“Magansidhinanniha . . . Doodhe”

1. Addu hagiirre afiꞌrate maa assa hasiissannonke? Mayira? (Isayaasi 48:17, 18)

IIMI Anninke lowo geeshsha baxannonke; isi xaano ikko albillitte hagiirru noo heeshsho heeꞌnammora hasiꞌranno. (Ros. 3:12, 13) Isi dhagge ikkitanno dandoo oye kalaqinonke; kayinni haꞌrinshonke uminke qineessiꞌneemmo gede woy garanna gara ikkinokkire uminke doodhineemmo gede asse dikalaqinonke. (Ros. 8:9; Erm. 10:23) Yihowa addu hagiirre afiꞌrate isira soqqamanna biddishshisi garinni heeꞌra hasiissannonketa afino.—Isayaasi 48:17, 18 nabbawi.

2. Sheexaanu mayine ammannammora hasiꞌranno? Yihowa kayinni ma assino?

² Sheexaanu Yihowara soqqammummokkinni hagiirraamma ikka dandiineemmo hattono mannu ooso uminsa umonsa gashshituro qinaannonsa yine ammannammora hasiꞌranno. (Kal. 3:4, 5) Yihowa finqilu manni mite yanna geeshsha uminsa umonsa gashshanno gede fajje tenne kaphu kissera dawaro qolino. Mannu gashshooti qinaannokkiti xabbe leeltino. Ikkirono, Qullaawa Borro Yihowara soqqame harshammi yee heeꞌrinohu batinyu labballinna meenti xagge kultanno. Insa giddo mittu Yesuusi Kiristoosiiti. Hanni balanxe Yesuusi Yihowara soqqama doodhinohu mayiraatiro laꞌno. Hakkiinni iimi Annanke magansiꞌra hasiissannonkehu mayiraatiro xiinxallineemmo. Jeefote, Yihowara soqqama doodhineemmo gede assinonkeha mito korkaata laꞌneemmo.

YESUUSI YIHOWARA SOQQAMA DOODHINOHU MAYIRAATI?

3. Sheexaanu Yesuusi ma assanno gede kulinosi? Yesuusi maa assa doodhino?

³ Yesuusi uullate aana noo yannara ayera soqqamannoro doodha hasiissinosi. Yesuusi cuuamihunni shiima yanna gedensaanni Sheexaanu fonqolinosi; isi mitte hige kumbuulisiro alamete gashshoote baala aannosita kulinosi. Yesuusi kayinni togo yee qolino: “Koo Sheexaane anewiinni fafi! ‘Maganokki Yihowa calla magansiꞌri; qullaawa soqqanshono isira calla shiqishiꞌri’ yine borreessinoonnina.” (Mat. 4:8-10) Yesuusi konne doorsha doodhinohu mayiraati? Hanni mito korkaata laꞌno.

4-5. Yesuusi Yihowara soqqama doodhanno gede assinosihu mitu korkaati maati?

⁴ Yesuusi Yihowara soqqama doodhanno gede assinosihu qaru korkaati baxilleho; isi Annasi lubbora baxanno. (Yoh. 14:31) Qoleno Yesuusi Yihowara soqqama doodhinohu hatto assa hasiissannota ikkitino daafiraati. (Yoh. 8:28, 29; Aju. 4:11) Isi Yihowa heeshshote Buicho ikkinota hattono addaxxinannihanna shaqqado ikkinota afino. (Far. 33:4; 36:9; Yai. 1:17) Yihowa woꞌmanka woyite Yesuusira halaale ikkinore kulinosi; qoleno noosire baalankare uyinosihu isooti. (Yoh. 1:14) Sheexaanu mannu oosora kayinni reyo abbino. Isi hafuuraamohonna umosi calla baxanno kaphaanchooti. (Yoh. 8:44) Yesuusi tenne afino daafira Sheexaanu lawishsha haꞌrunse Yihowara finqilate heda nafa dihedino.—Fil. 2:5-8.

⁵ Yesuusi Yihowara soqqama doodhanno gede assinosihu wolu korkaati, isi ammaname soqqamasi abbitanno guma balaxe hedasiiti. (Ibi. 12:2) Isi ammanaminoha ikke heeꞌriro Annisi suꞌmi qullaawannotanna Daawuloosi mannu oosora abbino shetto woꞌmunni woꞌma baꞌannota afino.

YIHOWA MAGANSIꞌRA HASIISSANNONKEHU MAYIRAATI?

