Yesuusi Yihowa Suꞌmi Qullaawanno Gede Assino Gara

1-2. (a) Yesuusi reyara albaanni noo hashsha maa assino? (b) Konni birxichira hiikkuri xaꞌmuwa xiinxallineemmo?

YANNA Niisaani 14, 33 M.D. Hamusete hawarrooti; Yesuusa kaandanni, isira yoo yinanni, minshannisi hattono beebba assiꞌne shinannisi yanna gambisse no. Isi xaalla minu aana minnoonni minira ammanantino soqqamaasinesi ledo baxxino hurbaate ite kaino. Yesuusi hakko hurbaati gedensaanni soqqamaasinesira jeefote jawaachishannore kulinonsa. Insa baalunku hakko mininni fultara shiima yanna albaanni Yesuusi lowo tiro afidhino huuccatto assino. Soqqamaasinchu Yohaannisi tenne huuccatto Yohaannisi fooliishsho 17 borreessino.

² Yesuusi huucciꞌrino huuccatto hatte yannara iso yaachishinosiri maatiro anfeemmo gede kaaꞌlitannonkehu hiittoonniiti? Tini huuccatto Yesuusi uullate aana soqqami yanna baalantera roorse laꞌꞌanno coyi maatiro leellishshannohu ma garinniiti? Hanni kuri xaꞌmuwara qolloonni dawaro laꞌno.

“SUꞌMAKKI EGENSIISOOMMONSA”

3. Yesuusi Yihowa suꞌmi daafira mayino? Hatto yiinohu mayyaateeti? (Yohaannisi 17:6, 26)

³ Yesuusi huuccatto assiꞌranni “Suꞌmakki egensiisoommonsa” yiino. Isinni, rosaanosira Yihowa suꞌma egensiisinonsata lame hige qummi assino. (Yohaannisi 17:6, 26 nabbawi.) Yesuusi “Suꞌmakki egensiisoommonsa” yiinohu mayyaateeti? Insara affinokki suꞌma egensiisanni noonsa? Yesuusi rosaano Ayihudoota ikkitino daafira Maganu suꞌmi Yihowa ikkinota wonanni affino. Kuni suꞌmi Ibiraawootu afiite Qullaawa Borro giddo lowo kume ikkanno bayicho no. Hakko daafira Yesuusi insara Maganu suꞌma ikkikkinni, isi ayimma xawisanni noonsa. Yesuusi insara Maganu ayimma yaano isi assara hedinore, loososinna akattasi ayeno kulara dandaannokki garinni xawisinonsa.

4-5. (a) Mittu manchi suꞌma afate yaa mayyaatero leellishanno lawishsha kuli. (b) Yesuusi rosaano Yihowa suꞌma affinohu ma garinniiti?

⁴ Lawishshaho, hanni songokkira Daawiti yinannihu mittu cimeessi no yine hendo; qoleno kuni rodii akimichaho. Konne rodoo egennittonku lowo diro ikkino. Kayinni mitto barra hedeweelcho xagisiꞌra hasiisseennahe kuni rodii loosanno hospitaale haꞌritto; isino dandoosi horoonsiꞌre heeshshokki gatisihe. Xa konne rodoo albinni roore baxatto hattono isi suꞌma kayinsanna macciishshatto woyite, assinohere qaagatto. Daawiti xa bashsho afoottoha songote cimeessa calla ikkikkinni heeshshokki gatisino akimichaati.

⁵ Hatteente gede Yesuusi rosaano bashshonni Yihowa suꞌma affino. Kayinni Yesuusi uullate aana soqqami yannara, rosaanosi Yihowa ayimma roore huwattanno gede kaaꞌlinonsa. Hatto yineemmohu mayiraati? Korkaatuno Yesuusi assinorinninna coyiꞌrinorinni Annisi ayimma leellishino. Hakko daafira Yesuusi rosaano isi rosiisino roso macciishshitenna mannaho leellishino shaqqille laꞌe albinni roore Yihowa ‘afa’ dandiitino.—Yoh. 14:9; 17:3.

