Gara Ikkitinokki Hedo Qeeꞌla Dandaatto

1-2. Soqqamaasinchu Phaawuloosira mito woyte may macciishshaminosi? Phaawuloosi lawishshi ninke kaaꞌlankera dandaanno yineemmohu mayraati? (Rooma 7:21-24)

SOQQAMAASINCHU Phaawuloosi daafira hedatto woyte may qulli yaannohe? Worba misiyoonichaati, fullahino rosiisaanchooti woy Qullaawu Maxaafiha lowo maxaafa borreessinoho yite hedattoha ikkara dandaanno. Tini garankolla. Ikkirono Phaawuloosi dadillino, hexxo mudhinonna yaadino woyti no. Ninke giddo batinye waaddannonte gede isono gara ikkitinokki hedo waaddinosi woyti no.

² Rooma 7:21-24 nabbawi. Isi Roomu Kiristaanira borreessino sokkara ninke giddo batinye waaddanno hedo waaddannosita borreessino. Phaawuloosi ammanamino Kiristaanchooti; isi Maganu fajjo assa lowo geeshsha hasiꞌrannoha ikkirono giddosi gara ikkinokkire assanno gede xixxiiwannosiri noota coyiꞌrino. Tenneno agurranna alba assinohu gara ikkinokki coyinna xa iillanni noosihu uurrannokki qarri, Phaawuloosi mito woyte busha hedo waaddannosi gede assino.

3. Konni birxichira maa ronseemmo? (Qoleno “Harancho Xawishsha” lai.)

³ Ikkirono Phaawuloosi gara ikkitinokki hedoa qeeltasira diwodhino. Konni birxichira aante noo xaꞌmuwa xiinxallineemmo: Phaawuloosi mito woyte ‘Ani qarraataamoho’ yee hedanno gede assinosiri maati? Isi gara ikkitinokki hedo qeeꞌlinohu hiittoonniiti? Ninkeno gara ikkitinokki hedo qeeꞌla dandiineemmohu ma garinniiti?

PHAAWULOOSI GARA IKKINOKKIRE HEDANNO GEDE ASSINOSIRI MAATI?

4. Phaawuloosi gara ikkinokkire hedanno gede assinosiri maati?

⁴ Alba assinori. Kiristaancho ikkara albaanni Saaooli yinannihu Phaawuloosi gedensoonni gaabbisannosire assino. Lawishshaho isi ammanaminoha Isxifaanoosi kinnatenni awwaalle shinanni gede sumuu yiino. (Soq. 7:58; 8:1) Qoleno Saaooli Kiristaana buuto xiiwanni beebba assiꞌrino.—Soq. 8:3; 26:9-11.

5. Phaawuloosi alba assinori hiikkanno gede assinosi?

⁵ Soqqamaasinchu Phaawuloosi Kiristaancho ikkihu gedensaanni alba assinore hedanni mito woyte isonooto bushiishanno. Isi bashsho Kiristaana xiiwannoha ikkino daafira lowo diri gedensaanni nafa tiiꞌꞌisi bushiishinosiha ikkara dandaanno. Lawishshaho isi 55 M.D. balla Qorontoosi Kiristaanira borreessinote umi sokkara togo yiino: “Bashsho Maganu songo waadeemmoha ikkoommo daafira, . . . soqqamaasincho ikke woshshama dihasiissannoeho.” (1 Qo. 15:9) Mitu ontu diri gedensaanni Efessooni heeꞌranno Kiristaanira borreessino sokkara “qullaawootu baalunkura woriidiha” ikkinota coyiꞌrino. (Efe. 3:8) Hattono Ximootewoosira borreessino sokkara ‘alba Magano xonannoha, mannasi buuto qarrisannohanna booꞌnaleessa’ ikkinota coyiꞌrino. (1 Xi. 1:13) Hanni Phaawuloosi mitte songo towaatanno woyte, alba waadino Kiristaaninni woy maatensanni xaadanno woyte hiitto ikkannoro hedi.

6. Phaawuloosi lowo geeshsha yaadanno gede assinosiri woluri maati? (Lekkaalliidi qaagiishshano lai.)

⁶ Maalasi qasanno uticho. Phaawuloosi, lowo geeshsha yaachishinosi coy ‘maalasi qasanno utichi’ gede ikkinota coyiꞌrino. (2 Qo. 12:7) Phaawuloosi xissiisiꞌranno gede assinosi coye bade dikulino; kayinni isi horoonsiꞌrino yaatto dhibba, lowo geeshsha yaachishinosi coyeb woy wolere ikkara dandaannota leellishshanno.

