‘Ayyaanaamittete Gooꞌroꞌne’ Qoꞌla Agurtinoonte

1. Mannu oosora hasiisannohu mitu coy maati? (Maatewoosi 5:3)

YIHOWA mannu oosora may hasiisannonsaro afino. Lawishshaho lubbotenni heeꞌrate sagale, uddanonna minu hasiisannonke. Kuri hasiissannonke coyibba giddonni mitto nafa shiima yanna geeshsha hoongummoro heeshsho qarra ikkitannonke. Yihowa maalaamittete hasatto calla ikkikkinni ayyaanaamittete hasattono oye kalaqinonke. (Maatewoosi 5:3 nabbawi.) Addu hagiirre afiꞌra hasiꞌnummoro tini hasatto noonketa huwatanna woꞌmanka woyte tenne hasatto wonshiꞌrate sharrama hasiissannonke.

2. “Ayyaanaamittete coye” gooꞌrate yaa mayyaatero lawishshunni kuli.

² “Ayyaanaamittete coye” gooꞌrate yaa mayyaate? Tini yaatto Girikete afiinni ayyaana afiꞌrate huucciꞌranno manna kultannote. Hanni mitto huucciꞌraancho hendo. Isi jaawinohu mitu katamu giddo doogote qaccera tattaꞌino uddano uddiꞌre hunquffi yee ofolle no. Sagale gattaawe wolqa baino; aanasi lae mannu shiqqo giwinosi; barra arrishsho hashsha qole qiidu qeqannosi. Kuni huucciꞌraanchi heeshshosi woyyaabbanno gede kaaꞌlo hasiissannosita seekke afino. Hatteente gede ayyaanaamittete coye gooꞌrino manchi yaano ayyaana afiꞌrate huucciꞌranno manchirano gooꞌrosi qoꞌlate kaaꞌlo hasiissannosi. Hakko daafira isi, Yihowa iso baxxannorira qixxeessinota falakkinota ayyaanaamittete qixxaawo horoonsiꞌrate quqquxamanno.

3. Konni birxichira maa xiinxallineemmo?

³ Konni birxichira balanxe Yesuusi kaaꞌlasera huuccidhinote Finqe gobba mancho lawishshinni maa ronseemmoro xiinxallineemmo. Tenne xaggera ayyaanaamittete gooꞌronsa qoꞌla hasidhannori lossiꞌra hasiissannosaha sase akata luphi assine kulloonni. Hakkiinni aanchine ayyaanaamittetenni gikki yitinori yaano soqqamaasinchu Pheexiroosinna Phaawuloosi hattono Moote Daawiti lawishsha ikkitinonke gara xiinxallineemmo.

LOWO GEESHSHA HASIISSANNONKETA SASE AKATTA

4. Finqe gobba mancho Yesuusi maa assasera hasidhino?

⁴ Mitto barra Finqe gobba mancho Yesuusiwa martino. Beettose “agaaninte amaddeenna shette no.” (Mat. 15:21-28) Ise guluphite kaaꞌlannose gede Yesuusa huuccidhino. Tini Finqe gobba mancho Yesuusiwa shiqqu woyte dhagge ikkitanno akatta nooseta leellishshino. Hanni kuri giddonni mite laꞌno.

5. Finqe gobba mancho hiitti akatta nooseta leellishshino? Yesuusi isera maa assino? (Misileno lai.)

⁵ Finqe gobba mancho addinta umose heeshshi assitannota ikkitinota leellishshino. Hatto yineemmohu mayraati? Korkaatuno Yesuusi ise woshshu buttuꞌlinni lawisinoha lawannore coyiꞌri woyte koffi diyitino; hakkawaro Ayhude ikkinokki manni tenne saada minensa wodha rosantinota ikkitara dandiitanno. Yesuusi hatto yiinohu ate ikkoottoro maa assatto? Xoninoe yite hedde iso kaaꞌlo xaꞌmiꞌra aguratto? Finqe gobba mancho hatto diassitino. Ise umose heeshshi assitannota calla ikkikkinni hexxo mudhitannokkita ikkaseno leellishshino. Yesuusi kaaꞌlannose gede wotto worase tenne leellishshanno. Hatto assitanno gede kakkaysinoseri maati? Yesuusira noose ammanaati. Ammanase Yesuusi dhagge ikkanno coye assanno gede kakkayissinosi. Isi daynohu “Israeelete mine baino geꞌreewira” ikkinota coyiꞌrinoha ikkirono, tenne Ayhuditte ikkitinokki mancho beettowiinni battete ayyaana fushshino.