6-7. Xaa yannara batinyu manni Yihowa magansiꞌrannokkihu mayiraati? Kayinni iso magansiꞌra hasiissannonkehu mayiraati?

⁶ Xaa yannara batinyu manni Yihowa magansiꞌrannokkihu isita baxissanno akatta afinokki daafiraati; hattono isi insara assinonsaha baalanka coye huwattinokkihuraati. Ateenaho heeꞌrinohu soqqamaasinchu Phaawuloosi sabbakkino mannino tenne dihuwatino.—Soq. 17:19, 20, 30, 34.

⁷ Phaawuloosi macciishshanni noo mannira, “mannu baalunkura heeshshonna foole hattono duuchankare aannohu Magano” ikkinota xawisino. Isi lede, “heeshsho afiꞌnoommohu, milli yineemmohunna heeꞌneemmohu isinniiti” yiino. Maganu Kalaqaanchoho; “mannu gaꞌre baalanta mittu manchiwiinni kalaqino;” hakko daafira iso magansiꞌra hasiissannonke.—Soq. 17:25, 26, 28.

8. Yihowa horo assannokki coyi maati? Xawisi.

⁸ Yihowa Kalaqaanchonna kalqe alamera Aliidiha ikkino daafira mannu iso magansiꞌranno gede giddeessa dandaanno. Ikkirono Yihowa horo hatto diassanno. Hatteentenni isi nooha ikkinotanna ninke mitto mittonka lubbora baxannonketa leellishshanno taje qixxeessino. Isi dandaami deerrinni batinyu manni hegerera jaallasi ikkara hasiꞌranno. (1 Xim. 2:3, 4) Hakko daafira Yihowa wolootaho isi hedinori daafira rosiinseemmo gedenna mannu oosora assannoha dancha coye kulleemmonsa gede qajeelsinonke. (Mat. 10:11-13; 28:19, 20) Isi songote deerrinni qineessinonke hattono baxillunni towaattannonkere aliidi laꞌꞌaano uyinonke.—Soq. 20:28.

9. Yihowa baxilli leellinohu hiittoonniiti?

⁹ Yihowa isi noota ammanannokki manna towaatanno gari isiha dhagge ikkanno baxille leellishanno. Hanni tenne hedi: Lowo diro lowo biliyoone ikkanno manni garanna gara ikkinokki coyi daafira uminsa biddishsha haꞌrunsanni keeshshino. Ikkirono Yihowa heeshshote hasiisannonsarenna hagiidhitanno gede assannonsare shaqqillunni uyinonsa. (Mat. 5:44, 45; Soq. 14:16, 17) Isi insara mimmito baxate, ooso ile lossiꞌratenna diinaggaabbe loosse dancha guma afiꞌrate dandoo uyinonsa. (Far. 127:3; Ros. 2:24) Tini Yihowa baalanta mannu ooso baxannota leellishshanno. (Ful. 34:6) Hanni Yihowara soqqama doodhineemmo gede assinonkeha mito korkaatanna isi maassiꞌrinonke gara laꞌno.

YIHOWARA SOQQAMA DOODHINOOMMOHU MAYIRAATI?

10. (a) Yihowara soqqammeemmo gede assannonkehu qaru korkaati maati? (Maatewoosi 22:37) (b) Yihowa cinca kaaꞌlitinohehu hiittoonniiti? (Faarso 103:13, 14)

¹⁰ Yihowara soqqammeemmohu qaru korkaati Yesuusi gede Iso lubbora banxeemmo daafiraati. (Maatewoosi 22:37 nabbawi.) Yihowa akatta daafira ronseemmo woyite isiwa shinqeemmo. Hanni lawishshaho, Yihowa cincinonke gara laꞌno. Israeelete daga isira hajajama gibbuta isi, “hadhanni noo doogonninna loossanni noo bunshewiinni higganno gede” huuccinonsa. (Erm. 18:11) Yihowa guuntete xeꞌne noonkerenna bushsha ikkinoommota qaaganno. (Faarso 103:13, 14 nabbawi.) Yihowa cincanna wole baxissanno akattasi daafira hiincakki isira hegerera soqqamatto gede dikakkayissannohe?

11. Iimi Anninkera soqqama doodhineemmo gede assinonkehu wolu korkaati maati?

¹¹ Qoleno Yihowara soqqama doodhinoommohu togo assa hasiissannota ikkitino daafiraati. (Mat. 4:10) Hakkiinni saeno ammanamme soqqammeemmo soqqansho mayi guma abbitannoro anfoommo. Ammanamme soqqamanke Yihowa suꞌmi qullaawanno gede, Daawuloosi kaphi xawo fulanno gedenna Anninke Yihowa wodani hagiidhanno gede assitanno. Qoleno xaa yannara Yihowara soqqama doodhineemmoha ikkiro hegerera isira soqqamate hexxo heedhannonke!—Yoh. 17:3.

