Woloota Towaaxxitinanni Woyite Hagiirriꞌne Baoonke

1-2. Yihowa woloota towaattannore ma garinni laꞌꞌanno? (Lawishsha 19:17) (Misillano lai.)

KOORIYAHO heeꞌrannohu Jiini Yeeli yinanni rodii togo yiino: “Aninna minaamaꞌya adhammummonkunni 32 diro saꞌꞌannonke. Minaamaꞌya dhiwanteenna towaaxxa hanafummonku 5 diro saꞌꞌanno. Ise Parkinseni yinannihu buutote dhibbi amadinose daafira milli yaa qarra ikkitannose. Minaamaꞌya lubbora baxeemmo hattono ise towaaxxa hagiirsiissannoe. Ise goxxannohu minenke noohu hospitaalete dhiwamino manni goxanno daallasiraati. Ani mulese goxeemmo hattono mimmitu anga amande gonxeemmo.”

² Baxatto manna lawishshaho, annakkinna amakki, galtekki, qaaqqokki woy jaalakki towaaxxitanni nootto? Hatto ikkiro, insa towaaxxate qoosso afiꞌrootto daafira hagiidhattoti dihuluullissannote. Qoleno baxatto manna towaatatto woyite Yihowara galoottoha ikkakki leellishatto. (1 Xi. 5:4, 8; Yaq. 1:27) Ikkirono duucha woyite wolootu affinokki qarri iillannohe. Mito woyite, qarru iillanni noohehu ate calla ikkoottohu gede assite nafa hedattora dandaatto. Mannu ledo nootto woyite hagiirraamo lawattora callu nootto woyite kayinni hindiiddo qalxitannoheha ikkara dandaanno. (Fa. 6:6) Iillanni noohere wolootu afa hooggara dandiitanno; Yihowa kayinni woꞌmanka woyite afanno. (Fulo 3:7 ledo heewisiisi.) Yihowa hindiiddokkinna assattore horo dihawanno. (Fa. 56:8; 126:5) Isi baxatto manna kaaꞌlate assattore baala afanno. Yihowa insara assattore isira liqiissoottohu gede asse kiiranno; hattono qole baatannoheta kule qaale eino.—Lawishsha 19:17 nabbawi.

3. Abirihaaminna Saara Taara towaaxxanni noo yannara qarra ikkannori may iillinonsaha ikkara dandaanno?

³ Qullaawu Maxaafi woloota towaatino mannita batinye xagge kulanno. Hanni Abirihaaminna Saara lawishsha laꞌno. Insa Uuri kataminni fuli yannara anninsara Taarara 200 diri balla ikkannosi. Ikkirono Taara insa ledo haꞌrino. Insa Kaaraani iillate 960 kiilo meetire hadhino. (Kal. 11:31, 32) Abirihaaminna Saara Taara baxxannoti dihuluullissannote; kayinni roorenkanni hadhanni doogote noo yannara iso towaata mageeshshi geeshsha qarra ikkitannonsaro hanni hedi. Insa hadhinohu gaala woy harre guluffe ikkara dandaanno; tini qolte geedhinohu Taarara lowo geeshsha qarra ikkitasira dandiitanno. Abirihaaminna Saara lowo geeshsha daafurtinohu gede assite heddinoha ikkiro tini nooreentilla. Insara macciishshaminonsari ikkireno ikkiro Yihowa hasiissannonsa jawaante uyinonsati dihuluullissannote. Yihowa Abirihaaminna Saara kaaꞌlinte gede ateno jawaachishannohe hattono kaaꞌlannohe.—Fa. 55:22.

4. Konni birxichira maa ronseemmo?

⁴ Hagiirru banxeemmo manna towaaxxineemmo woyite cincineemmo gede kaaꞌlannonke. (Law. 15:13) Mittu manchi qarru iillisirono hagiirraamo ikka dandaanno. (Yaq. 1:2, 3) Woꞌmanka woyite hagiirraamo ikka dandaattohu hiittoonniiti? Hagiirraamo ikka dandaattoti mitte doogo, Yihowa addaxxatenna dancha danchare hedatto gede kaaꞌlahera iso huucciꞌrate. Konni birxichira woloota towaaxxitannori hagiirraamma ikkite heeꞌrate assa dandiitannoha wole coye laꞌneemmo. Qoleno wolootu insa kaaꞌla dandiitanno gara ronseemmo. Hanni balanxe, woloota towaaxxitannori hagiirraamma ikkite heeꞌra hasiissannonsahu mayiraatironna hagiirrinsa baꞌꞌanno gede assara dandaannori maatiro laꞌno.

