Qarru Yannara Keere Afiꞌra Dandiitinanni

1. “Maganu keeri” maati? Konne keere afiꞌra kaaꞌlitannonkehu hiittoonniiti? (Filiphisiyusi Sokka 4:6, 7)

TENNE alamera noo manni afinokki keeri no. Kuni ‘keeri Maganu aannoho’; konne keere afiꞌneemmohu iimi Anninke ledo dancha jaalooma kalaqiꞌneeti. Maganu aanno keere afiꞌnummoro beꞌe yinummokki heeꞌneemmo. (Filiphisiyusi Sokka 4:6, 7 nabbawi.) Magano baxanno manni ledo danchu jaaloomi heeꞌrannonke. Qoleno “keeru Magani” ledo danchu jaaloomi heeꞌrannonke. (1 Tes. 5:23) Iimi Anninke daafira ronsummoro, iso addaxxinummoronna isira hajajammummoro Maganu aanno keeri buutote qarri iillannonke woyite wodanaaꞌmineemmo gede kaaꞌlannonke.

2. Maganu keere afiꞌneemmota huluullammeemmokkihu mayiraati?

² Qarru iillannonke woyite lawishshaho, fayya ubbanno woyite, dano kalaqantanno woyite, dagate gaance kaꞌanno woyite woy dartu iillannonke woyite addinta Maganu aanno keere afiꞌra dandiineemmo? Togoo qarri waajjineemmo gede assankera dandaanno. Ikkirono Yesuusi rosaanosi, “Wodaniꞌne masoonke; waajjitinoonte!” yee amaalinonsa. (Yoh. 14:27) Ammanate roduuwinkeno tenne amaale harunsitino. Insa, buutote qarri iillinsarono Yihowa kaaꞌlonni keere afiꞌra dandiitino.

FAYYA UBBANNO YANNARA KEERE AFIꞌRA

3. Fayya keerenke huntara dandiitannohu hiittoonniiti?

³ Fayya heeshshonke gara woꞌmunni woꞌma soorritara dandiitanno. Hanni Koroonu fayya batinye manna gawajjitino gara laꞌno. Mitte xiinxallo kultino garinni, darate saꞌꞌanno manni Koroonu fayya yannara goxicho hooge qarramino. Tini fayya, quwa sae yaadanno manni, ago agannohunna jingilli assitanno xagga adhanno manni hattono finqilannonna insaneeto shaate woꞌnaalanno manni kiiro lexxitanno gede assitino. Kiꞌne heedhinanni gobbara fayya ubbinoha ikkiro, yaaddo gargadhanna Maganu aanno keere afiꞌra dandiitinannihu hiittoonniiti?

4. Yesuusi goofimarchu barri daafira masaalino masaalo afanke keere afiꞌneemmo gede assitannonkehu mayiraati?

⁴ Yesuusi goofimarchu yannara “Addi addi darga” dhibbu heeꞌrannota masaalino. (Luq. 21:11) Tenne afanke keere afiꞌneemmo gede kaaꞌlitannonkehu hiittoonniiti? Fayya ubburo dhagge assiꞌra dihasiissannonke. Yesuusi togoori ikkanno yee coyiꞌrinota anfoommo. Hakko daafira Yesuusi goofimarchu yannara heeꞌranno mannira amaalino amaale harunsineemmo; isi, “Massinoonte” yiino.—Mat. 24:6.

5. (a) Filiphisiyusi Sokka 4:8, 9 kultanno garinni fayya ubbanno woyite mayi daafira huucciꞌra hasiissannonke? (b) Qoonqotenni qaddaꞌnoonniha Qullaawa Maxaafa macciishshase mitte rodoo kaaꞌlitinosehu hiittoonniiti? Ise lawishshinni maa rosootto?

