Ty taratasy voalohany ho ahi-ty Korintianina
2 Ka lafa niavy taminareo any aho rahalahy, le tsy nampiasa safà mipoapoaky marè na niseho hoe tena hendry lafa nitory taminareo ty sekirè masi-Ndranahary. 2 Fa lafa taminareo any aho, le nitapa-kevitsy tsy hiresaky raha hafa mihintsy, laha tsy ty mikasiky an’i Jesosy Kristy noho ty namonoa azy tamy tsato-kazo eo. 3 Nalemy noho natahotsy noho nangitikitiky biby aho tamy zaho niavy taminareo any. 4 Le tsy nampiasa safàm-pahendrea maharesy lahatsy aho lafa niresaky noho nitory taminareo, fa nampiseho hoe mahery ty fanahy masy. 5 Amy zay tsy ty fahendrean’olombelo ro hahavy anareo hanam-pinoa, fa ty heri-Ndranahary.
6 Le miresaky mikasiky fahendrea amy ze olo matotsy tsika, fa tsy ty fahendrea amy zao tontolo zao eto* na ty ahin’ny mpanday aminy eo, azy fa tsy hisy sasy rey. 7 Fa ty mikasiky ty fahendrea-Ndranahary amy sekirè masy ao ro resahintsika, zany hoe fahendrea navony iny. Fa niomani-Ndranahary sandrany raha io, talohan’ny nisian’ny tontolon’olombelo, mba hahazoantsika voninahitsy. 8 Tsy nisy nahay an’ny fahendrea zay ty mpanday tamy zao tontolo zao* eto, satria laha nihain-drozy raha zay, le tsy ho nivonoan-drozy* Tompo be voninahitsy iny. 9 Fe araky ty voasoratsy hoe: “Mbo tsy nihitan’ny maso na niren’ny sofy, na nitiry tam-pon’olo ao ty raha niomani-Ndranahary ho ani-ze olo tea azy.” 10 Fa tamintsika ro nampisehoa-Ndranahary mazava soa an’ny raha rezay tamy alalan’ny fanahiny, satria ty fanahy mikaroky anatin’ny kila raha iaby, ndre ty raha laliky mikasiky a-Ndranahary aza.
11 Ia moa ty mahay mikasiky ty olo raiky laha tsy ty vatany avao? Manahaky ani-zay koa fa tsy misy mahay mikasiky a-Ndranahary, laha tsy ty fanahi-Ndranahary avao. 12 Tsy nandramby ty toe-tsaini-zao tontolo zao* tsika, fa nandramby ty fanahy baka amy Ndranahary, mba hahaizantsika ty raha namea-Ndranahary antsika satria soa fanahy ie. 13 Miresaky an’ny raha zay koa tsika, kanefa tsy mampiasa safà ampianarin’olo hendry, fa mampiasa safà ampianarin’ny fanahy. Tsy zay fa ty safà arakin’ny fanahy ro anazavantsika ty raha arakin’ny fanahy.
14 Fe ty olo arakin’ny nofotsy le tsy maneky* ani-ze raha baka amy fanahi-Ndranahary, satria hagegea raha zay aminy. Le tsy afaky hahay an’ny raha zay ie, satria ilà ty fanahi-Ndranahary lafa mandiniky an’ny raha zay. 15 Fa ty olo arakin’ny fanahy le mandiniky ty raha iaby, kanefa tsy misy olo mandiniky azy. 16 “Ia moa ro lasa mahay ty sain’i Jehovah, ka afaky mampianatsy azy?” Fa tsika mana ty sain’i Kristy.