“OOTTOEHU SUꞌMIKKIRA YITE”

6. Yihowa Yesuusira suꞌmasi uyinohu ma garinniiti? (Yohaannisi 17:11, 12)

⁶ Yesuusi rosaanosi daafira huuccanni, “Oottoehu suꞌmikkira yite agarinsa” yiino. (Yohaannisi 17:11, 12 nabbawi.) Hatto yaa Yesuusa Yihowa yine woshshinanni yaate? Hatto yaa diꞌꞌikkino. Yesuusi huucciꞌri woyite Yihowa “suꞌmikkira yite” yiinota wodanchi. Hakko daafira Yihowa Yesuusi suꞌma diꞌꞌikkino. Ikkina Yesuusi Maganu suꞌma uyinoonnisita coyiꞌrinohu mayyaateeti? Umihunni, Yihowa iso riqiwe coyiꞌrara Yesuusa soyino. Yesuusi Annisi suꞌminni dayino hattono konni suꞌminni lowo looso loosino. (Yoh. 5:43; 10:25) Hatteeno agurranna Yesuusi suꞌmi “Yihowa Gatisaanchoho” yitanno tiro afiꞌrino. Addanko, Maganu suꞌmi Yesuusi suꞌmi ledo xaadooshshe afiꞌrinoho.

7. Yesuusi Yihowa suꞌminni coyiꞌrinohu hiittoonniitiro leellishanno lawishsha kuli.

⁷ Lawishshaho, mittu ambaasaaderichi gashshaancho riqiwanno daafira gashshaanchu suꞌminni coyiꞌrara dandaanno. Hakko daafira ambaasaaderichu coyiꞌrannore gashshaanchu coyiꞌrannori gede assine laꞌnanni. Hatteente gede Yesuusi Yihowa riqiwe mannaho Yihowa suꞌminni coyiꞌrino.—Mat. 21:9; Luq. 13:35.

8. Yesuusi uullara daara albaanni baalanka coye Annisi suꞌminni assino yineemmohu mayiraati? (Fulo 23:20, 21)

⁸ Yesuusi Qaale ikkino daafira, Maganunnite ayyaanaame oosoranna mannu oosora mashalaqqenna biddishsha kule Magano riqiwe coyiꞌrino. (Yoh. 1:1-3) Israeele halalla noo yannara Yihowa insa towaatara soyino sokkaasinchi Yesuusa ikkikki digatino. Yihowa Israeele konni sokkaasinchira hajajama hasiissannonsahu mayiraatiro kulanni, “Ane suꞌminni daannoha ikkino daafira” yiino.a (Fulo 23:20, 21 nabbawi.) Yihowa hatto yiinohu Yesuusi iso riqiwannota hattono Annisi suꞌma ayirrisatenna qullaawanno gede assate albisa ikkannota leellishateeti.

“ANNAꞌYA, SUꞌMAKKI AYIRRISI!”

9. Yesuusi Yihowa suꞌmi qullaawanno gede assinohu hiittoonniiti? Xawisi.

⁹ Xaa geeshsha ronsummonte gede, Yesuusi uullara daara albaanni nafa Yihowa suꞌmi qullaawanno gede assino. Yesuusi uullate aana heeꞌre assinohu baalunku coyi Yihowa suꞌmi ledo xaadooshshe afiꞌrinoho! Yesuusi soqqanshosi jeefisara kae heeꞌre, “Annaꞌya, suꞌmakki ayirrisi!” yee Yihowa huucciꞌrino. Hakkiinni bayichonkonni, “Suꞌmaꞌya ayirrisoommo; ledeno ayirriseemmo” yitannoti lowo huuro gordunni daggu.—Yoh. 12:28.

10-11. (a) Yesuusi Yihowa suꞌma ayirranno gede assinohu ma garinniiti? (Misileno lai.) (b) Yihowa suꞌmi qullaawanna minshe nookkiha ikka hasiissannohu mayiraati?

¹⁰ Yesuusino Annisi suꞌma ayirranno gede assino. Ma garinni? Isi tenne assinoti mitte doogo Annisita dhagge ikkitanno akattanna loosino looso wolootaho kuleeti. Ikkirono isi Annisi suꞌmi ayirranno gede wolereno assino. Yihowa suꞌmi qullaawanna minshe nookkiha ikka hasiissannosi.b Yesuusi haꞌrunsaanosira lawishshu huuccatto rosiisi woyite, tini lowo geeshsha hasiissannota ikkitinota leellishino. Isi, “Iima heeꞌrattohu Annanke, suꞌmikki qullaawa ikko” yiino.—Mat. 6:9.