⁵ Fayya ubburo lowo geeshsha yaandammoranna waajjinammora dandiineemmo. Deesi yinanni rodoora togoo coyi tuncu yiinose.b Wosiilise, wosiilise beettinna akimichise Koroonu fayyanni reyituta, ise tini vayirese amaddannoe hattono geedhitino amaꞌyara sayiseemma yite waajjitino. Qoleno ise tenne fayyanni kainohunni loosoꞌya hoogeemma yite heddino daafira, sagaletenna minu kirira baaxxeemma woxe mamiinni afiꞌreemma yite yaaddino. Kuni coyi lowo geya yaachishinose daafira hashsha goxicho nafa hooggino. Kayinni Deesi galagalte keere afidhino. Hiittoonni? Ise Yihowa wodanaaꞌmitanno gedenna dancha danchare heddanno gede kaaꞌlasera badde kulte huuccidhino. (Filiphisiyusi Sokka 4:8, 9 nabbawi.) Deesi qoonqotenni qaddaꞌnoonnihu Qullaawu Maxaafi widoonni Yihowa “yaannosere” macciishshitino. Ise togo yitino: “Tenne qaddaꞌnoonni huuro macciishshe lowo geeshsha hagiidhoomma; tini yaaddoꞌyanni beedho afiꞌreemma gedenna Yihowa ane daafira hedannota qaageemma gede kaaꞌlitinoe.”—Far. 94:19.

6. Hojju xiinxallonna songote gambooshshi kaaꞌlannohehu hiittoonniiti?

⁶ Fayya ubburo bashsho assineemmoha mito coye assa qarra ikkitankera dandiitanno; ikkirono tini hojju xiinxallo assiꞌneemmokki gede woy gambooshshe haꞌneemmokki gede assitankera wodha dihasiissannonke. Borruwankenna viidiyubbate giddo kulloonni woꞌnaalshi ammanate roduuwinke togoo qarri heeꞌririno Yihowara ammanante soqqantanni noota qaangeemmo gede assannonke. (1 Phe. 5:9) Gambooshshe haꞌranke jawaachishshannota Qullaawu Maxaafi hedo qaangeemmo gede assitannonke. Qoleno woloota jawaachinsheemmonna ninkeno jawaanteemmo faro afiꞌneemmo. (Rom. 1:11, 12) Yihowa soqqamaanosi dhiwantu woyite, waajjitu woyite woy callimma macciishshantunsa woyite kaaꞌlinonsa gara hiincakki, ammanakki kaajjishshanno; hattono isi ateno kaaꞌlannoheta addaxxatto gede assitannohe.

7. Soqqamaasinchu Yohaannisi lawishshinni maa rosootto?

⁷ Ammanate roduuwikki ledo xaadate sharrami. Fayya ubbanno yannara mannunniwa wole agurina ammanate roduuwinkewa nafa gamba yaa qoropha hasiissannonkeha ikkara dandaanno. Togoo yannara soqqamaasinchu Yohaannisira macciishshaminosiri macciishshamahera dandaanno. Isi jaalasi Gayiyoosi xaada hasiꞌrino. (3 Yoh. 13, 14) Ikkirono Yohaannisi shiima yanna geya Gayiyoosinni xaada dandaannokkita huwatino. Hakko daafira Yohaannisi assa dandaannore assino; isi Gayiyoosira sokka borreessino. Kiꞌnerano duucha woyite ammanate roduuwiꞌne ledo xaada qarra ikkitannoꞌneha ikkiro, silke bilbiltine, viidiyote widoonni woy sokka borreessitine insa ledo xaadate woꞌnaalle. Ammanate roduuwinke ledo ganyine xaandeemmoha ikkiro beꞌe diyineemmo hattono keere afiꞌneemmo. Roorenkanni yaaddo amaddannohe woyite songote cimeeyye ledo xaadate woꞌnaali; qoleno insa baxillunni amaaltannohe amaale adhi.—Isa. 32:1, 2.