WOLOOTA TOWAAXXA HAGIIRREKKI HUNTARA DANDIITANNOHU HIITTOONNIITI?

5. Woloota towaaxxitannori hagiirrinsa baꞌꞌannokki gede assiꞌra hasiissannonsahu mayiraati?

⁵ Woloota towaaxxitannori hagiirrinsa bairo wolqa baꞌara dandiitanno. (Law. 24:10) Qoleno insa daafurtanno woyite shaqqille leellishanna danchu garinni towaata qarra ikkitansara dandiitanno. Ikkina woloota towaaxxitannorira hagiirrinsa baꞌꞌanno gede assara dandaannori maati?

6. Woloota towaatannohu mitu manni daafure quubbi yaannohu mayiraati?

⁶ Woloota towaaxxitannori daafurte quubbi yitara dandiitanno. Liya yinanni rodoo togo yitino: “Woloota towaata dancha hoshsha honsoonni barra nafa daafursitara dandiitanno. Barru jeefora duucha woyite horo wolqate yinanniri diheeꞌrannoe. Mito woyite isinni borreessine sonkoonnie sokkara nafa dawaro qola qarra ikkitannoe.” Wolootaho gari geeshsha goxa woy fooliishshiꞌra qarra ikkitannonsa. Ineesi yinanni rodoo togo yitino: “Gari geeshsha goxa qarra ikkitinoe. Duucha woyite hashsha hashsha lame saate goxummahu gedensaanni balloꞌya towaatate kaeemma. Qoleno minaanniꞌyanna ani boohaarate fula agurrummonku lowo diro ikkinonke.” Woloota towaaxxitannori mitootu woꞌma yannansa baxxanno manna towaattanni sayissanno daafira wolootu ledo yanna sayisanna uyinanninsaha tiokiraasete looso nafa adha agurtino. Hakko daafira insa callattinohunna qarru woshshaado giddo ubbinohu gede assite heddara dandiitanno.

7. Woloota towaaxxitannori mitootu insaneeto bushiishshannohu woy dadillitannohu mayraati?

⁷ Woloota towaaxxitannori insaneeto quwa saꞌe bushiishshara woy yaaddara dandiitanno. Jeesika yinanni rodoo togo yitino: “Duucha woyite annaꞌya kaaꞌlate kawiinni sainore assa hasiissannoe yee hedeemma. Mito geeshsha fooliishshiꞌreemma woyite umoꞌya calla baxoommahu gede asse hedeemma daafira aneneeto bushiisheemma.” Woloota towaaxxitannori mitootu, tini duha ikkitinonsahu gede assite heddannohuranna caaccaabbanno daafira insaneeto bushiishshanno. Wolootu baxxanno manna kaaꞌlate garire diassinoommo yite yaaddanno. Wolootu qolte caaccaabbe heedhe coyidhinori towaattanni noo mancho xissiisino daafira insaneeto bushiishshanno. (Yaq. 3:2) Mitootu towaattanno manchira dhibbu roore lexxanni haꞌranna laꞌanno woyite lowo geya yaaddanno. Barbara yinanni rodoo togo yitino: “Lowo geya qarra ikkannoe coyi giddo mittu baxeemma jaalaꞌyara barru baala dhibbu lexxanni haꞌranna laꞌꞌate.”

