Nabbawaano Xaꞌmitanno Xaꞌmo
Daawiti Faarso 145:2 Magano “hegere hegerera” galateemmohe yiino; hatto yaasi isi horo direyemmo yee hedino yaateni?
Hatto yaa diꞌꞌikkino. Isi borreessinori soꞌro diafiꞌrino.
Konni qummeeshshira Daawiti togo yiino: “Barru barrunkunni galateemmohe; hegere hegerera galateemmohe.” (Far. 145:2) Hakkiinni wolu qummeeshshira togo yiino: “Mooticha Maganoꞌya, woꞌmu wodaniꞌyanni galata eemmohe; suꞌmakkino hegere geeshsha ayirriseemmo.”—Far. 86:12.
Daawiti tenne coyiꞌrinohu horo reyannokkita hede diꞌꞌikkino. Isi, mannu cubbaataamo ikkino daafira reyannotanna isi umisino cubbaataamo ikkinota afino. (Kal. 3:3, 17-19; Far. 51:4, 5) Isi Magano hagiirsiisino manni lawishshaho Abirihaami, Yisihaaqinna Yaiqoobi nafa reyitinota afino. Qoleno isi gedensoonni reyasi gattannokkita afino. (Far. 37:25; 39:4) Ikkirono Daawiti Faarso 145:2 coyiꞌrino hedo Magano hegerera yaano lubbotenni noo geeshsha guwisiꞌra hasiꞌrinota woy murciꞌrinota leellishshanno.—2 Sam. 7:12.
Faarso 18, 51 nna 52 umoonni noo hedo leellishshannonte gede, Daawiti borreessinoti mite hedo umisi heeshsho daafira kultannote. Faarso 23 Daawiti Yihowa, biddishsha qixxeessannohu, fooliishsho aannohunna agaranno allaalaanchi gede asse xawisino. Daawiti hattoo allaalaanchooti. Qoleno isi ‘heeshshosi diri baalunkunni’ Maganoho soqqama hasiꞌrino.—Far. 23:6.
Daawiti borreessino hedo baalanta Yihowahu qullaawu ayyaani massageennasi borreessinota qaagi. Isi borreessinori giddo gama albillitte ikkannore kultanno masaalooti. Lawishshaho Daawiti Faarso 110 Mootichisi iima Maganu ‘qiniiteenni ofollanno’ yannanna jawa roorre adhanno yanna qummi assino. Roorre adhannohu ma assateeti? Maganu diinna aana roorre afiꞌrateetinna uullate aana noo ‘gosara yoo yaateeti.’ Iima heeꞌre gashshannohunna ‘hegerera kakkalaancho’ ikkannohu Buuramino moote dayinohu Daawiti sirchi widoonniiti. (Far. 110:1-6) Yesuusi Faarso 110 noo masaalo isi daafira kultannota ikkitinotanna albillitte woꞌmitannota coyiꞌrino.—Mat. 22:41-45.
Addanko, Daawiti isi heeꞌrino yanna daafiranna albillitte reyotenni kae Yihowa hegerera guwisiꞌranno yanna daafira borreessinohu qullaawu ayyaani massageennasiiti. Hakko daafira tini, Faarso 37:10, 11, 29 noo masaalo hunda Israeelete waro woꞌmitinotanna albillitte Maganu uulla woꞌmate hedinore wonshanno woyiteno woꞌmitannota ikkitinota huwatate kaaꞌlitannonke.—Tenne metseetera nooha “Ane Ledo Gannate Eatto” yaanno birxicho gufo 8 lai.
Faarso 145:2 nna wole qummeeshshuwa hundi waro Daawiti lubbotenni noo geeshsha Yihowa guwisiꞌra hasiꞌrinota leellishshanno. Qoleno albillitte Yihowa reyotenni kayisannosi woyite isi maa assa hasiꞌrannoro leellishshanno.