6. Finqe gobba manchore kultanno xaggenni maa ronseemmo?

⁶ Ayyaanaamittete hasattonke wonshiꞌrate ninkeno tenne akatta lossiꞌra hasiissannonke. Umonke heeshshi assineemmore, hexxo mudhineemmokkirenna kaajjado ammana noonkere ikka hasiissannonke. Kaaꞌlannosi gede hexxo mudhikkinni Magano huucciꞌrannohu umosi heeshshi assanno mancho callaho. Qoleno Kiristoosi Yesuusira noonke ammana kaajjishiꞌranna isi rosaanosi massagate horoonsiꞌrannoha ammanaminohanna wodanaamo borojjicho addaxxa hasiissannonke. (Mat. 24:45-47) Kuri akatta noonsarira ayyaanaamittete hasatto wonsha Yihowanna Beettosi hagiirsiissannonsa. (Yaaqoobi 1:5-7 ledo heewisiisi.) Xa hanni Yihowa ayyaanaamittete sagale, uddanonna mine qixxeessannonke gara xiinxallino. Soqqamaasinchu Pheexiroosinna Phaawuloosi hattono Moote Daawiti lawishsha xiinxalline, kuri xinta ikkitinore hasiissannonke coyibba afiꞌrate assa hasiissannonkere laꞌneemmo.

PHEEXIROOSI GEDE AYYAANAAMITTETE SAGALE WOꞌMANKA WOYITE SAGAꞌLE

7. Pheexiroosira uynoonnisi loosi maati? Ikkirono isi maa assa hasiissinosi? Xawisi. (Ibiraawoota 5:14–6:1)

⁷ Hanni soqqamaasinchu Pheexiroosi lawishsha laꞌno. Yesuusi Buuramino Moote ikkinota umo huwattu Ayhudooti giddo mittu isooti; isi Yihowa mannisira ‘hegere heeshsho qaale’ itisate Yesuusa horoonsiꞌranni noota afino. (Yoh. 6:66- 68) Yesuusi reyotenni kae iimira haꞌrara albaanni Pheexiroosi “Wiliiꞌleꞌya itisi” yee hajajino. (Yoh. 21:17) Pheexiroosi hakkonne uynoonnisi looso ammaname umo fushshino; qoleno Yihowa iso horoonsiꞌre lame Qullaawu Maxaafi wido ikkitino sokka borreessiisino. Ikkollana Pheexiroosi umisino ayyaanaamittete sagale ita hasiissinosi. Lawishshaho, isi soqqamaasinchu Phaawuloosi hakkuyra albaanni qullaawu ayyaaninni borreessino sokka seekke xiinxallino. Pheexiroosi, Phaawuloosi borreessinori giddo mitu ‘huwatate qarrisannoha’ ikkinota coyiꞌrino. (2 Ph. 3:15, 16) Ikkollana isi, Yihowa Phaawuloosi borreessino sokka widoonni shiqishinoti “kaajjado sagale” alliiffattannosi gede yaano huwatannonna loosu aana hosiisanno gede kaaꞌlannosita addaxxe hexxo mudhikkinni xiinxallinoti egennantinote.—Ibiraawoota 5:14–6:1 nabbawi.