DANO KALAQANTANNO WOYITE KEERE AFIꞌRA

8. Kalaqantanno dano keerekki huntara dandiitannohu hiittoonniiti?

⁸ Ati heeꞌratto qooxeessa lolahu gawajje egenninoha, baattote huxano woy giira kaꞌe egentinoha ikkiro, lowo yanna baasa yaadattoha ikkara dandaanno. Danotenni kainohunni fiixakki shiiꞌroottoha woy jajjakki hoogoottoha ikkiro, lowo geeshsha xissiisiꞌroottoha, hexxo mudhattohanna wole agurina caaccaawattoha nafa ikkara dandaanno. Tini maalaamittete coye baxattoha ikkoottota woy ammana ajjinoheta leellishshannota diꞌꞌikkitino. Togoo qarri iillannohe woyite dadillakki nooreentilla. (Iyo. 1:11) Ikkirono yaachishanno coyi iilliherono hagiirre afiꞌra dandaatto. Hiittoonni?

9. Yesuusi buutote dano iillitannonke woyitira qixxaambeemmo gede assinonkehu hiittoonniiti?

⁹ Yesuusi masaalino masaalo qaagi. Alamete aana noohu mitu manni dano gawajjitannonsakkihu gede asse hedanno; ninke kayinni dano lexxitanni hadhannotanna mite dano gawajjitankera dandiitannota anfoommo. Yesuusi harunsaanosira, goofimarchu daara albaanni ‘baatto huxidhannotanna’ wole addi addi dano kalaqantannota kulinonsa. (Luq. 21:11) Qoleno isi ‘bunshe batidhannota’ masaalino; yannankera noo jaddo, finqillenna shabbarsitannori iillishshanno dano tenne leellishshanno. (Mat. 24:12) Yesuusi togoo dano iillitannonkehu Yihowa ninkera hedannokki daafira ikkinota dicoyiꞌrino. Isinni batinye ammanantinote Yihowa soqqamaanora dano iillitinonsa. (Isa. 57:1; 2 Qor. 11:25) Yihowa maalaletenni dano iillitannonkekki gede assa hoogara dandaanno; kayinni isi wodanaaꞌminenna keerinke baikkinni heeꞌneemmo gede hasiisannonkere aannonke.

10. Dano kalaqantara albaanni balanxe qixxaawanke ammana noonketa leellishshanno yineemmohu mayiraati? (Lawishsha 22:3)

¹⁰ Dano iillitannonke woyite ma assineemmoro balanxe qixxaambummoro dano kalaqantanno woyite wodanaaꞌmineemmo. Kayinni balaxe qixxaawa ammana noonkekkita leellishshannoni? Deeꞌni. Isinni dano kalaqantanno woyitira balaxe qixxaawanke Yihowara ninke gatisate dandoo noosita ammanneemmota leellishshanno. Hiittoonni? Maganu Qaali dano kalaqantanno woyitira qixxaambeemmo gede amaalannonke. (Lawishsha 22:3 nabbawi.) Metseettanke widoonni, songote gambooshshi widoonninna kullanninke egensiishshi widoonni, Maganu dirijjite dano kalaqantanno woyitira qixxaambeemmo gede duucha higge qorowisiissinonke.c Yihowa addaxxineemmo? Hatto ikkiro, uyinanninke amaale dano kalaqantara albaanni xaanni harunsineemmo.

11. Margareeti lawishshinni maa rosootto?

¹¹ Hanni Margareeti yinanni rodoo woꞌnaalsha laꞌno. Ise heedhanno qooxeessira dolu giira kaꞌuta qaese agurte xooqqanno gede kulloonnise. Baalunku manni mitteenni fule xooqanni noo daafira doogo cufantino. Wiliile gobba gudisse tunsiissino; hakko daafira ise boode yanna geeshsha makeenise giddonni fula didandiitino. Ikkirono ise balaxxe qixxaabbino daafira gattino. Margareeti borsise giddo dano kalaqantanno woyite xoonqe fullanni doogo leellishanno kaarta wodhitino. Ise dano kalaqantara albaanni tenne doogo makeenunni hadhe nafa laꞌino. Margareeti balaxxe qixxaabbino daafira dano iillitusekki gattino.