7. Phaawuloosi guuntete xeꞌne gawajjitinosihu hiittoonniiti? (Rooma 7:18, 19)

⁷ Guuntete xeꞌne. Phaawuloosi guuntete xeꞌnesi ledo sharramino. (Rooma 7:18, 19 nabbawi.) Isi gara ikkino coye assa hasiꞌrannoha ikkirono, uddiꞌrinohu shamu maali tenne assannokki gede ataawe ikkinosi. Isi maalu yortosinna gara ikkinore assate halchosi mereero woꞌmanka woyte gaaru noota ammanino. Ikkirono, Phaawuloosi gara ikkinore assate lowo geeshsha sharramino. (1 Qo. 9:27) Isi busha yorto galagalte waaddannosi woyte lowo geeshsha caaccaawannoti dihuluullissannote!

PHAAWULOOSI GARA IKKITINOKKI HEDO QEEꞌLINO GARA

8. Phaawuloosi borreessino sokka laanfesi qeeꞌlino gara leellishshannohu hiittoonniiti?

⁸ Phaawuloosi sokkasira qummi assinonte gede, isinna ammanate roduuwisi Maganu ayyaani kaaꞌlonni busha yorto gargadhanna qeeꞌla dandiitannohu hiittoonniitiro hiincino. (Rom. 8:13; Gal. 5:16, 17) Phaawuloosi Kiristaanu qeeꞌla hasiissannonsata busha akattanna yorto duucha hige qummi assino. (Gal. 5:19-21, 26) Phaawuloosi laanfesi daafira hiincinoti, Qullaawa Borro amaale hasiꞌrinotinna busha yortosi qeeꞌlate maa assa hasiissannosiro afinoti dihuluullissannote. Woloota amaalino amaale isi umisi loosu aana hosiisinoti egennantinote.

9-10. Phaawuloosi gara ikkitinokki hedo gargadhanno gede kaaꞌlinosiri maati? (Efessooni 1:7) (Misileno lai.)

⁹ Phaawuloosi hexxo mudhino woyti nooha ikkirono, dancha danchare heda dandiino. Lawishshaho isi ledosi misiyoone ikkite soqqantannori dancha mashalaqqe kultannosi woyte hagiidhanno. (2 Qo. 7:6, 7) Ammanate roduuwisiwa aanasino hagiidhanno gede assitinosi. (2 Xi. 1:4) Qoleno Yihowa hagiirsiisinota afino. Addanko, Phaawuloosi Maganoho “keeraanchu tiiꞌꞌinni” soqqama dandiino daafira hagiidhino. (2 Xi. 1:3) Isi Roomaho usurame noo yannara nafa ammanate roduuwasi “Mootichunni hagiidhe” yee jawaachishinonsa. (Fil. 4:4) Isi coyiꞌrino hedo gara ikkitinokki hedo qeeltinosi manchi coyiꞌrannota dilabbanno. Phaawuloosi busha hedo dagganni waaddannosi woyte, dancha danchare hedate sharramannoti dihuluullissannote.

¹⁰ Qoleno Phaawuloosi, wodo isi umisira uynoonni elto ikkitinota ammanino daafira, gara ikkitinokki hedo qeeꞌla dandiino. (Ga 2:20; Efessooni 1:7 nabbawi.) Konnira isi, Yihowa Yesuusi Kiristoosi widoonni gatona yaannosita addaxxa dandaanno. (Rom. 7:24, 25) Phaawuloosi alba loosino soꞌronna guuntete xeꞌne waaddusirono, Maganoho hagiirrunni ‘qullaawa soqqansho soqqama’ dandiino.—Ibi. 9:12-14.

11. Phaawuloosi lawishshi jawaachishannonke yineemmohu mayraati?

¹¹ Ninkeno Yihowa dadillinseemmokki gede Phaawuloosinte gede woꞌmanka woyte hendeemmore, assineemmorenna coyiꞌneemmore qoropha hasiissannonkeha ikkara dandaanno. Ninkeno, ‘Ani isi hiittoo qarraataamooti!’ yineemmoha ikkara dandaanno. Eliizac yinanniti 26 diro ikkannose rodoo macciishshamannoseri daafira togo yitino: “Phaawuloosira iillinosire heda jawaachishshannoe. Togoori macciishshamannoeti ane calla ikkoommakkita afaꞌya fooliishsho uytinoe. Kuni Yihowa mannisira iillannore afannota leellishannoho wole qaagiishshaati.” Ikkina busha hedo waaddunkerono Phaawuloosi gede keeraancho tiia afiꞌratenna hagiirraamma ikkate ma assa dandiineemmo?