12-13. Jeeninna Paami woꞌnaalshinni maa ronseemmo?

¹² Anje heeꞌnenni Yihowa lubbora baxa rosa dandiineemmo; kuni baxilli lophineemmo woyiteno lexxanni haꞌranno. Hanni lame roduuwi Jeeninna Paami lawishsha laꞌno.a Insa mitte 10 diriti mitte qolte 11 diriti heeꞌre mite yee Qullaawa Maxaafa xiinxalla hanafino. Kuri seenni anninna ama Qullaawa Maxaafa xiinxalla hasiꞌra hoogirono, Jeeninna Paami maatensa ledo beetekiristaane haꞌri geeshsha Yihowa Farciꞌraasine ledo xiinxallanno gede fajjinonsa. Jeeni togo yitino: “Yihowa Farciꞌraasine Qullaawu Maxaafinni rosiissinoeri darawoꞌya jingilli assitanno xagga adheemma gedenna amanyoote bainore asseemma gede xixxiibbannoeta dandee saeemma gede kaaꞌlinoe.”

¹³ Boodu diri gedensaanni lamenti seenni halashshaano ikkino. Gedensoonni insa geedhino annanna amansa towaaxxanni heeꞌrenni suwisaano ikkino. Jeeni hakkawarita qaagge togo yitino: “Yihowa jaallasi ammaname towaatannotanna 2 Ximootewoosi 2:19 yitannonte gede, ‘Yihowa isire ikkitinore afinota’ umiꞌya heeshshonni laoomma.” Yihowa iso baxanna isira soqqama doodhitannore towaatannoti dihuluullissannote!

14. Coyiꞌneemmorinninna assineemmorinni Yihowa suꞌmi mishamannokki gede kaaꞌla dandiineemmohu hiittoonniiti? (Misillano lai.)

¹⁴ Yihowa suꞌmi mishamannokki gede kaaꞌla hasiꞌneemmo. Hanni danchu, shaqqadunna maarannohu muli jaali noohe yine hendo. Mitto barra mittu manchi jaalakki kaajjadohonna kaphaanchoho yaanna macciishshitto. Hakka woyite maa assatto? Isira halamatto. Hatteente gede Sheexaanunna isi wido ikkino manni kapho tareesse Yihowa suꞌma hunate woꞌnaalanno woyite, isi daafira halaale kulle suꞌmisira halammeemmo. (Far. 34:1; Isa. 43:10) Coyiꞌneemmorinninna assineemmorinni woꞌma lubbonkenni isira soqqama hasiꞌneemmota leellinsheemmo.

15. Soqqamaasincho Phaawuloosi mixosi biddi assiꞌrasi kaaꞌlitinosihu hiittoonniiti? (Filiphisiyusi 3:7, 8)

¹⁵ Yihowa hagiirsiisanno garinni soqqamate woy isira albinni roore soqqamate uminke fajjonni mixonke biddi assiꞌneemmo. Lawishshaho, soqqamaasinchu Phaawuloosi dagoomisi giddo noosiha ayirrado bayicho agure Kiristoosi haꞌrunsaancho ikkanna Yihowara soqqama doodhino. (Gal. 1:14) Tini hagiirru noo heeshsho heeꞌranno gedenna iima Kiristoosi ledo gashshate qoosso afiꞌranno gede assitinosi. Isi Yihowara soqqama doodhasinni horo digaabbino; ninkeno horo digaabbineemmo.—Filiphisiyusi 3:7, 8 nabbawi.