8. Maganu sokkaasinchi haaro xawaabba xawisisita Pheexiroosi maa assino?

⁸ Pheexiroosi uynoonnisi biddissira hajajame Yihowa ammanannota leellishino. Lawishshaho, Pheexiroosi Iyyoophe yinannihu malkate katamira heeꞌreenna Maganu sokkaasinchi ajuujatenni, Muse Seeri garinni battaabbino saada gorre itanno gede kulinosi. Ayhudootaho kuni biddissi biso shorodhi assannoho. Umi qara Pheexiroosi togo yee qolino: “Mooticha, horonta hatto diasseemmo; korkaatuno lagaawinorenna battaawinore horo ite diegennoommo.” Hatte yannara Sokkaasinchu, “Maganu keereensinoha ati battaawinoho yaa aguri” yee qolinosi. (Soq. 10:9-15) Xa Pheexiroosira coy leellinosi. Tenne mayinni anfeemmo? Pheexiroosi ajuuja lae kaꞌꞌanni heeꞌreennanni Ayhudicha ikkinokki manchi Qornelewoosi soynohu sasu manni daye, Pheexiroosi mare mootichansa hasaawisanno gede koysinosi. Bashshootiro Pheexiroosi Ayhudicha ikkinokki manchi minira eate horo sumuu diyaanno. Ayhudootu dagate wido ikkino manna battaawinohu gede assite laꞌanno. (Soq. 10:28, 29) Pheexiroosi kayinni Yihowa xawisinosiha haaro xawaabba hakkawoyintenni adhino. (Law. 4:18) Isi Qornelewoosiranna minisi mannira farciꞌrino; qoleno insa halaale macciishshite adhitanna, qullaawu ayyaani dirrannansa hattono cuuantanna lae hagiidhino.—Soq. 10:44-48.

9. Kaajjado ayyaanaamittete sagalera hasatto lexxitannonke gede assiꞌnummoro afiꞌneemmoti lame horo hiitteeti?

⁹ Pheexiroosi gede ado woy Maganu Qaaliha xinta ikkino halaale ganyine sagaꞌla hasiissannonke. Kaajjado ayyaanaamittete sagalera yaano hawa gede huwantannikki halaale afate noonke hasattono lexxitanno gede assiꞌra hasiissannonke. Maganu Qaale xiinxallate yanna gaaꞌmanna seekke huwatate sharrama hasiissannonke; hatto assa gaabbissannota diꞌꞌikkitino. Mayra? Hatto assinummoro ajanni ajeenna lame horo afiꞌneemmo: Umihunni, Yihowara noonke baxillinna ayirrinyi lexxanno gede assannore ronseemmo; layinkihunni qole dhagge ikkannohu iimi Anninke daafira wolootaho kulate albinni roore kakkaꞌneemmo. (Rom. 11:33; Aju. 4:11) Pheexiroosi lawishshinni ronseemmori wolurino no: Maganu Qaale huwantoommo gara biddi assinanni woyte hedonkenna assootenke baychonkonni biddi assiꞌra hasiissannonke. Ayyaanaamittetenni dancha gede sagaꞌlinanni heeꞌra dandiineemmohunna Yihowa horoonsiꞌrannonkehu hatto assineemmoha ikkiro callaati.

PHAAWULOOSI GEDE AYYAANAAMITTETE UDDANO WOꞌMANKA WOYTE UDDIDHE

10. Ayyaanaamittete uddano uddiꞌrate yaa mayyaate? (Qolaasiyaasi 3:8-10)

¹⁰ Yihowa hagiirsiisate isi qixxeessinota wole qixxaawo horoonsiꞌra yaano ayyaanaamittete uddanono uddiꞌra hasiissannonke. Hatto yaa mayyaate? Soqqamaasinchu Phaawuloosi ‘akkala mannimma mulqine tunge haaro mannimma uddiꞌra’ hasiissannonketa borreessino. (Qolaasiyaasi 3:8-10 nabbawi.) Haaro mannimma uddiꞌrate yannanna sharro hasiissanno. Hanni Phaawuloosi umisi lawishsha laꞌno. Isi Magano hagiirsiisate anjesinni kayse jawaate sharramino. (Gal. 1:14; Fil. 3:4, 5) Ikkollana isi Maganu hedinori daafira garu egenno noosikkihura, ayyaanaamittetenni tunsichu giddo heeꞌrino. Kiristoosi roso afa hoogasinna naaxxaleessa ikkasi akkala mannimma uddiꞌrinoha “booꞌnaleessa” mancho assitinosi.—1 Xi. 1:13.