12. Dano kalaqantanno woyitira uyinanninke biddishsha harunsineemmohu mayiraati?

¹² Gashshaano ninkenna wolootu fayyimma agarate yite minira yannante hingeemmo gede, heeꞌneemmo qooxeessa agurre fulleemmo gede woy wolere assineemmo gede hajajjankera dandiitanno. Mitu manni noonsare agure xooqa hasiꞌrannokki daafira uyinanninsa biddishshira bayichonkonni dihajajamanno. Kiristaanuna? Qullaawu Maxaafi togo yaanno: “Mootichu Yesuusira yitine roorre uyinoonninsarira hajajamme. Aliidi roorricha ikkinohura mooteteno hajajamme. . . . Insa . . . Mootetewiinni sonkannireeti.” (1 Phe. 2:13, 14) Yihowa dirijjiteno fayyimmanke agadhate kaaꞌlanno biddishsha uyitannonke. Songonke cimeeyyera teessonke kulleemmo gede duucha hinge qaagiissinanninke; tini, dano kalaqantanno woyite insa ninkenni xaaddanno gede kaaꞌlitannonsa. Ati hatto assootto? Mininni fulleemmokki gede, heeꞌnoommo qooxeessa agurre haꞌneemmo gede hattono hasiisannonkere afiꞌra dandiineemmo gara woy woloota kaaꞌla dandiineemmohu mamooteetironna hiittoonniitiro kullankera dandiinanni. Togoo biddishshira hajajammeemmokkiha ikkiro ninketano ikko songote cimeeyye heeshsho qarru giddo tungammora dandiineemmo. Kuri ammanantino labballi ninke lubbora yite diinaggaabbannore ikkitinota qaagge. (Ibi. 13:17) Margareeti togo yitino: “Songote cimeeyyenna Yihowa dirijjite uyitino biddishsha harunsaꞌya heeshshoꞌya gatissinota woꞌmunni woꞌma ammaneemma.”

13. Darame wolewa haꞌrinohu batinyu Kiristaanira keerinsanna hagiirrinsa baꞌꞌannokki gede kaaꞌlinonsari maati?

¹³ Danotenni, olunni woy dagate gaancenni kainohunni heedhanno qooxeessa agurte hadhinori batinyu roduuwi martinowa haaro heeshsho rosate dandiiture baala assitino; qoleno ayyaanaamittete coye assa diagurtino. Dartu iilleennansa addi addi bayicho haꞌrinohu umi xibbi diri Kiristaani gede insa martinowa “Maganu qaale [kula]” diagurtino. (Soq. 8:4) Sabbakansa insa iillannonsa qarra ikkikkinni Maganu Gashshoote illachishshanno gede kaaꞌlitinonsa. Hakko daafira insa hagiirrinsanna keerinsa baꞌꞌannokki gede assidhino.

DARTU IILLANNONKE WOYITE KEERE AFIꞌRA

14. Dartu keerenke hunara dandaannohu hiittoonniiti?

¹⁴ Dartu iillannonke woyite keere afiꞌneemmo gede assannonkeha duucha coye hoongammora dandiineemmo. Usurranninke yine waajjinummokkinni mitteenni gamba yineemmoha, faajjete sabbankeemmoha hattono barru dilgonke assiꞌneemmoha ikkiro hagiirrenna harshammo afiꞌneemmo. Kuri coyibba assa dandiineemmokkiha ikkiro, gaꞌa hiikkinammokka yine waajjine yaandammora dandiineemmo. Togoo woyite yaada nooreentilla. Ikkirono qoropha hasiissaanke. Yesuusi dartu harunsaanosi gufidhanno gede assara dandaannota kulino. (Yoh. 16:1, 2) Ikkina dartu iillannonke woyite keerinke baꞌꞌannokki gede assiꞌra dandiineemmohu hiittoonniiti?