8. Woloota towaattannore shiimare coyiꞌne galata kaaꞌlitanno gara leellishanno woꞌnaalsha kuli.

⁸ Woloota towaaxxitannorira mitootaho assitannore naadannohu nookkiha lawannonsa. Mayira? Korkaatuno insa diinaggaabbe loossannorira woy assitannorira hakkeeshshi geya galatannonsahu dino. Shiimare coyiꞌne galata lowore kaaꞌlitara dandiitanno. (1 Te. 5:18) Meliisa yinanni rodoo togo yitino: “Mito woyite caaccaawe wiꞌleemma. Kayinni towaateemmansari ‘Assattanke coyira baalaho galanteemmohe’ yitannoe woyite lowo geeshsha hagiidheemma! Tini aananno barra insa towaatate qixxaawenna quqquxame kaeemma gede kaaꞌlitannoe.” Ahimadu yinanni rodii wolootu galattinositi kaaꞌlitinosi gara xawisino. Isinna minaamasi, insawa heedhannota minaamasi rodoo iltino beetto towaatanno; tenne beetto hawwunaatu dhibbi waadannose. Isi togo yiino: “Ise towaatate assineemmore ise woꞌmunni woꞌma huwattannokkiha ikkiro nafa, assinoommoserira galattannonke woyite woy ‘baxeemmaꞌne’ yite borreessitanno woyite lowo geya hagiidhineemmo.”

HAGIIRRIꞌNE BAꞌꞌANNOKKI GEDE ASSIꞌRA DANDIITINANNI GARA

9. Woloota towaaxxitannori dhukansa affinore ikka dandiitannohu hiittoonniiti?

⁹ Dhukaꞌne affinoonnire ikke. (Law. 11:2) Ninke baalunkura hasiꞌnoommore baala assate yannanna wolqa diheedhannonke. Hakko daafira assa dandaattorenna assa dandaattokkire badi; hattono mito woyite ‘didandeemmo’ yii. Tini soꞌro diꞌꞌikkitino! Hatto assakki dhukakki afoottoha ikkoottota leellishshanno. Wolootu kaaꞌlitannoheta kultuhero hagiirrunni maahoyye yii. Jeyi yinanni rodii togo yiino: “Mitte hinge assa dandiineemmori shiimareetilla. Assa dandiineemmokkiri noota huwatanna dhukanke anfoommore ikka hagiirrinke baꞌꞌannokki gede kaaꞌlitannonke.”

10. Woloota towaaxxitannori wodanchitannore ikka hasiissannonsahu mayraati? (Lawishsha 17:27)

¹⁰ Wodanchitinannire ikke. (Lawishsha 17:27 nabbawi.) Wodanchattoha ikkiro towaatatto manchi hanqisannohere coyiꞌriro woy assiro roore wodanaaꞌma dandaatto. Wodanchanno manchi mittu manchi mito coye assannohu mayraatiro huwatate woꞌnaalanno. Mitu buutote dhibbi mittu manchi konni albaanni assannokkire assanno gede assasira dandaanno. (Ros. 7:7) Lawishshaho, konni albaanni shaqqillunni coyiꞌrannohunna wolootaho hedanno manchi heewisamara woy nyerri yaara dandaanno. Woy konne abbeꞌꞌe konne asseꞌꞌe calla yaannoha, mishannoha woy shiimurinni hagiidhannokkiha ikkara dandaanno. Buuto dhiwamino mancho towaattanni noottoha ikkiro, dhibbisi daafira afa kaaꞌlitahera dandiitanno. Dhibbisi daafira afitto kiiro akatisi soorraminohu dhibbisinni kainohunni ikkinotanna isi togoo mancho ikkinokkita roore huwatatto.—Law. 14:29.

11. Woloota towaaxxitannori barru baala yanna gaaꞌma hasiissannonsahu lowo geeshsha hasiisanno coy hiikkonneeti? (Faarso 132:4, 5)

¹¹ Yihowa ledo nooꞌne jaalooma kaajjishiꞌrate yanna gaaꞌme. Mito woyite “roore hasiisanno coye” assate mito coye agura hasiissannoꞌne. (Fil. 1:10) Roore hasiisanno coy giddo mittu Yihowa ledo nooꞌne jaalooma kaajjishiꞌrate. Moote Daawiti Yihowa magansiꞌra balaxisiisino. (Faarso 132:4, 5 nabbawi.) Hatteente gede, kiꞌneno barru baala Qullaawu Maxaafiha mito gafa nabbawatenna huuccatto assiꞌrate yanna gaaꞌmitine roore hasiisannore balaxisiisa dandiitinanni. Eliisha yinanni rodoo togo yitino: “Huuccatto assiꞌrenna Faarsote maxaafi giddonni sheshifachishshanno qummeeshshuwa hiince hagiirriꞌya baꞌꞌannokki gede assiꞌra dandoomma. Roore kaaꞌlinoe coyi Yihowa huucciꞌrate. Yihowa wodanaaꞌmeemma gede kaaꞌlaera barru giddo duucha hige huucciꞌreemma.”