BUSHA HEDO GARGADHA DANDIINEEMMO GARA

12. Ganyine ayyaanaamittete coye assanke gara ikkitinokki hedo gargadhate kaaꞌlitannonkehu hiittoonniiti?

¹² Ganyite ayyaanaamittete coye assi. Ganyine ayyaanaamittete coye assineemmoha ikkiro, albinni roore dancha danchare illachinsheemmo. Ayyaanaamittete coye ganyine assa fayyimmanke agadhate kaaꞌlannohu woꞌmanka woyte assineemmo coy ledo heewisiisa dandiineemmo. Dancha sagale ita, ganyine ispoorte loosanna dancha gede goxa ordu fayyimmara kaaꞌlitannonke. Hatteente gede, baalunku Maganu Qaale ganyine nabbambeemmoha, gambooshshe qixxaambe haꞌne dawaro qolleemmohanna soqqansho fulleemmoha ikkiro hagiirraamma ikkineemmo. Jawaachishannoha togoo coye assineemmoha ikkiro, busha hedo qeeꞌla dandiineemmo.—Rom. 12:11, 12.

13-14. Mito ammanamino Kiristaana ganye ayyaanaamittete coye assansa kaaꞌlitinonsahu hiittoonniiti?

¹³ Hanni Jooni yinanni rodii woꞌnaalsha laꞌno; isi 39 dirihu heeꞌreenna kaanserete dhibbi amadinosita kulloonnisi. Umi qara iso busha hedo waaddinosi. Isi, ‘Konni diriꞌyanni hiitto dhiwamummo?’ yee hedino. Hakka woyte qaaqqisira sase dirolla ikke noosi. Jooni gara ikkitinokki hedo qeeꞌlanno gede may kaaꞌlinosi? Togo yiino: “Dhibbu lowo geeshsha daafursannoeha ikkirono, maatenke woꞌmanka woyte ayyaanaamittete coye assitanno gede assate sharrameemmo. Shota ikka hoogirono baalanka gambooshshe haꞌneemmo, lamalate kiiro soqqansho fulleemmo hattono ganyine maatete magansiꞌra assiꞌneemmo.” Jooni albita qaage lede togo yiino: “Umi qara lowonta mansoommo; kayinni mulenni Yihowa jawaachishannonketanna baxannonketa wodanchoommo. Yihowa ane jawaachishinte gede ateno jawaachishannohe.”

¹⁴ Aleenni qummi assiniti Eliiza togo yitino: “Gambooshshe haꞌrummanna hojju xiinxallo assiꞌrumma kiiro Yihowa huuccattoꞌya macciishshannoetanna lubbora baxannoeta qaageemma. Tini hagiirsiissannoe.” Afirikaho woradu aliidi laꞌꞌaancho ikke soqqamannohu Nolaani yinanni rodii, isinna minaamasi Diyaani daafira coyiꞌranni togo yiino: “Hexxo mudhineemmo woyte nafa ganyine ayyaanaamittete coye assineemmo. Yihowa gara ikkinore assineemmo gede kaaꞌlanni noonketa woꞌmanka woyte buuxisannonke. Yihowa kaaꞌlannonketanna maassiꞌrannonketa qaagate woꞌnaalleemmo; isi ma garinni kaaꞌlannonkeronna maassiꞌrannonkero anfoommokkiha ikkirono tenne assannota kayinni anfoommo.”

15. Gara ikkitinokki hedo qeeꞌlate ma assa hasiissannonkeha ikkara dandaanno? Lawishsha kuli.

¹⁵ Gara ikkitinokki hedo qeeꞌlate wolereno assa hasiissannonkeha ikkara dandaanno. Hanni lawishshaho hallo dhiwinohe yine hendo. Konni dhibbinni hurate barru baala lekkatenni milli yaatenni sainore assa hasiissannoheha ikkara dandaanno. Konni dhibbi kaima afate xiinxalla woy akimete minira haꞌra nafa hasiissannohe ikkara dandiitanno. Hatteente gede gara ikkitinokki hedo qeeꞌlineemmo gara afate, Qullaawa Maxaafanna borruwanke xiinxalla hattono gikki yiino Kiristaancho nafa amaaꞌla hasiissannonkeha ikkara dandaanno. Hanni kaaꞌlitannonketa mite hedo lende laꞌno.

