Ati Tenne Afootto?
Yihowa Israeele bukukkaamanna lemboola kakkalo assite shiqishidhanno gede fajjasi kaaꞌlitinonsahu hiittoonniiti?
SEERU bukukkaamanna lemboola Yihowara kakkalo assine shiqishiꞌra dandiinannita kulanno. Kakkalote daafira kulanno seeri tenne lamenta cea duucha woyite mitteenni kulanno; qoleno lamente giddo mitte hoogguro mitte kakkalo assine shiqishiꞌra dandiinanni. (Lew. 1:14; 12:8; 14:30) Tini Israeelete manna kaaꞌlitinohu hiittoonniiti? Umihunni bukukkaama afiꞌra qarra ikkitanno yanna no. Mayira?
Bukukkaama
Bukukkaama gobbatenni gobba hadhanno ceaati; tini cea Israeelete gobbara heedhannohu iibbillu yannaraati. Diru kiiro tini cea Birru aganira iibbille hasidhanni wodiidi gobba higge hadhanno; hakkiinni Badheessu woggara agurte Israeelete gobba higganno. (Farf. 2:11, 12; Erm. 8:7) Hakko daafira, hundi waro Israeelete dagara hawadu woggara kakkalo assite shiqishidhanno bukukkaama afiꞌra qarra ikkitannonsa.
Lemboola
Lembooli kayinni duucha woyite gobbatenni gobba dihaꞌranno; hakko daafira diro woꞌma Israeelete gobbara heeꞌranno. Qoleno lemboola mine cea dandiinanni. (Yohaannisi 2:14, 16te ledo heewisiisi.) Bayibil Pilanti Endi Animalsi yinanni maxaafi yaanno gara ikkiro, “Baalante Paalestiinu qachuwaranna katammara mannu lemboola ceanno. Mittu mittunku manchira lembooli galanno mini noosi woy minisi girgiddira tini cea galtanno xullo fushshanno.”—Isayaasi 60:8te ledo heewisiisi.
Mine ceꞌnoonni lemboola
Yihowa Israeele tenne diro woꞌma gobbansara heedhanno cea kakkalo assite shiqishidhanno gede fajjasi, isi baxillaanchonna mannisi qarri leellannosi Magano ikkinota leellishshanno.