Kaameela Kadonso Aguro?

Aterano togoori tuncu yiinohe? Hatto ikkiro, kaameela kada woy agura doodhatto gede mayi kaaꞌlannohe?

Mite gobbara kaameela kaddanno geerri kaameela kadate fajjonsa haaroonsiꞌra hasidhuro, akimete minira marte fayyimmansa laisiisidheenna akimichu fajja hasiissanno. Togoo gobbara heeꞌranno Kiristaani gashshootu fushshino seera ayirrisanno. (Rom. 13:1) Heeꞌratto gobba ikkitutano ikkituro kaameela kadate dandookki layiꞌrattoti addi addi doogga no.

KAAMEELA KADATTO GARA LAYIꞌRI

Mitte geerru daafira xiinxallitanno dirijjite geerru insaneeto aante noo xaꞌmuwa xaꞌmanno gede jawaachishshanno:

• Doogote worroonni malaatta nabbawa woy hashsha xunse laꞌꞌa qarrissannoe?

• Haxo wirri yee kaameelunnita badhiidi hincilaallo laꞌꞌate dandooꞌya hooganni noommo ikka?

• Kaameelaho nadaaje uyinanniricho kadoommowiinni lekkaꞌya rahe kayise fireene amada qarra ikkitinoe?

• Kaameela lowo geeshsha sunuutunni kadanni badheenni daannohura doogo cufeemmo?

• Muli yannara kaameela kadanna dano iillite hoogginoe woyiti no? Woy mitirira masse gananna kaameeliꞌya xenfeꞌe yiino woy bibbicamino?

• Kaameela kadeemmo gara lae tiraafiikichu uurrise egenninoe?

• Kaameela kadanni heeꞌre muge egennoommo?

• Garunni kadeemmokki gede assitaera dandiitannoti adhanni noommo xagga no?

• Kaameela kadeemmo gari yaachishinonsata maateꞌya miilla woy jaallaꞌya kulte egentinoe?

Kuri xaꞌmuwa giddo mittete woy lamete “ee” yite qoloottoha ikkiro, mitore biddi assiꞌra hasiissannoheha ikkara dandaanno. Lawishshaho, kaameela hakko iso hashsha kada shaashsha hasiissannoheha ikkara dandaanno. Kadatto gara ganyite layiꞌri. Maatekki miilla woy jaalakki kaameela kadatto gara lainohunni mayi macciishshamannosiro xaꞌma dandaatto. Woy kaameela qorophine kandanni gara rosiinsanni roso rosa dandaatto. Ikkollana aleenni noo xaꞌmuwara roorete “ee” yite qoloottoha ikkiro, tini kaameela kada agurate maltino yanna ikkitara dandiitanno.a

QULLAAWU MAXAAFIHA XINTU SEERA HAꞌRUNSI

Kaameela kadate dandoonke ajjanni hadhanni noota huwata hoongammora dandiineemmo. Kaameela kada agurate daafira hasaawa baxisa hooggahera dandiitanno. Ikkina, nootto gara seekkite layiꞌratto gedenna dancha doorsha doodhatto gede kaaꞌlannohehu Qullaawu Maxaafihu xintu seeri hiikkonneeti? Hanni lame laꞌno.

Dhukakki afoottoha ikki. (Law. 11:2) Geedhineemmo woyite illenkenna maccanke dunkitanno; wolqanke shaqqitanno; qarummankeno ajjanno. Lawishshaho, lowo manni shiimurinni gawajjamara dandaannota afino daafira, jawooꞌmanno woyite mitu gari ispoorte aguranno. Kaameela kadano hattooti. Dhukasi afino manchi kaameela kadasi qarra abbitannositi leeltusiro kada agura doodhanno. (Law. 22:3) Qoleno dhukasi afino manchi wolootu isiri yaachishinonsata kultannosi woyite macciishshe adhanno.—2 Saamueeli 21:15-17 ledo heewisiisi.

Mundeete shedi heeꞌrannohekki gede qorophi. (Mar. 22:8) Kaameelu qorophine kada hoongiro lowo geeshsha gawajjanno. Mittu manchi dandoosi albite geeshshita ikkitinokkita afanni heeꞌrenni kaameela kadannoha ikkiro, isitano wolu manni heeshshono gawajjara dandaanno. Konni garinni danotenni lubbo shiinoha ikkiro mundeete shedira xaꞌmamara dandaanno.

Kaameela kadattoro woy kada agurattoro doodha qarra ikkitinoheha ikkiro, kada agurummoro mannu ayirrisa agurannoe yite yaaddooti. Baxissanno akatta nooheha lawishshaho, dhukakki afoottoha, umokki heeshshi assattohanna wolootaho hedattoha ikkootto daafira Yihowa baxannohe. Qoleno isi irkisaheranna sheshifachishahera qaale eino. (Isa. 46:4) Isi horontanni diagurannohe. Hakko daafira, kaameela kadattoronna agurattoro doodhatto woyite hayyonna wodancha oye kaaꞌlannohe gede huuccatto assiꞌri.