Asan’ny Apostoly

6 Tamy andro zay amy zay, lafa nihamaro mpianatsy rey, le nanjary nimenimeny tamy Jiosy manao safà hebreo ty Jiosy manao safà grika, satria tsy mba nisy nikarakara ty ampela maty valy tamin-drozy eo lafa natao ty fizarà hany sanandro. 2 Farany nampikaihin’ny Apostoly 12 rey ty mpianatsy iaby, le nivolanin-drozy hoe: “Tsy mety* laha enganay ty safà-Ndranahary mba hahafahanay hizara sakafo anabo latabo eny. 3 Dikani-zay zany rahalahy, mifiliana lahilahy fito mana laza soa aminareo eo, olo feno fanahy masy sady mana fahendrea, mba hotendrè hanao an’ny raha tsy maintsy atao zay. 4 Fa zahay hifantoky amy vavaky noho fanompoa, zany hoe ty fampianara ty safà-Ndranahary. 5 Niteatean’ny mpianatsy iaby rey resakin-drozy zay, ka nifily an’ny lahilahy retoa rozy: Stefana, azy lahilahy tena nanam-pinoa noho feno fanahy masy iny, Filipo, Prokoro, Nikanora, Timona, Parmena, noho Nikoleo baka a Antiokia any, azy lasa nanaraky fivavaha jiosy iny.* 6 Le nandesin-drozy tamy apostoly rey any lahilahy rey. Ka lafa baka nivavaky ty apostoly, le nametra-tana tamin-drozy.

7 Tsy nieny niparitaky amy zay ty safà-Ndranahary, ka nihamaro biby ty isakin’ny mpianatsy ta Jerosalema any. Nimaro biby koa ty mpisoro nanjary naneky ty finoa.

8 Le tena nahazo hatò tamy Ndranahary Stefana sady nameany hery maro, ka nahavita fahagagà* noho famantara bevata tamy vahoaky eo. 9 Fe nisy lahilahy maromaro niavy hialy hevitsy tamy Stefana. Baka amy azy kaihy hoe Synagogan’ny olo Namea Fahafaha rey ty ilany, le Kyrenianina noho Aleksandrianina ty sisany. Nisy koa baka a Kilikia noho Azia any. 10 Fe tsy nahavita nanohitsy azy rozy, satria hita tamy ty raha nivolaniny hoe hendry ie sady nampean’ny fanahy masy. 11 Le nandresy lahatsy olo tambalimbaliky any rozy mba hivola hoe: “Nirenay nanivativa an’i Mosesy noho Ndranahary ie.” 12 Le nataon-drozy ze hampikoronta ty vahoaky noho ty anti-panahy noho ty mpanora-dalàna, ka niavy tampoky tamy Stefana eo rozy. Nisamborin-drozy ie, le nandesin-drozy tamy Fitsarà Anabo Jiosy any. 13 Le nanday vavolombelo mavandy rozy hivola hoe: “Lahilahy io tsy mieny mandratiraty an’ny pilasy masy toy noho ty Lalàna. 14 Renay, ohatsy, ie nivola fa hampikopaky an’ny pilasy toy zao hoe Jesosy baka a Nazareta any iny, le hanova ty fomban-draza nampitapitan’i Mosesy tamintsika rey.”

15 Le nanenty soa an’i Stefana iaby ty olo nipetraky tamy Fitsarà Anabo iny eo, ka nihitan-drozy hoe manahaky tarehin’anjely ty tarehiny.