¹¹ Yihowa suꞌmi qullaawanna minshe nookkiha ikka hasiissannohu mayiraati? Korkaatuno hunda Edenete kaashshu basera Sheexaanu Daawuloosi Magano Yihowa mishino hattono suꞌmasi hunino. Sheexaanu, Yihowa kaphaancho ikkinohu gedenna Addaamiranna Heewanira dancha coye hoꞌlinonsahu gede asse coyiꞌrino. (Kal. 3:1-5) Qoleno Sheexaanu Yihowa assanno coyi gara ikkinokkita coyiꞌrino. Sheexaanu konni garinni kapho coyiꞌre Yihowa suꞌma hunino. Gedensoonni Sheexaanu Iyyoobi yannara, mannu ooso Yihowara soqqantannohu isiwiinni mitore afidhanno daafira calla ikkinohu gede asse coyiꞌrino. Qoleno kuni suꞌma hunannohu Sheexaanu, Yihowa lubbora baxannohunna qarru iillisirono isira soqqamannohu dino yee coyiꞌrino. (Iyo. 1:9-11; 2:4) Yihowanna Sheexaanu giddo kaphaanchu ayetiro leellishate yanna hasiissino.

“HEESHSHOꞌYA SAYISE EEMMO”

12. Yesuusi Yihowa suꞌma baxanno daafira maa assino?

¹² Yesuusi Yihowa baxanno daafira, Yihowa suꞌmi qullaawanna minshe nookkiha ikkanno gede assate dandiire baala assa hasiꞌrino. Isi “Heeshshoꞌya sayise eemmo” yiino. (Yoh. 10:17, 18) Addanko Yesuusi Yihowa suꞌmira yee reyate nafa maahoyye yiino.c Guuta ikkitinori Addaaminna Heewani Yihowara badhe wodhitino hattono Sheexaaneho halantino. Yesuusi kayinni uullara daatenna Yihowa baxannota leellishate maahoyye yiino. Isi heeshshosi baalantenni minshe nookkiha ikke Yihowa baxannota leellishino. (Ibi. 4:15; 5:7-10) Isi qarru haqqi aana reyate geeshsha minshe nookkiha ikkino. (Ibi. 12:2) Konni garinni, Yihowanna suꞌmasi baxannota leellishino.

13. Sheexaanu kaphaancho ikkinota leellishate Yesuusi malinoho yineemmohu mayiraati? (Misileno lai.)

¹³ Yesuusi heeꞌrino heeshshonni kaphaanchu Yihowa ikkikkinni Sheexaane ikkinota woꞌmunni woꞌma leellishino! (Yoh. 8:44) Xaa geeshsha heeꞌrino manni giddo Yesuusi geeshsha Yihowa afinohu dino. Sheexaanu Yihowa kassasino kisse giddo mitte nafa halaale ikkitoommero Yesuusi afanno. Kayinni Yesuusi Yihowa suꞌmira halamate murciꞌrino. Yihowa agurinosiha lawisi woyite nafa Yesuusi baxillaanchu Annisira badhe wodhantenni reyate maahoyye yiino.—Mat. 27:46.d

“OOTTOE LOOSO UMO FUSHSHE, . . . AYIRRISOOMMOHE”

14. Yesuusi ammanaminotera Yihowa baꞌraasinosihu hiittoonniiti?

¹⁴ Yesuusi reyara albaanni noo hashsha huuccatto assiꞌranni togo yiino: “Oottoe looso umo fushshe, . . . ayirrisoommohe.” Isi ammanamino daafira Yihowa baꞌraasannosita addaxxino. (Yoh. 17:4, 5) Yesuusi Annasi addaxxasi garankolla. Yihowa iso waamate giddo diagurinosi. (Soq. 2:23, 24) Isi Yesuusa reyotenni kayisino; hattono iima ayirrado bayicho uyinosi. (Fil. 2:8, 9) Jeefote, Yesuusi Maganu Gashshooti moote ikke gashsha hanafino. Kuni Gashshooti maa assanno? Yesuusi rosaanosi huuccatto assidhanno gede rosiisi woyite togo yiino: “Gashshootikki dayo. Fajjokki iima ikkitanni noonte gede, uullate aanano ikkito.”—Mat. 6:10.