16. Juuliya woꞌnaalshinni maa ronseemmo? (Misillano lai.)

¹⁶ Yihowara soqqama illachinsheemmoha ikkiro xaano ikko albillitte hagiirru noo heeshsho heeꞌneemmo. Hanni Juuliya yinanni rodoo woꞌnaalsha laꞌno. Juuliya halaale rossara albaanni anjesenni hanaffe mitte beetekiristaane giddo faarso faarsitanno. Ise dancha gede faarsitanno daafira egennantino sirbaancho ikkitanno gede qajeelsinise. Mulenni Juuliya maccata ikkitu; hattono egennaminohu addi addi bayicho sirba hanaffu. Ise egennaminohu muuziiqu rosi mine rossanni heedheenna ledose rosannohu Maganu daafira kula hanafise; hattono Maganu suꞌmi Yihowa ikkinota kulise. Mulenni Juuliya lamalate giddo lame higge Qullaawa Maxaafa xiinxalla hanaffu. Gedensoonni ise sirbaancho ikkantenni heeshshose woꞌmatenni Yihowara soqqamate murcidhino. Tenne doodha shota diꞌꞌikkitinose. Ise togo yitino: “Lowo manni dandookki mulla huꞌnitanni nootta yaannoe; ani kayinni heeshshoꞌya woꞌmatenni Yihowara soqqama hasiꞌroomma.” Ise 30 diri albaanni doodhitinohu konni doorshi daafira mayi macciishshamannose? Ise, “Giddiidi keere afiꞌroomma; Yihowa albillitte wodaniꞌya halcho baala wonshannoeta addaxxeemma” yitino.—Far. 145:16.

YIHOWARA SOQQAMA AGURTINOONTE

17. (a)Yihowara soqqama doodhitinokkiri maa assa hasiissannonsa? Mayira? (b)Yihowara soqqama doodhitinori affino coyi maati?

¹⁷ Heeꞌnoommohu goofimarchu yanna giddooti. Soqqamaasinchu Phaawuloosi “Daannohu shiima yanna gedensaanni daanno; dikeeshshanno” yee borreessino. (Ibi. 10:37) Tini ma assineemmo gede assitannonke? Yihowara soqqama doodhinokki manni isira soqqama doodhate gattinonsa yanna shiimate; hakko daafira insa rakke qaafo adha hasiissannonsa. (1 Qor. 7:29) Qoleno Yihowara soqqama doodhinoommoha ikkiro, iillannonke qarra dandiine saꞌꞌa hasiissannonketanna kuni qarri ‘keeshshannohu shiima yanna calla’ ikkinota anfoommo.

18. Yihowanna Yesuusi ma assinammora hasidhanno?

¹⁸ Yesuusi rosaanosi iso haꞌrunsa hanaffanno gede calla ikkikkinni agurtukkinni haꞌrunsitannosi gede kulinonsa. (Mat. 16:24) Hakko daafira Yihowara lowo diro soqqammoommoha ikkiro agurrummokki soqqamate murciꞌra hasiissannonke. Isira soqqamate eꞌnoommo qaali garinni heeꞌrate sharrama hasiissannonke. Tenne assa shota diꞌꞌikkitino; ikkirono xa nafa lowo atootenna harshammo afiꞌne hagiidha dandiineemmo!—Far. 35:27.

19. Jiini woꞌnaalshinni maa ronseemmo?

¹⁹ Mitootu Yihowara soqqamate lowore agura hasiissanno yite heddanno. Ati wedellichahoro Yihowara soqqamittoro gate baꞌꞌannoheri nooha lawannohe? Jiini yinannihu mittu wedellichu rodii togo yiino: “Yihowa Farciꞌraasincho ikka furro fuuqqo hooltannohu gede asse hedeemmo. Batinye darawoꞌya insa insanaawa gamba yite yanna sayissanni, baxillu jaalooma kalaqidhanni woy finqille noota viidiyote geeme godoꞌlitanni hagiidhitanno; ani kayinni roore yanna gudeemmohu gambooshshenna soqqansho haꞌranniiti yee hedeemmo.” Togo yee heda Jiini gawajjitinosihu hiittoonniiti? Isi togo yiino: “Lamu gari heeshsho heeꞌra hanafoommo; qoleno tini mito geeshsha hagiirsiissinoe. Kayinni tini geedote hagiirre afiꞌreemmo gede diassitinoe. Facci asse aguroommoha Qullaawu Maxaafi halaale galagale heda hanafummo; hattono woꞌmu wodaniꞌyanni Yihowara soqqamate murciꞌroommo. Hatte yannanni hanafe Yihowa huuccattoꞌya baalate dawaro qolinoe.”

20. Maa assate murciꞌra hasiissannonke?

²⁰ Faarsaanchu Yihowara togo yee faarsino: “Ati dooroottohura, Qullaawa Darga heeꞌrara woshshoottosihura tashshi yoosi.” (Far. 65:4) Ninkeno woꞌmanka woyite Iyyaasu yiinota yaate murciꞌno; isi, “Aninna miniꞌya manni kayinni Kaaliiqa magansiꞌneemmo” yiino.—Iya. 24:15.