Yihowa Farciꞌraasine Loosinsara Woxe Afidhannohu Hiittoonniiti?

Alamete doyicho loosinkera roore anga woxe afiꞌneemmohu, Yihowa Farciꞌraasine ikkino manni uminsa hasattonni fushshanno fushshonniiti.a Gambooshshinke bayicho, woxe fushsha hasiꞌranno mannira fushshote saaxine worranni; qoleno woxe fushsha dandiinannita wole doogga webisayitenke aana Fushshote qoolira kulloonni. Woxe fushshanno manchi alamete doyicho loosinkera woy songote hajora, woy lamunkura woxe fushsha dandaanno doogga qixxeessinoonni.

Yihowa Farciꞌraasine loosse afidhanno woxi giddonni kageeshsha fushshe woy asaraate uyiyye diyinanninsa. (2 Qorontoosi 9:7) Gambooshshinkewa mutsuwaate gamba diassineemmo; qoleno ammaꞌnote soqqamaasinenke manna cuuate, madaarshaho, sargete, woy wole ammaꞌnote ledo xaadooshshe afidhino soqqanshora woxe diadhitanno. (Maatewoosi 10:7, 8) Keeke ganne hiratenni, baazaare qixxeessine, biingote godoꞌlenni, muuziiqunna sirbunni ayirrinsanni ayyaana qixxeessine, sagale worre hirranni, kaartu godoꞌlenni, woy wole togoo doogganni woxe gamba assate diwoꞌnaalleemmo; qoleno manna woxe tuggenke diyineemmo. Woxe fushshitinori ayeootiro woleho dikullanni. (Maatewoosi 6:2-4) Woxe afiꞌrate yine, webisayitenke aanano ikko borronke aana mannu egensiishsha fushshanno gede diassineemmo.

Mitte mittenti Yihowa Farciꞌraasine songo, songote gambooshshiwa aganu aganunku woxu shallago rippoorte shiqishshanno; qoleno togoo gambooshshenke mannu baalunku daa dandaanno. Fulino woxe garunni amandoonnita buuxate, mitte mittente songota woxu shallago ganyine laꞌanni (woy odiite assinanni).—2 Qorontoosi 8:20, 21.

Woxe Fushsha Dandiinanni Doogga

• Fushshote saaxine: Gambooshshu Addaraashera, Jajjabbu Gambooshshi Addaraashera woy wole gambooshshinke basera woxe woy cheeke fushshote saaxinera wora dandiinanni.

• Interneetete widoonni woxe fushsha: Duucha gobbara, “Yihowa Farciꞌraasine Loosira Woxe Fushshi” yaanno qoola horoonsidhe woxe kirediti-kaardetenni, debiiti-kaardetenni fushsha, baanki traansifere assa, woy wole togoo doogonni fushsha dandaatto.b Yihowa Farciꞌraasine giddo mitootu, tenne doogga giddo mite horoonsidhe aganu aganunku fushshitanno woxe balaxxe wodhitanno.—1 Qorontoosi 16:2.

  

• Balanxe hende uyinanni woxe: Woxe fushshate mito woyite balanxe qixxaawanna alba qolle heda, hattono higgete egenno noonsare amaaꞌla hasiissanno. Konni garinni alba qolle hedanna qixxaawa, mite gobbara giwiru widoonni kaaꞌlo afidhino. Mitootu, xaanni woy reyitu gedensaanni woxe kaaꞌlote loosira uyinanni gede dhaaꞌma dandiitanno gara huwatansa kaaꞌlitinonsa. Konni woroonni kulloonnire horoonsidhe woxe fushsha hasiꞌrattoha ikkiro, ballo heeꞌratto gobbara noota Yihowa Farciꞌraasineta sinu biiro hasaawisi:

  • baankete mine noo woxe

  • inshuraansenna xurata

  • bayichunni bayicho adhine haꞌnannikki jajja

  • akisoonenna boonda

  • dhaansa

Heeꞌratto gobbara woxe fushsha dandiinanni doogga ledde afate, “Yihowa Farciꞌraasine Loosira Woxe Fushshi” yaanno qoola lai.