16. Busha hedo waaddannohe gede assannohere badde afatto gede kaaꞌlannoheri maati? (Faarso 139:1-4, 23, 24)

¹⁶ Huuccatto assidhe hasiisannohe coy daafira hedi. Moote Daawiti, Yihowa seekke egenninosita afino. Hakko daafira Daawiti yaachishshannosi hedo bade afanno gede kaaꞌlasira Yihowa huucciꞌrino. (Faarso 139:1-4, 23, 24 nabbawi.) Atino busha hedo waaddannohe gede assannohere badde afatto gedenna qeeꞌlatto gara afatto gede kaaꞌlahera Yihowa huucciꞌra dandaatto. Qoleno ateneeto aante noo xaꞌmuwa xaꞌma dandaatto. ‘Isi tini busha hedo daggannoe gede assanni noori maati? Tini hedo daggannoehu hiittoo hiittoo woyteeti? Busha hedo gargadhantenni ise calla hedeemmo?’

17. Jawaachishshanno hedo illachishatto gede kaaꞌlitannoheta hiikkuri birxichuwa xiinxalla dandaatto? (Misileno lai.)

¹⁷ Ate kaaꞌlannohe birxicho xiinxalli. Mito woyte mite Yihowa akatta daafira xiinxalla kaaꞌlitahera dandiitanno. Lawishshaho soqqamaasincho Phaawuloosi wodotenna Yihowa maaro daafira hiincasi lowo geeshsha kaaꞌlitinosi. Atino hatto assa dandaatto. Maganu maaro, gatona yaatenna ammanamino baxilli daafira xiinxallate Yihowa Farciꞌraasineta Xiinxallote Kaaꞌlitanno Borro woy wole ate afiinni qixxaawinoha Qullaawa Maxaafa xiinxallate kaaꞌlanno uduunne horoonsiꞌra dandaatto. Kaaꞌlitannohe birxichuwa afiꞌrittohu gedensaanni borreessite amaxxi. Kuri birxichuwa leeltannowa wodhi; hakkiinni busha hedo waaddannohe woyte nabbawi. Nabbawoottore loosu aana hosiisate woꞌnaali.—Fil. 4:8.

18. Mito Kiristaana kaaꞌlitinoti xiinxallote projekte hiittenneeti?

¹⁸ Aleenni kulliti Eliiza Iyyoobi xagge xiinxallitino. Ise togo yitino: “Iyyoobi ledo mitto assannoehu lowo coy no. Isira qarru aana aanaho iillinosi. Ikkirono Iyyoobi hexxo mudhe noo yannara qarru iillinosihu mayraatiro afa hoogirono kaaꞌlo afiꞌrate alba Yihowawa higa diagurino.” (Iyo. 42:1-6) Aleenni kulliti Diyaani togo yitino: “Minaanniꞌyanna ani xiinxallote pirojektenke yannara Yihowawa Shiqi (Amaaru Afoo) yaanno maxaafa xiinxallineemmo. Dora gananno manchi gananno uduunne biifisannonte gede, Yihowa quxannonke gara dhagge assiꞌnoommo. Mageeshshi geeshsha hexxo mudhinoommoro hedantenni, Yihowa quxanni noonke garanna dancha manna ikkineemmo gede assate woꞌnaalanni noo gara hendeemmo. Tini, albinni roore isiwa shinqeemmo gede assitannonke.”—Isa. 64:8.

ALBILLITTETE YANNA WOꞌMA GIDDONNI AGADHI

19. Maa addaxxa dandiineemmo?

¹⁹ Ayyaanaamittete coye ganyine assineemmoha hattono kaaꞌlitannonketi dancha xiinxallote pirogiraame noonkeha ikkirono waaddannonketi busha hedo woꞌmunni woꞌma baꞌꞌa hooggara dandiitanno. ‘Ani isi hiittoo qarraataamooti!’ yine hendeemmo woyti heeꞌrara dandaanno. Ikkirono Yihowa kaaꞌlonni dagganni waaddannonketa busha hedo ajisha dandiineemmo. Hakko daafira roore woyte keeraanchu tiiꞌꞌi heeꞌrannonketa hattono heeshshonkenni hagiirraamma ikkineemmotanna soqqanshonkenni Yihowa hagiidhannota addaxxa dandiineemmo.

20. Maa assate murciꞌrootto?

²⁰ Alba loonsoommo soꞌro, xa iillanni noonke qarri woy laanfenke annattannonkekki gede assiꞌrate murciꞌno. Yihowa kaaꞌlonni busha hedo qeeꞌla dandiineemmo. (Fa. 143:10) Danchare heda qarra ikkitannonkekki yanna quqquxamme agadhineemmo. Hatte yannara yaachishshanno hedo horo heedhannokki daafira, soodote kiiro gonxoommowiinni hagiidhinanni kaꞌneemmo; hattono baxillaanchu Maganinkera Yihowara hagiirrunni soqqammeemmo!