15. Darte waajja hasiissannonkekkihu mayiraati? (Yohaannisi 15:20; 16:33)

¹⁵ Maganu Qaali togo yaannonke: “Kiristoosi Yesuusinni maganittete heeshsho heeꞌra hasiꞌranno baali xiiwamanno.” (2 Xim. 3:12) Andire yinanni rodiira isi heeꞌranno gobbara loosonke agambita tenne ammane adha qarra ikkitinosi. Isi togo yiino: ‘Tenne gobbara batinye Yihowa Farciꞌraasine no. Gashshaano ninke baalanka hiitto assite usura dandiitanno?’ Tini hedo Andire keere afiꞌranno gede ikkikkinni lowo geeshsha yaadanno gede assitinosi. Wolootu roduuwi kayi ninke diusurranninke yite heda agurte Yihowa addaxxitino. Insa usurantara dandiitannota affino; kayinni Andire geeshsha diyaaddino. Hakko daafira Andire insa lawishsha harunsatenna Yihowa addaxxate murciꞌrino. Mulenni isi keere afiꞌrino; hattono qarra ikkannori heeꞌrirono xa hagiirraamo ikka dandiino. Ninkeno hagiirraamma ikka dandiineemmo. Yesuusi dartu iillannonketa kuli yannara ammanamme heeꞌra dandiineemmotano buuxisinonke.—Yohaannisi 15:20; 16:33 nabbawi.

16. Dartu iillannonke woyite hiittoo biddishshira hajajama hasiissannonke?

¹⁶ Loosonke hoollanni woy agambanni woyite sinu biironna songote cimeeyye biddishsha uyitannonke. Konne biddishsha uyinanninkehu ninke agarate, ayyaanaamittete sagale afiꞌneemmo gede assatenna dandiinummo deerrinni sabbakate looso loosa agurreemmokki gede kaaꞌlateeti. Biddishsha uyinoonniꞌnehu mayiraatiro woꞌmunni woꞌma leella hoogiꞌnero nafa hajajamate dandiitinire baala asse. (Yai. 3:17) Qoleno roduuwinke woy songote giddo loonsanni loosi daafira afa hasiissannonsakki mannira horo kultinoonte.—Ros. 3:7.

17. Umi xibbi diro heedhino soqqamaasine gede maa assate murciꞌrootto?

¹⁷ Sheexaanu Maganu mannira ola kayisinohu qaru korkaati insa “Yesuusira ammanamatenni farcidhannore” ikkitino daafiraati. (Aju. 12:17) Sheexaanunna isi alame waajjishiishshahera wodhitooti. Mannu giwinkerono, sabbakankenna rosiisanke hagiirrenna keere afiꞌneemmo gede assitannonke. Umi xibbi diro, Ayihudete roorrooti Yesuusi soqqamaasine sabbaka agurtanno gede hajajjunsata, kuri ammanantino labballi Maganoho hajajama doodhitino. Insa sabbaka diagurtino; tini hagiirraamma ikkitanno gede assitinonsa. (Soq. 5:27-29, 41, 42) Hige loosonke hoollanni woyite hayyotenni sabbaka hasiissannonke. (Mat. 10:16) Ikkirono dandiinummore baala assinummoro, Yihowa hagiirsiinsironna heeshsho gatissanno sokka kulliro afiꞌnanni hagiirri heeꞌrannonke.

“KEERU MAGANI LEDOꞌNE HEEꞌRANNO”

18. Addu keere afiꞌra dandiineemmohu ayewiinniiti?

¹⁸ Lowo qarri iillannonke yannara nafa keere afiꞌra dandiineemmota dihuluullammeemmo. Togoo yannara hasiisannonkehu Maganu aanno keere ikkinota qaaga hasiissannonke; konne keere aannohu Yihowa callaati. Fayya ubbanno woyite, dano kalaqantanno woyite woy dartu iillannoꞌne woyite Yihowa addaxxe. Dirijjitesiwa gamba yitine heedhe. Albillitte daggannota dhagge ikkitanno yanna illachishshe. Hatto assitiniro, “keeru Magani ledoꞌne heeꞌranno.” (Fil. 4:9) Aananno birxichira ammanate roduuwinkera qarru iillannonsa woyite Maganu aanno keere afidhanno gede kaaꞌla dandiineemmohu hiittoonniitiro ronseemmo.