11. Phaawuloosi qeeꞌlate sharrama hasiissinosi laanfe hiittenneeti? Xawisi.

¹¹ Phaawuloosi Kiristaancho ikkara albaanni hanqaaleessaho. Soqqamaasinete loosi maxaafi kulanno garinni Phaawuloosi lowo geeshsha hanqaaleessa ikkino daafira Yesuusi rosaano ‘waajjishiishatenna shaate qodhe kaino.’ (Soq. 9:1) Phaawuloosi Kiristaancho ikkihu gedensaanni konne akkala mannimma wido ikkino akata mulqe tugate lowo geeshsha sharrama hasiissinositi egennantinote. (Efe. 4:22, 31) Ikkirono, Phaawuloosiranna Barnabaasira coy kawa kaꞌaanni higinsa woyte ‘mereeronsa lowo gibbo kaꞌino.’ (Soq. 15:37-39) Kuni coy Phaawuloosi badhera qolasira dandaannoha ikkirono isi kayinni hexxo dimudhino. Isi ‘mannimmasi hulmanni’ yaano guuntete xeꞌnesi ledo sharramanni Yihowa hagiirsiissanno heeshsho heeꞌrate murciꞌrino.—1 Qo. 9:27.

12. Phaawuloosi akkala mannimma mulqe tuganno gede kaaꞌlinosiri maati?

¹² Phaawuloosi umisi wolqa addaxxinokki daafira akkala mannimma mulqe tuge haaro mannimma uddiꞌra dandiino. (Fil. 4:13) Pheexiroosi gede Phaawuloosino “Maganu aanno wolqa” addaxxino. (1 Ph. 4:11) Ikkirono Phaawuloosi hexxo mudhino woyti no. Ikkollana isi hexxo mudhanno woyte iimi Annisi assinosiha dancha coye hedanno; tini qolte woyyaawate sharrama agurannokki gede kaaꞌlitinosi.—Rom. 7:21-25.

13. Phaawuloosi faale haꞌra dandiineemmohu hiittoonniiti?

¹³ Yihowara soqqammanni keeshshinoommo diri ikki geeshshihano ikkiro, akkala mannimma mulqine tunge Yihowa aannonketa ayyaanaamittete uddano yaano haaro mannimma uddiꞌrate woꞌmanka woyte sharramme, Phaawuloosi lawishsha haꞌrunsa dandiineemmo. Mite laanfe qarrissunkero lawishshaho, hanqoho muddammeemmoha woy woloota ayirrinyu xeino garinni hasaawinsa rakkannonkeha ikkiro woyyaawa didandeemmoho yine hexxo mudha dihasiissannonke. Hatteentenni, mixonke wonshiꞌrate yaano hedonkenna assootenke woyyeessiꞌrate sharrama agura dihasiissannonke. (Rom. 12:1, 2; Efe. 4:24) Ikkollana tenne assineemmo woyte qaaga hasiissannonkehu mittu coy no: Uddano ninkera ikkitanno gede assine gowisiisiꞌra dandiineemmo; Yihowa aannota ayyaanaamittete uddano uddiꞌrate kayinni biddi yaa hasiissannonkeri ninke umonkeeti. Maganu biddissi ledo sumuu yaanno garinni heeꞌrate soorramme biddi yaa hasiissannonke yaa garankolla.

DAAWITI GEDE AYYAANAAMITTETE MININNI FULTINIKKINNI HEEDHE

14-15. Yihowa mannisira ayyaanaamittete mine qixxeessannohu hiittoonniiti? (Faarso 27:5) (Misileno lai.)

¹⁴ Addu hagiirre afiꞌrate ayyaanaamittete sagalenna ayyaanaamitte uddano calla diꞌꞌikkitannonke. Ayyaanaamittete minino hasiisannonke. Ayyaanaamittete mini maati? Konni mini giddo agarooshshe afiꞌne heeꞌrate maa assa hasiissannonke?