12. Woloota towaaxxitannori fayyimmansa agadhate yanna gaaꞌma hasiissannonsahu mayraati?

¹² Fayyimmaꞌne agadhate yanna gaaꞌme. Loosu batiꞌrannonsari lawishshaho woloota towaaxxitannori yanna heedhannonsakki daafira, fayyimmansa agadhate kaaꞌlannore assa qarra ikkitannonsa. Dancha sagale itanna ganyine ispoorte loosa mannimmatenna surrete fayyimmara lowo geeshsha hasiissannote. Hakko daafira fayyimmate kaaꞌlitanno sagale ittinenna ganyitine ispoorte loossine nooꞌneta shiima yanna danchu garinni horoonsiꞌrate woꞌnaalle. (Efe. 5:15, 16) Hattono dancha gede goxate woꞌnaalle. (Ros. 4:6) Goxichu surrenke haaroonsannota xiinxallo leellishshanno. Mittu fayyimmate daafira kulanno birxichira, mittu manchi dancha gede goxiro yaaddosi ajjannotanna qarru iillisirono wodanaaꞌma dandaannota kultanno hedo no. Boohaarateno mito geeshshi yanna gaaꞌma hasiissannoꞌne. (Ros. 8:15) Woloota towaattannoti mitte rodoo hagiirrise baꞌꞌannokki gede kaaꞌlinoseri maatiro coyidhanni togo yitino: “Ayyare dancha ikkitanno woyite gobba fule arrishsho giwaarate woꞌnaaleemma. Ajayi ajeenna aganunni mitte hige jaallaꞌya ledo boohaarateno pirogiraame fushshiꞌreemma.”

13. Osoꞌla dancha ikkitinohu mayiraati? (Lawishsha 17:22)

¹³ Ososhshiishannoꞌnere assate woꞌnaalle. (Lawishsha 17:22 nabbawi; Ros. 3:1, 4) Osolu manninatunna surrete fayyimmara kaaꞌlanno. Woloota towaattinanni woyite coyi kiꞌne heddinoonni gede ikka hoogara dandaanno. Kayinni caacceessannoꞌne coyi tuncu yaannoꞌne woyite haariintine osoꞌlitinanniha ikkiro, tini kalaqamino qarra dandiitine saꞌinanni gede kaaꞌlitaꞌnera dandiitanno. Qoleno towaattinanni manchi ledo osoꞌla jaaloomiꞌne kaajjanno gede assitara dandiitanno.

14. Addaxxatto jaalikkira hasaapha kaaꞌlitannohehu hiittoonniiti?

¹⁴ Addaxxatto jaalikkira hasaaphi. Hagiirraamo ikkate dandiittore baala assittorono mito woyite dadillisannori tuncu yaannohe. Togoo woyite hasaaphoottore macciishshe ateneeto bushiishatto gede assannohekkihu danchu jaalikkira hasaapha kaaꞌlitahera dandiitanno. (Law. 17:17) Isi seekke macciishshasinna jawaachishannohere coyiꞌrasi hagiirrikki baꞌꞌannokki gede kaaꞌlitahera dandiitanno.—Law. 12:25.

15. Hexxoꞌne illachisha hagiirraamma ikkitinanni gede kaaꞌlitannoꞌnehu hiittoonniiti?

¹⁵ Baxxinanni manni ledo Gannatete giddo heedhinoonnihu gede assitine hedde. Woloota towaatate loosi yannate geeshshiha ikkinotanna Yihowa manna kalaqinohu togoo looso loosara ikkinokkita qaagate woꞌnaalle. (2 Qo. 4:16-18) “Addu heeshsho” heeꞌneemmo yanna dagganni no. (1 Xi. 6:19) Baxatto manchi ledo albillitte Gannatete giddo maa assitinanniro hasaawa lowo geya hagiidhatto gede assitahera dandiitanno. (Isa. 33:24; 65:21) Hiizeri yinanni rodoo togo yitino: “Towaateemmansarira duucha woyite muli yanna giddo mitteenni uduunne gombeemmota, mitteenni dondeemmotanna mitteenni sayikile kandeemmota kuleemmansa. Reyotenni kaꞌꞌannohura banxeemmo mannira daabbo ganneemmotanna sagale qinsheemmota hasaambeemmo. Hakkiinni hexxonke daafira mitteenni Yihowa galanteemmo.”