15. Yesuusi wolere maa assanno?

¹⁵ Muli yannara Yesuusi Maganu diinna ledo olamanno; hattono Armagedooni olinni bushuulle hunanno. (Aju. 16:14, 16; 19:11-16) Hakkiinni isi mulenni Sheexaane “diimete” tuganno; Sheexaanu hakko heeꞌre mittoreno assa didandaanno. (Aju. 20:1-3) Yesuusihu Kumu Diri Gashshooti yannara galagale keeru heeꞌranno; mannu oosono guuta ikkitanno. Isi reyitinore kayisanno. Uulla woꞌmano gannate assanno. Yihowa hedinori woꞌmanno!—Aju. 21:1-4.

16. Kumu Diri Gashshooti jeefora heeshsho hiittoota ikkitanno?

¹⁶ Kumu Diri Gashshooti jeefora heeshsho hiittoota ikkitanno? Mannu ooso cubbinna guuntete xeꞌne baꞌanno. Mannu ooso wodote widoonni cubbinsara maaro afiꞌrate huucciꞌra dihasiissannonsa; hattono mereerimu woy kakkalaanchu dihasiisanno. Qoleno ‘goofimarchu [Addaami abbino] diini reyo baꞌanno.’ Waammate giddo mitturino diheeꞌranno. Reyitinori galagalte kaꞌanno. Uullate aana heeꞌranno manni baalu guuta ikkanno.—1 Qor. 15:25, 26.

17-18. (a) Kumu Diri Gashshooti jeefora mayi ikkanno? (b) Yesuusi moote ikke gashshanno yanna gooffuro maa assanno? (1 Qorontoosi 15:24, 28) (Misileno lai.)

¹⁷ Kumu Diri Gashshooti jeefora woluri mayi ikkanno? Hatte yannara mittu lowo geya baxxino coyi ikkanno. Yihowa suꞌmi qullaambe daafira kaꞌino xaꞌmo dawaro afidhanno. Ma garinni? Sheexaanu Edenete kaashshu basera, Yihowa kaphaanchonna mannu ooso baxillunni gashshannokkihu gede asse coyiꞌrino. Hatte yannanni kayise Yihowa ayirranno gede assanno manni suꞌmisi qullaawa ikkanno gede assanni keeshshino. Hakko daafira, Kumu Diri Gashshooti jeefora Yihowa, isi baxillaancho iimi Annanke ikkinoti woꞌmunni woꞌma xabbe leeltanno gede assanno.

¹⁸ Jeefote Sheexaanu kaphi xawo fulanno. Yesuusi moote ikke gashshanno yanna gooffanno woyite ma assanno? Sheexaanu lawishsha haꞌrunse Yihowara finqila ikka? Hatto diassanno! (1 Qorontoosi 15:24, 28 nabbawi.) Yesuusi Gashshoote Annisira qolanno. Isi Yihowa gashshootira maahoyye yee galanno. Addanko, Sheexaanu gede ikkikkinni Yesuusi Yihowa baxanno daafira umisi fajjonni baalanka coye aguranno.

19. Yesuusi Yihowa suꞌma mageeshshi geya baxanno?

¹⁹ Yihowa Yesuusira suꞌmasi aasi dhagge diꞌꞌikkitannonke! Yesuusi guutu garinni Annasi riqiwannoha ikkasi leellishino. Ikkina Yesuusi Yihowa suꞌma mageeshshi geya baxanno? Isi Yihowa suꞌma baalunku coyinni roorsiꞌranno. Isi Yihowa suꞌmira yee reyate maahoyye yiino; hattono Kumu Diri Gashshooti jeefora umisi fajjonni baalanka coye Yihowara qolanno. Yesuusi lawishsha haꞌrunsa dandiineemmohu hiittoonniiti? Aane noo birxichira tenne xaꞌmora dawaro qollanni.