira bagamannokki baxillesino leellishinonke. Kuni baxilli Yihowa hegere cigilesinni irkisannonke gede assinosi. Yihowa woꞌmanka woyite isiwa gamba yine heeꞌneemmo gede assannonke hattono uyinonke hexxo wonshannonke. Isi hegerera jaallasi ikkine heeꞌnammora hasiꞌranno! (Far. 46:1, 2, 7) Hakko daafira, Yihowa iillannonke qarri ikkihano ikkiro isira ammanamme heeꞌneemmo gede hasiissannonke jawaante aannonke.

¹⁹ Yihowa soqqamaanosira bagamannokki baxille leellishannohu hiittoonniitiro ronsoommo. Isi ninkeno mimmitoho bagamannokki baxille leellinshammora hasiꞌranno. Tenne assa dandiineemmohu hiittoonniiti? Aananno birxichira tenne lowo geeshsha hasiissanno hajo ronseemmo.