¹⁵ Moote Daawiti Yihowa qixxeessinohu ayyaanaamittete daasi woy mini daafira coyiꞌrino. (Faarso 27:5 nabbawi.) Yihowa ayno woy aye coyno mannisi ammanara geedote gawajjo iillishara difajjanno. Yihowa soqqamaanosi gawajjannorinni agarannonsahu hiittoonniiti? Isi mannasi gawajjate seekkinanni bagadi shuffannota coyiꞌrino. (Fa. 34:7; Isa. 54:17) Sheexaanunna halesi wolqaataamma ikkiturono, geedote gawajjo iillishshankera didandiitanno. Insa shitunkero nafa Yihowa reyotenni kayse heeshsho aannonke. (1 Qo. 15:55-57; Aju. 21:3, 4) Qoleno Yihowa yaandeemmo woyte kaaꞌlannonke; tini isira soqqama agurreemmokki gede kaaꞌlitannonke. (Law. 12:25; Mat. 6:27-29) Hakkiino sae baxillaanchu Anninke ayyaanaamittete maate wido ikkitinore kaaꞌlitannonke roduuwanna allaaltannonke cimeeyye uynonke. (Isa. 32:1, 2) Mitteenni gamba yineemmo woyte, Yihowa agarooshshinni horo afiꞌra dandiineemmo gara ronseemmo.—Ibi. 10:24, 25.

16. Yihowa Daawiti agarinosihu hiitte doogganniiti?

¹⁶ Daawiti Yihowara hajajamino daafira affanni heedhenni cubbo loossannorira iillitanno gawajjonni gatino. (Lawishsha 5:1, 2 ledo heewisiisi.) Ikkollana Daawiti Maganu seera lawashshi asse aguranno woyte Yihowa isi wixiꞌrinore mixxannokki gede digolaminosi. (2 Sa. 12:9, 10) Daawiti loosino soꞌro nookkiha qarru iillisi woytena? Huuccattotenni giddosita gudise Yihowara kuꞌlino; Yihowano Daawiti lowo geeshsha baxannositanna towaatannosita kule yaaddosinni fooliishshiishinosi.—Fa. 23:1-6.

17. Daawiti faale haꞌra dandiineemmohu hiittoonniiti?

¹⁷ Mitto doorsha doodhineemmo woyte, Yihowa amaale hasiꞌne Daawiti faale haꞌra dandiineemmo. Mito woyte qarru amadannonkehu Yihowa gola hoogeennanke ikkikkinni ninke gara ikkinokki doorsha doodhinoommo daafira ikkara dandaannota qaango. (Gal. 6:7, 8) Loonsoommo soꞌro nookkiha qarru iillannonke woyte, Yihowa wodanankenna hedonke agarannonketa addaxxine giddonketa gudinse huuccattotenni isira kuꞌla dandiineemmo.—Fil. 4:6, 7.

AYYAANAAMITTETE GOOꞌROꞌNE QOꞌLA AGURTINOONTE

18. Qarra ikkankera dandaannori maati? Woꞌmanka woyte ayyaanaamittete hasattonke wonshiꞌra dandiineemmohu hiittoonniiti? (Misillano lai.)

¹⁸ Tayxehu 2026 diru qummeeshshinke, “Ayyaanaamittete coye goodhinori hagiirraammaho” yaanno. Tini amaale bashshonni roore xa hasiissannote. Mayra? Heeꞌnoommohu ayyaanaamittete coye hasiꞌrannokkihu woy tenne hasattonsa kaphu ammaꞌno woy mannu hedo horoonsiꞌre wonshiꞌrate woꞌnaalannohu hagiirraamma ikkinokki manni batiꞌrino alameraati. Togoo manni hunannonkekki gede qoropha hasiissannonke. Ma garinni? Yihowa qixxeessinonketa ayyaanaamittete sagale sagaꞌla, haaro mannimma uddiꞌranna ayyaanaamittete mininni agarooshshe afiꞌrate sharrama hasiissannonke.