WOLOOTA TOWAATTANNORE KAAꞌLA DANDIINEEMMO GARA

16. Songonkera noore woloota towaattannore kaaꞌla dandiineemmohu hiittoonniiti? (Misileno lai.)

¹⁶ Woloota towaaxxitannori fooliishshidhanno yanna afidhanno gede kaaꞌlensa. Songote giddo noori towaanyo hasiissannosi manchi ledo yanna sayisse woloota towaattannore kaaꞌla dandiitanno. Tini insa, fooliishshidhanno gedenna uminsara mitore assidhanno yanna afidhanno gede kaaꞌlitannonsa. (Gal. 6:2) Mite halashshaano lamalate kiiro konni garinni kaaꞌlo hasiissannonsare kaaꞌlate pirogiraame fushshidhino. Laanshaawino minaannase towaaxxitannoti Nataaliya yinanni rodoo togo yitino: “Songote giddo noohu mittu rodii lamalate giddo mitte woy lame hige daye minaanniꞌya ledo yanna sayisanno. Insa mitteenni soqqantanno, hasaabbanno hattono mitteenni filme laꞌꞌanno. Minaanniꞌya tenne yanna lowo geya baxanno; hattono tini ani umiꞌyara mitore assiꞌreemma yanna afiꞌreemma gede lawishshaho, fule milli yeemma kaaꞌlitannoe.” Mito woyite towaanyo hasiissannosihu ledo galtine, towaatannosi manchi dancha gede goxanno gede kaaꞌla dandiitinanni.

17. Songote gambooshshi yannara woloota towaattannore kaaꞌla dandiineemmohu hiittoonniiti?

¹⁷ Woloota towaattannore songote gambooshshi yannara kaaꞌlensa. Woloota towaaxxitannori songote, woradunna qoqqowu gambooshshiwa insa towaaxxitanno daafira gari geeshsha macciishsha hooggara dandiitanno. Songote giddo noori gambooshshu yanna woꞌma woy mite yanna geeshsha towaanyo hasiissannori mule ofolte insa towaattannore kaaꞌla dandiitanno. Towaantanni manchi mininni fula dandaannokkiha ikkiro, isiwa hadhe ledosi gambooshshe viidiyotenni eꞌe iso towaatanno manchi gambooshshe haꞌranno gede kaaꞌla dandaatto.

18. Woloota towaaxxitannore kaaꞌlate wolere maa assa dandiineemmo?

¹⁸ Woloota towaattannore galatte hattono insara huucce. Songote cimeeyye woloota towaattannore ganyite kaaꞌlitanno. (Law. 27:23) Heeꞌnoommo gari ikkihano ikkiro, ninke baalunku woloota towaattannore naandeemmonsatanna banxeemmonsata ganyine kula dandiineemmo. Qoleno Yihowa woꞌmanka woyite insa jawaachishannonsa gedenna hagiirrinsa baꞌꞌannokki gede kaaꞌlansara huucca dandiineemmo.—2 Qo. 1:11.

19. Quqquxamme agadhineemmo coy maati?

¹⁹ Muli yannara Yihowa xissiisiꞌre wiꞌlanno manni hindiiddo baala feyanno. Dhibbunna reyo diheedhanno. (Aju. 21:3, 4) “Naafichu bullichi gede kubbanno.” (Isa. 35:5, 6) Geedhimmatenni kainohunni daanno qarrinna dhiwantinore towaata abbitanno qarri ‘saino coye ikkanno; hattono horonta diqaanganni.’ (Isa. 65:17) Yihowa dhagge ikkitanno hexxonke agadhine heeꞌnoommote tenne yannara nafa tuge diagurannonke. Jawaante afiꞌrate woꞌmanka woyite iso addaxxineemmoha ikkiro, ‘cincatenninna hagiirrunni woꞌmunni woꞌma kaajjine uurra dandiineemmo gede’ kaaꞌlannonke.—Qol. 1:11.